Yowani 1
1
MAMBU MA NZAMBI AYI MBANGI YI NZAMBI
1Va thonono, Diambu dikibela, Diambu diba va kimosi ayi Nzambi ayi Diambu diawu Nzambi. 2Diambu diba va thonono va kimosi ayi Nzambi. 3Bima bioso bivangimina mu diawu, kuisi ko kima kikambu vangu mu kambu diawu mu bibioso bikivangulu. 4Mu diawu muba Luzingu. Luzingu beni luba kiezila ki batu. 5Kiezila kilembo kienzuka mu tombi vayi tombi kisia kisudika ko.
6Vaba Mutu wumosi wutumu kuidi Nzambi, dizina diandi Yowani. 7Wuyiza mu telama kimbangi ; mu telama kimbangi mu diambu di kiezila muingi batu boso bawilukila mu niandi. 8Niandi veka kasia ba kiezila ko, vayi, niandi wuyiza kaka mu telama kimbangi mu diambu di kiezila. 9Kiezila ki kiedika kiawu kioki kiyiza va ntoto, kioki kieti kienzulanga batu boso. 10Niandi diambu diyiza va ntoto ayi ntoto wuvangu mu niandi vayi ntoto wusia kunzaba ko. 11Niandi wuyiza ku tsiꞌandi vayi basi tsiꞌandi basia kuntambula ko.
12Vayi kuidi batu boso bantambula, niandi wuba vana lulendo lukitukila bana ba Nzambi ; bobo bawilukila mu dizina diandi. 13Bika sia ti bana beni mu menga voti mu luzolo lu nsuni babutukila, voti mu luzolo lu mutu vayi babutu mu luzolo lu Nzambi.
14Diambu dikituka nsuni ayi diyiza zinga va khatitsikꞌeto. Beto tumona nkembo andi ; banga nkembo wu Muana wumosi kaka wowo wuba kuidi Tata. Nkembo beni wuba wuwala mu nlemvo ayi mu kiedika.
15Yowani wuntelimina kimbangi bu katuba mu yamikina :
—Talanu mutu wawu, niandi ndiyolukila mu thangu ndilukamba : mutu wowo wunkuiza ku manima mama wundutidi munneni, bila niandi wutuama kukibela ayi minu.
16Mu diambu di fuluka ku nlemvo andi, beto boso tutambula lusakumunu va mbata lusakumunu. 17Bila Moyize niandi wuvana Mina vayi Yesu Klisto niandi wunata nlemvo ayi kiedika. 18Kadi mutu kamuenieti Nzambi ko vayi Muanꞌandi wumosi kaka widi va ndambu yi Tata, niandi wunzabikisidi.
ZITSONGOLO ZITHETI AYI ZIPHASI ZITHETI
Kimbangi ki Yowani Mbotiki
(Matayi 3.1-12 ; Malako 1.2-8 ; Luka 3.15-17)
19Vava vadi kimbangi ki Yowani mu thangu Bayuda baba ku Yelusalemi bafidisa zinganga Nzambi ayi Balevi muingi banyuvula : “ngeyo widi nani e ?”
20Buna wuba kamba kiedika mu kambu memata :
—Minu ndisi ama Klisto ko#1.20 Minkanda minkaka misonama Klisto va buangu ki Mesiya. Vayi bika ntangi kasudika ti Klisto kidi mu Kingeleki bosi Mesiya mu ki ebelewo. Klisto ayi Mesiya babeki tsundu yimosi : wusobolo kuidi Nzambi..
21Babuela kunyuvula :
—Vayi buna widi nani e ? Widi Eli ?
Wuba vutudila :
—Ndisi ama Eli ko !
Bawu babuela kunyuvula :
—Widi mbikudi e ?
Wuba vutudila :
—Nana.
22Buna babuela kunyuvula diaka :
—Vayi widi nani e ? Wutukamba muingi tubaka buvanina mvutu kuidi bobo batutumini. Mbi wuntuba mu diambu di ngeyo veka e ?
23Buna wuba kamba :
—Minu ndidi mbembo yi mutu wowo wulembo yamikina mu dikanga : luludika nzila yi Pfumu banga bu bikudila mbikudi Ezayi.
24Batu Bobo bafidusu baba mu dikabu di Bafalisi ; 25banyuvula :
—Enati wisi Klisto ko voti Eli ko, voti mbikudi ko vayi buna bila mbi wulembo botikila e ?
26Yowani wuba vutudila :
—Minu ndilembo lubotikila mu nlangu, vayi va khatitsikꞌeno vadi mutu wumosi wulukambulu zaba, 27mutu wowo wunkuiza ku manima mama, ndisi fuana ko mu nianguna minsinga mi zisapatu ziandi.
28Mambu mama ku Betani maviokila, buala buidi va disimu di nzadi Yolidani, kuna Yowani kaba botikilanga batu.
Yesu niandi Muana dimeme di Nzambi
29Mu lumbu kilanda, Yowani wumona Yesu wunkuiza kuidi niandi, buna wutuba :
—Tala, Muana dimemi di Nzambi wumbotulanga masumu ma nza. 30Niandi mutu wowo ndiluyolukila bu ndilukamba ti : “Mutu wowo wunkuiza ku manima mama wundutidi munneni bila niandi wutuama kukibela ayi minu.” 31Minu ndisia tuama kunzaba ko, vayi mu diambu kazabakana kuidi Iseli diawu minu ndilembo botikila mu nlangu.
32Yowani wutelama kimbangi bu katuba :
—Ndimona Pheve yitotukila ku Diyilu banga dibembe, yivuanda va niandi. 33Kuidi minu, ndisi kunzaba ko ; vayi mutu wowo wuthuma mu kuiza botika mu nlangu niandi wukhamba : “Va mutu wowo wela mona Pheve yikulukidi va niandi ayi yivuendi va niandi ; buna niandi mutu wela botikila mu Pheve Yinlongo.” 34Buna minu ndimona ayi nditelama kimbangi ti mutu wawu niandi muana Nzambi.
35Diaka mu lumbu kilanda, Yowani wuba diaka vana ayi minlonguki miandi miodi. 36Mu thangu kamona Yesu wumviokila vana buna wutuba :
—Tala, Muana dimemi di Nzambi.
37Minlonguki mi miodi minwa bu katuba, buna milandakana Yesu.
38Yesu bu kabaluka wuba mona balembo nlandakana. Diawu kaba yuvudila :
—A mbi luntomba e ?
Bamvutudila :
—Labi bu dinsundula Nlongi, kuevi wukala e ?
39Wuba kamba :
—Yizanu ayi malumona.
Bayenda ayi bamona va kaba nkalanga. Bakala yandi mu lumbu kina ; yiba nduka-nduka thangu yi nya yi masika.
40Andele, khomba yi Simoni Piela, wuba wumosi mu minlonguki beni miodi miomi miwa mambu ma Yowani ayi milandakana Yesu.
41Ku nzimunina, niandi wuyenda bata theti khombꞌandi Simoni, wunkamba :
—Beto tumueningi Mesiya Tsundu Mesiya Klisto.
42Buna wunnata kuidi Yesu. Yesu bu kantala, buna wunkamba :
—Ngeyo widi Simoni, muana Zonasi. Ngeyo wela tedolongo Sefasi. Tsundu Sefasi “Ditadi”.
43Mu lumbu kilanda, Yesu wukana kuenda ku Ngalili. Wumona Filipi ayi wunkamba :
—Wundandakana ! 44Filipi wuba muisi Betesayida, divula dimosi ayi Andele ayi Piela. 45Filipi wuyenda tala Natanayeli ayi wunkamba :
—Beto tumueningi mutu wowo Moyize kayolukila mu Mina ayi wowo mimbikudi miyolukila, dizina diandi Yesu, muana zozefu muisi Nazaleti.
46Natanayeli wunkamba :
—Buna ku Nazaleti kulenda kuandi totukila diambu dimboti e ?
Filipi wumvutudila :
—Yiza ayi mona.
47Yesu wumona Natanayeli wulembo yizi ku kaba, buna wutuba :
—Tala muisi Iseli wukiedika, mu niandi mukambulu mayuya.
48Natanayeli wunyuvula :
—Kuevi wunzabidi e ?
Yesu wumvutudila :
—Tuamina Filipi kiza kambi, bu vuendingi kuna tsi nti wu figi, minu ndimueningi.
49Buna Natanayeli wunkamba :
—Nlongi, ngeyo widi Muana Nzambi, widi ntinu wu Iseli.
50Yesu wumvutudila :
—Ngeyo wilukidi bu ndikembi ti ndimueningi bu vuendingi ku tsi nti wu figi e ? Wela mona mambu manneni viokila mama. 51Buna wubuela kamba :
—Bukiedika ndikulukamba, luela mona Diyilu dizibukidi ayi zimbasi zi Nzambi ziela maka ayi kuluka va muana mutu.
Currently Selected:
Yowani 1: YOM
Highlight
Share
Copy
Want to have your highlights saved across all your devices? Sign up or sign in
Nkanda wu Moyo, Nguizani Yimona ayi Minkunga
Copyright © 2002 mu dizina di Biblica, Inc.®
Yisadulu mu nsua wu Biblica, Inc.® Minsua mi tsadulu mikinzika.
Kiyombe Contemporary Version, New Testament and Psalms
Copyright © 2002 by Biblica, Inc.®
Used by permission of Biblica, Inc.®. All rights reserved worldwide.
