Lukahtar 13
13
E vorba e Isusohći katar o baro peripe e Galilejengo thaj katar o pokajipe. Sastardipe katar jekh dešuoh̄to bršengo nasvalipe, subotaha. Paramiča thaj e vorbe e Devlehće thagarimahtar. E Irodohće sastra. O rovipe pala o Jerusalimo.
1Ande gola djivesa avile varsave džene thaj mothode lehće kaj o Pilato čhordah e Galilejengo rat, ćhinindo e žrtve e Devlehće.
2Thaj dindo vorba vov phendah lengje: Zar tumen paćan kaj von seha maj došale katar gola savor̄e, kaj gaći napatisalje, nasvaljardile.
3Mothovav tumee: Niči! Te na pokajin tumen savor̄e, kam h̄asardon gadija kam mudardon.
4A kana e kula ando Siloam pelah thaj eradilah pe gola dešuoh̄to džene thaj kana mudardah len, zar tumen paćan, kaj von seha maj bangje, maj došale katar e Jerusalimohće manuša.
5A me phenav tumee: Niči! Te na pokajisajvona, savor̄e kam mudardivona.
6Thaj phendah lengje gaja paramiči: Varesavo manuš sah, thaj sah le jekh smokva, savi bajrilah maškar e drakha. Jekhvar avilah vov te dikhel da li o kaš bijandah, thaj niči arakhlah niso.
7Thaj phendah e drakharehće, e manušehće savo arakhel e drakha: Ake, o trito brš sar avav thaj rodav, a nisar našti arakhav kaj bijandah jekhvar, ćhin la! Sohće te bajrol maškar e reza, kana našti bijanel.
8A vov dindo vorba phendah lehće: Bareja, muk la vi gava brš, dži kaj me hanavav e phuv oko late thaj te čhudav gošnja, gunoj, trujal late.
9Te bijanela, lačhipe avela, a te niči, a tu ćhin la dži brše.
10Jekhe subotaha sikadah vov ande jekh khangjiri.
11A inćate sah jekh džeji savi sah nasvali dešuoh̄to brš, bangjili, bizuralimahći, thaj našti inzajvola, sar bar̄ome, capenime ande zeja.
12Kana o Isuso dikhlah gova, akhardah la, andah la angla pehte, thaj phendah laće: Manušnije, akana kam nakhel o nasvalipe ćiro.
13Thaj vov čhutah pire va pe late, a voj po than inzili tar thaj hvalisardah, ašardah e Devle.
14A o šorutno e khangjirako h̄oljaljah kaj vov sastardah la subotone thaj dindo vorba phendah e manušengje: Si šov djive kana trubuj te ćerel pe bući. Aven ande godola djivesa te sastardon, a na te aven subotaha, savatone.
15A o Baro vaćardah lehće: Hoh̄amneja! Zar svako maškar tumende subotaha niči putarel thaj mukel pire guruve thaj pire gjore, magarco, katar e jasle te igjarel len po paj?
16A zar niči putaraha amen subotone gale dukhade čheja e Avramohćira, sajva o beng phanglah maj anglal dešuoh̄to bršendar.
17Kana vov gava dijah vorba, e džungale manuša savor̄e ladžaje thaj lolile, a sa e aver džene veselisalje e šukare bućengje save vov ćerdaha.
18Thaj o Isuso phendah lengje: Savo si o thagaripe, o rajipe e Devlehko? Sar te mothovav tumee godova?
19Gova si sar jekh kućinor̄i e gorušicaći, savi o manuš lel thaj čhudel ande pi phuv, a gova palal bajrol, sar baro kaš, a e Devlehće čiriklja aven thaj bešen pe lehće krangujra.
20Thaj vov pale phendah: Sar te mothovav tume: Savo si o thagaripe e Devlehko?
21Godova si sar o šuklo h̄umer, kaj lel e džeji thaj čhuvel ande trin vasujra ar̄o, dži kaj sa niči šukljol.
22Thaj vov nakhlah krozo e thema, e forujra thaj e gava, sikavindo thaj džando ando Jerusalimo.
23A varesavo dženo phendah lehće: Bareja, da li si cîr̄a gola manuša save kam aven spasime? A vov phendah lengje.
24Čalaven te den pe cinone udaror̄a, kaj phenav tumee, but džene kam mangen te den andre, a našti dena.
25Kana uštela e ćherehko šorutno tha kana phandela o udar, a tumen ačhen avri thaj len te peken ande udara dindo vorba: Bareja, bareja, putar amee, vov kam tumee phenel: Me niči pindžarav tumen katar sen.
26A tumen ačhena te den vorba: Amen h̄alam angla tute thaj pilam, a pe droma tu sikadan amen.
27A vov kam phenel: Mothovav tumee pale, niči pindžarav tumen katar sen, našen mandar savor̄e, tumen, save ćeren bilačhipe.
28Inća kam avel rovipe thaj e dandengo ićharipe, kana dikhena e Avramo, e Isako, e Jakovo, thaj e prorokon ande Devlehko thagaripe, thaj kana tumen kam aven čhudine avri okothar.
29Thaj kam aven katar o istoko thaj katar o zapado katar o severo thaj katar o jugo, thaj von kam bešen te h̄an ande Deviehko thagaripe.
30Thaj, ake dikh, si gola paluvne, save kam aven e anglutne, a si pale anglutne sa ve kam aven maj palune.
31Gole djivesehko avile varesave lilvarne, rašaja, dindo vorba lehće: Inkli, thaj dža tar akatar, kaj o Irodo kamel te mudarel tut.
32A vov phendah lengje: Džan tar tha phenen gole lisicaće: Ake, tradav e bengjen andar e manuša, sastarav e manušen adjive thaj tehara, a e tritone djivesehko sa kam avel ćerdino.
33Ali adjive, tehara thaj avertehara trubuj te phirav, kaj jekh proroko našti h̄asarel po šoro van e Jerusalimohtar.
34Jerusalime! Jerusalime! Tu mudareh e prorokon, tu čhudeh tu e bar̄enca pe gola save si tuće bičhalde. Gaći droma kamlema te ćidav e čhavor̄en, sar e khanji kaj ćidel e piličonen tala pe phaka, a tumen gova niči kamlen.
35Ake, ita, ačhela tumaro ćher bi nikahko, a me mothovav: Tu men man niči dikhena dži kaj jekhe djivesehko niči phenena mae: Nek avel bah̄talo svako gova savo avel ande Devlehko anav.
Currently Selected:
Lukahtar 13: GURB1938
Highlight
Share
Copy
Want to have your highlights saved across all your devices? Sign up or sign in
Englezongo thaj avere Themengo Biblijako Amalipe 1938.
