Geiq Dwzbaijyienz 23
23
1Baujloz ok daeuj le, couh cimyawj gyoengqde, doiq gyoengqde naeuz: “Gak boux beixnuengx hax, gou soqlaiz soj guh hih saeh, cungj mij'z naeuz doiq mbouj hwnj Cangqdiq.” 2Yiengq youq mwnq dih Yaqnaznizyaq#23:2 Boux Yaqnaznizyaq neix mbouj dwg 9:10 dih boux Yaqnaznizyaq mwnq. boux goengjsae dajbwiz daeuzdaeuz neix dingq Baujloz yienghneix naeuz le, couh hawj doengh boux ndwn youq henz ndang Baujloz he fak de mbat bak he. 3Baujloz ngaiz vunz fak le, couh naeuz de naeuz: “Ndaek ngauqm'z, haex max rog hih ngaeuz ndaw hih yaq,#23:3 Dineix ndaw yienzvaenz dwg naeuz ‘Bangxciengz cat hoi’ gawq neix he. gyajcang guh ndei hwj! Mwngz naengh youq dineix dwg ij ciuq fazliz daeuj saemjbuenq gou hih, hoeng mwngz mbouj soenhsouj fazliz, dauq hawj vunz doh gou. Cangqdiq caemh ij doh mwngz lo!”
4Gyoengq vunz ndwn youq henz de dingq de yienghneix naeuz le, couh doiq de naeuz: “Mwngz gingqyienz gamj mang goengjsae dajbwiz daeuzdaeuz; mwngz mbouj rox de dwg swqhaeuh Cangqdiq he haj?”
5Baujloz dingq le, couh naeuz: “Ox, gak boux beixnuengx hax, gou mbouj rox de dwg boux guh goengjsae dajbwiz daeuzdaeuz he hah. Gou mbouj hab mang goengjsae dajbwiz daeuzdaeuz, aenvih ndaw Singqgingh ndaw de sij naeuz:
Mbouj ndaej mang beksingq dih lingjdauj.”
6Baujloz yawj ndaej ok gyoengq vunz neix ndaw de miz dingxfaen vunz dwg Sajduhgaih baij dih vunz, dingxfaen vunz dwg Fazliqcaiq baij dih vunz, yiengq de couh youq mwnq hemq naeuz: “Gyoengq beixnuengx hax, gou dwg Fazliqcaiq baij hih vunz, caemh dwg Fazliqcaiq baij dih lwglan. Gou seizneix ngaiz vunz saemj, dwg vih gou sinq vunzrai ndaej dauqlix gij neix.”
7De baex gangj gawq vah neix he le, Fazliqcaiq baij hih vunz caeuq Sajduhgaih baij hih vunz couh majcangq doxceng hwnjdaeuj, caemh faen song buek hwj, 8aenvih Sajduhgaih baij hih vunz mbouj sinq vunz rai le ndaej dauqlix, caemh mbouj sinq miz bouxcai caeuq miz hoenzsaenz, hoeng, Fazliqcaiq baij hih vunz nej, sam yiengh cungj sinq miz. 9Couh vih yienghneix, gyoengqde yied ceng yied youqgaenj. Yiengq miz geij boux Fazliqcaiq baij hih fazliz cenhgyah ndwn hwnjdaeuj hemq naeuz: “Gyoengqraeuz cimh mbouj raen boux neix miz maz coih hah; saekseiz caemh miz hoenzsaenz cixnaeuz miz bouxcai doiq de gangj vah goq nej!”
10Gyoengq vunz yied ceng yied gog, yied ceng yied youqgaenj, guh hwj cijveihguenh cungj lau Baujloz ngaiz vunz sik faen song mbiengj bae, couh mingqlingq gij binggyep he roengz bae, daj ndaw gyoengq vunzlai daiq Baujloz okma, daiq haeuj ndaw binghyingz bae.
11Couh youq ngwnz mwnq, Yehsuh ndwn youq henz ndang Baujloz, doiq de naeuz: “Mwngz gaej you; coengqsim bax! Mwngz gaenq ndaej youq Yehluqsajlaengj guh gou dih cingqyinz lo, youq Lozmaj caemh bietdingh ndaej vih gou hwj guh cingqyinz.”
Geiqmaeuz haihrai Baujloz
12-13Yiengq daengz ranzrongh le, [13]miz seiqcib lai boux Youzdaiq vunz [12b]doxcomz hwj geiqmaeuz ij gaj Baujloz. Gyoengqde engqgya yiengq Cangqdiq baujcingq naeuz: “Mbouj gaj Baujloz, gyenhgyez mbouj gw gijmaz.” 14Gyoengqde geiqmaeuz ndei le, couh bae cimh doengh goengjsae dajbwiz he caeuq doenghheij boux gangj vah couh baenz he, doiq gyoengqde naeuz: “Gyoengqraeuz gaenq caezgya baujcingq goq lo, hauhnaeuz mbouj gaj Baujloz, gyoengqraeuz couh gijmaz cungj mbouj gw. 15Seizneix faenhsou caeuq gyoengq veijyienzveiq dih vunz bae naeuz Lozmaj cijveihguenh, hawj de daiq Baujloz daeuj dineix, gyajcang naeuz caiq ij caz gij saeh de hwj; gyoengqraeuz gaenq guh ndei cwnjbiq lo, daengj de daeuj daengz dangjroen le, couh gajgak de bae.”
16Ngamqluj gyoengqde gangj doenghgij vah neix hih mwhde, ngaiz boux vaihseng Baujloz ndaej dingqri. De dingqri le, couh haeuj ndaw binghyingz bae naeuz Baujloz ni. 17Baujloz dingq le, couh cingj boux lienzcangj he daeuj, doiq de naeuz: “Cingj mwngz daiq daeg hauxseng neix bae cimh cijveihguenh. De miz vah ij naeuz de ni.”
18Boux lienzcangj mwnq couh daiq daeg vaihseng de bae cimh boux cijveihguenh. De naeuz: “Ngaiz gyaeng hih Baujloz, de heuh gou bae, gouz gou daiq boux hauxseng neix daeuj cimh mwngz, naeuz de miz saeh ij naeuz mwngz ni.”
19Boux cijveihguenh mwnq dingq boux lienzcangj yienghneix naeuz le, couh rag dawz gij fawz daeg vaihseng Baujloz goq henz he bae, cam de naeuz: “Mwngz miz maz saeh ij naeuz gou ni hax?”
20Yiengq daeg vaihseng Baujloz han de naeuz: “Gij vunz Youzdaiq gaenq cimciek ndei; gyoengqde ij gouz mwngz ngoenzcog daiq Baujloz bae daengz veijyienzveiq mwnq bae, gyajcang naeuz ij caz cingsuj gij saeh de hwj. 21Gou gouz mwngz gaejyungh dingq gyoengqde, aenvih gyoengqde miz seiqcib lai vunz demq youq buenqroen hwj ij gaj de. Gyoengqde caemh yiengq Cangqdiq baujcingq goq naeuz: ‘Mbouj gaj Baujloz, gyenhgyez mbouj gw gijmaz.’ Gyoengqde cungj guh ndei cwnjbiq lo, caenh daengj mwngz dapwngq hoh lo.”
22Boux cijveihguenh dingq le, couh raengq daeg vaihseng Baujloz naeuz: “Gaejyungh hawj vunz rox mwngz gaenq naeuz gij saeh neix naeuz gou ni lo.” De yienghneix raengq le, couh hawj de ok ma lo.
Baujloz ngaiz soengq bae hawj Feihlizswh saengjcangj
23-24Daeg vaihseng Baujloz ok ma le, cijveihguenh couh heuh song boux lienzcangj daeuj, raengq song boux de naeuz: “Vaiq bae cwnjbiq songbak vunz buqbingh, caetcib vunz bingmax, songbak vunz dawz hungzinghcangh, [24a]caemh ij cwnjbiq duz max he hawj Baujloz naengh. [23c]Haemhneix gouj diemjcung [24b]ij soengq de bae [23b]Gaijsajliqyaq Singz [24c]dih Feihlizswh saengjcangj mwnq bae.”
25Cijveihguenh caemh sij fung saenq he hawj Feihlizswh saengjcangj. Ndaw saenq ndaw de sij naeuz:
26Feihlizswh saengjcangj, mwngz ndei:
27Seizneix miz boux he ngaiz Youzdaiq vunz gaemh dawz, ceng di he ngaiz gyoengqde gaj lo. Gou rox de dwg Lozmaj vunz he, yiengq couh daiq bing bae gouq de okma. 28Gou vih siengj caz cingsuj gyoengqde vihmaz ij gauq de, couh daiq de bae daengz gij vunz Youzdaiq dih veijyienzveiq mwnq bae. 29Hoeng gajlaeng gou cij rox, gyoengqde gauq de hih dwg gvanhhih Youzdaiq vunz dih funghsuz vaenqdiz lah, gaenhbaenj mbouj famh gijmaz coih hwj hab gaj cixnaeuz hab gyaeng.
30Gajlaeng miz vunz naeuz gou ni, miz vunz ok geiqmaeuz ij gaj de. Sojhij gou majcangq gietdingh daiq de bae daengz mwngz mwnq, caemh naeuz hawj doengh boux gauq de mwnq bae daengz mwngz mwnq bae youq dangqnaj mwngz gauq de. Muengh mwngz banh gij saeh neix. Couh yienghneix bax.
Gwzlauzdiq-Lijsihyaq cijveihguenh muengh mwngz bingzan!
31Couh yienghneix, gyoengq bing couh ciuq de raengq hih yienghmwnq bae guh, couh daiq Baujloz lienzyeh ganj bae. Gyoengqde bae daengz buenqroen mwnq heuh Anhdizbaqdij he le, 32daengz daixngeih ngoenz gyoengq buqbingh couh dauq maj binghyingz lo, hawj gyoengq bingmax giqcuz soengq Baujloz bae.
33Gyoengqde bae daengz Gaijsajliqyaq le, couh dawz fung saenq gyau hawj saengjcangj, caemh gyau Baujloz hawj de. 34Saengjcangj yawj le, couh cam Baujloz, cam de dwg vunz aen saengjlaw. Gajlaeng de rox Baujloz dwg Gihliqgyah vunz le, 35couh doiq Baujloz naeuz: “Daengj gij vunz gauq mwngz mwnq daeuj le, gou ij saemj gij saeh mwngz.” Saengjcangj yienghneix naeuz le, couh mingqlingq vunz dawz Baujloz gyaeng haeuj ndaw yazmonz gaxgonq goeng Hihliz lij lix youq goq he bae.
Currently Selected:
Geiq Dwzbaijyienz 23: YBNT
Highlight
Share
Copy
Want to have your highlights saved across all your devices? Sign up or sign in
© New Bridge Publishing Company Limited
