San Juan 5

Jesús binchexrueꞌen naa xii chroꞌa bakji

1Are batho kanxion nchaꞌon ni judío binchechjian na̱ naa kiai, ko Jesús kjan ngain rajna Jerusalén. 2Ko ngain rajna Jerusalén, chiaon thi dixinxin ni rajna thi diꞌin “Thi dixinxin kuleko” nthi̱ꞌa̱ jii naa thi jiria jinda ko ngain ngigua hebreo diꞌin Betesda. Ko thi jiria jinda jindajin naꞌo thjarioꞌo jikeꞌe thi jijanthe. 3Ko nthi̱ꞌa̱ te tsjé chujni niꞌi, ni chroꞌa dikon, ni chroꞌa thji ko ni chroꞌa thingi, ko kain chujni mee techuꞌen na̱ tsingi jinda. 4Ixin naa ángel nanao baxinkanjio ngain thi jiria jinda ko banchengithjen nda, ko thi niꞌi saꞌo baxinkajingi jinda mee, ndabakuxrueꞌen kexeꞌo chin bechunda. 5Ko nthi̱ꞌa̱ beꞌe naa xii ubechunda kan ko thejni nano beniꞌi xa. 6Ko are Jesús bikon xii mee tajitsinga xa nthi̱ꞌa̱, jeꞌe ubenuꞌe ixin anto see beniꞌi xa. Mexinxin ndachro ngain xa:

—¿Arinao tsuxruaꞌan?

7Ko thi niꞌi ndachro:

—Jaꞌan chundaꞌa kensen ruxrangi na ngain jinda are thingithjen nda, ixin are jaꞌan rinaꞌo singi nda, ko ujee ni dingi saꞌo.

8Ko Jesús ndachro:

—Dingathjen, ko tsiꞌin kaniaꞌa ko thjixin ruthea.

9Ko tuinxion xii mee ndakuxrueꞌen xa ko tsiin xa kanieꞌe xa ko kuexiꞌin kjuixin ruthee xa. Ko nchaꞌon mee, nchaꞌon banchejugaꞌa na̱. 10Mexinxin ni judío ndachro na̱ ngain jeꞌe thi kuxrueꞌen:

—Jai nchaꞌon nchejugaꞌa ni, ko jeꞌa jian ixin jaꞌa tsame kaniaꞌa.

11Thi xii mee ndachro:

—Thi binchexruanna ndachjejin na: “Tsiꞌin kaniaꞌa ko thjixin ruthea.”

12Kuthimejan banchiangiꞌi na̱ ko ndachro na̱:

—¿Kensen ndathjo: “Tsiꞌin kaniaꞌa ko thjixin ruthea”?

13Ko thi xii mee benueꞌa kensen binchexrueꞌen ixin Jesús sadikjixin ngayee chujni te nthi̱ꞌa̱. 14Kuthejan Jesús betanxin thi xii mee ngain niꞌngo, ko ndachro ngain xa:

—Tsjexin, jaꞌa ukuxruaꞌan, mexinxin ikjanꞌa ncheꞌe thi jianꞌa ko jañaa tsuanꞌa thi icha tangi.

15Ko thi xii mee sakjui xa bindachro xa ngain ni judío ixin Jesús thi binchexrueꞌen xa. 16Ko ni judío ruee na̱ Jesús ixin naruguenxon na̱ ixin jeꞌe banchexrueꞌen ni niꞌi ngain nchaꞌon nchejugaꞌa ni. 17Aro Jesús ndachro ngain na̱:

—Ndudana kainxin nchaꞌon ncheꞌe ndo xra, ko jaꞌan kai rinthaꞌa xra.

18Ko ixin jiꞌi ni judío icha bakjee kexreen ruguen na̱ Jesús, ko jeoꞌa ixin banchexrueꞌen ni niꞌi ngain nchaꞌon nchejugaꞌa ni, kai ixin bandachro ixin Ndo Dio, Ndudee jeꞌe, ko jeꞌe inchin jeꞌe ndo.

Thi juachaxin chunda xeꞌen Ndo Dio

19Kuthimejan Jesús ndachro ngain na̱:

—Nduaxin thi rundathjo ra, jaꞌan thi Xeꞌen Ndo Dio, chroꞌa sinthaꞌa thi jaꞌon rinaꞌo, jaꞌan nthaꞌa thi dikon ncheꞌe Ndudana ixin kain thi ncheꞌe Ndudana, mee thi nthaꞌa jaꞌan kai. 20Ixin Ndudana anto thjue na ndo, ko tjaguꞌna ndo kain thi jeꞌe ndo ncheꞌe ndo, ko xra tsjaago ndo thi icha jié xra sincheꞌe ndo ko jaꞌa ra tsisaꞌan ra are sikon ra jiꞌi. 21Jañaa inchin Ndudana nchexechon ndo chujni digeꞌen, jañaa kai jaꞌan, thi Xeꞌen ndo, sinthagechon chujni jaꞌan rinaꞌo. 22Ko Ndudana xruꞌin jie̱ sincheꞌe ndo ngain chujni ixin jaꞌan thi bayáa juachaxin sinthaꞌa jie̱ 23ixin jaꞌan thi Xeꞌen Ndo Dio, kai sinchesayana na̱ jaꞌan jañaa inchin nchesayeꞌe na̱ jeꞌe ndo. Ko thi nchesayanaꞌa, kaxon nchesayeꞌa Ndudana, ndo ruaꞌan na jaꞌan.

24’Jaꞌan ndua thi rindathjo ra, thi chujni thiꞌin thi jaꞌan ndachrjan ko dithikaon thi ruaꞌan na jaꞌan, chujni mee kjan na̱ inaa chujni narua ko xruꞌin nchaꞌon tsjexin, ko chujni mee isuenꞌa na̱ jie̱ ixin thi jianꞌa bincheꞌe na̱, ixin jeꞌe na̱ ubayee na̱ juachaxin kjan na̱ inaa chujni narua thi xruꞌin nchaꞌon tsjexin. 25Jaꞌan ndua rindathjo ra ixin tsii nchaꞌon, ko nchaon mee ujuii nchaon are chujni chunxinꞌa na ko tsiꞌin na̱ thana jaꞌan, thi Xeꞌen Ndo Dio, chujni mee rukjan na̱ inaa chujni narua ko xruꞌin nchaꞌon tsjexin. 26Ixin jañaa inchin Ndudana chunda ndo juachaxin dajon ndo thi nchegechon ni, jañaa kai xrajeꞌo juachaxin mee bayáa jaꞌan ixin sajon thi nchegechon ni. 27Ko kai chjana ndo juachaxin sinthaꞌa jie̱ jaꞌan, thi Xii juixin ngajni. 28Ko jaꞌa ra thisanꞌa ra ixin jiꞌi ixin tsii nchaꞌon are kain chujni undabeꞌen tsiꞌin na̱ thana, 29ko sachrjeduxin na̱ thi texrabaa na̱. Ko ni bincheꞌe thi jian ruxechon na̱ ko ixruꞌin nchaꞌon seꞌen na̱, aro ni bincheꞌe thi jianꞌa ruxechon na̱ ixin suꞌen na̱ jie̱.

Chujni ndachro ixin Jesús, jaan, Xeꞌen Ndo Dio

30’Jaꞌan chroꞌa sinthaꞌa thi jaꞌon rinaꞌo. Jaꞌan nthaꞌa jie̱ inchin thetunna Ndudana ko jian nthaꞌa jie̱, ko jaꞌan thjeꞌa sinthaꞌa thi jaꞌan rinaꞌo, ixin jaꞌan nthaꞌa thi rinao Ndudana, ndo ruaꞌan na. 31Ja̱ jaꞌon rundachrjan ixin jaꞌan anto jian na, mee xruꞌin xree. 32Aro jii naa thi nichja ixin kensen na jaꞌan, ko thi nichja jeꞌe ixin jaꞌan, jaan ndua. 33Jaꞌa ra ruaꞌan ra chujni ixin banchiangiꞌi na̱ Juan, ko thi jeꞌe nichja, jaan, ndua. 34Aro jaꞌan rugundanaꞌa ixin chujni runichja na̱ jian ixin jaꞌan, jeꞌo ndachrjan jiꞌi ixin jaꞌa ra nchao rukjan ra inaa chujni narua. 35Juan, beꞌe inchin naa candil bache ko banchengasaan, ko jaꞌa ra chaꞌa ra ixin xruii kainxion nchaꞌon. 36Aro jaꞌan chunda inaa thi nichja jian ixin jaꞌan ko icha renthe ke thi nichja Juan, ko mee thi nthaꞌa jaꞌan thi kuetunna Ndudana. Ko mee thi nichja ixin jaꞌan ko nichja ixin Ndudana thi ruaꞌan na. 37Ko Ndudana, ndo ruaꞌan na jaꞌan, nichja ndo ixin jaꞌan, ko jaꞌa ra xruꞌin nchaꞌon kuiꞌin ra thee ndo ko xra dikonꞌa ra ndo. 38Ko jaꞌa ra dayeꞌa ra juajnee ndo, ixin dithikaonꞌa ni ra jaꞌan, thi jeꞌe ndo ruaꞌan ndo. 39Jaꞌa ra anto tsjeꞌe ra Xroon ixin tuenao ra ixin jañaa rukjan ra inaa chujni narua ke xruꞌin nchaꞌon tsjexin, aro Xroon nichja xron ixin jaꞌan. 40Aro jaꞌa ra rinaoꞌa ra dithikaon ni ra jaꞌan ko rukjan ra inaa chujni narua ke xruꞌin nchaꞌon tsjexin.

41’Ko jaꞌan rinaoꞌa ixin chujni runichja chrjuin ixin jaꞌan. 42Ko jaꞌan chunxin ra ko nuna ixin jaꞌa ra thjueꞌa ra Ndo Dio. 43Ko jaꞌan juiꞌi ixin Ndudana ruaꞌan na ndo, aro jaꞌa ra dayénaꞌa ni ra, aro ja̱ kexeꞌo inaa chujni rukii ko runichja thi jeꞌo xraxaon, chujni mee, jaan, rugayeꞌe ra na̱. 44¡Kexreen sithikaon ni ra jaꞌan, ja̱ jeꞌo jaꞌa ra nchesayeꞌe choo ra ko thjeꞌa ra juasaaya thixin ngain Ndo Dio! 45Aro xraxaonꞌa ra ixin jaꞌan tsjangiꞌa ra ngathexin kon Ndudana, ko jaꞌa ra chunthia ra thi kji̱n Moisés, ko Moisés thi tsjangiꞌa ra. 46Ko ja̱ rugithikaon ra Moisés, kai rugithikaon ni ra jaꞌan, ixin Moisés dikji̱n ixin jaꞌan. 47Ko jaꞌa ra ja̱ dithikaonꞌa ra thi jeꞌe dikji̱n, ¿kexreen sithikaon ra thi jaꞌan rindathjo ra?

Currently Selected:

San Juan 5: plsNT

Highlight

Copy