San Juan 11
11
On tlakatl itoka Lázaro omik
1Nemiya sen tlakatl itoka katka Lázaro yejuan kualouaya. Yejua chanej* katka ipan on kalpan itoka Betania yejuan no ikalpan María niman Marta, on ikniuan. 2(In María yejua okitekilijka toTEKO on ajuiyalistli itoka nardo ipan ikxiuan niman okinuajuats ikan itson. Yejua ikniu katka Lázaro yejuan kualouaya.) 3On omemej siuamej iknijtin otlatitlankej ijkin ma kijlitij Jesús:
—ToTEKO, motejtlajsokaikniu* kualo.
4Ijkuak Jesús ijkon okak, okijtoj:
—On kualolistli xkimiktis, yej san para noteititis iueyilis Dios niman no itechkopa kiteititis noueyilis nejua yejuan niiKoneu Dios.
5Jesús kintlajsojtlaya* Marta inuan ikniuan María niman Lázaro. 6Pero maski okijlijkej ika Lázaro kualouaya, ome tonajli más onokau ne kampa nemiya. 7Kemaj okinmijlij on inomachtijkauan*:
—Ma tiuiyan ne Judea oksejpa.
8Kemaj on nomachtijkej* okijlijkej:
—Temachtijketl, san kemach katka on hebreos* yejuan ompa chanejkej kinekiyaj mitsmiktiskej ikan temej, ¿niman oksejpa tikneki tias ompa?
9Jesús okinmijlij:
—¿Tline* xmelauak kipiya majtlaktli uan ome horas on tonajli? Tej, tla se kistinemi ikan tonajli, xnajantikisa pampa nochi nesi ikan on tlauijli yejuan onkaj ipan in tlaltikpaktli. 10Pero tla se kistinemi ipan yeuajli, najantikisa pampa xkipiya tlauijli.
11Kemaj okinmijlij Jesús:
—Totetlajsojkaikniu Lázaro kochi, pero nikontlachaltis.
12Kemaj on nomachtijkej* okijlijkej:
—ToTEKO, tla yokoch, kijtosneki uelis pajtis.
13Pero Jesús kijtosnekiya ika Lázaro yomik, niman on nomachtijkej* kinemiliayaj ika Lázaro san kochiya. 14Yejua ika Jesús más kuajli okinmijlij:
—Lázaro yomik. 15Más kuajli para nemejuamej ika xompa ninemiya ijkuak Lázaro kualouaya, pampa aman uelis nikchiuas itlaj yejuan mechpaleuis nentlaneltokaskej. Yejua ika nipaki. Pero ma tiauiyan tikontaj.
16Kemaj Tomás, yejuan no kijliayaj kouatsin*, okinmijlij on oksekimej nomachtijkej*:
—No ma tiuiyan para san sekan timikiskej iuan Jesús.
Jesús okitemakak nemilistli niman oteyolitij
17Ijkuak Jesús oajsik okimachistijkej ika Lázaro ye kipiya naui tonajli ika okitôkakej. 18Betania nisiu katka Jerusalén. San kipiyaya kanaj ome kilómetro uan tlajko, 19niman miyekej hebreos* oyajkej okinnotsatoj Marta niman María para kinyoltlaliskej pampa omik inmikniu.
20Ijkuak Marta okimat ika Jesús ompa ye ajsitiaya, okis okinamikito, pero María onokau inchan. 21Niman Marta okijlij Jesús:
—NoTEKO, tla nikan tinemiskia, nokniu xmikiskia. 22Pero nejua nikmatstikaj ika Dios mitsmakas nochi tlen tiktlajtlanilis.
23Jesús okijlij:
—Mokniu oksejpa yoliuis*.
24Marta okijlij:
—Kemaj, nejua nikmatstikaj ika oksejpa yoliuis* ijkuak yoliuiskej* niman nokuiteuaskej on mikatsitsimej ipan on sa ika nochi tonajli.
25Kemaj Jesús okijlij:
—Nejua nikinyoliuitia on yejuan yomikkej niman nikinmaka nemilistli oksejpa. Yejuan nechneltokas, maski mikis, nemis oksejpa. 26Niman nochi yejuan sanken* nemi niman nechneltoka, nemis para nochipa. ¿Tikneltoka in?
27Yejua okijlij:
—Kemaj noTEKO. Nejua nikneltoka ika tejua tiCristo yejuan Dios okuajtitlan para tlamandaros. Niman nikneltoka ika tejua tiiKoneu Dios yejuan ye ijki onkatka para uajlas ipan in tlaltikpaktli.
Jesús ochokak
28Ijkuak ijkon yokijtoj, Marta oyaj okinotsato María on ikniu, niman ijkin san okichtakaijlij:
—On Temachtijketl nikan nemi niman mitsnotsa.
29Ijkuak María ijkon okak, nimantsin onotelkets niman oyaj okitato Jesús. 30Jesús sanken* xe kalakiya ne kalpan, yej nemiya kampa Marta okinamikito. 31Niman ijkuak on hebreos* yejuan kiyoltlaliayaj María ichan okitakej ika María nimantsin okis, okikuitlapanuijkej. Yejuamej kinemiliayaj ika María yau itech on tlalkontli para ompa onchokas.
32Kemaj, ijkuak oajsik kampa nemiya Jesús, María onotlakuantelkets ikxitlan, niman okijlij:
—NoTEKO, tla nikan tinemiskia, nokniu xmikiskia.
33Ijkuak Jesús okitak ika María niman on hebreos* yejuan ompa iuan oyejkokej sanoyej* chokaj, yejua no sanoyej onajman niman iminuan oyolkexan, 34niman okintlajtoltij:
—¿Kanon onenkitôkakej?
Niman okijlijkej:
—ToTEKO, xuajla xkitaki.
35Kemaj Jesús ochokak. 36Niman on hebreos* okijtojkej:
—Xkitakan ken sanoyej kitlajsojtlaya*.
37Pero semej yejuamej okijtojkej:
—In yejuan okimpajtij ixtololojuan on ciego, ¿xueliskia itlaj kichiuaskia para Lázaro maka mikiskia?
Lázaro oyoliu niman onoketsteu ipan itlalkon
38Jesús ikan miyek iyolkexanalis okinisiuij on tlalkontli. On tlalkontli sen teostotl katka niman kipiyaya sen tetl yejuan ika tentsakutikatka. 39Jesús okijtoj:
—Xkejkuanikan on tetl.
Pero Marta yejuan ikniu on mikatsintli, okijlij:
—NoTEKO, amantsin sanoyej yomoloniak pampa ye kipiya naui tonajli ika omik.
40Pero Jesús okijlij:
—¿Tlen xonimitsijlij tla titlaneltoka tikitas iueyilis Dios?
41Kemaj okejkuanijkej on tetl. Niman Jesús oajkotlachix ne iluikak, niman okijtoj:
—NoTajtsin, nimitsmaka tlaxtlauijli pampa tinechkaki. 42Nejua nikmatstikaj ika nochipa tinechkaki, pero aman ijkin nikijtoua impampa in tlakamej yejuan nikan nemij, para ma kineltokakan ika tejua otinechajtitlan.
43Ijkuak ijkon okijtoj, kemaj ikan chikauak tlajtojli okinots Lázaro:
—¡Lázaro, xuajkisa!
44Niman on mikatsintli ouajkis uajtejkuixtiaya ipan imauan niman ikxiuan ikan ilpikatl niman ixayak tejkuixtikatka ikan tela. On hebreos* ijkon kitekitiltiayaj ijkuak kintejkuiyaj on yejuan yomikkej. Jesús okinmijlij:
—Xtojtomakan niman xkauilikan ma uiya.
On fariseos* okitlajtouilijkej kenijki kimiktiskej Jesús
(Mt. 26.1-5; Mr. 14.1-2; Lc. 22.1-2)
45Miyekej hebreos* yejuan oualajkej iuan María okineltokakej Jesús ijkuak okitakej on tlen okichiu. 46Pero sekimej oyajkej okintatoj on fariseos* niman okintlajtlajtouilijkej on tlen Jesús okichiu. 47Yejua ika, on fariseos* niman intlayekankauan on tiopixkej onosentlalijkej inuan on más uejueyi tekiuajkej ipan on sanedrín* niman okijtojkej:
—¿Tlinon tikchiuaskej? In tlakatl kichiua miyek milagros. 48Tla ijki tikauiliskej ma kichiua, nochi tlakatl kineltokas niman on romanos kixoxotoniskej toueyitiopan niman in topaís.
49Pero se de yejuamej, itoka Caifás, yejuan ipan on xipan más ueyi intlayekankau katka on tiopixkej, okinmijlij:
—Nemejuamej xitlaj* nenkimatij. 50Nemejuamej xnenkimatij ika para tejuamej más kuajli yes tla sen tlakatl mikis para maka kixoxotoniskej nochi in país.
51Pero Caifás ijkon okijtoj xpampa melauak ijki okis ipan iyojlo. Yejua okijtoj pampa yejua más ueyi intlayekankau katka on tiopixkej ipan on xipan, niman Dios okitlamachilistij para ma kijto ika Jesús mikis ipampa on país kampa chantij on hebreos*. 52Niman ijkon okijtoj xsan ipampa on país, yej no para kinsentlalis nochimej on ikoneuan Dios yejuan nochajchayajtinemij*. 53Yejua ika desde ipan on tonajli on tekiuajkej hebreos* okisetlalilijkej para kimiktiskej Jesús. 54Yejua ika tej, Jesús xok kistinemiya intsajlan on hebreos*, yej okis de ne Judea niman oyaj ne ipan sen kalpan itoka Efraín yejuan nisiu on xalpatlajkan. Ompa onokau inuan inomachtijkauan*.
55Ye nisiu katka para on hebreos* kichiuaskej on iluitl Pascua*, niman miyek tlakatl yejuan ualeuayaj nochiuiyan ipan on país oyaj ne Jerusalén para nochipauaskej ken intlanauatil on hebreos* tlanauatia. 56Jesús kitejtemojtinemiyaj. Niman ijkuak ye nemiyaj ne ipan on ueyitiopan, ijkin kinotlajtoltiayaj:
—¿Tlinon nenkinemiliaj? ¿Nenkinemiliaj ika uajlas ipan in iluitl, noso ka?
57On fariseos* niman intlayekankauan on tiopixkej yotlanauatijkaj ika tla yakaj kimati kanon nemi Jesús, ma kitemachistikan para uelis kajsiskej.
Currently Selected:
San Juan 11: nguNT
Highlight
Share
Copy
Want to have your highlights saved across all your devices? Sign up or sign in
© 1987, 2012 Wycliffe Bible Translators, Inc. All rights reserved.
