Hechos 4
4
Pedro niman Juan okinuikakej imixpan on más uejueyi tekiuajkej ipan on Sanedrín*
1Chika Pedro niman Juan sanken* kinnojnotsayaj on tlakamej, oualajkej on tiopixkej iuan intlayekankau on policías ipan on ueyitiopan niman on saduceos. 2Yejuamej kualaniyaj pampa Pedro niman Juan kinmachtiayaj on tlakamej ika Jesús onoyolitij niman onokuiteu ipan itlalkon niman yejua ika on mikatsitsimej no yoliskej*. 3Okimajsikej niman okintsakukej hasta uajmostla, pampa ijkuakon ye tiotlak katka. 4Pero miyekej yejuan okakkej on temachtilistli otlaneltokakej. Niman okimpojkej san on yejuan tlakamej oajsik kanaj makuijli mil tlakamej.
5Niman uajmostla onosentlalijkej ne Jerusalén on intlayekankauan on hebreos*, on tlajtlajmatkej niman on temachtijkej ikan tlanauatijli. 6No ompa nemiya Anás on más ueyixtikaj tlayekanki intech on tiopixkej, Caifás, Juan, Alejandro niman on oksekimej yejuan nopouaj ipan ifamilia on más ueyixtikaj tlayekanki intech on tiopixkej. 7Niman ijkuak Pedro niman Juan okintlalijkej imixpan, okintlajtoltijkej:
—¿Akinon itlanauatil, noso akinon ika itoka onenkipajtijkej on tlakatl?
8Kemaj Pedro yejuan yoltentikatka ikan Espíritu Santo, okinmijlij:
—Nemejuamej tlayekankej intech on tlakamej, niman nemejuamej akin ueuetkej tlayekankej hebreos*, 9tla nemejuamej nentlajtlanij de on tlen kuajli ipan onochiu in tlakatl uilatsin, niman kenijki opajtik, nemechijlis. 10Kuajli xmatstiakan nemochimej* nemejuamej, niman nochimej on kech chanejkej ipan in país de Israel, ika in tlakatl, yejuan nikan nemixpan nemi, opajtik ikan ipoder JesuCristo yejuan ualeua Nazaret. Yejua onenkajkopilojkej ipan kojnepanojli*, niman Dios okiyolitij* niman okuiteu ipan itlalkon. 11In Jesús, yejuan ken sen tetl yejuan nemejuamej tepanchijkej xonenkiselijkej. Pero aman yejua yonochiu yakatstikaj. 12Niman xakaj okse ueli temakixtia, pampa Dios xokuajtitlan yakaj okse tlakatl ipan in tlaltikpaktli yejuan itechkopa uelis timakisaskej.
13Ijkuak on más uejueyitekiuajkej ipan on Sanedrín* okitakej ken yolchikajkej Pedro niman Juan, niman ika yejuamej xonomachtijkej* ipan escuela nion xuejueyixtokej, okintlatlachaltij niman okinomakakej cuenta ika yejuamej iuan onouikakej Jesús. 14Niman pampa on tlakatl yejuan okipajtijkej ompa inuan ijkatikatka, yejuamej xouelkej itlaj okimixkomakakej. 15Yejua ika, okinnauatijkej ma uajkisakan ne kampa onosentlalijkej on más uejueyitekiuajkej ipan on Sanedrín*, niman kemaj on tekiuajkej onotlajtlajtoltijkej. 16Kijtouayaj:
—¿Tlinon tikinchiuiliskej in tlakamej? Nochimej yejuan chantij Jerusalén kimatstokej ika yejuamej okichijkej sen ueyi milagro niman tejuamej xuelis tikiyanaskej. 17Pero san para maka más machiyas intsajlan on tlakamej on tlen okichijkej, ma tikinchikajkanauatikan para maka sa ma tenojnotsakan ikan itoka Jesús.
18Niman kemaj oksejpa okinnotskej niman okinnauatijkej para maka más tenojnotsaskej nion temachtiskej ikan itokatsin Jesús. 19Pero Pedro niman Juan otlanankilijkej:
—Xkixtlalokan nemejuamej ixpan Dios. ¿Akinon kitocarouaj tiktlakamatiskej, nemejuamej noso Dios? 20Tejuamej tej, xuelis tikajkauaskej ika tikijtoskej on tlajtlamach* yejuan yotikitakej niman yotikakej.
21Kemaj on tekiuajkej ipan on Sanedrín okinchikajkaajuakej, niman kemaj okinmakajkej. Xokinextijkej kenijki uelis kincastigaroskej pampa nochi tlakatl kiyekteneuaya Dios ipampa on tlen onochiu. 22On tlakatl, yejuan opajtik ikan on milagro, kipiyaya más de cuarenta xipan.
On tlaneltokakej okitlajtlanilijkej Dios para ma kinyolchikaua
23Ijkuak Pedro niman Juan yokinmakajkej, oyajkej ne kampa nemiyaj on oksekimej tlaneltokakej, niman okintlajtlajtouilijkej nochi tlen okimilijkej intlayekankauan on tiopixkej niman on ueuetkej tlayekankej. 24Niman ijkuak on tlaneltokakej ijkon okakkej, nochimej yejuamej onoueyikatsajtsilijkej itech Dios ikan san se inyojlo, niman okijlijkej:
—ToTEKO, tejua tiDios yejuan otikchijchiu on cielo*, niman in tlaltikpaktli, niman on mar niman nochi tlajtlamach* tlen impan onkaj. 25Tejua otikijtoj itechkopa moEspíritu Santo niman itechkopa motekitkau David:
¿Tline* najkomanaj on países?
¿Tline on tlaltikpaktlakamej kinemiliaj on tlen xitlaj* kijtosneki?
26Inreyes in tlaltikpaktli niman on tlayekankej nosentlaliaj
para kixnamikij ikan tlauejli toTEKO Dios
niman on Cristo yejuan okitlapejpenij para techmandaros.
27’Melauak ijkon onochiu pampa Herodes niman Poncio Pilato onosentlalijkej nikan ipan in ueyikalpan inuan on yejuan xhebreos* niman no inuan on hebreos*. Yejuamej tej, onosentlalijkej para okixnamikkej ikan tlauejli on moyekKonetsin Jesús yejuan otiktlapejpenij para techmandaros. 28Ijkon tej, yejuamej okichijkej nochi tlen tejua otiknek niman yotiktlalijkaj ipan moyojlo para nochiuas. 29Niman aman toTEKO Dios, xkita ken techchikajkanauatiaj, niman xkinkauili motekitkauan para ma kiteijlijkan motlajtol ikan nochi yolchikaualistli. 30Niman ikan mopoder ma kimpajtikan on kokoxkej niman ma kichiuakan tlamauisoltin niman milagros* ikan itokatsin moyekKonetsin Jesús.
31Ijkuak otlan noueyikatsajtsiliaj, ne kampa onosentlalijkej otlalolin, niman on Espíritu Santo nochimej okinyoltemitij, niman otemachtijkej itlajtol Dios ikan yolchikaualistli.
On yejuan tlaneltokaj okitexexelouilijkej tlen kipiyayaj
32Nochimej on miyekej tlaneltokakej san se inyojlo niman san se intlamachilis kipiyayaj. Niman xakaj kijtouaya tla itlaj iyaxka* on tlen kipiyaya, yej nochi on tlajtlamach* insepanyaxka katka. 33Niman ikan miyek poder, on apóstoles* sanken* tenojnotsayaj ken toTEKO Jesús onoyolitij* niman onokuiteu ipan itlalkon. Niman Dios sanoyej* okintiochiu nochimej yejuamej. 34Intsajlan xakaj nemiya yejuan itlaj kipolouaya pampa nochimej on yejuan kipiyayaj intlaluan noso inkaluan kinnamakayaj, niman on tomin kuajkiyaj 35niman kinmaktiliayaj on apóstoles*. Niman on apóstoles* kinxelouiliayaj oksekimej ken se itlaj kipolouaya. 36Ompa tetsajlan nemiya sen levita, itoka katka José, yejuan ijki okichiu. Yejua otlakat ipan on tlaluaktli itoka Chipre. Niman on apóstoles* okitokayotijkej Bernabé yejuan kijtosneki teyoltlalijketl. 37Yejua in tlakatl okinamakak sen tlajli niman on tomin okuajkik niman okinmaktilij on apóstoles* para kimpaleuiskej on yejuan kimpoloua.
Currently Selected:
Hechos 4: nguNT
Highlight
Share
Copy
Want to have your highlights saved across all your devices? Sign up or sign in
© 1987, 2012 Wycliffe Bible Translators, Inc. All rights reserved.
