Joannostir 19
19
Džeļ, 19.
1Togi Pilatos lija Iisusos te čhudža māren Les.
2Te voiskakīre murša, khudle kolkos ērkšķendir, te čhudle pe Lesko šēro, te uradle Les ane bagraņica,
3Te rakirdle: radintut, Judengo Kraļi! te marde Les piro ščoki.
4Pilatos noko vigija te phendža lenge: dikhen, me vilidza Les ke tume, sobi tume medžinen, so me nalatha ke Jov nisai bang.
5Togi vijavdža Iisusos ano ērčengo kolkos te ane bagraņica. Te phendža lenge Pilatos: dava mānuš!
6Kedikhne Les rašangīre bāredīra te slugi, zadīne glosa: mār ko trušul, Les, mār ko trušul! Pilatos rakirla lenge: len Les tume, te māren ko trušul; hai me nalatha an Leske bang.
7Judi otphendle leske: menge isi dopheniben, te po māro dopheniben Jov čhebi mērel, vašo dova so kērdžapes Davleskīre Čhāveske.
8Kedi Pilatos šundža da lav, togi butir strahandija.
9Te noko zagija ane pretorija, te phendža Iisuske: kārig Tu? Ne Iisusos leske naotphendža.
10Pilatos rakirla Leske: hobi mange naotphenesa? hobi nadžines, so mange isi moca mārav Tut ko trušul te isi mange moca otmukhav Tut?
11Iisusos otphendža: tuke najālas pe Mange nisai moca, keļi tuke opraturestir najāl dīno; vašadava butir grehos pe doleske, kon pšedija Man tuke.
12Da brīžatir Pilatos rodija sir otmukhel Les. Judi hadīne glosa: keļi otmukhesa Les, tu nasan pšečeļos kraļiske: svako, kon kerlapes kraļiske, dova isi preču kraļiske.
13Kedi Pilatos, da lav šundša, lidžija Iisusos avri, te bešča pe sendosko štetos, so dena goli Lifostroton, Juditkes Gabatu.
14Togi isis pančto dīves ano kurko angil Patradžin, te šovto štunda, te phendža Pilatos Judenge: dava, tumāro kraļis!
15Ne jone zadīne glosa: le, le, mār Lel ko trušul! Pilatos rakirla lenge: hobi tumāre Kraļis māra ko trušul? Rašangīre bāredīra otphedle: nāni menge kraļis, sir seņu kesaros
16Togi jov pšedija Les lenge po māriben po trušul. Te līne Iisusos, te līdžīne.
17Te, līdžindoi Peskīro trušul, Jov vigija pe do štetos, sav dena goli Čekateskīro, ne Juditkes Golgofa.
18Doi mardle Les po trušul te Lesa dui vāvren, pe jek te pe vār rīg, ne maškiral Iisusos.
19Pilatos čhindža oprečhiniben, te čhudža opre po trušul. Čhindlo isis: Iisusos Nazarejos, Kraļis Judengīro.
20Da čhiniben kedīne būt Judendir, vašo dova so štetos, kai isis mardo po trušul Iisusos isis nadūr forostir, te čhindlo isis Juditkes, Grieķitkes, Rimskitkes.
21Juditka rašange bāredīra phendle Pilatoske: na čhin: Kraļis Judengīro, ne so Jov phendža: Me Kraļis Judengīro.
22Pilatos otphendža: so me čhindžom dova čhindžom.
23Kedi voiskakīre murša, marde po trušul Iisusos, līne Leskīre idži, te rosčhudle po štār džeļa, svako voiskakīreske muršeske pe džeļ, te hitonos; hitonos isis nasudlo, ne sāro kerdo opratunestir.
24Tejake phendle jek vavreske; nalas rozriskiras les, ne thurdas vaš leske kokalici, koneskīro jāla, — mejāl so isi rakirdo ano čhinibena: rozčhudle idži Mīre maškir penge, te vaš Mīro opratuno idžos thurdīne kokalci (Davidoskīri gili, 21, 19). Jake obgīnepen voiskākīre murša.
25Ke Iisuskīro trušul tardīne dai Leskīri, te phen Leske dakīri, Marija Kleoposkīri romni, te Marija Magdaļina.
26Iisusos, dikša da te sikļaibnangīres doi tardes, sajes miļindža, rakirla Peskīri dake: džūli! dava, tīro čhāvo.
27Togi rakirla sikļaibnangīreske: daja, daij tīri! te da brīžatir sikļaibnangīro dava lija la ke pe.
28Pošļi dava Iisusos, džinindoi, so uže sāro pšečkirdo, mejāl čhinibena pherde, rakirla: pjav.
29Doi tardija jek khoro, pherdo šutasa. Voiskakīre murša, zamočidle šutasa gubka te čhudle po isoposko kašt, te hadīne ke Leskīre ušta.
30Kedi Iisusos šut lija, te phendža: phečkirdo! te, nomukša šēro, pšedija duhos.
31Ne sir togi isis pančto dīves, togi Judi, sobi namukhen masa ko trušul ano savatunesko dīves (hai do savato isis dīves bāro), mangle Pilatos, sobi pšemāren lenge pīrenge kokali te lēn len tēlle.
32Te jake javdle voiskakīre murša, te pšeršoneske pšemardle pīrengīre kokali, te vavreske, savo isis mardo ko trušul Lesa.
33Ne, kedi dojavdle ko Iisusos, te sir dikhle Les uže mēnes, napšemardle Leskīre pīrengīre kokali;
34Ne jek voiskakīre muršendir šķeposa dija čhurje an Lesko bokos, te zāras vithadija rat te pāņing.
35Te kon dava dikša dova švatkindža, te lašņo leskīro švatkuma; jov džinel, so rakirla lašņuma, sobi tume nin mepačan.
36Hai dava javdžapes, mepherdžon Čhinibena: kokalos Leskīro menazaphadžolpes (2. Moisej. 12, 46).
37Te jake ano vār štetos Čhiniben rakirla: dikhena pe Doleske, Sajes dīne čhurje (Zaharija, 12, 10).
38Pošļi dava Iosifos Arimafejatir (sikļaibnangīro Iisuskīro, ne čhorahano strahandoi Judendir) mangja Pilatos, sobi nolen masa Iisuskīre; te Pilatos mukša, Jov gija, te nolija Iisuskīre masa.
39Javdža Nikodimos nin (jov vāgo javelas ko Iisusos rati), te jandža zakerde mirendir te alojatir, saj šel litri.
40Te jake jone līne Iisuskīre masa, te obpačkirdle les cerhensa te do lače khančkirbnaskīre drābensa, sir sajek garūvena Judi.
41Pe do štetos, kai Jov isis mardo ko trušul, isis bār, te ane bār nēvo grobos, an savo nikon nasis čhudlo.
42Doi čhudle Iisusos vaše Judengo pančto dīves, te vašo dova so grobos isis paše.
Currently Selected:
Joannostir 19: LET1933
Highlight
Share
Copy
Want to have your highlights saved across all your devices? Sign up or sign in
© British and Foreign Bible Society 1933, 2016
