Génesis 31
31
Jacob sathingeꞌe Labán
1Jacob kunuꞌe thi bakekin kain xeꞌen Labán ixin jeꞌe, ixin bandachro xan: «Jacob kuemeꞌe kain thi bechunda ndudaa ná, mexinxin tsjé chunda.» 2Kai Jacob bakunuꞌe ixin Labán ibancheꞌa jian ngain inchin are saꞌo. 3Ko Ndo Dio ndache Jacob: «Sathji nuntheꞌe ni ndui ko ngain ni chujnia ko jaꞌan sariꞌi ngajin.»
4Ko ruaꞌan juajna Jacob ngain Raquel ko Lea ixin ruginthekii ngataon jngi thi jithingaria kuleko, 5ko ndache kayui nchra:
—Jaꞌan dikon ndudaa ra ichrjuinꞌa ncheꞌe ndo ngajin na xraa are saꞌo. Aro Ndo Diue ndudana kain nchaꞌon jii Ndo ngajin na. 6Ko jaꞌa ra nuꞌa ra jian ixin anto dingaxin ñaꞌo nthaꞌa xree ndo. 7Ko jeꞌe ndo nguxon ncheyana ndo, ko dasingixina ndo thi dacha. Aro Ndo Dio tajandaꞌa Ndo ixin Labán sincheꞌe thi jianꞌa ngajin. 8Are bandachro ndo: “Jaꞌa sacha kain ku techunda tsjé naꞌo”, kain kunaꞌa banchian ba xan techunda tsjé naꞌo. Ko are bandachro ndo: “Jaꞌa sacha kain ku tethedunga naꞌo”, kain kunaꞌa banchian ba juxon xan tethedunga naꞌo. 9Jiꞌi bincheꞌe Ndo Dio ko bagantsjeꞌe ndudaa ra kuxiigo ko ndabakjan kuxiguna.
10«Naa nchaꞌon are tedinga kunaꞌa, jaꞌan kuxinanxin ko bikon ngathe kuthachrin ixin kudaꞌa teta kunaꞌa, juxon ku techunda tsjé naꞌo. 11Ko ngain kuthachrin jiꞌi ndachjejin na angeel Ndo Dio: “Jacob”. Ko jaꞌan bathaa: “Nthiꞌi riꞌi”. 12Kuthimejan ángel ndachjejin na: “Tsjeꞌe jian, ko sikon ixin kain kudaꞌa teta kunaꞌa juxon ku tethedunga naꞌo, ku techunda tsjé naꞌo ko ku xraa dichjekanito naꞌo. Jamee jituꞌen ixin jaꞌan bikon kain thi bincheꞌe Labán ngajin. 13Jaꞌan Ndo Dio, Ndo kununxin ngajin ngain Bet-el, nthiꞌa thi kuingutaꞌa aceite ngataꞌa xro ko ndachruxin ixin sithikaon na jaꞌan. Jai dingathjen, ko dachrjexin nunthe jiꞌi ko sathji ngain nunthe guanxin.”»
14Ko batheꞌe Raquel ko Lea, ko ndachro:
—Kain thi chunda ndudana ná, jaꞌan ná ixruꞌin ruchjana ná ndo, 15ko nchena ná ndo xraa jeꞌa xeꞌen ndo, ko binchekji ná ndo ko binchexiꞌin ndo kain thi kjuengeꞌe ndo ꞌna ixin kuthena ná ngajin. 16Kain thi bantsjeꞌe Ndo Dio ngain ndudana ná ko chjaa Ndo jaꞌa, nduaxin jikininxin ná jaꞌan ná ko xanꞌna ná. Mexinxin jai ncheꞌe kain thi rundathjo Ndo Dio.
Jacob sakjuixin Padan-aram
17Kuthimejan Jacob binchekani kayui chriꞌi ko xeꞌen ngain kucamello, 18ko kuexiꞌin beka kain kuxiigo. Kai sabikao kain thi bechunda, thi bacha nthiꞌa Padan-aram ko sakjui nu nunthe Canaán, ngain nchianduꞌe ndudee. 19Ko nchaꞌon bachrje na̱, Labán beꞌa ixin sadikji dikjiꞌin kulekue. Ko Raquel kuema kainxion diue ndudee ko sabikao. 20Ko jañaa Jacob bincheyeꞌe Labán thi arameo, ixin binchenueꞌa ixin sarrukji. 21Ko sakuingakaꞌo kain thi bechunda ko bathujin na̱ jinda jithinga diꞌin Éufrates, ko sakjui na̱ nu jnee nunthe Galaad.
Labán ruee Jacob
22Ko nchaꞌon ninxin kuetuꞌen na̱ Labán ixin Jacob sadikinga. 23Kuthimejan Labán kunixin chujnii sarruee na̱ Jacob, ko ngain nchaꞌon yatuxin bitse na̱ na̱, nu jnee nunthe Galaad. 24Aro naa thi̱e Ndo Dio kununxin ngathe kuthachrin ngain Labán, thi arameo, ko ndache Ndo: «Tuyautheꞌa Jacob are tsjao.»
25Ko Labán bithja Jacob nthiꞌa ngain jnee nunthe Galaad thi binchejugaꞌa Jacob kunixin kain chujnii kanxion nchaꞌon. Kai Labán binchejugaꞌa nthiꞌa chiaon kunixin chujni bikao. 26Ko ndachro Labán ngain Jacob:
—¿Unda bincheyana? Ko sabikoo xanꞌna xraa chujni tse na̱ ngain thi diketo na̱ ko sadikao na̱ thiaxiꞌin na̱. 27¿Unda jimao sakuingana ko bincheyana? Ja̱ rundachjejin na, jaꞌan runthachjian naa kiai ko rukunchjian soon kunixin nirua ko arpa ko ruchaa ná. 28Kara rukajanda na ruketuxin xanꞌna ko xanthina. ¡Jaꞌa bincheꞌe xraa thi ndakuaꞌa xraxaon! 29Jaꞌan nchao runthaꞌa jianꞌa ngajin ra, aro Diue ndudaa nichjana riunkjin ko ndachjejin na: “Tuyautheꞌa Jacob.” 30Ko ja̱ anto binao sarrukji nchianduꞌe ndudaa, aro ¿unda kuemana kainxion diuna?
31Batheꞌe Jacob ngain Labán:
—Xraon na ko xraxaꞌon ixin jaꞌa rugantsjena xaꞌan. 32Ko ixin dio rindachro, ja̱ chrujan thi chunda diua, ncho deꞌen ngathexin kon chujnia ná. Thjee jian, ko ja̱ chrujan bantsjexin ná nchiandui ko sinchii, sathjiꞌo.
Aro Jacob binueꞌa ixin Raquel kuee diue ndudee.
33Ko Labán saꞌo bikjee ngaxiꞌin nchia ndasiꞌin Jacob, kuthejan bixiꞌin nchia ndasiꞌin Lea ko ngain nchia ndasiꞌin nchri ncheꞌe xra kuthejan ngain nchia ndasiꞌin Raquel. 34Ko Raquel dikema dio chringi thi xrajiꞌin kucamello ko jeꞌe tajitaꞌa nthiꞌa. Ko Labán kjuee nguixin ngaxiꞌin nchia aro xruꞌin bithja. 35Kuthimejan Raquel ndache ndudee:
—Deguñaoꞌa ko nchetjañana ixin chroꞌa dingathjen ngathexin kon ixin jixindangana jnina.
Labán kjuee diue aro xruꞌin bithja. 36Kuthejan Jacob anto guñao ko ndachro ngain Labán:
—¿Keꞌe binthañaunxin? ¿Keꞌe jianꞌa binthaꞌa ixin anto riduñao ko ruena? 37Ukjuee ngakjan kain thi richunda, tjaguꞌna keꞌe bantsjexin ná nchiandui. Dakee ngathexin kon chujnia ná ixin sikon na̱ kain na̱ ko rundachro na̱ kensen jianꞌa jincheꞌe. 38Kan nano binthaꞌa xra ngajin, ko xruꞌin kulekua ko kuthentsua bankajin xeꞌen ba, ko xruꞌin kulekua juine. 39Ko ja̱ chrujan kuxiigo chrintho te ngaꞌa jna baguen kulekua, jaꞌan bakjunkjaꞌan ba, ko ja̱ chrujan ku bakee na̱ ngain nchaꞌon o ngain thi̱e jaꞌan bakjengaꞌa ba ꞌna. 40Ngain nchaꞌon bachjan na ixin sua, ko ngain thi̱e bakunkina ixin chrintha ko chroꞌa bagarichrin. 41Kan nano jaꞌin bariꞌi ngain nchiandui: the ko noo nano binthaꞌa xra ixin kjuengaxin ꞌna kayui xaꞌan xan nchrii ko inkjaon nano binthaꞌa xra ixin kuingaria kulekua. Ko the nthiꞌa basingixina thi bagacha. 42Ja̱ Diue Abraham, thi Dio kai baxraguen ndudana Isaac, ja̱ rugeꞌa Ndo ngajin na, nduaxin rixruaxon rana rugengixin na nchiandui. Aro Ndo Dio bikon Ndo juachauna ko xra binthaꞌa, ¡mexinxin riunkjin kununxin Ndo ngajin ko binthasathaꞌa Ndo!
Jacob ko Labán binthekjuauthexin
43Kuthejan Labán batheꞌe ngain Jacob:
—Nchrii temee xanꞌna, xan nchinchinchjan temee xanthina, kuleko temee, kulekuna. Ko kain jiꞌi jaꞌan thetuꞌan. Aro jai, ¿keꞌe sinthaꞌa ngain xanꞌna ko xanthina? 44Icha jian tsjauthexin ná jaꞌa ko jaꞌan, ko jiꞌi sinthaxraxaon ná kayui ná.
45Kuthimejan Jacob kuaa naa xro jié ko kuengathjen xro, 46ko ndache chujnii:
—¡Thjejo ra xro!
Ko kain na̱ kjuejo na̱ xro ko basintja na̱ xro. Ko kain na̱ tabinthe na̱ chrika xro basintja na̱, ko juinekaꞌo choo na̱. 47Ko Labán binchegiꞌin nthiꞌa kunixin ngiigua arameo «Jegar Sahaduta» ko Jacob binchegiꞌin kunixin ngiigua hebreo «Galaad».
48Kuthejan Labán ndachro:
—Xro basintja ná jiꞌi sinthaxraxaon ná thi kjuauthexin ná jaꞌa ko jaꞌan.
Mexinxin nthiꞌa biꞌin Galaad, 49ko kai biꞌin Mizpa ixin Labán ndachro:
—Ndo Dio rutsjaa ná kayui ná are ichroꞌa sukon choo ná. 50Ja̱ sintja xanꞌna o sarikoꞌo ikanxin nchrii, Ndo Dio sikon Ndo, maski xruꞌin kensen sikon, ko jeꞌe Ndo sinthaxraxaon Ndo jaꞌa, thi kjuauthexin ná.
51Ko Labán xra ndache Jacob:
—Tsjeꞌe xro basintja ná ko jii ngayaa ná, xro sinthaxraxaon ná thi kjuauthexin ná. 52Kain xro jiꞌi sinthaxraxaon ná thi kjuauthexin ná, ko jaꞌa sathuꞌa tuenxin xro teꞌi ixin siꞌi sincheꞌe thi jianꞌa ngajin na, ko jaꞌan kai sathuꞌa tuenxin xro teꞌi ixin tsji sinthaꞌa thi jianꞌa ngajin. 53Ko Ndo Diue ndudachriꞌa Abraham ko ndudachriꞌna Nacor sincheꞌe jie̱ ngajin ná.
Jacob bajin ngathexin kon Ndo Dio, Ndo baxraguen Isaac, ndudee jeꞌe, ixin isathoꞌa tuenxin xro teꞌi. 54Kuthejan Jacob guen naa kuxiigo ixin juinchesayeꞌe Ndo Dio kuthimejan bayee kain ni chujnii ko juine na̱ ko ndabithuꞌe na̱ nthiꞌa ngagaꞌa jna thi̱e mee.
55Ko nduexin nduuyo, Labán bingathjen ko kuetuxin xanthii ko xeꞌen ko binchenchaon xan ko sakjan nchianduꞌa.
Currently Selected:
Génesis 31: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
