San Juan 6

Jesús chjee juine naꞌo no̱ chujni

(Mt. 14:13-21; Mr. 6:30-44; Lc. 9:10-17)

1Batho kanxion nchaꞌon, kuthimejan Jesús kjui tuenxin nda Galilea, thi kai diꞌin Tiberias. 2Ko tsjé chujni baruee Jesús ixin bagikon na̱ thi naꞌa bagikunxin na̱ bancheꞌe jeꞌe ngain chujni niꞌi. 3Kuthimejan Jesús kuani ngain naa jna, ko nthi̱ꞌa̱ tabeꞌe jeꞌe ko ni theyoo bakao. 4Ko uchiaon juii kiai bancheꞌe ni judío, thi kiai diꞌin pascua. 5Ko are Jesús bikon ixin anto tsjé chujni jiruee, jeꞌe ndachro ngain Felipe:

—¿Thinoo sikeꞌna ná thi sine kainxin chujni jiꞌi?

6Aro Jesús ndachro jañaa ixin bikunxin keꞌe rundachro Felipe aro jeꞌe ubenuꞌe jian keꞌe runcheꞌe. 7Ko Felipe ndachro:

—Kain tumi dacha naa thi ncheꞌe xra jni kunithjao xra sithjaꞌa tumi sinanxin kain niuthja sine kain chujni jiꞌi.

8Kuthimejan Andrés, xan choo Simón Pedro, jeꞌe kai naa chujni bakao Jesús, ko jeꞌe Andrés ndachro ngain Jesús:

9—Nthiꞌi jii naa xichjan chunda naꞌo niuthja dikunchjianxin cebada ko yoo kuchee, aro ¿kexreen siraxin sine kain chujni jiꞌi?

10Kuthimejan ndachro Jesús:

—Ndache ra kainxin na̱ tasinte na̱ ngataꞌa nunthe.

Ko anto ka beꞌe nthi̱ꞌa̱ thi binthe kain na̱, ko jeꞌo ni xii binthe inchin naꞌo no̱ na̱. 11Kuthimejan Jesús kuaa thi naꞌo niuthja ko kuexruxiꞌin Ndo Dio, kuthimejan bajon niuthja ngain chujni bakao, ko jeꞌe na̱ kunchjeeya na̱ niuthja ngain chujni binthe nthi̱ꞌa̱. Ko xrajeꞌo bincheꞌe Jesús ngain kuchee ko kain na̱ juine na̱ ba ko jian kujeꞌe na̱. 12Ko are ujuexin kujeꞌe na̱, Jesús ndachro ngain chujni bakao:

—Datse ra kain thi xeꞌe ixin singukuaꞌa.

13Ko jeꞌe na̱ batse na̱ kain thi xeꞌe ko binchekauntja na̱ theyoo nthaxra thi niuthja dikunchjianxin cebada xexin juine na̱. 14Kuthimejan are kain chujni bikon na̱ ixin Jesús bincheꞌe thi naꞌa bagikunxin na̱ jiꞌi, jeꞌe na̱ ndachro na̱:

—Ndua, jeꞌe naa thi dayée juajnee Ndo Dio, thi rukii ngataꞌa nunthe jiꞌi.

15Aro kain chujni mee binao na̱ sarugikao na̱ Jesús ixin runchekjan na̱ rey na̱, ko jeꞌe kunuꞌe jiꞌi mexinxin jeuxinxion kjan sakjui ngain jna inaa.

Jesús kjuixin ruthee ngatauꞌen jinda

(Mt. 14:22-27; Mr. 6:45-52)

16Ko are undakunthie chujni bakao Jesús kjui na̱ ngain jinda, 17ko kuani na̱ naa ntha barko ixin rukatauꞌen na̱ jinda ixin rugiji na̱ ngain rajna Capernaum. Ko undakunaxin xeꞌe ko Jesús xra dijiꞌa ngain na̱. 18Ko kuexiꞌin kjua chrintho suji ko jinda anto suji kjamangiathe nda. 19Ko are usakjui na̱ inchin naꞌo o inkjaon kilómetro ngatauꞌen jinda, jeꞌe na̱ bikon na̱ Jesús jitunchieꞌen ngain ntha barko ko jithixin ruthee ngatauꞌen nda, ko kain na̱ binthexraon na̱. 20Aro jeꞌe ndachro ngain na̱:

—¡Jaꞌan juiꞌi, xraonꞌa ra!

21Ko jeꞌe na̱ ixraonꞌa na̱ ko chuꞌen na̱ ixin Jesús kuani ntha barko, ko tuin biji na̱ ngain nunthe tethji na̱.

Chujni kjuee na̱ Jesús

22Ko nduexion kainxin chujni ndabithuꞌe tuenxin ndachaon binthegikon na̱ ixin kain chujni bakao Jesús sabikao na̱ thi nakuaxinxon ntha barko beꞌe nthi̱ꞌa̱ ko bikon na̱ ixin Jesús kjuiꞌa ngain na̱. 23Aro kanxion ntha barko juixin rajna Tiberias biji ntha chiaon thi juinenxin na̱ niuthja, nio binchenchaon Jesús. 24Ko are chujni bikon na̱ ixin Jesús ko ni bakao jeꞌe ibintheꞌa na̱ nthi̱ꞌa̱, kain chujni kuani na̱ ntha barko ko sakjui na̱ ngain rajna Capernaum ixin bikjee na̱ Jesús.

Jesús thi niuthja nchegechon ni

25Ko are ubiji na̱ tuenxin jinda, betan na̱ Jesús ko banchiangiꞌi na̱:

—Suixin ke tjaago, ¿kensa juiꞌi nthiꞌi?

26Aro Jesús ndachro ngain na̱:

—Jaan ndua thi rindathjo ra ixin jaꞌa ra thjee ni ra aro jeꞌa ixin thi naꞌa bikunxin ra binthaꞌa, jaꞌa ra thjee ni ra ixin juinthe ra ko jian kujaꞌa ra. 27Ko ncheꞌe ra xra, aro jeꞌa ixin thi jine ni ixin yaa ndathjexin, ncheꞌe ra xra ixin thi nchekjan ni inaa chujni narua ko xruꞌin nchaꞌon tsjexin. Ko jaꞌan thi Xii juixin ngajni, ruchjaꞌa ra jeꞌe mee ixin Ndo Dio Ndudana chjana ndo juachaxin mee.

28Kuthimejan banchiangi na̱ ko ndachro na̱:

—¿Keꞌe rinao Ndo Dio ixin jaꞌan ná sinthaꞌa ná?

29Ko Jesús ndachro:

—Ndo Dio rinao ndo ixin jaꞌa ra dithikaon ni ra jaꞌan, thi jeꞌe ndo ruaꞌan ndo.

30Kuthimejan banchiangiꞌi na̱ Jesús ko ndachro na̱:

—¿Keꞌe thi xra naꞌa dikunxin ná sincheꞌe jaꞌa, ixin jaꞌan ná sithikaꞌon ná? ¿Keꞌe nchao sincheꞌe? 31Ni ndo dachriꞌna ná xrachrjen juine na̱ maná ngain jna thi xruꞌin jii, jañaa inchin jitaxin ngain Xruen Ndo Dio: “Ngajni xinkajinxin niuthja bajon ndo juine na̱.”

32Ko Jesús ndachro:

—Jaꞌan ndua thi rindathjo ra ixin jeꞌa Moisés thi chjaa ra niuthja juixin ngajni, Ndudana dajon ndo thi niuthja ndua juixin ngajni. 33Ko niuthja dajon Ndo Dio, mee thi juixin ngajni ko jeꞌe nchekjan chujni inaa chujni narua.

34Kuthimejan ndachro na̱:

—Nchana ná, kainxin nchaꞌon chjana ni ra niuthja yaa.

35Ko Jesús ndachro ngain na̱:

—Jaꞌan thi niuthja nchegechon chujni. Thi chujni tsii ngajin xruꞌin nchaꞌon seꞌen na̱ jintha, ko thi sithikaon na jaꞌan xruꞌin nchaꞌon seꞌen jinda. 36Aro undathjo ra, maski ubikon ni ra, jaꞌa ra dithikaonꞌa ni ra. 37Kainxin chujni chjana Ndudana, tsii na̱ ngajin, ko kain chujni thii ngajin, jaꞌan sayaa na̱. 38Ixin jaꞌan juixin ngajni ko jeꞌa ixin sinthaꞌa thi jaꞌan rinaꞌo, jaꞌan juiꞌi ixin sinthaꞌa thi rinao thi ruaꞌan na nthiꞌi. 39Ko thi rinao thi ruaꞌan na nthiꞌi, mee ke xruꞌin chujni chjana ndo sinthatjaan, ixin jaꞌan sinthaxechon chujni mee ngain thi nchaꞌon are ndatsjexin nunthe. 40Ixin Ndudana rinao ndo ixin kain chujni satsuan na na̱ jaꞌan, thi Xeꞌen ndo, ko sithikaon na̱ ngajin, rukjan na̱ inaa chujni narua ko xruꞌin nchaꞌon tsjexin, ko jaꞌan sinthaxechon na̱ ngain thi nchaꞌon are ndatsjexin nunthe.

41Ko ni judío kuexiꞌin na̱ nichja na̱ jianꞌa ixin Jesús ixin jeꞌe ndachro: “Jaꞌan thi niuthja juixin ngajni.” 42Ko ndachro na̱:

—¿Ajeꞌa jiꞌi Jesús, thi xi tsiꞌi José? Jaꞌan ná chunxin ná ndudee ko janee. ¿Kexreen jeꞌe nchao rundachro ixin jeꞌe juixin ngajni?

43Kuthimejan Jesús ndachro ngain na̱:

—Inichjaꞌa ra jañaa. 44Xruꞌin chujni nchao tsii ngajin, ja̱ jeꞌa Ndudana thi tsiaꞌo na na̱, ko jaꞌan sinthaxechon chujni mee ngain thi nchaꞌon are ndatsjexin nunthe. 45Ngain xroon dikji̱n ni bagayée juajnee Ndo Dio ndachro: “Ndo Dio sinchekueꞌen kain chujni.” Mexinxin kain chujni kuiꞌin thi ndachro Ndudana ko kuangi ngain jeꞌe ndo, chujni mee thii na̱ ngajin.

46’Xruꞌin chujni bikon Ndudana, jeꞌo jaꞌan thi juixin ngajni, bikon ndo. 47Jaꞌan ndua thi rindathjo ra, thi chujni dithikaon ngajin, chujni mee rukjan na̱ inaa chujni narua thi xruꞌin nchaꞌon tsjexin. 48Jaꞌan thi niuthja nchegechon chujni. 49Ni ndo dachriꞌa ra xrachrjen juine na̱ maná ngain jna thi xruꞌin jii, ko maski juine na̱ jeꞌe na̱ ndabeꞌen na̱. 50Aro jaꞌan thi niuthja juixin ngajni, ko thi sine niuthja jiꞌi, chujni mee isenꞌa. 51Jaꞌan thi niuthja jichon juixin ngajni. Thi chujni sine niuthja jiꞌi, chujni mee sechon kainxin nchaꞌon, ko thi niuthja jaꞌan sajon, mee nthauꞌna, ko jaꞌan sajon nthauꞌna ixin kainxin chujni rukjan na̱ inaa chujni narua thi xruꞌin nchaꞌon tsjexin.

52Kuthimejan ni judío kuexiꞌin kuyauthe choo na̱ ko binthendachro na̱:

—¿Kexreen ixin xii jiꞌi nchao ruchjaa ná nthauꞌe sunthe ná?

53Jesús ndachro ngain na̱:

—Jaꞌan rindathjo ra ndua, ixin ja̱ sintheꞌa ra nthauꞌna, thi nthauꞌe thi Xii juixin ngajni, ko siꞌa ra jnina, jaꞌa ra chroꞌa rukjan ra inaa chujni narua thi xruꞌin nchaꞌon tsjexin. 54Thi chujni jine nthauꞌna ko siꞌi jnina, chujni mee nchao rukjan inaa chujni narua ko xruꞌin nchaꞌon tsjexin, ko jaꞌan sinthaxechon chujni mee ngain thi nchaꞌon are ndatsjexin nunthe. 55Ixin nthauꞌna mee thi ndua jine ni, ko jnina, mee thi ndua diꞌi ni. 56Thi chujni jine nthauꞌna ko diꞌi jnina, chujni mee jii ngajin ko jaꞌan riꞌi ngain chujni mee. 57Ndudana, ndo jichon, jeꞌe ndo ruaꞌan na ndo, ko jaꞌan richon ixin jeꞌe ndo, mexinxin thi chujni sine na jaꞌan kai sechon ixin jaꞌan. 58Ko jaꞌan thi niuthja juixin ngajni. Ko jeꞌa inchin niuthja juine ni ndo dachriꞌa ra xrachrjen ko maski juine na̱ niuthja mee, jeꞌe na̱ ndabinthegeꞌen na̱, aro thi chujni jine niuthja jiꞌi, chujni mee sechon kainxin nchaꞌon.

59Kain jiꞌi kjuaago Jesús are beꞌe ngain niꞌngo Capernaum.

Tsjé chujni bakao Jesús sakjuixin na̱ ngain

60Are kain chujni bakao Jesús kuiꞌin na̱ jiꞌi, ndachro na̱:

—Thi kjuagua ná xii jiꞌi anto tangi sithikaon ni, ¿kensen nchao sithikaon jiꞌi?

61Ko Jesús kunuꞌe ixin chujni tedithikaonꞌa na̱ thi jeꞌe kjuaago ko ndachro:

—¿Achrjuinꞌa tunuꞌa ra ixin thi jaꞌan rindachrjan? 62Mexinxin, ¿keꞌe ruxraxaon ra ja̱ rugikon ni ra jaꞌan, thi Xii juixin ngajni, sarukajiin nthi̱ꞌa̱ thi bariꞌi? 63Espíritu thi nchegechon ni, ko nthao xruꞌin renthe nthao. Ko thi jaꞌan ndathjo ra, mee Espíritu ko mee thi nchegechon ni. 64Aro xra te kanxion ra xro xra dithikaonꞌa ra.

Ixin Jesús ubenuꞌe kekaa chujni bagithikaonꞌa, ko kensen rukjaago jeꞌe ixin rutse na̱. 65Ko ndachro:

—Mexinxin jaꞌan ndathjo ra ixin xruꞌin chujni nchao tsii ngajin, ja̱ Ndudana tsiaoꞌa na̱.

66Are maꞌo, tsjé chujni bakao Jesús irueꞌa na̱ jeꞌe. 67Kuthimejan Jesús banchiangiꞌi thi theyoo chujni bakao ko ndachro:

—¿Akai jaꞌa ra rinao ra satsji ra?

68Aro Simón Pedro ndachro:

—Nchana, ¿ngain kensen tsji ná? Jeꞌo thi Suixin nichja nchekjan ni inaa chujni narua ko xruꞌin nchaꞌon tsjexin. 69Jaꞌan ná ubithikaꞌon ná ko nuna ná ixin Suixin thi Cristo, thi Xeꞌen Ndo Dio, ndo jichon.

70Jesús ndachro:

—Jaꞌan kuinchiaꞌa ra jaꞌa ra xro theyoo ra, ko ixinꞌa mee, naa ra chujnii nchiijin ra.

71Jesús ndachro jiꞌi ixin Judas Iscariote xeꞌen Simón, naa thi theyoo chujni kuinchieꞌe Jesús ko jeꞌe thi rundachro ixin rutse na̱ Jesús.

Currently Selected:

San Juan 6: plsNT

Highlight

Copy