Génesis 22
22
Abraham bithikaon Ndo Dio
1Batho kainxion nano, kuthimejan Ndo Dio tsjeꞌe Ndo arrugithikaon Abraham thi ruketuꞌen Ndo. Ko bayee Ndo, ko jeꞌe ndachro:
—Nthiꞌi riꞌi.
2Ko Ndo Dio ndachro Ndo:
—Thjiꞌo xaꞌan, xan nakuaxinxon chunda, xan anto thjueꞌe, ko sathji ngain nunthe Moriah, ko nthiꞌa duꞌen xan ko tjaaga xan ixin nchendusena xan nthiꞌa ngain naa jna thi jaꞌan rundathjo.
3Ko nduexin, anto dakao, Abraham bingathjen ko bincheka kuluchuꞌe, ko bikao Isaac ko yoo xi nchexree. Ko bikao tsjé ntha niꞌo ixin rukjaaga thi runchendusen, ko sakjui thi ndachro Ndo Dio. 4Ko nchaꞌon ninxin teyaa na̱ nthiꞌá, Abraham kjín bikunxin thi jna rukji. 5Kuthimejan ndache xi nchexree:
—Dithuꞌa ra nthiꞌi ngain kulucho, ixin jaꞌan ko xanꞌna xra satsji ná inchin ko nthiꞌa sinthasayaa ná Ndo Dio, kuthimejan rukjan ná.
6Ko Abraham kuentaꞌa ntha niꞌo ngataꞌa nthachaan Isaac, ko jeꞌe bikao xruꞌi ko chia taade ko yui na̱ sabinthekji na̱. 7Ko Isaac kuingaria ko ndachro ngain Abraham:
—¡Pa!
Ko Abraham batheꞌe:
—¿Keꞌe rinao?
Ko Isaac ndachro:
—Techunda ná ntha niꞌo, techunda ná xruꞌi, aro, ¿thinoo jii kuleko seꞌen ko ruche ixin sinthundusen ná ngain Ndo Dio?
8Ko Abraham batheꞌe:
—Ndo Dio ruchjaa ná kuleko seꞌen ko ruche.
Ko jañaa sabinthekji kayui. 9Ko are bintheji thi ndachro Ndo Dio, Abraham binchechjian giꞌi jitangi ko basintaꞌa ntha niꞌo. Kuthejan kuia xan Isaac ko kuentaꞌa xan ngataꞌa ntha niꞌo basintja. 10Ko Abraham bechunda ngaa raa chia taade ko ubatsiin ra ixin ruguen xeꞌen. 11Aro naa angeel Ndo Dio ngajni nichjexin:
—¡Abraham! ¡Abraham!
—Nthiꞌi riꞌi —batheꞌe jeꞌe.
12Ko ángel ndachro:
—Xruꞌin nchekoo xaꞌan. Jai ununa ixin xraguna. Ixin jaꞌa ndachroꞌa ixin ruchjanaꞌa xaꞌan, thi nakuaxinxon xaꞌan.
13Ko Abraham bikon naa ku digechruagaꞌa ntheꞌe ngagaꞌa nthaa, ko tse ba ko buen ba ixin binchendusen ba ngain Ndo Dio ko iguenꞌa xeꞌen. 14Ko Abraham binchegiꞌin nunthe mee: «Nchaa ná Dio dajon Ndo thi rugunda.» Mexinxin xra ndachro na̱ jai: «Ngain jnee Ndo dajon Ndo thi rugunda.»
15Ko kjan nichja angeel Ndo Dio ngain Abraham, 16ko ndachro:
—Nchaa ná ndachro: “Ixin thi bincheꞌe jiꞌi ko ixin ndachroꞌa naꞌi are banchiaꞌa thi nakuaxinxon xaꞌan, mexinxin jaꞌan ndachrjan ngathe ansenna 17ixin jaꞌan sinthanchaon ko sinthatsjé ni sachrjeninxin inchin tsjéxin kunutse jii ngajni ko inchin tsjéxin nchise jii ngandeꞌe ndachaon. Ko ni sachrjeninxin jaꞌa, sacha na̱ ko tsetuꞌan na̱ nuntheꞌe ni runingakuꞌen na̱. 18Ko ixin ni sachrjeninxin jaꞌa, kain rajna te ngataꞌa nunthe tsunchaon na̱ ixin jaꞌa bincheꞌe thi jaꞌan kuetuꞌan.”
19Abraham kjan thi bithuꞌe ni nchexree, ko kain na̱ sakjan na̱ ngain nunthe Beerseba, thi binthe na̱.
Xeꞌen Nacor
20Kuthimejan are batho kanxion nchaꞌon, Abraham kuiꞌin ixin chriꞌi Nacor binchekunkjiꞌi jni chjan. Ko Nacor ko Abraham choo. 21Ko xan guan saꞌo kjui Uz, kuthimejan guan Buz, ko Kemuel, thi kjui ndudee Aram. 22Kuthimejan guan Quesed, kuthejan xan Hazo, Pildas, Jidlaf ko xan Betuel. 23Ko Betuel kjui ndudee Rebeca. Ko Nacor bechundakaꞌo Milca jni xeꞌen xan xii, ko Abraham ko Nacor choo.
24Kai Nacor kjui ndudee inoo chjan, thi bechundakaꞌo ngain inaa nchrii biꞌin Reúma. Ko mee kjui xan Teba, Gaham, Tahas ko xan Maaca.
Currently Selected:
Génesis 22: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
