Génesis 8
8
Kununxin nche xema
1Kuthimejan xraxaon Ndo Dio ixin Noé ko kain kuxiigo bixinkaꞌo Noé ngain barco, ko binchegatho Ndo naa chrintho suji ngataꞌa nunthe ko jinda kuexiꞌin xinkajin nda. 2Ko tabijee kain thi chrinduxin jinda chringi ndachaon ko tabijee thi dachrjexin jinda nthiꞌa ngajni. 3Ko jinda yauchjan ko yauchjan xinkajin nda ngataꞌa nunthe. Bathuja thi naa renkia ko yoo kan ko the nchaꞌon, 4kuthimejan barco tabetaꞌa ngain jna Ararat, ngaa kunithjao yatuxin ngain nchaꞌon theyaato. 5Ko jinda thinga baxinkajin nda, ko ngain kunithjao thexin ko nchaꞌon thexinxin kunithjao, kuexiꞌin bikon ni kon jna icha yeye.
6Ko batho yoo kan nchaꞌon, kuthimejan Noé banthjee thi ventana jii ngain barco. 7Ko kuajanda naa kunthaꞌa ko bakjangatauꞌen ba jinda ixin bagiraꞌa ba thi xema, thi rugengathjen ba. 8Kuthimejan ruaꞌan naa kuxentha ixin rugikunxin a uxema nunthe, 9aro kuxentha biraꞌa ba thinoo rukentaꞌa ruthee ba ixin nunthe xra jichretheꞌe jinda, ko kjan ba ngain Noé ko kuinxe raa ko tse ba ko xranxiꞌin ba ngain barco.
10Ko chuꞌen iyaato nchaꞌon, kuthimejan kjan kuajanda kuxentha inaa. 11Ko kuxentha kjan ba ngain Noé are utsukjin, ko jixrao ba naa kachjeꞌen ka olivo ko jañaa kuinxin Noé ixin ixruꞌin jinda jii ngataꞌa nunthe. 12Ko Noé xra chuꞌen iyaato nchaꞌon kuthimejan kjan kuajanda kuxentha, aro kuxentha ikjanꞌa ba ngain.
13Ko are Noé bechunda inkjaon renkia ko naa nano, ko ngain kunithjao saꞌo, ngain nchaꞌon thexinxin kunithjao ndajixema nunthe, ko Noé kuexiꞌin bantsjeꞌe thi jitsaa barco ko bikon ixin nguixin ngataon nunthe ndajixema. 14Ko ngain kunithjao yuxin ko ngain nchaꞌon kan ko yaato juexin xema nunthe. 15Kuthimejan Ndo Dio ndachro Ndo ngain Noé: 16«Dachrjexin ngain barco, jaꞌa, chriꞌa, xaꞌan ko nchri deindaꞌa. 17Kai dantsje kain kuxiigo te ngajin: kuxiigo techunda nene, kuxiigo nchekjanii ni ngain nchia, kuxiigo chrjikua ko te ngaꞌa jna, kuxiigo thingajintaon tseꞌe nunthe, ko tajanda ba satsji ba nguii ngataꞌa nunthe ko sinchetsjé choo ba.»
18Kuthimejan Noé bachrjekaꞌo chriꞌi, xeꞌen ko nchri deindeꞌe. 19Kai bachrje kainxin kuxiigo, ku thingajintaon tseꞌe nunthe, ku techunda nene ko kain kuxiigo yeye ko nchinchin. 20Ko Noé binchechjian giꞌi jitangi ko nthiꞌa kjuaaga kuxiigo ngataꞌa, ixin binchendusen ngain Ndo Dio, kuxiigo bajon Ndo juachaxin ixin nchao sine ni ko sinchendusen ni ngain Ndo. 21Ko are kuxrajniꞌi Ndo Dio thi anto chrjuin xrajni ndachro Ndo ngathe anseen Ndo: «Irukjanꞌa na rundachrjan ixin jianꞌa tsjiꞌi nunthe ixin thi jianꞌa ncheꞌe chujni, ixin chujni are xra nchinchin na̱ xraxaon na̱ ngathe anseen na̱ sincheꞌe na̱ juxon thi jianꞌa. Ko irukjanꞌa na suꞌen kain thi jichon inchin ukuꞌen.
22»Ko are xra seꞌe nunthe,
xra tsenga ni ko xra suan thi tsenga ni,
xra seꞌe kin ko sua,
xra seꞌe kunithjaue kin, kunithjaue sua
ko xra seꞌe nchaꞌon ko thi̱e.»
Currently Selected:
Génesis 8: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
