San Lucas 24

Jesús oyoliu niman onokuiteu ipan tlalkontli

(Mt. 28.1-10; Mr. 16.1-8; Jn. 20.1-10)

1Ipan on achtoj tonajli ipeuyan on semana, on siuamej sanoyej* uelipan oyajkej itech on tlalkontli. Yejuamej okiktikej on chaualistli ajuiyak yejuan okikuektlalijkej. Niman no okinuikakej oksekimej siuamej. 2Ijkuak ompa oajsikej, okitakej ika on tetl yejuan ika tentsakutikatka on tlalkontli yokejkuanijkaj. 3Yejuamej okalakitoj ijtik on tlalkontli, pero xokinextijkej itlalnakayo Jesús. 4Chika yejuamej xkajsikamatiyaj tlinon onochiu, nimantsin omemej tlakamej ikan petlanki tlakentli* ouajnonextijkej ompa intech majmaniyaj. 5On siuamej onopachojkej hasta ipan tlajli. Pero on tlakamej okinmijlijkej on siuamej:

—¿Tline* intsajlan on mikatsitsimej nenkitejtemouaj on yejuan yoltikaj? 6Yejua xnikan nemi. Yejua tej, yoyoliu* niman yonokuiteu. Xkelnamikikan tlinon omechijlij ijkuak sanken* nemiya nemouan ne Galilea. 7Omechijlij ika yejua yejuan onochiu Tlakatl ika onkatka kitemakaskej ipan inmauan on tlajtlakolejkej, niman ika kajkopiloskej ipan kojnepanojli*, niman ipan yeyi tonajli yoliuis* niman nokuiteuas ipan itlalkon.

8Kemaj on siuamej okelnamikkej on tlen Jesús okinmijlijka. 9Niman ijkuak youajnokuepatoj de itech on tlalkontli, nochi okintlajtlajtouilijkej on majtlaktli uan se apóstoles* niman nochimej on oksekimej. 10On siuamej yejuan okinmachistitoj on apóstoles yejuamej in katkaj: María Magdalena, Juana niman María on inanaj Santiago inuan on oksekimej siuamej. 11Pero on apóstoles* san okinuejuetskilijkej ika on tlen yejuamej okinmijlijkej niman xokineltokakej.

12Pero Pedro ouajnotelkets niman onotlaloj hasta itech on tlalkontli. Ijkuak yejua onopachoj para ontlachix ijtik on tlalkontli, san okitak on vendas de lino yejuan ika okitejkuixkaj Jesús. Kemaj yejua onokuep niman tlamojkaitaya ipampa on tlen onochiu.

Jesús okinnotitij omemej tlaneltokakej yejuan yayaj para Emaús

(Mr. 16.12-13)

13Sano ipan on tonajli, omemej tlaneltokakej yayaj para on kalpan itoka Emaús, yejuan onkaj kanaj majtlaktli uan se kilómetros de Jerusalén. 14On omemej tlajtlajtojtiayaj de nochi on tlen onochiu. 15Chika yejuamej tlajtlajtojtiayaj niman notenkuikuitiayaj ika in tlajtlamach*, sano Jesús okinnisiuij niman opeu inuan nejnemi. 16Niman maski kitayaj Jesús, ken itlaj kintsakuiliaya para xkixmatiyaj akin yejua. 17Kemaj Jesús okinmijlij:

—Chika nemejuamej nennejnemij, ¿tlinon ika nemotenkuikuitiuij? ¿Tline nemajmanaj?

18Se de yejuamej, itoka Cleofas, okinankilij:

—Nochi tlakatl kimatstikaj tlinon yonochiu ipan in tonaltin ne Jerusalén. ¿Tlen san tejua de nochi kech ompa chantij ne Jerusalén xtikmati on tlen yonochiu?

19Niman Jesús okinmijlij:

—¿Tlinon tej, onochiu?

Niman yejuamej okijlijkej:

—On tlen ipan onochiu Jesús yejuan ualeua Nazaret. Yejua sen tiotlajtojketl katka niman ixpan Dios niman imixpan on tlakamej okipix ueyi poder ika on tlen kichiuaya niman ika on tlen kijtouaya. 20Pero intlayekankauan on tiopixkej niman on tekiuajkej ipan on ueyitiopan okitemaktilijkej intech on tekiuajkej para okitlajtlakolmakakej para mikis niman para okajkopilojkej ipan kojnepanojli*. 21Tejuamej tikuitiayaj yejua kimakixtis in país de Israel. Niman aman ye kipiya yeyi tonajli ika ijkon onochiu. 22Maski no ijki sekimej siuamej yejuan touan nopouaj otechmojkatlachaltijkej aman. Ijkuak sanimantsin, oyajkej itech on tlalkontli, 23pero xokinextijkej itlalnakayo Jesús ijtik on tlalkontli. Ijkuak onokuepkej, okijtojkej yej okintakej sekimej ángeles ken intemikpan yejuan okinmijlijkej ika Jesús nemi yoltikaj. 24Kemaj sekimej tocompañeros oyajkej itech on tlalkontli, niman okitakej ken on siuamej okijtojkej. Pero xokitakej Jesús.

25Kemaj Jesús okinmijlij:

—¡Sanoyej mechpoloua kajsikamatilistli, niman sanoyej nemouejkauaj para nenkineltokaj nochi on tlen okijtojkej on tiotlajtojkej! 26¿Tlen xokijtojkej on tiotlajtojkej ika Cristo ika onkaj tlajyouis ijkuak xe tlejkoua iluikak para tlamandaros?

27Kemaj opeu kinmelajkaijlia nochi on temachtijli kampa kijtoua de yejua ipan on Yektlajkuilojli. Ouajpeu ipan on itlajkuiloluan Moisés niman kemaj on tlajkuiloltin yejuan nochimej on tiotlajtojkej okijkuilojkej.

28Ijkuak oajsikej ipan on kalpan kampa yayaj, nesiya ken Jesús yaya más tlayakapan. 29Pero yejuamej onotenkojtilijkej para ompa inuan ma nokaua niman okijlijkej:

—Nikan touan xmokaua, pampa ye tiotlaktitikaj, niman saniman ye tlayouas.

Yejua ika, Jesús ompa inuan onokau. 30Niman ijkuak inuan yeuatikatka itech mesa, okontilan on pan, niman okitiochiu. Kemaj okitlapan niman okinmamakak. 31Kemaj nimantsin oixtlajtlapojkej niman okixmatkej ika yejua Jesús, niman kemaj yejua san ouajnopoloj. 32Niman ijkin kinojliayaj:

—¿Tlen xmelauak sanoyej otechpaktij chika techajnojnotstiaya ipan ojtli niman techajpantlantilijtiaya on tlen itechkopa yejua tlajkuilolnestikaj ipan on Yektlajkuilojli?

33Sano ipan on hora, yejuamej okajsikej iminojui para Jerusalén kampa okiminnextitoj on majtlaktli uan se apóstoles* inuan on sekimej ompa san sekan nemiyaj. 34On majtlaktli uan se apóstoles* okijtojkej:

—Melauak tej, toTEKO yoyoliu* niman yonokuiteu ipan itlalkon. Niman Simón yokitak.

35Kemaj on omemej tlaneltokakej no okitetlajtlajtouilijkej tlinon impan onochiu ne ipan ojtli, niman kenijki okixmatkej Jesús ijkuak okitlapan on pan.

Jesús okinnotitij inomachtijkauan*

(Mt. 28.16-20; Mr. 16.14-18; Jn. 20.19-23)

36Yejuamej sanken* kijtojtikatkaj on ken impan onochiu, ijkuak Jesús onotelketstajsik intlajkotian niman ijkin okintlajpaloj:

—Xyolsejtiakan nemejuamej.

37Ikan innemojtil niman inkuekuetlakalis, kinemiliayaj kitstokej san yakaj itonal. 38Pero Jesús okinmijlij:

—¿Tline nemojkatlachaj? ¿Tline nenkauiliaj on ometlamatilistli kalaki ipan nemoyojlo? 39Xkitakan nomauan niman nokxiuan, niman xmatikan ika sano nejua. Xnechmatokakan niman xnechitakan pampa itonal yakaj xnakayoj nion omiyoj ken nenkitstokej nejua nikpiya.

40Ijkuak ijkon okinmijlij, okintitij imauan niman ikxiuan. 41Pero sanken* xkineltokayaj, pampa tlamojkaitayaj niman sanoyej pakilistlamatiyaj. Yejua ika Jesús okinmijlij:

—¿Itlaj nenkipiyaj para nikuas?

42Kemaj okimakakej seki michin yejuan tliuaki niman se achijtsin nekutli. 43Yejua okinselilij niman imixpan okikuaj. 44Kemaj okinmijlij:

—Ijkuak sanken* nemouan ninemiya, onemechijlij ijkin: Ika onkaj nocumpliros nochi on tlen noka tlajkuilolnestikaj ipan itlanauatil Moisés niman ipan intlajkuilol on tiotlajtojkej niman ipan on salmos.

45Kemaj okinkajsikamachiltij on tlen onkaj ipan on Yektlajkuilojli. 46Ijkin okinmijlij:

—Ijkin tlajkuilolnestikaj, ika Cristo ika onkatka mikis, niman ipan yeyi tonajli yoliuis* niman nokuiteuas ne ipan itlalkon. 47Niman no on yejuan notenojnotskauan noneki kinmachtiskej on tlakamej para ma noyolpatlakan, niman ijkon intlajtlakoluan kintlapojpoluiliskej. Yejua in temachtijli kiteijliskej ipan nochiuiyan países, pero yejuamej ika onkaj peuaskej nikan Jerusalén. 48In tlajtlamach* nemejuamej xteixpantilikan. 49Niman aman xkakikan. Nemopan nikuajtitlanis on Espíritu Santo yejuan noTajtsin omechijlijka ika mechmakas. Pero xmokauakan nikan Jerusalén hasta ijkuak nenkiseliskej on poder yejuan ne tlakpak ualeuas.

Jesús otlejkok iluikak

(Mr. 16.19-20)

50Kemaj Jesús okinkixtij ipan on ueyikalpan Jerusalén niman okinuikak hasta Betania. Ompa okinuajketsteu imauan niman okintiochiu. 51Chika kintiochijtikatka, kintlalkauijtiaya niman otlejkotiaj iluikak. 52Kemaj yejuamej okiyektenejkej Jesús, niman ikan paktli onokuepkej para Jerusalén. 53Niman yejuamej mojmostla yayaj ipan on ueyitiopan niman kiyekteneuayaj Dios. Ma ijki nochiua.

Currently Selected:

San Lucas 24: nguNT

Highlight

Copy