Lukéstar 16
16
1Phenél pe amalénge: Siné dek murš barvaló, isí‐da les jek upravítelos, ov‐da phenén kai xaljás o mangín e barvalé manušéskoro.
2Vikínel adavká pe slugás, phenél léske: so si adavká kai šunáv tútar? Sikáv‐ta mánge i smétka, sostár iz‐akaná naští pánda k’ovés mo uprávitelos.
3Vakerél kórkoŗo péske, o xizmetkjári: Akaná so te keráv, sóske kalél mándar mo Gospodínos (mo rai) o xizmetkjarléki? naští te xrándav, te mangávas‐bi lové sar jek dilendžís, amí ladžáv;
4Džanáv, so te keráv, ta te posreštínen man ándo kherá léngoro, kána bičhalél man na‐avrí mo Gospodínos katár o xizmetkjarléki.
5Vikínel, kídel léskere Gospodinéskere dlŭžnikén saoŗén jekhethané, akalkéske phenél: Me Gospodinéske kití trébe te des?
6Ov‐da phenél: Jek šel tjumbédes zeitíni. Vakerél léske: Le‐ta ti smétka, sígo te bešés, te pišínes: Pédeset (penínda).
7Averéske phenél: Tu‐da, kití trébe te des? Vakerél léske: Šel óka giv. Phenél: Le‐ta ti smétka thai pišín‐ta: Seksán.
8Ašarél o Gospodínos pe bilačé slugás, sóske godiavér isí thai kití godiavér isí akaná e svetóskere čhavé, pó‐godiavér isí akaná o čhavé adalké dünjáskere.
9Amí phenáv tuménge: Kazandínen‐ta tuménge amalén katár o bilačó barvalipé, ta te posreštínen tumén andé baré katunjénde, kána perén tumé katár tumarí baxt.
10Ko ándo nái‐tsiknedér pakjanó isí, ov‐da ándo pó‐baredér pakjanó isí. Ko ándo nái‐tsiknedér bilačó (bispravedlívo) isí, ov‐da ándo pó‐baredér bilačó k’oovél.
11Te nána sinjánas vérno e bilačé manginésa, káske k’oovél les túke dovérja e lačé čačuné manginésa?
12Te nána sinjánas vérno e komšískere manginésa, ko kadél tut so si toŗó?
13Khánek slúga naští služínel doné gospodén (rajén). Ja kakîidínel e jekhéske, e averéske‐da kadukhál, ja akalkés kadéxel, odolkés da nefréti kakerél, (lésa kaxál xolí). E Devlésa berabér o mangín naští služínes.
14Akaná o rašajá, but lové kai déxen, hem les šunén, hem aprasán.
15Adavká lénge phenél: Tumé ne‐li opravdínen tumén mamúi e manušénde? Amí džanél o Del tumaró vogí, sóske so si vučó e manušénge, odovká e Devléske‐da nefréti ovél.
16O zakónos thai o prorókja vakerén dži kai avél o Ivános; napálpale vakerén o aláv e Devléskoro ándo evangélje, séko manúš‐da mangél ándo thagaribé e Devléskoro zorjása andré te del.
17Amí te našávdjovel hem o nébos, hem i dünjáva, odovká pó‐lesno isí, amá te na perél oví jek kotoroŗó katár o zakónos.
18Ko mukjél pe ŗomnjá, averá‐da lel, odovká phiraibé (pirjaibé) kerél, ko akalké ŗomnjá pále lel, ov‐da phiraibé kerél.
19Siné jek manúš barvaló, sa urjavélas pes ándo rup t’ándo somnakál, diés dieséske biáv thai baró xabé kerélas.
20Siné‐da jek čoŗó manúš, o aláv léskoro o Lázaros, paš e barvaléskere vudará sa pášljovel, pherdó isí phumbaló ger
21Bare‐mangél te čaravél pes katár o pursuká (kotoroŗé maŗó) kai e barvaléskere masátar perén, amí nána del léske níko. Avén sar avén o džuklé, čaŗén o phumb léskoro.
22Uló so uló, o dilendžís muló, e angeljéntsa‐da ándo nébos uxtávdjovel. O barvaló ov‐da muló, uxljél, ándo bengéskoro thagaribé paróndjovel.
23Ándi jag kána isí, dikhél, opré, hekjokotár e Ibrahimés durál dikhél, thai paš les o Lázaros.
24Vikínel o barvaló, vakerél: Be‐Bába‐be, Ibrahiméja, molínav‐man túke, kerés so kerés, e Lazarós mánge kabičhalés, ov‐da po anguštó te del ándo paní, mi čhib šudrí ta te kerél, áke thábjovav andé adalké jagáte.
25Phenél léske o Ibrahím: E Sínko, ne‐li polučinján lačipé, andé dünjás kána sinjánas, o Lázaros‐da sa bilačipé uló léske. Akaná ov baxtaló, tu bibaxtaló.
26Trébe‐da te na bisterés, maškár aménde jek barí xar isí, thai ko mangél te nakjél othár dži athé, ili iz‐athé andé averé rigáte, naští.
27Phenél o barvaló: Bába‐be, molínav‐man túke te bičhalés les me dadéskere kheréste.
28Sóske isí man panš phralá, te vakerél lénge, te nána avén ol‐da andé adalké jagáte.
29Amí phenél léske o Ibrahím: Isí lénge o Músas, thai o prorókja, mukh len, te šunén len.
30Amá odovká phenél: Nanái, Bába Ibrahím. Amí te džal dži len jek džené katár o mulé, odolká hem kašunén, hem pišmáni k’oovén.
31Adavká phenél léske: Te na šunén e Musás, te na šunén e rasilnikén‐da, hič te n’ovél nána k’ovél lénge pakjoibé, oví te uxtjél lénge jek dženó andár e mulénde.
Currently Selected:
Lukéstar 16: ARL1912
Highlight
Share
Copy
Want to have your highlights saved across all your devices? Sign up or sign in
© British and Foreign Bible Society
