Keriben 21
21
XXI
O Bišujekto Šero
1Kana gēl’am avri lendar, phirahas pal o pāñi bibange dromeha až’andro Xōs. Pales, tajsa, gēl’am andro Rodos, he odotar gēl’am andri Patara.
2He rakl’am jek pāñengri, havi phirelas andri Fenika. Gēl’am avri pal o pāñi.
3He kana avl’am ko Kipros, mukl’am ada phuv pro bičāčo vast. Phirahas andri Siria, he avl’am pri phuv paš o Tiros, odoleske, kaj odoj kamenas te čhivrden avri, so ehas andri pāñengri.
4He rakl’am varehavonen Sikl’ārden. Bešl’am efta d’ivesa odoj, he jon phende e Pavloske preko Vōd’i, kaj te na ǧal andre Jeruzalema.
5He kana bešl’am efta d’ivesa, gēl’am avri. Gēl’am pro drom, he savore manuša ligede amen ko drom, jon, he lengre ǧuvl’a, he lengre čhāvore, aži avahas avri e forostar, he pēl’am pre čanga paš o pāñi, he mangahas pes.
6He pales, kana phend’am o jek avreste, Ačh mre Devleha, l’il’am a pāñengri, he jon gēle pāle khere.
7He pales, kana gēl’am pal o pāñi kathar o Tiros, avl’am andro Ptolemais, he phend’am e phralenge, Javen saste, he bešl’am jek d’ives maškar lende.
8He pales, tajsa, amen, e Pavloskre manuša, gēl’am avri, andri Kezaria. Gēl’am andr’ek kher, kaj bešelas o Filipos, Lāčo‐Laveskro andral o efta, he amen bešahas leha.
9He ehas les štār čhaja, biromeskre, have vakerenas so avela.
10He har bešenas but d’ivesa odoj, avl’as kathar i Judea varehavo Devleskro Manuš, so bučolas Agabūšis.
11He kana avl’as k’amende, l’il’as o Pavloskro šelo, so anelas pašal peste, he phandl’as peskre vasta he peskre prre, ha phend’as, Auka vakerel o Devleskro Vōd’i: Auka o bibolde andri Jeruzalema phandena e manušes, so anel adava šelo, he dena les andre gāǧengre vasta.
12He kana adala šund’am, amen, he jon, have odoj bešenas, mangl’am les, te na ǧal andri Jeruzalema.
13Pales phend’as o Pavlos pāle, So kamen tumen, kaj tumen roven, he phagen mro jilo? Me kamav te ǧav andri Jeruzalema, na korkoro te šaj man phanden, uva te merav vaš mre Rajeskro Ježišiskro Nav.
14He kana na kamelas, kaj amen te les ikeras, ačl’am, he phend’am, So kamel o Devel, muk t’avel.
15He pal ada d’ivesa l’il’am amāre verda, he gēl’am andri Jeruzalema.
16Gēle amentsa varehave Sikl’ārde andral i Kezaria, he ligede peha e Mnasonos, phure Sikl’ārdes kathar o Kipros, he amen kamaha te bešas andra leskro kher.
17He kana avl’am andri Jeruzalema, o phrala amen l’ile a baxtaha.
18He pales, tajsa, o Pavlos gēl’as amentsa ko Jakubos, he savore Najphureder ehas odoj.
19He kana lenge phend’as Ačhen saste, vakerd’as jek pal āver so o Devel kerd’as maškar o gāǧe peskra bāra būt’aha.
20He kana šunde, hašārde e Rajes, he phende leske, Tu dikhes, phrala, kaj ehi but dešel bibolde, have pat’an, he savore ikeren o Bāro Lav e zorāle jileha.
21He jon šunde, har tu sikl’āres savore bibolden, have ehi maškar o gāǧe, te muken e Mojžišis, he te na čhinen lengre čhāvoren andro mas, he te na ǧan pal o phurāne keribena.
22So ehi odova? O manuša čāčes perena ke peste jekhethāne, kana šunena, kaj tu avl’al adaj.
23Ker auka, har amen tuke phenas! Ehi amen štār manuša, have kerde sovel.
24Le len! he ker tut lentsa bi‐e‐mel! he potsin vaš lende, kaj te čhinen peskre bala! Auka savore ǧānena, kaj odova, so pal tute šunde, nāne či. Tu korkoro ǧas pro lāčo drom, he ikeres o Bāro Lav.
25Akanak vakeraha pal o gāǧe, have pat’an. Amen bičhad’am l’ila, he prinǧārd’am, kaj ehi lāčeder te na keren auka, uva te pes ikeren e xoxāne devlendar, h’e ratestar, he savorendar, so ehi tasade, he e lubñipnatar.
26Ak‐akanak o Pavlos l’il’as e manušen, he pales, tajsa, kerd’as pes lentsa bi‐e‐mel, he gēl’as andre kangeri te pes sikavel e manušenge, kana ehas pal o mel’ale d’ivesa, kaj te čhinen jekhe štāreprrengres vaš sako mel’alo d’ives.
27O efta d’ivesa ehas auka kerde, he kana o bibolde kathar i Azia les dikle andri kangeri, xanǧārde savore manušen, he thode peskre vasta upral leste.
28He dine viki, he phende, O Izraelskā manuša, keren vaš amende! Adava ehi o manuš, havo sikl’ārel savoren andri sako phuv mamuj o ǧene, he mamuj o Bāro Lav, he mamuj adava foros; liged’as e Junānen andri kangeri, he kerd’as adava devleskro kher mel’alo.
29Angleder jon dikhenas leha andro foros e Trofimos, Efezānos, he pēle pre gōd’i, kaj o Pavlos les liged’as andri kangeri.
30He savoro foros ehas xanǧārdo, he o manuša prastanas jekhethāne, he l’ile e Pavlos, he tsrdine les avri a kangeratar, he najekvār o vudāra ehas phandle.
31He har kamenas les te mudāren, o šereskro lurdo šund’as o lav, har savori Jeruzalema ehas xanǧārd’i.
32He najekvar l’il’as e lurden h’e šelengren, he prastalas tēle ke lende, he kana dikle e šereskres h’e lurden, ačle, he na mārde e Pavlos.
33Pales o šereskro avl’as pašal, he l’il’as les, he vičind’as te les phanden e sastrentsa, he phučl’as, Ko ehi? he So kerd’as?
34He varehave maškar o but manuša dine viki; varehave phende jek, varehave aver, he kana našt’i ǧānelas o čāčipen, odoleske kaj ehas bāre viki, vičind’as te les liǧal andro rajkāno kher.
35He har kamelas te ǧal upre andro kher, ehas ligedo e lurdendar, odoleske, kaj o manuša ehas but xanǧārde.
36He but manuša avle pal leste, he denas viki, he phende, Ker les preko!
37He kar kamenas te liǧan e Pavlos andro rajkāno kher, phend’as e šereskreske, Šaj vakerav tuha? He phend’as, G’ānes te vakeres Junānes?
38Na sal tu odova Egipt’ānos, havo angleder kerd’al xanǧārd’ipen? he na liged’al andri čuči phuv štārvardeš šel manušen, have mudāren?
39Uva o Pavlos phend’as pāle, Me som biboldo kathar o Tarzos andri Kilika, foroskro andr’ek bāro foros, he mangav tut savore mre jileha te man mukes te vakerav e manušentsa.
40He kana les mukl’as, o Pavlos terd’il’as odoj, kaj ǧas upre andro kher, he kerd’as peskre vasteha angal o manuša, he kana na vakerde, vakerd’as lentsa andri biboldengri čhib, he phend’as,
Currently Selected:
Keriben 21: MOR1936
Highlight
Share
Copy
Want to have your highlights saved across all your devices? Sign up or sign in
First published by the British and Foreign Bible Society in 1936.
