Génesis 35
35
Jacob kjan Bet-el
1Ndo Dio ndachro ngain Jacob: «Dingathjen ko sathji digariꞌi ngain nunthe Bet-el ko nthiꞌa nchechjiana naa giꞌi jitangi. Ko xraxaon ixin jaꞌan kununxin na ngajin are sarrithingeꞌe Esaú.» 2Ko Jacob ndache kain chujnii:
—Thinthuꞌe ra ko inchesayeꞌa ra kain dio nchechjian chujni, kuthimejan tsinda ra ko dituxiꞌan ra, 3ixin tsji ná Bet-el ko nthiꞌa sinthachjian naa giꞌi jitangi ixin tsexruxian Ndo Dio ixin jeꞌe Ndo kjuengijna na Ndo thi jaꞌan bakji.
4Kuthimejan jeꞌe na̱ bajon na̱ kain dio binthechunda na̱ ko kain nthachia bechunda na̱ ngain ndatsjuen na̱. Ko Jacob kjuabaa thi bajon na̱ ngain naa ruthee nthathjao jii chrika Siquem. 5Ko are bachrje na̱, Ndo Dio xrandoꞌo juaxraon kain chujnii rajna tendajin nthiꞌa, ko ixruꞌin bincheꞌe na̱ ngain xeꞌen Jacob.
6Kuthimejan Jacob ko kain chujni jithji ngain biji na̱ ngain rajna Luz thi kai diꞌin Bet-el, jii ngain nunthe Canaán. 7Ko nthiꞌa Jacob binchechjian naa giꞌi jitangi ko binchegiꞌin El-bet-el, ixin nthiꞌa kununxin Ndo Dio ngain are sajithingeꞌe Esaú. 8Ko are mee beꞌen Débora, nchri bagayakuꞌen Rebeca are xra nchion beꞌe, ko kjuabaa na̱ chringi naa nthathjao chiaon Bet-el ko binchegiꞌin na̱ ntha «Alón-bacut» ko ruchro «Ngain nthathjao anto tsjanga na̱».
9Are ukjanxin Jacob Padan-aram, nthiꞌa thi kununxiꞌin Ndo Dio ngain Bet-el ko binchenchaon Ndo. 10Ko are mee Ndo Dio ndache:
«Isinꞌa Jacob,
siꞌin Israel,
ko aremaꞌo jañaa bichunxinxin na̱.»
11Kai ndachro Ndo Dio:
«Jaꞌan Ndo Dio, Ndo chunda kainxin juachaxin.
Darichundakoꞌo chriꞌa tsjé chjan ko tsjé ni sachrjeninxin jaꞌa,
ko ni sachrjeninxin jaꞌa tsunchjian naa rajna jié ko tsjé rajnanchjan ko kai sachrjeninxin ni tsetuꞌan.
12Ko nunthe chjaꞌa Abraham ko Isaac,
kai ruchjaꞌa nunthe jaꞌa,
kuthimejan ruchjaꞌa nunthe ni sachrjeninxin jaꞌa.»
13Ko are Ndo Dio sakjuixin nthiꞌa, thi kjuauxin Jacob, 14Jacob basintja xro ko kuenthjithe xro aceite ko vino ko xro jiꞌi nchexraxaon, thi nichjexin Ndo Dio, 15ko Jacob binchegiꞌin nthiꞌa Bet-el, ko jiꞌi ruchro «nchianduꞌa Ndo Dio».
Raquel ndabeꞌen
16Jacob ko chujnii sakjuixin na̱ Bet-el, aro xra kjínxin rugijixin na̱ Efrata, are Raquel binchekunkjiꞌi xeꞌen, aro atho tangi guanxin xan. 17Ko thi icha tangi are ujiduan xan, mexinxin nchri jithjengijna Raquel ndachro: «Xraonꞌa ixin rinchekunkjiꞌi naa xan xii.» 18Raquel undajideꞌen aro xra kuixiꞌin nichja ko binchegiꞌin xeꞌen Ben-oni. Aro Jacob binchegiꞌin xan Benjamín.
19Ko Raquel ndabeꞌen ko kjuabaa na̱ ngandeꞌe nthiꞌá thji Efrata, thi kai diꞌin Belén. 20Ko Jacob basintaꞌa choo xro thi xrabaa Raquel ixin ruxraguxin chinthiꞌi. Ko xro teꞌi xra beꞌe are kji̱n na̱ xroon jiꞌi.
21Kuthimejan Israel ruee nthiee ko sabigeꞌe tuenxin nunthe diꞌin Migdal-edar. 22Ko are Israel ubeꞌe nthiꞌa, Rubén xeꞌen Israel, xan saꞌo, bejuakaꞌo Bilha, thi kai chriꞌi Israel, ko jiꞌi kunuꞌe Israel.
Xeꞌen Jacob
(1 Cr. 2:1-2)
Jaꞌin diꞌin thi the yoo xeꞌen Jacob. 23Chjan bechunda Lea kjui xan Rubén, xan saꞌo, Simeón, Leví, Judá, Izacar ko Zabulón. 24Chjan bechunda Raquel kjui José ko Benjamín. 25Chjan bechunda Bilha, nchri nchexree Raquel, kjui Dan ko Neftalí. 26Ko ngain Zilpa nchri nchexree Lea, binchekunkjiꞌi Gad ko Aser. Kain xan teꞌi xeꞌen Jacob ko guan xan are binthe na̱ Padan-aram.
Ndabeꞌen Isaac
27Ko Jacob kjui bitsjeꞌe Isaac ndudee ngain rajna Arba, thi kai diꞌin Hebrón ko jii ngain nunthe Mamre, thi beꞌe Abraham ko Isaac. 28Isaac bechon naa renkia ko noo kan nano 29kuthimejan ndabeꞌen. Ko Esaú ko Jacob kjuabaa xan ndudee xan ngain chinthiꞌi ni chujnii.
Currently Selected:
Génesis 35: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
