Génesis 21
21
Kunkjiꞌi Isaac
1Ko Ndo Dio bitsjeꞌe ko binchenchaon Sara, ko kuꞌen thi ndachro Ndo. 2Sara tabeyaa chjan ko binchian xeꞌen Abraham are ujunchjan. Ko jiꞌi kuꞌen ngain nchaꞌon undachro Ndo Dio ixin rukuꞌen. 3Abraham binchegiꞌin xan, Isaac. 4Ko nchaꞌon jninxin Abraham chjee xruꞌe Isaac, inchin kuetuꞌan Ndo Dio. 5Ko Abraham bechunda naa renkia nano are guan Isaac. 6Kuthimejan Sara ndachro: «Ndo Dio binchekjano na, ko kain ni tsunuꞌe ixin binthakunkjia chjan tsjano na̱ ngajin. 7¿Kensen rundache Abraham ixin jaꞌan runthakai chjan? ¡Aro xra chjaꞌa naa chjan maski jeꞌe ujunchjan!»
Abraham kuetuꞌan bengi na̱ Agar ko Ismael
8Ko are bithja nchaꞌon ixin Sara irrunchekaiꞌa Isaac, Abraham binchechjian naa kiai jié. 9Ko Sara bikon ixin Ismael, xeꞌen Agar, anto bakjanua Isaac. 10Mexinxin Sara ndachro ngain Abraham: «Dengi nchri ncheꞌe xra yaa kunixin xeꞌen nchra, ixin xan yaa chroꞌa ruchjeyakaꞌo xan thi jikininxin jeꞌo Isaac.»
11Ko jiꞌi binchexruxinꞌa Abraham ixin Ismael kai xeꞌen jeꞌe. 12Aro Ndo Dio ndachro ngain Abraham: «Taꞌa juachjaon ixin xichjan ko nchri nchexraa. Ko ncheꞌe kain thi ndathjo Sara ixin Isaac sachrjeninxin kain ni chujnia. 13Ko jaꞌan sinthaꞌa ixin xeꞌen Agar sachrjeninxin naa rajna jié ixin yaa xaꞌan kai.»
14Ko nduexin anto nduuyo bingathjen Abraham, ko binchekama ngain nthacheen Agar niuthja ko naa ruanxran jinda, ko bajon xan Ismael ngain, ko ndache ixin sarrukji. Ko Agar ko xeꞌen sakjuika ngain nunthe xema thi xruꞌin jii, diꞌin Beerseba. 15Ko are tabangeꞌe jinda, Agar bakeꞌe xichjan chringi naa nthachjan chunda nchin saunchjan. 16Ko Agar kjínxin sabigeꞌe ko tsjanga ko ndachro: «Rinaoꞌa sikon kexreen seꞌen xanꞌna».
17Ko Ndo Dio kuiꞌin Ndo tsjanga xichjan, ko ngajni nichjaxin angeel Ndo Dio ngain Agar ko ndachro: «¿Agar, keꞌe tuꞌan? Xraonꞌa, ixin Ndo Dio kuiꞌin tsjanga xaꞌan. 18Thji nchebangeꞌe ñao xan ko nchengathjen xan ixin isenꞌa xan, ixin jeꞌe xan sachrjeninxin xan chujni sinthe ngain naa nunthe anto jié.»
19Ko Ndo Dio binchegikon Agar naa thue chrinduxin jinda. Kuthimejan kjui ko binchechre ruanxran bikauxin jinda, ko bajon nda ngain xichjan. 20Ko Ndo Dio kjuengijna xichjan jiꞌi, ko bangi xan ko beꞌe xan ngain thi nunthe xema thi xruꞌin jii, ko anto benuꞌe xan banchegunda xan ntha chijno. 21Ko tabinthe na̱ ngain nunthe xema diꞌin Parán, ko janee binchetheꞌe jan ngain naa nchri egipcia.
Thi kjuauthexin Abraham ko Abimelec
22Ngain nchaꞌon taꞌa Abimelec kjui bikjao Abraham, ko bikao Ficol, thi thetuꞌen kain xi bakjaaya, ko ndachro:
—Bikon ná ixin Ndo Dio thjengijna jaꞌa ngain kain thi ncheꞌe. 23Mexinxin dajin ngathexin kon Ndo Dio ko ndachjejin na ixin xruꞌin nchaꞌon sincheyana, ko kai sincheyeꞌa xanꞌna, ko chujni sachrjeninxin ná jaꞌan ná. Ko dajin kai ixin jian sincheꞌe ngajin na, inchin jaꞌan binthaꞌa ngajin, ko xrajeꞌo sincheꞌe ngain kain chujni te ngain nunthe jaꞌa riꞌi jai.
24Ko Abraham ndachro:
—Jaan, sinthaꞌa thi bajin.
25Aro Abraham ndache Abimelec ixin ni nchexree Abimelec bantsjeꞌe na̱ naa thue dachrjedoꞌo jinda.
26Ko Abimelec ndachro:
—Nunaꞌa kensen bincheꞌe jiꞌi, ko jaꞌa xruꞌin nchaꞌon ndachjejin na, ko kununa jaija rindachjejin na.
27Abraham bajon kanxion kuthuchjon ko kuxinthaa kunaꞌa ngain Abimelec, ko kayui binthekjauthexin. 28Kuthimejan Abraham bantsjenda yaato kuthuchjuen, 29ko Abimelec banchiangiꞌi Abraham:
—¿Keꞌe ruchro thi yaato kuthuchjon bantsjenda jiꞌi?
30Ko Abraham batheꞌe:
—Nthatsaꞌan ñao dayeꞌe thi yaato kuthuchjunchjan teꞌi, ko ku teꞌi ruxraxaunxin jaꞌa ixin jaꞌan nge thue dachrjedoꞌo jinda jiꞌi.
31Mexinxin binchegiꞌin nunthe binthekjauxin na̱, Beerseba, ko jiꞌi ruchro, thue dachrjedoꞌo jinda thi binthekjauthexin, ixin nthiꞌa Abraham ko Abimelec binthekjauthexin.
32Ko are ujuexin kjuathexin na̱, Abimelec ko Ficol ko kain ni bikao, sabinthekjan na̱ ngain nuntheꞌe ni filisteo. 33Ko nthiꞌa Beerseba, Abraham kjuenga naa nthaa diꞌin tamarisco, ko nthiꞌa binchesayexin Ndo Dio, Ndo xruꞌin nchaꞌon tsjexin. 34Ko Abraham anto see beꞌe nthiꞌa ngain nuntheꞌe ni filisteo.
Currently Selected:
Génesis 21: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
