Génesis 29
29
Jacob diji ngain nunthe Padan-aram
1Ko Jacob bingaxin ñao sakjui, ko biji ngain nunthe dithuꞌe nu thi chrinxin nchaꞌon ngain nunthe Canaán.
2Ko ngataon jngi bikon naa thue dachrjedoꞌo jinda, ko nthiꞌa tenchejugaꞌa nii tajuchjan kuleko ixin ngain thue mee bagiꞌi ba jinda. Ko bejanthe kunixin naa xro jié. 3Ko banthegiꞌi ba jinda jeꞌo are baxrathe kain ba ixin baginthjiantaꞌa na̱ xro. Ko are bakjexin bagiꞌi ba nda, kjan bakejanthe na̱. 4Jacob kunchieꞌen ngain ni bakingaria ba ko banchiangi:
—¿Thinoo rajnaa ra jaꞌa ra?
—Jaꞌan ná juixin ná Harán —binthegatheꞌe na̱.
5Ko Jacob ndachro:
—¿Achunxin ra Labán, xeꞌen Nacor?
Jeꞌe na̱ ndachro na̱:
—Jaan, chunxin ná.
6Ko Jacob banchiangi:
—¿A niꞌa Labán?
Ko ni thingaria kuleko batheꞌe na̱:
—Labán jian jii. Tsjeꞌe, nthimee juii Raquel kunixin kue, yaa xeꞌen Labán.
7Kuthimejan Jacob ndachro:
—Atho xra see ditjaan ixin siataon nchaꞌon, ko xra dakao ixin siaxiꞌin kuleko. ¿Ajeꞌa icha nchao chjeꞌe ra ba jinda jaxon ko xra nchao sinea ba nchin?
8Aro jeꞌe na̱ batheꞌe na̱:
—Chroꞌa sinthaꞌa ná yaa, rugunda ruchuan ná tsii kain kuleko, kuthejan dinthjiantaꞌa ná xro ko diꞌi jinda kain kuna ná.
9Ko Jacob xra tetjao na̱ are ubiji Raquel, thi bakingaria kain kulekue ndudee. 10Ko are bikon Jacob ixin Raquel juiaꞌo kulekue Labán, chrinii jeꞌe, tuin kjui biginthjian xro jijanthe thue dachrjedoꞌo jinda ko chjee jinda kuleko. 11Kuthejan Jacob kuetuxin Raquel ixin chjee juajna ko suji tsjanga. 12Ko Jacob ndache Raquel ixin xra choo xan, ixin ndudee Raquel ko janee Jacob choo na̱. Ko tuin Raquel kjui binchenuꞌe ndudee.
13Are Labán kuiꞌin ixin Jacob, xeꞌen nchri choo, tuin bachrje ixin bichuꞌen xan ko kjuua xan ko kuetuxin xan ixin chjee xan juajna ko bikao xan ngain nchianduꞌa. Ko Jacob kuekiin kain thi kuꞌen. 14Ko Labán ndachro: «Ndua jaꞌa chujnina ko xrajeꞌo jni chunda, xraa jaꞌan.»
Jacob sekaꞌo Lea ko Raquel
Ko chiaon naa kunithjao beꞌe Jacob nthiꞌa. 15Kuthimejan ndachro Labán ngain Jacob:
—Jaꞌa sincheꞌa xra jañaunka ngajin; rugunda ruxengaꞌa ꞌna. Ko ndachjejin na kieꞌen rinao sacha.
16Labán bechunda yoo xeꞌen xan nchrii: xan Lea ko Raquel, xan icha nchiin. 17Ko Lea bechunda makon xraa sujiꞌa, ko Raquel chrjuin siin ko chrjuin betsjeꞌe. 18Ko Jacob icha banchexruxiꞌin Raquel ko ndache chrinii:
—Jaꞌan rinaꞌo sarikiꞌan xan Raquel, xan icha nchiin. Ja̱ rinao, sinthaꞌa xra yaato nano ixin jeꞌe xan.
19Ko batheꞌe Labán:
—Icha jian jaꞌa sarikoꞌo xan ko jeꞌa kaxeukua inaa xii. Mexinxin dithuꞌa ngajin ko ncheꞌe xra.
20Ko jañaa bincheꞌe xra Jacob yaato nano ixin Raquel. Aro ixin Jacob anto bathjueꞌe Raquel, kunueꞌa batho nano. 21Ko are juexin batho thi yaato nano, Jacob ndache Labán:
—Chjana xan Raquel ixin sarikiꞌan ixin uxethja thi kjuan ná.
22Kuthimejan Labán binchenuꞌe kain ni chiaon binthe, ko binchechjian naa kiee ni tutheꞌe. 23Ko are undakunthi̱e Labán bajon xan Lea ngain Jacob, ko Jacob bejuakaꞌo Lea thi̱e mee. 24Labán kai bajon naa nchri nchexree diꞌin Zilpa, ngain xan Lea ixin kjan nchri nchexree xan. 25Ko nduexin are ubingasaan, Jacob kunuꞌe ixin bejuakaꞌo Lea, ko ndachro ngain Labán:
—¿Unda binchena jiꞌi? ¿Ajeꞌa kjuan ná ixin jaꞌan binthaꞌa xra ixin xan Raquel? Mexinxin, ¿unda bincheyana?
26Ko Labán ndachro:
—Nthiꞌi kukuana ná ixin saꞌo xrajon xan icha jié, kuthimejan xan icha nchiin. 27Saꞌo nchexethja yaato nchaꞌon ngain xan Lea, ko ja̱ sincheꞌe xra iyaato nano, nthiꞌi jni nchaꞌon, nchao sarikoꞌo xan Raquel.
28Ko Jacob bithikaon thi kjuathexin, ko are ubatho thi jni nchaꞌon kutheꞌe ngain Lea. Labán bajon xan Raquel ngain Jacob ixin bekaꞌo. 29Labán kai bajon naa nchri nchexree, biꞌin Bilha, ngain Raquel ixin kjan nchri nchexree. 30Ko Jacob bejuakaꞌo Raquel ko icha thjueꞌe ke Lea. Ko Jacob xra bincheꞌe xra iyaato nano ngain Labán.
Xeꞌen Jacob
31Ko Ndo Dio bikon ixin Jacob bajinaoꞌa Lea, jeꞌe Ndo bincheꞌe Ndo ixin Lea nchao rugechunda chjan, aro Raquel naꞌi. 32Ko Lea tabeyaa chjan ko binchekunkjiꞌi xan biꞌin Rubén, ixin ndachro: «Nchana bikon na ixin tarrichiꞌin, ko jai nuna ixin xixiꞌna icha ruthjuena.»
33Ko tsjeꞌa nano batho ko Lea bechunda inaa xan, ko binchegiꞌin xan Simeón ko ndachro inaa: «Ndo Dio kuiꞌin Ndo ixin baginaoꞌa na na̱ ko chjana inaa chjan.»
34Ko bechunda inaa xan, ko jiꞌi xan ninxin ko binchegiꞌin xan Leví, ko ndachro inaa: «Anchee xixiꞌna seꞌe xa icha ngajin ixin uchjaꞌa nii chjan.»
35Ko Lea bechunda inaa chjan ko are binchekunkjiꞌi xan, binchegiꞌin xan Judá, ko ndachro: «Jai nchue sinthasayaa Nchana.» Kuthimejan ikjanꞌa bechunda icha chjan.
Currently Selected:
Génesis 29: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
