Génesis 43
43
Bikao na̱ Benjamín ngain nunthe Egipto
1Anto kuchjunga thi bane chujni nguii nunthe Canaán, 2mexinxin Jacob ko xeꞌen are ndajueꞌe na̱ thi nua kachji juiaxin na̱ nunthe Egipto, jeꞌe ndachro:
—Thji ra Egipto inaa ko theꞌna ra icha nua ixin sunthe ná.
3Aro Judá batheꞌe:
—Thi xii ndachjejin ná: “Ja̱ sikunaꞌa xan choo, xan icha nchiin, icha jian isiꞌa ra.” 4Mexinxin ja̱ tsanchrjanda xan tsji xan ngajin ná, nchao tsji ná sikeꞌna ná nua kachji; 5ko ja̱ ruchjeꞌa xan juachaxin tsji xan, jaꞌan ná tsjiꞌa ná, ixin thi xii ndachjejin ná: “Ja̱ sikunaꞌa xan choo, xan icha nchiin, icha jian isiꞌa ra.”
6Ko ndachro Israel:
—¿Unda ndache ra ixin bithuꞌe inaa xan choo ra? ¿Unda anto jianꞌa ncheꞌe ra ngajin?
7Ko binthegatheꞌe xan:
—Xii mee anto banchiangina ná ixin suixin ntha, ko ndachro: “¿A xra jichon ndudaa ra? ¿A chunda ra inaa xan choo ra?” Ko jaꞌan ná jeꞌo bathaa ná thi jeꞌe banchiangina ná. ¿Kexreen rukununanxin ná ixin jeꞌe rundachjejin ná: “Sikoo ra xan choo ra”?
8Ko Judá ndache ndudee:
—Tanchrjanda xan tsji xan ngajin na ko jaꞌan sarinda xan, ko satsji ná tuin ja̱ rinao xra sunthechon ná kain ná. 9Jaꞌan sarinda xan ko setsingataꞌa na thi tsuꞌen xan. Ko ja̱ sikianꞌa xan ngajin inaa, jaꞌan setsingataꞌa na thi jianꞌa sinchekininxin na kainxin nchaꞌon. 10Ko ja̱ rukayakunaꞌa ni ra kain nchaꞌon teꞌi, uyuxin nthiꞌá rukji ná ko rukjan ná.
11Ko Jacob ndachro ngain xan:
—Ja̱ xruꞌin inaa dithua ná sinthoꞌo ná, ncheꞌe ra thi sincheꞌe ra. Thji ra ngain xii yaa, aro ngaa thi sikuxin ra nuaꞌa ná, dankaa ra thi icha jian dajon nunthe te ná, nchin ndabalsamo, nchin tsjen, nchin ndaxrajni, nchin tsjuka diꞌin mirra, nchin nuez ko nchin almendra. 12Thjiꞌo ra tumi kunkjaꞌan ra na̱ ixin ja̱ chrujan ni tjajin ko sanchiaꞌa ra na̱ tumii na̱, ko kai thjiꞌo ra icha tumia ra. 13¡Sathji ra!, thjiꞌo ra xan choo ra ko thji ra ngain xii yaa inaa. 14Ndo Dio, Ndo chunda kainxin juachaxin, tsjengijna ra Ndo are sinthe ra ngathexin kon xii yaa ixin tsanchrjanda Simeón, ko Benjamín nchao rukjan ngajin ra. Ko ja̱ sinthatjaan kain xanꞌna, ¡ncho tuꞌen thi rugunda tsuꞌen!
15Ko xeꞌen Jacob kuaa xan thi binthegikao xan, kuaa xan tsjé tumi ko bikao xan Benjamín, ko jaikua sabinthekji xan Egipto. Are bintheji xan kunchieꞌen xan ngain José, 16ko José bikon ixin Benjamín juii ngain xan, ko ndache xi ncheꞌe xra thetuꞌan ngain nchianduꞌa:
—Thjiꞌo xii teꞌi ngain nchiania, ko duena naa kuxinthaa ko nchechjan ba ixin sinekiꞌan xa jai ngusine nchaꞌon.
17Ko xi thetuꞌan ngain nchianduꞌa José bincheꞌe xa thi bituꞌen xa, ko sabikao xa kain xan choo José, 18aro jeꞌe xan binthexraon xan ixin bikao na̱ xan ngain nchianduꞌa José, ko ndache choo xan:
—¡Bikoo ná na̱ nthiꞌi ixin thi tumi bankaa ná na̱ ngain thi kjuiuxin ná nua kachji, ko rundachro xa ixin jaꞌan ná kuemeꞌe ná, ko sinthakjan ná na̱ xi nchexree na̱ ko santsjaa ná na̱ kain kuluchuꞌa ná!
19Mexinxin are uchiaon tediji na̱ nchia, kunchieꞌen xan ngain xi nchexree José, 20ko ndachro xan:
—Dekiꞌin suixin, nduaxin jaꞌan ná ujuiꞌi ná naa nthiꞌá bikeꞌna ná nua kachji. 21Ko thi kuꞌen are juiꞌi na̱ kueꞌna ná are mee, ixin are usakjan ná ko ndabithuna ná thi tse ná thi̱e ko banthjaa ná kustee nuana ná, ko ngaa nanaa kusta bingachjian nua kachji bithja ná tumina ná. Ko yaa beꞌe kain tumi kjuenga ná ꞌna, ko jai bikian ná tumi ixin sinthakjan ná tumi. 22Kai bikian ná icha tumi tsenanxin ná icha nua kachji. Aro nunaꞌa ná kensen bakeꞌe tumina ná ngain thi kjuianxin ná nua, are mee.
23Ko xi nchexree José batheꞌe:
—Unchao, xraonꞌa ra. Ndo Diua ra bincheꞌe ixin kununxin tumi mee ngain thi kjuiuxin ra nuaꞌa ra, ixin jaꞌan nuna jian ixin jaꞌa ra chjana ra tumi.
Ko xi nchexree José bantsje Simeón ko binchechieꞌen ngain xan choo. 24Kuthimejan xi ncheꞌe xra bikao kain xan ngain nchianduꞌe José, ko bajon jinda ixin kjueen xan ruthee xan ko bajon thi juine kuluchuꞌe xan.
25Ko jeꞌe xan bantsje xan thi bikao xan ko chuꞌen xan José ixin rukii ngusine nchaꞌon, ixin jeꞌe xan kunuꞌe xan ixin rukii José rujine.
26Ko are José biji nchia, jeꞌe xan bajon xan kain thi juiaꞌo xan ko binthethuxin xan ko bisetaꞌa xan nunthe. 27Ko José banchiangi kexreen te xan:
—¿Kexreen jii ndudaa ra, thi dachrichjan ndachjejin ni ra? ¿A xra jichon?
28Xendua xan ko ndachro xan:
—Ndudana ná xra jichon ndo ko nchao jii ndo.
Ko kjan bisetaꞌa xan nunthe.
29Ko José tsjeꞌe kain xan ko bikon Benjamín, xan choo jeꞌe, xeꞌen janee ko ndachro:
—¿A jiꞌi xan choo ra, xan icha nchiin, thi jaꞌa ra ndachjejin ni ra? ¡Ndo Dio sinthanchaon ko tsiakunuaꞌa jaꞌa, Benjamín!
Ko José are ndachro jiꞌi, 30ko bikon xan choo, xraa ndakuaiya anseen, ko binao rutsjanga. Ko José bachrjegee ko sakjui thi dejuaxiꞌin ko beꞌe tsjanga. 31Ko are ujuexin tsjanga, kunthi nda ngakon ko bachrje ko ndachro ngain xi nchexree: «¡Dakee ra thi sunthe ná!»
32Ko jee bakeꞌe na̱ thi juine José ko jee bakeꞌe na̱ thi juine xan choo, ko ni egipcio beꞌe nthiꞌa kai jee binthe na̱ ixin ni egipcio chroꞌa nekaꞌo ni hebreo ixin ndachro na̱ ixin xruꞌin renthe ni hebreo. 33Ko José ndache xan kexreen ruginthe xan ngathexin kon jeꞌe ko kuexinxin ngain xan saꞌo ko juexinxin ngain xan icha nchiin, ko jeꞌe xan xratao binchexruan choo xan. 34Ko thi ndaxra betaꞌa ngain nthanchauen José ixin rujine jeꞌe, bajon ngain xan choo ko naꞌo nthiꞌá icha tsjé bajon ngain xan Benjamín. Kuthejan juine na̱ ko biꞌi na̱ ko anto chee na̱.
Currently Selected:
Génesis 43: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
