ULukha 20
20
Ukuthandabuza Ngamandla KaJesu
1Ngelinye ilanga kwathi efundisa abantu ethempelini, etshumayela ivangeli, abaphristi abakhulu labafundisi bomthetho, kanye labadala bebandla beza kuye. 2Bathi, “Ake usitshele ukuthi uwathatha ngaphi amandla okwenza lezizinto. Ngubani okunike amandla la?”
3Waphendula wathi, “Lami ngizalibuza umbuzo. Ngitshelani, 4ukubhaphathiza kukaJohane kwakuvela ezulwini loba ebantwini na?”
5Bahlanganisa amakhanda bathi, “Singathi, ‘Kwakuvela ezulwini,’ uzabuza athi, ‘Kungani lingazange limkholwe?’ 6Kodwa singathi, ‘Kwakuvela ebantwini,’ abantu bonke bazasikhanda ngamatshe ngoba bakholwa ukuthi uJohane wayengumphrofethi.”
7Ngakho baphendula bathi, “Kasikwazi ukuthi kwakuvela ngaphi.”
8UJesu wathi, “Lami kangizukulitshela ukuthi lezizinto ngizenza ngawaphi amandla.”
Umzekeliso Wabalimi Besivini
9Waseqhubeka ngokutshela abantu umzekeliso lo wathi: “Indoda yahlanyela isivini yasiqhatshisa abanye abalimi, yasihamba okwesikhathi eside. 10Ngesikhathi sokuvuna yathuma inceku yayo kubaqhatshi besivini ukuze bayiphe ingxenye yezithelo zesivini. Kodwa abalimi bayitshaya, bayixotsha ingaphathanga lutho. 11Yathuma enye inceku kodwa laleyo bayitshaya bayiphatha kabuhlungu, bayixotsha ingaphathanga lutho. 12Waphinda wathuma eyesithathu, bayilimaza bayiphosela phandle.
13 Umninisivini wasesithi, ‘Ngenzeni? Ngizathuma indodana yami engiyithandayo; mhlawumbe bazayihlonipha.’
14 Kodwa kwathi abaqhatshi besivini beyibona, bahlanganisa amakhanda ngaleyondaba. Bathi, ‘Le yindlalifa. Kasiyibulaleni, ilifa libe ngelethu.’ 15Basebeyikhuphela ngaphandle kwesivini, bayibulala.
Kambe umninisivini uzabathini? 16Uzakuza afike ababulale labo baqhatshi besivini, isivini leso asinike abanye abalimi.”
Abantu bathi bekuzwa lokhu bathi, “Sengathi lokhu kungaze kwafa kwenzeka!”
17UJesu wabathi nhlo, wabuza wathi, “Pho kutshoni lokho okubhalwe ukuthi:
‘Ilitshe elalahlwa ngabakhi
seliyilona ilitshe lekhoneni?’ # 20.17 AmaHubo 118.22
18 Wonke owela phezu kwalelolitshe uzachobozeka abe yizicucu, kodwa lowo eliwela phezu kwakhe uzahlifizwa.”
19Abafundisi bomthetho labaphristi abakhulu badinga indlela yokumbopha masinyane ngoba babesazi ukuthi wakhuluma umzekeliso lo eqonde bona. Kodwa babesesaba abantu.
Ukuthela KuKhesari
20Bamthumela inhloli ezazizitshaya ezithembekileyo ukuze zimgolombe. Babefisa ukumbeka icala kokunye ayengakukhuluma ukuze bamedlulisele emandleni ombusi. 21Ngakho inhloli zambuza zathi, “Mfundisi, siyazi ukuthi wena ukhuluma njalo ufundisa okuqondileyo lokuthi kawubandlululi kodwa ufundisa indlela kaNkulunkulu ngeqiniso elipheleleyo. 22Kufanele yini ukuthi sithele imithelo kuKhesari loba hatshi?”
23Wabubona ubuqili babo wathi kubo, 24“Ngitshengisani idenari. Kulomfanekiso kabani lombhalo kabani kuyo?”
Baphendula bathi, “NgokaKhesari.”
25Wathi kubo, “Ngakho nikani uKhesari okungokukaKhesari, linike uNkulunkulu okungokukaNkulunkulu.”
26Behluleka ukumbamba ngalokho akutshoyo lapho obala. Sebemangaliswe yimpendulo yakhe bathula zwi.
Ukuvuka Kwabafileyo Lokwendiselana
27Amanye amaSadusi athi kakukho ukuvuka kwabafileyo eza kuJesu elombuzo. 28Athi, “Mfundisi, uMosi wasibhalela ukuthi nxa umfowabo wendoda angafa atshiye umfazi, kodwa bengelabantwana, umfowabo kumele amngene umfelokazi ukuze azalele umfowabo abantwana. 29Manje kwakulabafowabo abayisikhombisa. Owokuqala wathatha umfazi kodwa wafa engelamntwana. 30Owesibili 31njalo lowesithathu laye wamthatha, bonke boyisikhombisa benza njalo bafa bengatshiyanga bantwana. 32Ekucineni umfazi laye wafa. 33Pho-ke, ekuvukeni kwabafileyo uzakuba ngumkabani njengoba bonke boyisikhombisa babemthethe?”
34UJesu waphendula wathi, “Abantu balesisikhathi bayathatha njalo bayendiswa. 35Kodwa labo abazabe befanele ukuba lengxenye kulesosikhathi lasekuvukeni kwabafileyo kabazukuthatha loba bendiswe, 36njalo kabasayikufa ngoba sebenjengezingilosi. Bangabantwana bakaNkulunkulu, ngoba bengabantwana bokuvuka kwabafileyo. 37Kodwa emlandweni wesixuku esasibhebha umlilo, uMosi laye wakuveza ukuthi abafileyo bayavuka, ngoba ubiza uThixo ngokuthi ‘uNkulunkulu ka-Abhrahama, uNkulunkulu ka-Isaka, loNkulunkulu kaJakhobe.’#20.37 U-Eksodasi 3.6 38KasuNkulunkulu wabafileyo, kodwa owabaphilayo, ngoba kuye bonke bayaphila.”
39Baphendula abanye abafundisi bomthetho bathi, “Utsho kahle Mfundisi!” 40Kasabanga khona owaba lesibindi sokumbuza eminye imibuzo.
UKhristu UyiNdodana Kabani Na?
41UJesu wasesithi kubo, “Kungani besithi uKhristu uyiNdodana kaDavida na? 42UDavida yena ngokwakhe uyakufakaza eNcwadini yamaHubo uthi:
‘INkosi yathi eNkosini yami:
“Hlala ngakwesokunene sami,
43 ngize ngenze izitha zakho
zibe yisinyathelo senyawo zakho.” # 20.43 AmaHubo 110.1 ’
44 UDavida umbiza athi ‘Nkosi.’ Pho angaba yindodana yakhe njani?”
Iseluleko Ngabafundisi Bomthetho
45Kwathi bonke abantu besalalele, uJesu wathi kubafundi bakhe, 46“Limukani abafundisi bomthetho. Bathanda ukuhambahamba becece ngezembatho ezinde eziphephezelayo njalo bathanda ukubingelelwa emisikeni, futhi bathatha izihlalo eziphakemeyo emasinagogweni lezindawo zabahlonitshwa emadilini. 47Bahuquluza izindlu zabafelokazi njalo bazibonakalisa ngokwenza imikhuleko emide. Abantu abanjalo bazajeziswa kabuhlungu.”
Currently Selected:
ULukha 20: BEN
Highlight
Share
Copy
Want to have your highlights saved across all your devices? Sign up or sign in
IBhayibhili Elingcwele LesiNdebele™ BEN™
© 2003, 2006, 2022 Biblica, Inc.
Lisetshenziswe ngokusemthethweni. Wonke amalungelo agodliwe emhlabeni jikelele.
Ndebele Contemporary Bible™ BEN™
Copyright © 2003, 2006, 2022 by Biblica, Inc.
Used with permission. All rights reserved worldwide.
