Lizsij dih Gaihcij 24
24
Hijsaj aeu yah
1Yaqbwzlahhanj nienzgeij gaenq laux ladlad liux lo; seiqvunz de mboujguenj de guh gijmaz saeh, Yehhozvaz cungj soengq fuk hawj de. 2Miz ngoenz he, de doiq boux guenjgya de, caemh dwg bouxhoiq nienzgeij ceiq laux he, naeuz: “Daeuj, dawz gij fawz mwngz coengq haeuj luengqha gou daeuj.#24:2 Youq mwhde dih laehbeih, dawz gij fawz coengq haeuj luengqha bae cij baujcingq, couh dwg naeuz gij baujcingq neix gig yiemzsuz, mbouj dwg hezhej gangjriu dih saeh. Aiq dwg caeuq miz mbouj miz lwg miz gvanhaeh, aenvih lwg dwg daj mwnq ok daeuj he. 3-4Gou ij hawj mwngz yiengq gou baujcingq, baujcingq mbouj hawj daeglwg gou youq dieg neix aeu gij lwgsau vunz Gyahnamz ma guh yah; [4]mwngz ij maj bonjdeih gou aeu gij lwgsau caeuq gou doxcaemh minzcuz he ma hawj daeglwg gou Hijsaj guh yah. [3a]Hoeng hauhnaeuz gij baujcingq neix guh mbouj daengz nex, mwngz caemh gag rox, mwngz couh ij ngaiz Yehhozvaz, couh dwg gwnzmbwn caeuq lajdeih dih Cangqdiq, fad mwngz lo.”
5Yaqbwzlahhanj yienghneix naeuz le, boux guenjgya de couh doiq de naeuz: “Yiengq, hauhnaeuz dah lwgsau mwnq mbouj haenj gaen gou daengz mwnq dieg neix ma nej, dwg mbouj dwg gou bietdingh ij daiq daeglwg mwngz maj dieg coj mwngz hax?”
6Gajlaeng Yaqbwzlahhanj han de naeuz: “Mwngz ciengeiz mbouj ndaej daiq daeglwg gou maj dieg mwnq, 7aenvih Yehhozvaz Cangqdiq hawj gou biek ranz boh gou, aen cuz boh gou, ok daeuj hih mwhde, de doiq gou baujcingq goq naeuz: ‘Gou ij dawz dieg neix soengq hawj doengh daih gajlaeng mwngz.’ Yiengq gou caemh sinq de gaengjdingq baij bouxcai de roengz daeuj daiq mwngz bae, daj mwnq aeu dah lwgsau he ma hawj daeglwg gou guh yah dih. 8Hauhnaeuz dah lwgsau mwnq mbouj haenj gaen mwngz ma, yiengq couh mbouj suenq naeuz mwngz guh mbouj daengz, caeuq gij baujcingq neix mij maz gvanhaeh law; cijaeu mwngz mbouj daiq daeglwg gou maj mwnq couh ndaej lo.” 9Bouxhoiq raen Yaqbwzlahhanj cungj gangj daengz yienghneix bae lo, yiengq de couh coengq fawz haeuj luengqha Yaqbwzlahhanj bae, yiengq de baujcingq lo.
10Couh yienghneix, bouxhoiq couh daj ndaw gyoengq lozdoz Yaqbwzlahhanj genj aeu cib duz lozdoz ma doz gak cungj doxgaiq, yiengq fueng Meijsojbuqdazmijyaq, bae daengz aen singz Nazhoq. 11De daengz mwnq le, couh hawj doengh duz lozdoz bomz youq rog singz hih henz aen cingjraemx mwnq. Mwhde dwg yiengqhaemh, ngamqluj gij vunzbaz ok daeuj aeu raemx.
12De couh gouz Yehhozvaz naeuz: “Yehhozvaz hax! Bouxcawj gou Yaqbwzlahhanj dih Cangqdiq hax! Gouz mwngz hawj gou ngoenzneix guh hih saeh guh ndaej doeng, hawj Yaqbwzlahhanj rox naeuz mwngz dwg aiq de dih. 13Gou seizneix couh ndwn youq henz cingjraemx lo; gij vunzbaz ndaw singz cingq ok daeuj aeu raemx. 14Gou ij cam gij vunzbaz mwnq naeuz: ‘Cingj mwngz coengq aen guenqraemx mwngz roengzma, hawj gaemz raemx he hawj gou gw, ndaej lwi?’ Yiengq, hauhnaeuz miz dahlawz han naeuz: ‘Hawj mwngz gw bax; gou caemh hawj doengh duz lozdoz mwngz gw laem,’ yiengq gou muengh dah mwnq couh dwg mwngz hawj bouxhoiq mwngz Hijsaj hih yah lo. Yienghneix gou couh rox mwngz doiq bouxcawj gou ndei, yawj bouxcawj gou dij lo.”
15Boux guenjgya ngamq gouz daengz dineix, sawqmwh couh miz dah he, gij coh de heuh Liqbwzgyah he, gwnz mbaq de gwed miz aen guenqraemx he, daeuj daengz henz cingj. Dah neix dwg dahlwg Bijdujliq; Bijdujliq dwg daeglwg daeggo Yaqbwzlahhanj, dwg Nazhoq caeuq Mizgyah seng he. 16Dah Liqbwzgyah gig gyaeu, caemh mijyaengz miz vunzsai yaek de goq. De roengz bae daek raemx le, couh hwnj ma. 17Boux guenjgya raen le, couh riq goqbae doiq de naeuz: “Gouz mwngz hawj di raemx hawj gou gw, ndaej lwi?”
18Liqbwzgyah han naeuz: “Ndaej hah, goengjau, hawj mwngz gw.” De doq gangj couh doq nyungjnyat daj gwnz mbaq dawz aen guenqraemx roengzma, song fawz hwj dawz hawj goeng guenjgya gw.
19Hawj de gw le, Liqbwzgyah vanzlij naeuz: “Gou caiq daek raemx ma hawj doengh duz lozdoz mwngz gw laem, hawj gyoengqde gw imq bae.” 20Gangj sat, couh majcangq dawz gij raemx ndaw guenq raix haeuj ndaw ruhraemx bae, youhcaiq bae daek raemx ma hawj doengh duz lozdoz gw. 21Liqbwzgyah aeu raemx hawj duz lozdoz gw hih mwhde, boux guenjgya youq henz de yawj, yawj de yawj nijnij, mij gangj saek gawq vah, siengj rox mbat neix de daeuj banh hih saeh dwg mbouj dwg Yehhozvaz gaenq nganhbaiz ndei hawj de lo.
22Daengj lozdoz gw raemx ndaej le, boux guenjgya couh dawz aen naek miz roek gwz#24:22 Dineix ndaw yienzvaenz dwg naeuz ‘buenq seqgwzlwz.’ hih gyengx gim raek ndaeng caeuq song aen naek miz song liengx geij#24:22 Dineix ndaw yienzvaenz dwg naeuz ‘cib seqgwzlwz.’ dih goenh gim hawj dah Liqbwzgyah dawz, 23naeuz: “Nuengx hax, cingj mwngz naeuz gou ni, mwngz dwg dahlwg byawz lah? Ndaw ranz boh mwngz miz mwnq hawj raeuz youq hih haz?”
24Dah de han naeuz: “Gou dwg dahlwg Bijdujliq; daxgoeng daxbuz gou dwg Nazhoq caeuq Mizgyah. 25Ndaw ranz gou miz baenxbienh gij gueng lozdoz, caemh miz mwnq hawj sou youq he.”
26Boux guenjgya dingq le, couh gvih roengzma baiqsax Yehhozvaz, 27naeuz: “Yehhozvaz bouxcawj gou dih Cangqdiq hax, gou ij haenh mwngz, aenvih mwngz itcig cungj doiq bouxcawj gou ndei, cungj gangj daengz guh daengz, gangj vah gw vah. Mwngz itloh daiq gou daeuj daengz gij caencik bouxcawj gou.”
28Gajlaeng Liqbwzgyah riq maj naeuz daxmeh de caeuq ndaw ranz de ni. 29-30Liqbwzgyah miz daeggo he heuh Lahbanh. [30a]De raen dahnuengx de miz gyengx gim raek ndaeng caeuq song aen goenhfawz, caiq dingqri de naeuz boux guenjgya baenzlawz doiq de gangj hih vah le, [29b,30b]couh nyungjnyat riq bae henz aen cingjraemx mwnq, raen boux guenjgya caeuq lozdoz vanzlij ndwn youq henz de, 31couh doiq de naeuz: “Goengjau hax, mwngz dwg boux Yehhozvaz soengq fuk hawj he dih vunz; vihmaz ndwn youq rog neix nej? Cingj mwngz haeuj ndaw ranz gou maj bax! Gou gaenq soujsib ndei mwnq youq he hawj mwngz lo, caemh cwnjbiq ndei mwnq youq he hawj doengh duz lozdoz lo.”
32Gajlaeng, boux guenjgya couh gaen Lahbanh haeuj ranz bae. Lahbanh couh dawz doenghheij doxgaiq gwnz gumq lozdoz roengzma, caiq gueng doengh duz de, caemh aeu raemx hawj boux guenjgya mwnq caeuq doengh boux caeuq de itheij daeuj he swiq ha. 33Lahbanh guh doenghgij neix ndaej le, caiq daek haeux baij byaek ndei heuh de gw. Hoeng, boux guenjgya mwnq engq han naeuz: “Mbouj hah, gou mbouj gw hah; gou mijyaengz gangj gou daeuj dineix ij guh gijmaz saeh haem. Daengj gou dawz gij saeh gou gangj ndei le cij gw.”
Yiengq Lahbanh han naeuz: “Ox, ndaej hah, cingj mwngz gangj bax.”
34Gajlaeng, boux guenjgya couh gangj naeuz: “Gou dwg bouxhoiq Yaqbwzlahhanj he. 35Yehhozvaz soengq fuk hawj bouxcawj gou lai hux lai, sawjhawj de bienqbaenz boux fouqfouq mizmiz he, caemh soengq hawj baenx gyoengq yiengz, baenx gyoengq cwz, lozdoz caeuq lawz, gimngaenz caeuq hoiq vunzsai vunzbaz. 36Mehcawj gou Sajlah nienz laux mwhde seng miz daeglwg he; bouxcawj gou caemh dawz sojmiz hih gyahcanj cungj hawj daeglwg neix liux. 37Bouxcawj gou hawj gou yiengq de baujcingq naeuz: ‘Mwngz baujcingq mbouj hawj daeglwg gou aeu gij lwgsau Gyahnamz ma guh yah; 38mwngz ij bae daengz dieg coj boh gou, youq ndaw minzcuz gou aeu dah lwgsau he ma hawj daeglwg gou guh yah.’
39“Yiengq gou couh cam bouxcawj gou naeuz: ‘Hauhnaeuz dah mwnq mbouj haenj gaen gou ma nej, ij baenzlawz guh?’
40“De han naeuz: ‘Gou soqlaiz cungj dwg dingq Yehhozvaz gaen Yehhozvaz; de gaengjdingq baij bouxcai de daeuj caeuq mwngz bae, hawj mwngz guh ndaej doenghgij saeh neix. Mwngz couh ndaej youq laeng gij caencik ndaw minzcuz gou aeu dah lwgsau he ma hawj daeglwg gou guh yah lo. 41Yiengq, hauhnaeuz gij caencik gou mbouj hawj dah de gaen mwngz ma, yiengq caemh mbouj caeuq gij baujcingq mwngz miz gvanhaeh.’
42“Sojhij, ngoenzneix gou daeuj daengz henz cingj le, couh naeuz: ‘Yehhozvaz, bouxcawj gou Yaqbwzlahhanj dih Cangqdiq hax, muengh mwngz hawj gou mbat neix daeuj guh hih saeh guh ndaej doeng. 43Seizneix gou couh ndwn youq henz cingjraemx lo. Gou cam gij lwgsau daeuj aeu raemx mwnq, cam de aeu raemx ma gw; 44hauhnaeuz miz dahlawz hawj gou caeuq doengh duz lozdoz gou gw nex, couh muengh dah mwnq dwg mwngz dingh hawj daeglwg bouxcawj gou guh hih yah lo.’
45“Ndaw sim gou ij gouz hih vah cungj mijyaengz gouz liux haemlwng, Liqbwzgyah gaenq gwed aen guenqraemx he bae daengz henz cingj aeu raemx lo. Yiengq gou couh cam de naeuz: ‘Cingj mwngz hawj di raemx hawj gou gw ndaej lwi?’
46“De couh vaiqdi nyungjnyat daj gwnz mbaq dawz guenqraemx roengzma, naeuz: ‘Cingj mwngz gw bax. Gou caemh ij hawj doengh duz lozdoz mwngz gw laem.’ Couh yienghneix, gou couh ndaej gw raemx, daiqlienz duz lozdoz cungj caemh ndaej gw.
47“Gw le, gou couh cam de naeuz: ‘Mwngz dwg dahlwg byawz lah?’
“De couh han naeuz: ‘Gou dwg dahlwg Bijdujliq; boh gou couh dwg daeglwg Nazhoq caeuq Mizgyah he.’
“Gou dingq le, couh aeu aen gyengx gim he raek haeuj aen ndaeng de bae, caiq dawz song aen goenhfawz daenj hawj de. 48Gajlaeng, gou couh gvih roengzma sax Yehhozvaz, haenh Yehhozvaz bouxcawj gou Yaqbwzlahhanj dih Cangqdiq, aenvih de daiq gou daeuj banh doeng gienh saeh neix, hawj bouxcawj gou ndaej aeu dahlan daegnuengx de ma guh bawx.” 49De gangj daengz dineix le, couh naeuz: “Mbouj rox hih faenhsou baenzlwh yiengh yawj; gou muengh faenhsou hawj gou rox, hawj gou haemq ndei rox ij baenzlawz yiengh guh.”
50Gajlaeng, daeggo de caeuq daxboh de han naeuz: “Ndaek gijn'x dwg Yehhozvaz nganhbaiz lah; raeuz ndaej nganhbaiz haz! 51Nex, Liqbwzgyah couh youq dineix; mwngz ndaej ciuq Yehhozvaz gangj hih yienghmwnq daiq de maj hawj daeglwg bouxcawj mwngz guh yah hah.”
52Bouxhoiq Yaqbwzlahhanj dingq song boux de yienghneix naeuz le, couh bomz roengz doem bae baiq Yehhozvaz. 53Baiq le, de couh aeu doenghgij raek youq gwnz hoz, gwnz fawz, gwnz rwz hih gimgim ngaenzngaenz caeuq buh soengq hawj Liqbwzgyah, caemh soengq hawj daeggo de caeuq daxmeh de haujlai dijbauj hih doxgaiq. 54Gajlaeng boux guenjgya mwnq caeuq doengh boux gaen de itheij daeuj he cij gw haeux. Gw le, gyoengqde caemh youq mwnq youq haemh.
Daengz doengxhaet daihcaeux hwnq daeuj le, boux guenjgya naeuz: “Raeuz ij maj laeng bouxcawj raeuz hoh lo.”
55Hoeng, daeggo Liqbwzgyah caeuq daxmeh de naeuz: “Hawj Liqbwzgyah caeuq raeuz lai youq geij ngoenz laem bax, gijmaj youq saek cib ngoenz laem haj.”
56Yiengq boux guenjgya han naeuz: “Giqyienz Yehhozvaz gaenq hawj gou banh ndaej gij saeh neix lo, faenhsou couh gaej hah gou lo; gou ij vaiqdi maj naeuz bouxcawj gou ni hax.”
57Gajlaeng gyoengqde han naeuz: “Raeuz heuh Liqbwzgyah daeuj camcam de yawj, yawjyawj de ij baenzlawz guh.” 58Yiengq gyoengqde couh heuh Liqbwzgyah daeuj cam de naeuz: “Mwngz haenj gaen boux neix bae lwi?”
Liqbwzgyah doq han naeuz: “Gou haenj gaen de bae hah.”
59Gyoengqde raen Liqbwzgyah yienghneix naeuz le, couh hawj Liqbwzgyah caeuq meh daj lij iq cix daiq de daengz hung hih naijmah gaen boux guenjgya Yaqbwzlahhanj caeuq doengh boux gaen de itheij daeuj he bae lo. 60Liqbwzgyah ijvanh okdin bae hih mwhde, gij vunz ndaw ranz de hoh fuk hawj de naeuz: “Dahnuengx raeuz hax, muengh mwngz ndaej guh fanh vunz dih daxmeh! Muengh doengh daih gajlaeng mwngz hoenx ndaej hingz dizyinz!”
61Couh yienghneix, Liqbwzgyah caeuq doenghheij dahhoiq swqhaeuh de cwnjbiq ndei le, couh gwih lozdoz gaen boux guenjgya mwnq bae lo.
62Mwh goeng guenjgya caeuq Liqbwzgyah okdin ma ranz hih mwhde, Hijsaj dwg youq Biqwj-Lahhaijlaiz youq he. (Biqwj-Lahhaijlaiz dwg youq Gyahnamz dih mwnq gansauq he.) Couh youq mwh goeng guenjgya caeuq Liqbwzgyah mijyaengz ma daengz ranz hih mwhde, Hijsaj gaenq ma daengz ranz daxboh de lo. 63Yiengq miz ngoenz he yiengqhaemh, Hijsaj ok rog reih bae doeng byaij sae byaij gag ngeix gijmaz, sawqmwh ngiengx raeuj hwnjdaeuj yawj, yawjraen miz lozdoz byaij goqdaeuj. 64Ngamqluj mwhneix Liqbwzgyah caemh yawjraen Hijsaj. De yawjraen Hijsaj le, couh nyungjnyat daj gwnz gumq lozdoz diuq roengzma, 65cam boux guenjgya mwnq naeuz: “Boux daj ndaw reih byaij goqdaeuj hih boux mwnq dwg byawz lah?”
Boux guenjgya han naeuz: “Dwg bouxcawj gou Hijsaj.” Liqbwzgyah dingq boux guenjgya yienghneix naeuz le, couh nyungjnyat vaiqdi aeu cahginh ma goemq naj hwj.
66Gajlaeng, boux guenjgya couh dawz de banh hih saeh gangj naeuz Hijsaj ni. 67Hijsaj dingq le, couh daiq Liqbwzgyah haeuj ndaw cangqbungz daxmeh de gaxgonq youq goq he bae. Couh yienghneix, Hijsaj aeu Liqbwzgyah ma guh yah lo. Hijsaj caemh gig aiq de. Hijsaj dajlwh daxmeh de rai le cungj dwg simnyap sizsiz, guh hwj daengz seizneix Liqbwzgyah daeuj le, de cij gaihcij vuenheij.
Currently Selected:
Lizsij dih Gaihcij 24: YBNT
Highlight
Share
Copy
Want to have your highlights saved across all your devices? Sign up or sign in
© New Bridge Publishing Company Limited
