Hechos 5
5
Ananías niman Safira otlajtlakojkej
1Pero sen tlakatl itoka Ananías iuan Safira isiuau no okinamakakej sen tlajli. 2In tlakatl okixpachoj tlajkotipan on tomin niman okinmaktilij on apóstoles* ken nochi yeskia. Niman isiuau iuan okimat. 3Niman kemaj Pedro okijlij:
—Ananías, ¿tline* otikauilij Satanás okalak ipan moyojlo niman omitschiualtij para tikajkayauasnekiya on Espíritu Santo? ¿Tline tej, seki otikixpachoj on tomin yejuan ika omitstlaxtlauilijkej on motlal? 4Ijkuak xe tiknamakaya, ¿xmoyaxka* katka on tlajli? Niman ijkuak otiknamakak, ¿xmoyaxka* katka on tomin? ¿Tline tej, ijkon otiknemilij tikchiuas? Xotitechkajkayau tejuamej, yej otikajkayau Dios.
5Ijkuak Ananías ijkin okak, ouetstiaj niman omik. Niman nochimej yejuan okimatkej on tlen onochiu sanoyej* onomojtijkej. 6Kemaj oualajkej semej telpokamej, niman okitejkuixkej itlalnakayo. Kemaj okuikakej niman okitokatoj.
7Kanaj ipan okse yeyi hora okalakito on isiuau Ananías. Yejua xkimatiya tlinon yonochiu. 8Kemaj Pedro okitlajtoltij:
—Xnechijli, ¿melauak san ichkich* in onenkinamakakej nemotlal?
Niman yejua okinankilij:
—Kemaj, san ichkich.
9Kemaj Pedro okijlij:
—¿Man tline onemotlajtolmakakej para nenkitlatlataskej iEspíritu toTEKO? Aman nikan kiauatenko uajlauij on yejuan yokitokatoj moueuentsin, niman aman tejua no mitsuikaskej niman mitsontôkaskej.
10Kemaj nimantsin ouetstiaj ikxitlan Pedro niman omik. Ijkuak okalakitoj on telpokamej, okitatoj yomik. Yejuamej okixtijkej niman okitokatoj inakastlan iueuentsin. 11Niman nochimej on tlaneltokakej, niman nochimej yejuan okimatkej on tlen onochiu, sanoyej onomojtijkej.
Miyek milagros* niman tlamauisoltin okichijkej on apóstoles*
12On apóstoles* kichiuayaj miyek milagros* niman tlamauisoltin intech on chanejkej. Niman nochimej on tlaneltokakej nosentlaliayaj ipan iCorredor Salomón. 13Niman on oksekimej chanejkej xkinekiyaj teuan noneloskej, maski kipiyayaj miyek tetlakaitalistli intech on apóstoles* niman on tlaneltokakej. 14Niman on yejuan tlaneltokayaj itech toTEKO más miyekiyayaj, tlakamej niman siuamej. 15Ijkon tej, kinuajkixtiayaj on kokoxkej ipan calles niman kintlaliayaj ipan intlapech noso ipan impetl para ijkuak panos Pedro maski san itlaseuajlo* kimajsis semej yejuamej. 16Niman de on kalpanmej yejuan onokej iyeualkan Jerusalén, no kinuajuikayaj ompa inkokoxkauan niman on yejuan kimpiyayaj on xkuajkualtin espíritus. Niman nochimej pajtiyaj.
Opeu kintlaueltotokatinemij on apóstoles*
17Kemaj on inmasueyitlayekankau on tiopixkej niman on saduceos yejuan iuan nouikaj sanoyej okinnexilolitakej on apóstoles*. 18Yejua ika tej, yejuamej okimajsikej on apóstoles* niman okintsakuatoj. 19Pero ijkuak tlayoua sen ángel, yejuan toTEKO okuajtitlan, okitlapoj itsakuijlou* on cárcel, okinkixtij, niman okinmijlij:
20—Xuiyan niman xmomanakan ne ipan on ueyitiopan. Xkintlajtlajtouilikan on tlakamej on temachtijli ika in yenkuik nemilistli.
21On apóstoles* okitlakamatkej niman ijkuak otlanes okalakkej ipan on ueyitiopan niman opeu temachtiaj.
Ijkuak oajsik inmasueyitlayekankau on tiopixkej niman on yejuan iuan ompa nemiyaj, okinsentlalijkej nochimej on tetlakanonotskej niman nochimej on ueuetkej tlayekankej hebreos*. Kemaj okintitlankej on policías ne ipan cárcel para kominnanaskiaj on apóstoles*. 22Pero ijkuak on policías oajsikej xokinnextijkej on apóstoles*. Yejua ika ouajnokuepkej niman okinmachistitoj on más uejueyitekiuajkej ipan on Sanedrín*. 23Niman okijtojkej:
—Ijkuak otajsikej, otiknextijkej on cárcel kuajli tsakutikaj ikan llave niman on soldados majmantokej ixpan on tsakuijlomej. Pero ijkuak otitlatlapojkej xakaj otiknextijkej ompa tlaijtik.
24Ijkuak okakkej on tlajtojli, intlayekankauan on tiopixkej niman intlayekankau on policías de on ueyitiopan oometlamatkej*, niman kinotlajtoltiayaj kanon onkisas nochi in tlen onochiu. 25Kemaj oyejkok sen tlakatl yejuan okinmijlij:
—Xkakikan, on tlakamej yejuan onenkintsakukaj nemij ne ueyitiopan, niman kinmachtiaj on tlakamej.
26Kemaj on intlayekankau on policías niman on policías oyajkej niman okimanatoj on apóstoles* san kuajlotika, pampa kinmakajsiyaj on tlakamej. Kuitiayaj ika on tlakamej kinmojmotlaskiaj. 27Ijkuak okinuajuikakej, okinmankej inmixpan on más uejueyi tekiuajkej ipan on Sanedrín*, niman on más ueyi tlayekanki intech on tiopixkej. Ijkin okinmijlij:
28—Sanoyej otemechchikajkanauatijkej para maka sa xtemachtikan ikan itoka Jesús. Aman xkitakan on tlen onenkichijkej. Yonenkitemiltijkej ikan nemotemachtil imanian nochi Jerusalén niman nenkinekij nentechtlajtlakoltiskej ika imikilis on tlakatl.
29Kemaj Pedro niman on oksekimej apóstoles* otlanankilijkej:
—Kitocaroua achtoj tiktlakamatiskej Dios xken nemejuamej yejuan san nentlakamej. 30IminDios on toachtojtajuan okiyolitij* niman okuiteu Jesús on yejuan onenkimiktijkej ijkuak onenkajkopilojkej ipan kojnepanojli*. 31Dios okitlalij Jesús ueyi tlayekanketl niman temakixtijketl ne iyekmakopa para kinkauilis on hebreos* ma noyolpatlakan niman para kipopoloskej nochi kech intlajtlakol. 32Niman tejuamej tiktepanextiliaj nochi in kech tlajtlamach*, niman no kitepanextilia on Espíritu Santo yejuan okinmakak Dios on yejuan kitlakamatij.
33Ijkuak on más uejueyi tekiuajkej ipan on Sanedrín* ijkon okakkej, sanoyej kualaniyaj hasta kinekiliayaj para kinmiktiskej on apóstoles*. 34Pero ne intsajlan on tetlakanonotskej nemiya sen fariseo itoka Gamaliel, yejuan temachtijketl katka ika on tlanauatijli. Nochi tlakatl sanoyej kitlakaitaya. Yejua onotelkets niman otlanauatij ma kinkixtikan on apóstoles* achijtsin ne kiauak. 35Kemaj okinmijlij on más uejueyi tekiuajkej ipan on Sanedrín:
—Tlakamej hebreos*, kuajli xmonemilikan tlinon nenkinchiuiliskej in tlakamej. 36Xkelnamikikan nemejuamej ika nemiya sen tlakatl itoka Teudas yejuan kijtouaya ika yejua sen tlakatl ueyixtikaj, niman okistinen iuan kanaj naui ciento tlakamej. Pero se tonajli yakaj okimiktij niman nochimej yejuan iuan kistinemyaj onochajchayajkej*, niman nochi ompa otlan. 37Más sakin* Judas, yejuan chanej* Galilea, ouajlaj ipan on tonaltin ijkuak onijkuilolok ne ipan on poualistli. Niman miyekej iuan okistinenkej, pero no omik niman nochimej yejuan iuan kistinemiyaj onochajchayajkej*. 38Yejua ika, nemechijlia xkinkauakan in tlakamej. Maka itlaj ika xmokalaktikan, pampa on intemachtil on apóstoles* noso on tlen nochiua tla san intech tlakamej kisa, popoliuis. 39Pero tla kisa itech Dios, xnenueliskej nenkixoxotoniskej, yej nenkitlauelixnamikiskej Dios.
40Niman on más uejueyi tekiuajkej ipan on sanedrín* okiselijkej on tlen Gamaliel okijtoj. Kemaj ijkuak okinuajuikakej on apóstoles*, okinnotskej, niman ijkuak yokinuijuitekej, okinnauatijkej maka sa tenojnotsakan ikan itoka Jesús. Kemaj okinmakajkej. 41On apóstoles* ouajkiskej ne imixpan on más uejueyi tekiuajkej ipan on Sanedrín* ikan paktli, pampa Dios okinkauilij okimpijpinauijkej pampa kineltokayaj Jesús. 42Niman mojmostla ne ueyitiopan niman techajchan xkajkauayaj ika temachtiayaj niman tenojnotsayaj itechkopa JesuCristo.
Currently Selected:
Hechos 5: nguNT
Highlight
Share
Copy
Want to have your highlights saved across all your devices? Sign up or sign in
© 1987, 2012 Wycliffe Bible Translators, Inc. All rights reserved.
