Keriben 13
13
XIII
O Dešutrito Šero
1Ak‐akanak ehas andri Kangeri, havi ehas andri Antioxia, varehave devleskre manuša he sikl’āribnaskre: o Barnabāšis, h’o Šimeonos, havo bučolas Kālo, h’e Kirensko Lukas, h’o Manaenos, havo bāril’as e Herodoha, phuvakre šereskreha, h’o Savlos.
2Har mangenas e Rajes, he har bokhāl’onas, o devleskro Vōd’i phend’as, Ulav mange e Barnabāšis h’e Savlos vaš e būt’i, pre havi me len vičind’om!
3Pales, kana jon bokhāl’ile he pes mangle, he thode peskre vasta pre lende, bičhade len avri.
4He jon, bičhade avri e devleskre Vōd’estar, gēle andre Seleukia, he odotar gēle pal o pāñi andro Kipros.
5Kana ehas andro Salamis, sikl’ārenas o Devleskro Lav andre biboldengre kangera. He o Janos ehas lenge har lengro telūno manuš.
6He kana pēle prek i pāñeskri phuv andro Pafos, rakle jekhe xoxāne devleskre manušes, biboldes, so bučolas Barježišis.
7Havo ehas e phuvakre bičhadeha, e Sergjeha Pavloha, havo has god’aver manuš. Gēl’as paš o Barnabāšis h’o Savlos, he kamelas te šunel e Devleskre Lava.
8O xoxāno Elimāšis (auka ehas leskro aver nav) ehas mamuj lende, he kamelas te paruvel a phuvakre bičhades kathar o pat’aviben.
9Pales o Savlos (havo bučolas mek Pavlos), pherdo e devleskre Vōd’eha, dikl’as pe leste.
10Phend’as, O tu, pherdo xoxavibnaha he bilāča būt’aha, tu Bengeskro čhāvoro so kames o bilāčipen, kames inke te band’āres o lāče Rajeskre droma?
11Ak‐akanak dikh! O Rajeskro vast ehi pre tute, aveha korro, varekana na dikheha o kham. Najekvar pēle pe leste thuv he kāl’ipen, he ǧalas pašal, he rodelas varekas, kaj te lel les vastestar.
12Pales o phuvakro bičhado, kana dikl’as so ’has kerdo, pat’alas, he phrād’as peskre jakha ke Rajeskro sikl’āriben.
13Akana o Pavlos he leskre manuša gēle avri andral o Pafos, pēle ke Perga andri Pamfilia, he o Janos gēl’as kathar lende, pēl’as pāle andri Jeruzalema.
14Kana avle andral i Perga, pēle ke Antioxia andri Pizidia, he gēle andre biboldengri kangeri sobotone, he bešte tēle.
15Pales, kana ginde o Bāro Lav, he kana ginde pal o Devleskre Manušengre būt’a, o najbāreder manuša andral e biboldengri kangeri bičhade ke lende, he phende, Tumen, manuša he phrala, te tumen avelas varehavo lav te hazden upre e manušen, vakeren!
16Pales o Pavlos ušt’il’as upre, kerelas e vasteha, phend’as, Manuša Izraelska, he tumen, have daran mre Devlestar, šunen!
17O Devel e Izraelskone manušendar l’il’as avri amāre daden, hazdiñas e manušen kana jon bešenas har aver‐themeskre andre Egiptsko phuv, he zorāl’a musaha liged’as len avri.
18Kana odova ehas duvarbiš berš, mro Devel ikerelas e dukha vaš lengro keriben andre čuči phuv.
19Kana kerd’as preko efta rata andre Xanānaskri phuv, ulad’as lenge lengri phuv.
20Pal odova diñas lenge e čhibālen štār‐šel he panǧvardeš berš aži ko Samuelis, o Devleskro Manuš.
21Pal odova kamenas šereskres. Mro Devel diñas lenge e Savlos, e Kišoskre čhāves, manušes kathar o Benjaminska. Šaj odova ehas duvarbiš berš.
22Kana Jov les l’il’as avri, hazdiñas upre e Davidos kaj t’ avel lengro šereskro, havoneske diñas kaj te prinǧārel so mro Devel kamelas, he phend’as, Me rakl’om e Davidos, e Jeseskre čhāves, manušes havo ehi pal mro jilo, he jov kerela savoro so me kamava.
23Mro Devel, pal akada manušeskro rat, har lenge phend’as, thod’as vaš o Izraelis e Ježišis, e Sast’ipnaskres.
24Kana o Janos angleder sikl’ārelas pal o bol’ipen vaš o laǧade manuša Izraelska, inke jov odoj na ’has.
25He kana o Janos kerd’as leskri būt’i, phend’as, So tumenge keren pre gōd’i kaj me som? Me na som jov. Dikhen! jek manuš avela pal ma, havoneskre tsiraxa me na som dosta lāčo, kaj len te lav tēle.
26Manuša he phrala, čhāvore e Abrahamskone ratestar, he sako manuš tumendar, havo daral mre Devlestar, tumenge ehi akadava sasto lav bičhado.
27Odola have bešen andri Jeruzalema, he lengre šereskre, have les na ǧānenas, he na ǧānenas viki e Devleskre Manušendar, have ehi ginde sako kurko, odola manuša čačārde o lava, kana les kamenas te našavel.
28He našt’i rakhenas har les te našaven, he kamenas e Pilatos, kaj te les te kerel preko.
29Kana ehas kerdo savoro, so ehas čhindo pal leste, l’ile les tēle pal o kašt, he thode les andre mūlengri xev.
30He mro Devel l’il’as les kathar o mūle.
31Dikhenas les but d’ives odola, have avle leha andral i Galilea andri Jeruzalema, have ehas leskre jakhengre maškar o manuša.
32He amen tumenge phenas o baxtāle lava, har ehas kerd’i e dadenge i sovel.
33Mro Devel pherd’as ada lava amenge, lengre čhāvorenge auka, kaj Jov hazdiñas e Ježišis upre inke jek var, har ehi čhindo andre dujto gil’i, Tu sal mro čhāvo, adadad’ives me tut kerd’om,
34Odoleske hazdiñas les kathar o mūle kaj te ñikana te na krrñovel, he phend’as k‐auka, Me dava tumenge o čāčo Davidoskro lāčiben.
35Phend’as andr’aver gil’i. Ma muk tre kamle manušes kaj te dikhel krrñipen.
36Pales, kana o Davidos kerd’as mre Devleskre būt’i, mūl’as, he thode les maškar leskre dada, he dikhelas krrñipen.
37Uva jov, haves mro Devel l’il’as upre, na dikl’as krrñipen.
38G’anen tumen, odoleske, manuša he phrala! kaj prek ada manuš ehi sikl’ārdo tumenge o mukipen e bilāče būt’endar.
39Vaš leste savore manušenge, have leske pat’an, ehi mukle savore bilāče būt’a, have tumenge n’avenas mukle e Mojžišiskre Laveha.
40Odoleske den tumenge trat’, kaj te n’avel ke tumende odova, pal soste vakeren o Devleskre Manuša.
41Dikhen! tumen, have bilāčes dikhen, he phrāven tumāre jakha! he meren! Me kerav būt’i andre tumāre d’ivesa, andre havi tumen na pat’ana, mek kana tumenge jek manuš odova phenela.
42He kana o bibolde gēle avri andral e biboldengri kangeri, o gāǧe kamenas, kaj akada lava t’aven sikl’ārde aver kurko.
43Kana o kangerakre manuša gēle pestar, but bibolde he bolde ǧanas pal o Pavlos h’o Barnabāšis, have lenge phenenas t’ačhen ke mro Devel.
44H’aver kurko avelas savoro foros jekhethāne te šunel o Devleskro Lav.
45Kana o bibolde dikle bute ǧenen, xol’ārenas pes, he vakerenas mamuj oda būt’a so vakerelas o Pavlos, he vakerde mamuj lende he mamuj mro Devel.
46Pales o Pavlos h’o Barnabāšis ačhenas buter bi‐e‐dar, he phende, Amen kamahas, kaj o Devleskro Lav t’avel vakerdo angleder tumenge; uva amen dikhas kaj odova tumen na kamen. Len tumenge pre gōd’i, kaj tumen na san dosta lāče t’aven ǧide berš beršestar. Dikhen! amen ǧas ko gāǧe.
47Auka amenge vičind’as o Raj, Me thod’om tut kaj t’aves o dud e gāǧenge, kaj t’aves ǧido až’ andro najpalūno d’ives.
48Kana adava o gāǧe šunde, hašārenas pes e Rajeske Laveha, he odola, have ehas kerde ko ǧiviben až’ andro najpalūno d’ives, pat’anas.
49He o Rajeskro Lav ehas buxl’ārdo pal savori phuv.
50Uva o bibolde xanǧārde upre e devleskre h’e čāče ǧuvl’en h’e najbāreder manušen andro foros, he kerenas preko e Pavlos h’e Barnabāšis, he trād’ine len avri andral lengri phuv.
51Akadala mārde i čik peskre tsiraxendar mamuj lende, he pēle andro Ikoniumos.
52H’o Sikl’ārde hašārenas pes e devleskre Vōd’eha.
Currently Selected:
Keriben 13: MOR1936
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1936.
