San Lucas 15

Thi kuꞌen kuleko digitjaan

(Mt. 18:10-14)

1Kain xi thjejo tumii César ko chujni ncheꞌe jianꞌa binthekunchieꞌen na̱ ixin binthekiꞌin na̱ thi ndachro Jesús. 2Mexinxin xi fariseo ko xi tjaago ley chrjuinꞌa nichja xa ixin Jesús ko ndachro xa:

—Xii jiꞌi dakao jian kain chujni ncheꞌe jianꞌa ko jinekaꞌo na̱.

3Kuthimejan Jesús nichja naa thi kuꞌen jiꞌi:

4—¿Kexeꞌe ra, xro chunda ra naꞌo kan kuleko, ko sinchetjaan ra naa ba, atsinthueꞌa ra thi noo kan ko thena̱a̱ ba ngataon jngi ko tsji ra sikjee ra thi ko ndabitjaan, ko sinchija ra ba kuthimejan rukjan ra? 5Ko are sinchii ra ba, jaꞌa ra ruchaꞌa ra ko tsame ra ba ngataꞌa nthachaan ra. 6Ko are saso ra nchiandui ra, sinchenueꞌe ra kain ni jian dakjioꞌo ra ko ni te chrika nchiadui ra ko rundache ra na̱: “Jai chaꞌa ra ngajin ixin ubithja thi kuleko binthatjaan.” 7Jaꞌan ndathjo ra ixin jañaa tsuꞌen nthi̱ꞌa̱ ngajni, ixin icha seꞌe thi ruchee ni are naa chujni isincheꞌa thi jianꞌa ko sithikaon Ndo Dio, ke ixin thi noo kan ko thena̱a̱ chujni jian, ni irugundeꞌa tsentuxin na̱ thi jian tencheꞌe na̱.

Tumi digitjaan

8Ko Jesús ndachro:

—Keꞌe sincheꞌe naa nchrii chunda the tumi ko sinchetjaan nchra naa tumi. ¿A jeꞌa sinchegakaon nchra naa xruꞌi, sajon nchra nchia ko jian tsjee nchra tumi siraja nchra tumi? 9Ko are sithja nchra tumi mee, jeꞌe nchra siruee nchra kain nchri jian xrakao kunixin kain nchri te chrika nchianduꞌa nchra ko rundachro nchra ngain kain nchrii mee: “Anchee chaꞌa ra ngajin ixin jaꞌan ubithja thi tumi binthatjaan.” 10Jaꞌan rindathjo ra ixin xrajeꞌo chee Ndo Dio ko angeel ndo, are naa chujni incheꞌa thi jianꞌa ko dithikaon Ndo Dio.

Thi kuꞌen xan sakjuixin nchianduꞌa

11Ko kai ndachro Jesús:

—Naa thi xii bechunda xa yoo xaxii, 12ko xan icha nchiin ndachro xan ngain ndudee xan: “Pa, dichjana thi jikininxin na sayaa.” Kuthimejan jeꞌe ndo kunchjeyeꞌe ndo kayui xan mee thi bechunda ndo. 13Ko tsjéꞌa nchaꞌon batho, xan icha nchiin binchekji xan nunthe bayée xan, ko tumi mee sakjuixin xan inaa nunthe anto kjín. Ko nthi̱ꞌa̱ binchexinkua xan tumii xan ko bakjikua xan. 14Ko are ujuexin binchexiꞌin xan kain tumii xan, anto ndakuchjunga thi rune na̱ ngain nunthe mee, ko jeꞌe xan anto bageꞌen xan jintha. 15Kuthimejan sabiganchia xan xra ngain naa xi najni ngain nunthe mee, ko xi najni mee bajon xa xra ngain xan. Ko jeꞌe xan sabikingaria xan kukuchi ngataon jngiꞌi xa. 16Ko jeꞌe xan anto bageꞌen xan jintha, ko binao xan rujine xan thi bane kukuchi, ko xruꞌin chujni bachjee xan thi rune xan. 17Kuthimejan beꞌe xan xraxaon xan ko ndachro xan: “¡Anto tsjé ni nchexree ndudana xeꞌe na̱ thi jine na̱ ko jaꞌan nthiꞌi ndajidenxin na jintha! 18Icha jian jaꞌan sarukjan na thi jii ndudana ko rundathjan ndo: Pa, jaꞌan jianꞌa binthaꞌa ngain Ndo Dio ko ngajin suixin. 19Jaꞌan ijikininxinꞌa na siꞌin na xaꞌan; jeꞌo chjana xra inchin naa ni nchexraa.” 20Ko jamee bincheꞌe xan; kuaa xan nthiꞌá ko sakjan xan nchianduꞌa ndudee xan.

’Xra ikjion juii xan ko ndudee xan bikon xan ko kuiakunueꞌe ndo xan. Ko kuinga ndo bigetanxin ndo xan ngatja nthiꞌá ko kjuua ndo xan ko anto chee ndo. 21Kuthejan jeꞌe xan ndachro xan ngain ndudee xan: “Pa, jaꞌan jianꞌa binthaꞌa ngain Ndo Dio ko ngajin suixin. Jaꞌan ijikininxinꞌa na siꞌin na xaꞌan suixin.” 22Aro ndudee xan kuetuꞌen ndo ni nchexree ndo: “Jaikua sikoo ra luntho icha jian ko thentuxinna ra xan, ko kai dakeꞌe ra naa kuchianingo ngain raa xan, ko nchekjanga ra xan kathee xan. 23Sikoo ra kuxinthachjan binthanthao ko dueꞌen ra ba. ¡Ko sunthe ná ko ruchaa ná! 24Ixin xanꞌna jiꞌi xraa undabeꞌen xan, ko jai kjan xechon xan. Undabitjaan xan ko xra kjan ná binthoo ná xan.” Ko kuexiꞌin na̱ binchechjian na̱ kiai ixin jeꞌe xan.

25’Ko are mee xan saꞌo ngataon jngi jii xan. Ko are sakjan xan ko uchiaon juii xan nchianduꞌa xan, kuiꞌin xan soon ko kuiꞌin xan ixin tethe na̱. 26Kuthimejan baye̱e xan naa ni ncheꞌe xree ndudee xan ko banchiangiꞌi xan keꞌe jituꞌen yaa. 27Jeꞌe ni ncheꞌe xra mee ndachro: “Juii xan choo, ko ndudaa kuetuꞌan ndo beꞌen thi kuxinthachjan kjunthao, ixin juii xan choo ko xruꞌin kuꞌen xan.” 28Aro xan saꞌo guñao xan, ko ichroꞌa xan bixiꞌin xan nchia, mexinxin ndudee xan bachrje ndo ixin binchetseꞌen ndo ñao xan ixin rugixiꞌin xan nchia. 29Ko jeꞌe xan ndachro xan ngain ndudee xan: “Suixin nuꞌa kejaꞌin nano jaꞌan rinthaꞌa xra ngajin, ko kainxin nchaꞌon jaꞌan dithikaꞌon kain thi diketunna, aro suixin xruꞌin nchaꞌon bechjana naa kuchibatuchjan ixin rujinekiꞌan xan jian dakjiꞌan. 30Aro jai juii xaꞌan jiꞌi, xan binchexinkua tumia ngain nchrii tuchji ngain xii, ko suixin buꞌen thi kuxinthachjan kjunthao ixin sine xan.” 31Kuthimejan ndudee xan ndachro ndo ngain xan: “Jaꞌa kainxin nchaꞌon riꞌi ngajin, ko kainxin thi richunda, jaꞌa kai chunda. 32Aro jai jikininxin sakeꞌe ná naa kiai ko sunthe ná ko ruchaa ná, ixin xan choo jiꞌi xraa ndabeꞌen xan ko kjan xechon xan. Ko jeꞌe xan bitjaan xan, aro jai binthoo ná xan.”

Currently Selected:

San Lucas 15: plsNT

Highlight

Copy