Lukahtar 17
17
Katar o dukhavipe, mukipe, paćape thaj katar e buća. O sastaripe e deše phuknjalengo. Avipe e Devlehće thagarimahko.
1A pe amalengje phendah: Našti avel te jekh e avre ni dukhavel, ali pharipe thaj bibah̄ golehće savehtar avel gov dukhavipe, gov jogji.
2Maj feder avela lehće te umblaven e ajsavehko bar̄ pe lehći kor̄ thaj te čhuden le ando paj, nego te vov rovljarel fijesave galendar, gav cinonendar.
3Arakhen tumen. Te dukhavela tu ćo phral, darav le, pa te pokajisajvola, muk lehće, jertisar.
4Thaj te dukhavela tu efta droma po djive thaj te avela tuće pale efta drom thaj te phenela: Me kaji ma, a tu muk lehće.
5A e apostolujra phende e Barehće: Bajrav amengje amaro paćavipe.
6A o Baro dijah lengje vorba: Te avela tumen gaći paćavipe gadibor si gaj kućin e gorušicaći, thaj te mothovena gale kaštehće: Kušinajvo thaj ikaldivo thaj pusadivo ande gav baro paj, gov kaš kandela tumen.
7Kana tumaro bućarno, o kandino hanavel e phuv, čajravel thaj arakhel e guruven, thaj kana maj palal irisajvol andar e umal savo si gova manuš maškar tumende savo kam lehće mothovel: Avta sigo, beš thaj h̄a.
8Ven tumen kam phenen lehće: Lačhar mae maj anglal o h̄ape, dunav će baja, phande tu e kuštikaha thaj kande ma dži kaj me h̄av. Athoska šaj vi tu h̄ah thaj pijeh.
9Čačimaha, tumen niči kam zahvalisajvona e slugahće, e kandinehće, kana vov ćerela sa so sah lehće phendino. Niči me an gova paćav.
10Gadija vi tumen, kana kandena sa gova so sah tume mothodino, tumen kam den vorba: Amen sam čuče bućarne, bilačhe, amen ćerdam gova so trubusardah te amen ćerah, so sah ame vaćardino.
11Thaj džando ando Jerusalimo vov nakhlah maškar e Samarija thaj e Galileja.
12Thaj kana dijah ande jekh gav, dikhlah deše phuknjalen, deše brundale dženen, save ačhile dural.
13Von por̄ade pe muja dindo vorba: Isuse, sikamneja, kovljar ćo ilo pe amende čor̄ende!
14A vov, dikhindo len, phendah lengje: Džan tar tha sikadon e rašajengje, e livarnengje. A von gadija džando sastile.
15A jekh manuš lendar, haćarindo kaj sastilah, irisaljah thaj lijah te ašarel te hvalisarel e Devle andar sa o krlo.
16Thaj pelah mujal angla lehće prne thaj zahvalisaljah lehće. A gova manuš sah Samarijako.
17A o Isuso dindo vorba mothodah lehće: Zar niči sastile gol deš džene, savor̄e? Kaj si vadže gola aver inja džene?
18Sar šaj avel tha te niči arakhadinjaljah vadžaj khajekh manuš maškar lende te zahvali pe e Devlehće, a avilah samo gava manuš andar aver phuv.
19Thaj phendah lehće: Ušti thaj dža tar, ćo paćavipe sastardah tu.
20Thaj kana phučle le e rašaja, kana kam avel e Devlehko thagaripe, vov dindo vorba mothodah lengje: E Devlehko thagaripe kana avela, niči kam dikhinjavol.
21Thaj niči kam mothodol: Aketalo kathe ili etalo kothe, kaj e Devlehko thagaripe hi andre ande tumende korkor̄e.
22A pe amalengje phendah: Kam aven e djivesa kana tumen kamena te dikhen jekhe djivesehko e manušehće čhave, pa niči kam dikhena le.
23Thaj kam phendol tumengje: Aketalo akaring ili eketalo okoring, inća, a tumen na te džan pala lende, na te roden le.
24Thaj sar kaj prastel e munja, e strafin e gromohći po maškar e devlehko, tha sar phabol upral saor̄ende thaj upral sa so arakhadol tala o del, eke, gasavo kam avel vi e manušehko čhavo ande po djive.
25A maj anglal sa golehtar trubuj te napatisajvol, te ićhardol thaj te kaljaren le, te bangjaren thaj te došaren le e adjivesutne manuša.
26Thaj sar kaj sah ande djivesa e Nojehće, gadija kam avel vi ande djivesa e manušehće čhavehće.
27Von h̄ale thaj pile, lena r̄omen tha lije r̄omnja, ćerde abijav dži ke gov djive kana dijah o Noje ande pajali, ande ladja. Thoska avile pe jekhvar e bare bršinda thaj o paj tasadah savor̄en.
28Gadija sar kaj sah ande djivesa e Lotohće: Hana, pijena, ćinena, bićinena, bajravena e kaš thaj ćerena ćhera.
29Thaj gole djivesehko kana iklistah o Lot katar e Sodoma, muklinajljah e jag thaj muklilah o khandino ćukurto katar o del thaj mudardah sa.
30Gadija kam avel vi gole e djivesehko kana sikadola o čhavo e manušehko.
31Thaj gole djivesehko gova savo arakhadivola upre po ćher, te na huljel tele, te lel pe patave thaj po buhljaripe, a ni gova savo arakhadola ande umal, te na iri pe palpale.
32Den tumen godji thaj ripardon so sah e Lotohće r̄omnjaha.
33Gova savo kamela te arakhel po džuvindipe, h̄asarela le, a savo god h̄asarela le, arakhela le pale.
34Mothovav tumengje: Goja jrat duj kam džene aven pe jekh sovardo, pe jekh kreveto, pa jekh kam del pe, a o aver kam ačhel.
35Duj manušnja kam pišen, jekh kam avel lini, a e aver kam mukljol.
36Duj džene kam aven pe umal, jekh kam lel pe, a o aver kam mukel pe.
37Thaj dindo vorba phende lehće: Kaj, Bareja? A vov dija svato lengje: Kaj si e lubine, e limoraša, inćate kam ćidinajvon e mulikane čiriklja.
Currently Selected:
Lukahtar 17: GURB1938
Highlight
Share
Copy
Want to have your highlights saved across all your devices? Sign up or sign in
Englezongo thaj avere Themengo Biblijako Amalipe 1938.
