San Juan 12

María ikniu Lázaro, okitlalilij Jesús ajuiyalistli

(Mt. 26.6-13; Mr. 14.3-9)

1Ijkuak chikuasen tonajli poliuiya ika ajsis on iluitl Pascua*, Jesús oyaj ipan on kalpan itoka Betania. Lázaro on tlakatl yejuan Jesús yokiyolitijka, chantiya ipan on kalpan. 2Marta kintlamakaya, niman Lázaro katka semej de on tlakamej yejuan ompa tlakuajtikatkaj iuan Jesús. 3Kemaj, María okuajkik kanaj tlajko litro ajuiyalistli itoka nardo, yejuan sanoyej* patioj. Niman ikan on ajuiyalistli okimaltij ikxiuan Jesús niman kemaj okinuajuats ikan itson. Ijtik on kajli oten ikan on ajuiyalistli. 4Kemaj Judas Iscariote, (ikoneu Simón, yejuan no teuan tlapouajli katka intech on majtlaktli uan ome inomachtijkauan* Jesús yejuan más sakin okitemaktilij), okijlij:

5—¿Tline* xmás kuajli nonemakaskia in ajuiyalistli ika yeyi ciento denarios* niman ika on tomin tikimpaleuiskiaj on mayankej?

6Pero Judas ijkon okijtoj xpampa melauak kimikneliaya on mayankej, yej pampa yejua tlachtekketl katka. Yejua kejeuaya on bolsa ikan tomin niman kichtekiya seki on tlen kitlaliayaj ipan on bolsa. 7Kemaj Jesús okijlij:

—Maka xpajsolo. Yejua kejejtikatka in ajuiyalistli para nechmatlaloskia ipan notlalnakayo ipan on tonajli ijkuak nechtôkaskej ipan notlalkon. 8Nochipa nemotsajlan nenkimpiyaskej on mayankej, pero nejua xnochipa nikan nennechpiyaskej.

On hebreos* kimiktisnekiyaj Lázaro

9Miyekej on hebreos* okimatkej ika Jesús nemiya Betania niman ompa oyajkej. Oyajkej xsan para kontaskej Jesús, yej no para kontaskej Lázaro yejuan Jesús okiyoliuitij* niman oketsteu ne intsajlan on mikatsitsimej. 10Yejua ika intlayekankauan on tiopixkej okitlajtouilijkej para no kimiktiskej Lázaro, 11pampa san yejua ipampa miyekej on hebreos* ye notsijtsinkixtiayaj intech niman yej kineltokayaj Jesús.

Jesús okalak Jerusalén ken sen rey

(Mt. 21.1-11; Mr. 11.1-11; Lc. 19.28-40)

12Uajmostla miyek tlakatl yejuan ye nemiya Jerusalén para kipanoskej on iluitl Pascua* okakkej ika Jesús ajsis ompa Jerusalén. 13Yejua ika, okitekej imauan on soyatl niman okiskej okinamikitoj Jesús. Yejuamej ijkin tsajtsitiayaj:

—¡Ma kiseli yekteneualistli! ¡Ma Dios kitiochiua on yejuan uajlau ikan itokatsin toTEKO! ¡Ma Dios kitiochiua on iRey Israel!

14Jesús okinextij sen poloko* niman ipan onotlalij ken kijtoua on Yektlajkuilojli:

15Maka xmomojtikan nemejuamej yejuan nenchantij ipan on ueyikalpan itoka Sión.

Xkitakan, nemoRey.

Ualetiu ipan sen poloko.

16Achtoj on inomachtijkauan* Jesús xokajsikamatkej on tlajtlamach*. Pero ijkuak Jesús otlejkok ne iluikak, okelnamikkej ika nochi on ye ijki tlajkuilolnestikatka itech yejua, niman ijki mero ipan onochiu.

17On tlakamej yejuan nemiyaj iuan Jesús ijkuak okonots Lázaro ipan itlalkon para okiyoliuitij, kitetlajtlajtouiliayaj nochi tlen okitakej. 18Yejua ika, miyek tlakatl oyajkej okinamikitoj Jesús pampa okimatkej on milagros* yejuan okichiu. 19Kemaj on fariseos* okinojlijkej:

—¡Xkitakan, xitlaj* otiktlankej! ¡Xkitakan, nochi tlakatl ipan in tlaltikpaktli okiselijkej yejua!

Sekimej griegos* okitejtemojkej Jesús

20Intsajlan on tlakamej yejuan oyajkej Jerusalén para okimauistilitoj Dios ipan on iluitl, nemiyaj sekimej yejuan chanejkej katkaj Grecia. 21Yejuamej okinisiuijkej Felipe yejuan chanej* katka Betsaida de Galilea, niman ijkin okijlijkej:

—Señor, tiknekij tikitaskej Jesús.

22Felipe oyaj niman okitlajtlajtouilij Andrés on tlen okijlijkej. Niman kemaj on omemej san sekan oyajkej okitlajtlajtouilitoj Jesús on tlen kijtouayaj. 23Niman Jesús okinmijlij:

—Yoyejkok on tonajli ijkuak nejua yejuan oninochiu Tlakatl nikselis ueyilistli. 24Ika tlen melauak nemechijlia ika tla xachtopa nimikis, xuelis niktemakas nemilistli. Nejua no niijki ken se iteyo on trigo. Tla se iteyo on trigo xkitôkaj ipan tlajli, xueli kitlakitia miyek, yej nokaua iselti. Pero tla kitôkaj ipan tlajli, tla ijkon, noskaltia niman kitlakitia miyek. 25Yejuan kichiua kanika para maka kipolos inemilis ipampa Cristo xkipiyas nemilistli yejuan para nochipa. Pero on yejuan kitemaka inemilis ipampa Cristo, kiselis nemilistli para nochipa. 26Tla yakaj kineki nechtekipanos, ika onkaj yas nouan, niman ijkon kampa nejua ninemis, no ompa nemis on yejuan nechtekipanos. Tla yakaj nechtekipanos, noTajtsin kitlakaitas.

Jesús okitemachistij ika kimiktiskej

27’Aman sanoyej ninoyolkokoua. ¿Tlinon nikijlis noTajtsin? ¿Nikijlis: “NoTajtsin, xnechmanaui de on tlajyouilistli yejuan aman nopan nochiuas”? ¡Ka! Xijkon nikijlis pampa yejua ika oniuajlaj ipan in tlaltikpaktli. 28NoTajtsin, xchiua para ma mitsueyilikan.

Kemaj okakistik sen tlajtojli de ne iluikak yejuan okijtoj: “Yonikchiu para ma nechueyilikan, niman oksejpa nikchiuas para ma nechueyilikan.”

29Niman on tlakamej yejuan ompa tlakaktikatkaj okijtojkej ika okakistik sen tlakomonajli, niman oksekimej kijtouayaj ika sen ángel okuajnots.

30Kemaj Jesús okinmijlij:

—On tlajtojli okakistik xpara nejua nikakis, yej para nemejuamej nenkakiskej. 31Aman yoyejkok on tonajli ijkuak Dios kinyolkuitis niman kintlajtlakolmakas nochimej in tlaltikpaktlakamej. Niman aman yejua kixtilis ipoder on diablo* yejuan kimandaroua in tlaltikpaktli. 32Niman ijkuak nechajkopiloskej ipan kojnepanojli* nikan ipan in tlaltikpaktli, sano nejua nikyoltilanas nochi tlakatl notech.

33Ijkuak ijkon okijtoj, okitekakistilij kenijki mikis ipan on kojnepanojli. 34Niman ijkuak on tlakamej ijkon okakkej, okijlijkej:

—On Yektlajkuilojli techmachistia ika Cristo nemis para nochipa. Yejua ika, ¿tline tejua tikijtoua ika on yejuan onochiu Tlakatl ika onkaj kajkopiloskej? ¿Akinon on yejuan onochiu Tlakatl?

35Kemaj Jesús okinmijlij:

—Nejua yejuan nitlauijli ninemis nemotsajlan sa keski tonaltin más. Yejua ika, xmouikakan ipan on notlauil chika ninemi nemouan, tlamo on tlayouajlotl mechtlanis. Sen tlakatl yejuan nejnemi ipan tlayouajlotl xkimati kanon yau. 36Xneltokakan notlauil chika ninemi nemotsajlan para on tlauijli mechyekanas.

Ijkuak Jesús otlan kijtoua in tlajtlamach*, oyaj niman yejuamej xok okimatkej kanon nemiya.

On hebreos* xokineltokakej Jesús

37Maski Jesús okichiu miyek milagros* imixpan, xkineltokayaj. 38Ijkon ye onkatka para nochiuas on tlen okijkuiloj on tiotlajtojketl Isaías:

ToTEKO, ¿akinon yokineltokak totemachtil?

Maski okitakej mopoder, ¿akinon tlaneltoka?

39No xueliyaj kineltokayaj, pampa Isaías ijkin no okijkuilojka:

40Dios okinciegojtilij niman okinyoltechikau.

Ijkin okichiu para maka ma kajsikamatikan tlinon kijtosneki on tlen okitakej,

niman maka tlaneltokaskej impan inyojlo,

niman para maka ma uajnokuepakan notech para nikintlapojpoluis.

41Yejua in tlajtlamach* okijtoj Isaías pampa okitak iueyilis Jesús niman otlajtoj itechkopa yejua.

42Maski ijkon okijtoj on tlajtojli, miyekej on hebreos* okineltokakej Jesús, hasta on yejuan tekiuajkej. Pero, pampa kinmakajsiyaj on fariseos*, xkijtouayaj ika tlaneltokaj tlamo kinuakixtiskej ipan on sinagoga*. 43Ijkon tej, xkijtouayaj ika tlaneltokaj pampa yejuamej más kuelitayaj kiseliskej tlakaitalistli de on tlakamej xken kiseliskej tlakaitalistli de Dios.

Itlajtol Jesús yejua okintlajtlakolmakak on tlakamej

44Jesús okijtoj ikan chikauak tlajtojli:

—Yejuan nechneltoka xsan nejua nechneltoka, yej no kineltoka noTajtsin yejuan onechajtitlan. 45Niman on yejuan nechita no kita on yejuan onechajtitlan. 46Nejua oniuajlaj ipan in tlaltikpaktli ken sen tlauijli para on yejuan nechneltokas xnemis ipan tlayouajlotl. 47Tla yakaj kaki notlajtol niman xkitlakamati, xnejua nikyolkuitis nion nikitlajtlakolmakas, pampa nejua oniuajlaj xpara nikinyolkuitis niman nikintlajtlakolmakas in tlaltikpaktlakamej, yej para nikinmakixtis. 48Pero ye nemi akin kiyolkuitis niman kitlajtlakolmakas on yejuan xnechselia niman xkitlakamati notlajtol. On tlajtojli yejuan yonikijtoj yejua kiyolkuitis niman kitlajtlakolmakas ipan on sa ika nochi tonajli. 49Ijkon nochiuas pampa nejua xnikijtoua on tlen san nejua niknemilia, yej noTajtsin, yejuan onechajtitlan, yejua onechnauatij on tlen nikijtos niman nikteititis. 50Niman nikmatstikaj ika on tlen noTajtsin tlanauatia kitemaka nemilistli yejuan para nochipa. Yejua ika, on tlen nejua nikijtoua, nikijtoua on ken yejua onechijlij.

Currently Selected:

San Juan 12: nguNT

Highlight

Copy