Lizsij dih Gaihcij 26
26
Hijsaj yaeuh goengjvuengz Gihlah'wj
1Doenghbaez youq aen nienzdaiq Yaqbwzlahhanj, mwnq dieg neix, couh dwg Gyahnamz, miz ciengz ieknanh he; seizneix mwnq dieg neix caemh miz ieknanh. Yiengq Hijsaj couh deuznanh bae daengz Gihlah'wj, bae laeng Yaqbijmijlwz#26:1 Mboujguenj bouxlawz dang Feihliqswq vunz dih vuengz, cungj dwg heuh ‘Yaqbijmijlwz’ gij coh neix. Youq daixngeihcib it cangh caemh miz boux he heuh Yaqbijmijlwz; boux mwnq caeuq boux neix mbouj itdingh caemh boux he. goengjvuengz Feihliqswq vunz he youq.
2Yienzlaiz Yehhozvaz caemh yienh hawj Hijsaj raen, raengq de naeuz goq: “Mwngz gaej bae Ngaihgiz lo; bae mwnq dieg gou ij hawj mwngz youq he hax.” 3Hijsaj daengz Gihlah'wj le, Yehhozvaz caiq naeuz: “Mwngz camqciz sien youq dineix youq ndaej lo. Hauhnaeuz mwngz dingq gou, youq mwnqneix youq, gou couh caeuq mwngz youq, caiq soengq fuk hawj mwngz. Gou ij hengz gaxgonq gou caeuq daxboh mwngz Yaqbwzlahhanj soj baujcingq hih, couh dwg ij dawz manx dieg neix cungj soengq hawj mwngz caeuq gyoengq lwglwg lanlan laenjlaenj mwngz, 4hawj doengh daih gajlaeng mwngz fat ndaej lai luj gij ndaundeiq gwnzmbwn, caemh dawz mwnqneix sojmiz dih dieg soengq hawj gyoengqde. Lajmbwn gak aen minzcuz dih vunz cungj dwg dajlaeng doengh daih gajlaeng mwngz hih boux he#26:4 Ndaw Hihbwzlaizvaenz dwg naeuz ‘ceh.’ ‘Ceh’ caemh ceij baezneix dih boux he, caemh ndaej ceij dajlaeng Hijsaj dih doengh daih gajlaeng de dih aen minzcuz he. ndaej miz fuk, 5aenvih Yaqbwzlahhanj gig naeuzdingq; de dingq gij vah gou. Gou raengq de, mingqlingq de gijmaz, de cungj dingq, caemh soenhsouj doenghgij fazliz gou.” 6Yiengq, Hijsaj couh louz youq Gihlah'wj youq.
7Gajlaeng gij vunz dieg mwnq dwen daengz mehyah de, hoeng Hijsaj dauq han naeuz: “De dwg dahnuengx gou lah.” Aenvih Liqbwzgyah gyaeu gywtgywt baenxsau raixcaix, yiengq Hijsaj mbouj gamj nginh naeuz Liqbwzgyah dwg mehyah de. De gag naemj: “Gou mbouj ndaej naeuz Liqbwzgyah dwg mehyah gou, mbouj nex, gyoengqde vih ij ciengj aeu mehyah gou, couh gaj gou.”
8Gajlaeng Hijsaj youq mwnq youq haujlai caez le, miz ngoenz he, goengjvuengz Feihliqswq dajlwh conghcang muengh okdaeuj yawj, sawqmwh yawjraen Hijsaj caeuq Liqbwzgyah caenh luj gvanjbaz yienghmwnq doxgot doxcup. 9De raen yienghmwnq le, couh heuh Hijsaj daeuj laeng de, doiq de naeuz: “Ox, laixmboujlawz Liqbwzgyah dwg mehyah mwngz! Mwngz vihmaz naeuz de dwg dahnuengx mwngz nex?”
Gajlaeng Hijsaj han naeuz: “Hauhnaeuz gou naeuz de dwg mehyah gou nex, gou lau vih de hwj le gou ngaiz rai.”
10Yaqbijmijlwz caiq naeuz: “Mwngz doiq raeuz soj gangj soj guh dih saeh dwg gijmaz iqswh nej? Ceng di he, gij vunz raeuz neij miz vunz caeuq mehyah mwngz ninz, yiengq mwngz mbouj dwg hawj raeuz rap saeh vuengj lo maz!” 11Gajlaeng, Yaqbijmijlwz couh yiengq gij beksingq de fat dunghgauq naeuz: “Mboujlwnh bouxlawz sienghaih Hijsaj caeuq mehyah de, couh gajrai bouxlawz.”
Vunz rahoengz Hijsaj fouq
12Hijsaj youq mwnq dieg mwnq dajndaem. Aenvih Yehhozvaz soengq fuk hawj de, de bi mwnq funghsouh, sou ndaej beij de ndaem roengzbae hih lai ndaej baenx bak boix. 13-14Hijsaj fouq lo. Gij gyadangq de yied ngoenz yied lai, [14a]miz baenx gyoengq baenx gyoengq cwz, baenx gyoengq baenx gyoengq yiengz caeuq haujlai haujlai vunzhoiq; [13b]de couh bienqbaenz boux fouqfouq mizmiz he. [14b]Yiengq gij vunz Feihliqswq mwnq couh gig rahoengz de.
15Daxboh Hijsaj Yaqbwzlahhanj lij lix mwhde, gyoengq hoiq de vat dih doenghheij cingjraemx mwnq, seizneix heij cingjraemx neix cungj ngaiz gij vunz Feihliqswq aeu doem ma dienz liux lo, dienz hwj netnet saedsaed bae. 16Gajlaeng Yaqbijmijlwz couh doiq Hijsaj naeuz: “Mwngz gaej caeuq gyoengqraeuz youq mwnqneix youq lo! Buen bae daixlingh mwnq youq bax, aenvih mwngz gaenq beij raeuz giengz, beij raeuz fouq ndaej lai lo!”
17Yiengq, Hijsaj couh dajlwh mwnq buen deuz, buen bae daengz ndaw lueg Gihlah'wj, youq mwnq dap bungz youq. 18Gajlaeng, de caemh ciuqyiengh coemq gaxgonq daxboh de yungh goq hih doenghheij cingj mwnq doiqyungz vat, caemh ciuqyiengh heuh doengh aen cingj neix luj gaxgonq daxboh de soj heuh hih yienghmwnq ityiengh heuh.
19Youq mwnq youq le, gyoengq hoiq Hijsaj couh ij ngaiz vat cingj cij ndaej. Gyoengqde vat ndaej aen cingj miz raemx danh okdaeuj he le, 20youq Gihlah'wj gij vunz dajciengx he couh caeuq gyoengq vunz Hijsaj dajciengx he doxceng, naeuz: “Gij raemx neix dwg gij raemx gyoengqraeuz!” Couh vih yienghneix, Hijsaj couh heuh aen cingj mwnq heuh Aihswz (Aihswz couh dwg ‘doxceng’ dih iqswh), aenvih gyoengqde caeuq de doxceng. 21Gajlaeng, gyoengq hoiq Hijsaj caemhcaiq vat aen cingj he. Yiengq, gyoengqde caiq vih aen cingj neix hwj daeuj doxceng. Hijsaj couh an aen cingj neix heuh Sihdiznaz. (‘Sihdiznaz’ couh dwg ‘haemzcaeuz’ dih iqswh.) 22Couh vih yienghneix, Hijsaj couh bae daixlingh mwnq, caemhcaiq vat aen cingj he. Mbat neix gyoengqde mij daeuj vih aen cingj neix hwj doxceng lo. Yiengq Hijsaj couh naeuz: “Mbat neix Yehhozvaz soengq hawj raeuz gvangq yubyub dih dieg; baezneix raeuz ij fatdad lailai hwj hwngqhwngq seiqseiq bae.” De couh an aen cingj neix heuh Liqhozbwz. (‘Liqhozbwz’ couh dwg ‘gvangq yubyub dih dieg’ dih iqswh.)
23Mwh Hijsaj bae daengz Bezciqbah hih 24ngwnz mwnq, Yehhozvaz yienh hawj de raen, naeuz: “Gou dwg Cangqdiq, couh dwg baujcuk baujyouh daxboh mwngz Yaqbwzlahhanj dih Cangqdiq. Mwngz gaejyungh lau, aenvih gou caeuq mwngz youq. Vih bouxhoiq gou Yaqbwzlahhanj dih laizyouz, gou ij soengq fuk hawj mwngz, vanzlij sawjhawj doengh daih gajlaeng mwngz fatdad lailai hwj hwngqhwngq seiqseiq bae.” 25Gajlaeng, Hijsaj couh youq mwnq caeb aen daiz dajbwiz he hwj haenh Yehhozvaz, gingqbaiq Yehhozvaz. De caemh youq mwnq dap bungz hwj youq, gyoengq hoiq de caemhcaiq youq mwnq vat aen cingj he.
Hijsaj caeuq Yaqbijmijlwz doxdingh
26Yaqbijmijlwz caeuq boux bang de ok geiqmaeuz he Yaqhuqsaj, vanzlij miz boux gywnhcangj de Feihgoz, dajlwh Gihlah'wj bae daengz Hijsaj mwnq. 27Yiengq Hijsaj doiq gyoengqde naeuz: “Faenhsou giqyienz baenxlai haenq gou, vanzlij boenq gou dajlaeng dieg sou okma, seizneix vihmaz cungj lij daeuj laeng gou nej?”
28Gyoengqde han naeuz: “Aenvih gyoengqraeuz rox, Yehhozvaz cungj dwg caeuq mwngz youq. Mboujyienz seizneix gyoengqraeuz song mbiengj cungj caezgya baujcingq, caezgya doxdingh ndei hwj, 29baujcingq mwngz mbouj haih gyoengqraeuz, caemh luj raeuz mij haih goq mwngz ityiengh, cungj dwg doiq mwngz ndei, vanzlij hawj mwngz bingzan ok ma. Hawjm'z yawj hux, Yehhozvaz soengq fuk hawj mwngz baenx lai!”
30Gajlaeng Hijsaj couh loengh geij daiz byaek cingj gyoengqde gw, yiengq gyoengqde couh caezgya gw lo. 31Daengz ngoenz daixngeih, gyoengqde daihcaeux hwnq le, couh caezgya doxbaujcingq. Yiengq, Hijsaj couh soengq gyoengqde okma, gyoengqde caemh an'an onjonj maj lo.
32Couh youq ngoenz mwnq, gyoengq hoiq Hijsaj caemh daeuj naeuz de ni, naeuz: “Gyoengqraeuz vat cingj cimh ndaej raen raemx lo!” 33Yiengq, Hijsaj couh an aen cingj mwnq heuh Siqbah. (‘Siqbah’ couh dwg ‘baujcingq’ dih iqswh.) Gajlaeng mwnq couh bienqbaenz aen singz he; aen singz mwnq couh heuh Bezciqbah, itcig daengz seizneix.
Gij yah Hijsauj
34Hijsauj ndaej seiqcib bi mwhde, aeu song dah lwgsau Hwz cuz vunz ma guh yah. Song dah neix, dah he dwg dah lwgsau Bijliq, heuh Youzdiz, dah he dwg dah lwgsau Hijlwnz, heuh Bahsizmaz. 35Song mehyah Hijsauj siengzseiz hawj Hijsaj caeuq Liqbwzgyah simnyap ij rai.
Currently Selected:
Lizsij dih Gaihcij 26: YBNT
Highlight
Share
Copy
Want to have your highlights saved across all your devices? Sign up or sign in
© New Bridge Publishing Company Limited
