San Lucas 16

Xi ncheꞌe xra jianꞌa bincheꞌe

1Jesús kuekiin chujni bakao ko ndachro:

—Beꞌe naa xii bechunda tsjé tumi ko bechunda naa thi xii baketuꞌen ni ncheꞌe xree, ko chujni kjuangiꞌi na̱ xa ixin banchexinkua xa tumii xi najni. 2Kuthimejan xi najni mee baye̱e xa thi thetuꞌan mee ko ndache xa: “¿Andua thi ndachjejin na chujni ixin jaꞌa rithema na? Ndachjejin na thinoo kekaa binchexiꞌin tumina, ixin jaꞌa isincheꞌa xra ngajin.” 3Kuthimejan xi ncheꞌe xra mee beꞌe xa xraxaon xa: “¿Kexreen sinthaꞌa jai?, ixin xi najnina iruchjanaꞌa xa xra sinthaꞌa. Jaꞌan itsangaꞌa na ixin sinthaꞌa xra ngataon jngi, ko tusuana sanchiagaꞌa. 4¡Ununa keꞌe sinthaꞌa, ixin are santsjena na̱ xra, chujni jian sayéꞌna na̱ ngain nchianduꞌa na̱!” 5Kuthimejan thi baketuꞌan mee baye̱e nanaa chujni bekeꞌe xi najnii. Thi saꞌo banchiangiꞌi: “¿Jaꞌa, kejaꞌin rika ngain xi najnina?” 6Ko jeꞌe ndachro: “Jaꞌan rika ngain xa cien barrika aceite.” Jeꞌe thi baketuꞌan ndachro: “Nthiꞌi jii xroon jitaxin thi rika. Tuin dariꞌi ko tentaxin jeꞌo yoo kan ko the barrika.” 7Kuthimejan thi baketuꞌan banchiangiꞌi inaa thi jika ngain xi najnii: “Jaꞌa, ¿kejaꞌin rika ngain xi najnina?” ko jeꞌe ndachro: “Cien kusta trigo.” Kuthimejan thi baketuꞌan ndachro: “Nthiꞌi jii xroon thi jitaxin thi rika, ko jai tentaxin jeꞌo noo kan kusta trigo.” 8Ko xi najni jiꞌi banchekaꞌin xa ñao thi thetuꞌan mee ixin jian xraxaon keꞌe bincheꞌe. Ixin chujni dithikaonꞌa Ndo Dio icha nuꞌe thjengijna chujni ke chujni dithikaon Ndo Dio.

9’Jaꞌan ndathjo ra, ixin thjengijna ra icha chujni kunixin tumi dacha ra ngain nunthe jiꞌi, ixin ruchunda ra icha tsjé chujni jian sakjiꞌo ra. Ko are undatsjexin tumia ra nthiꞌi ngataꞌa nunthe seꞌe kensen ruchuꞌan ra nthi̱ꞌa̱ ngajni.

10’Thi chujni dakuꞌen thi tsjéꞌa chunda, kai jian sakuꞌen thi tsjé ruchunda, aro thi chujni dakuenꞌa thi tsjéꞌa, kai sakuenꞌa thi tsjé ruchunda. 11Mexinxin ja̱ dakuenꞌa ra thi jaꞌa ra chunda ra ngataꞌa nunthe jianꞌa jiꞌi, ¿kensen nchao ruchunthia ngajin ra ixin sayakuꞌen ra thi ndua icha renthe? 12Ja̱ dakuenꞌa ra thi jichunda inaa chujni, ¿kensen ruchjaa ra thi jikininxin ra?

13’Xruꞌin ni ncheꞌe xra nchao sincheꞌe xree yoo xi najni, ixin icha sinao naa xi najni ko runingakuꞌen inaa xa, o icha sithikaon ngain naa xi najni ko ngain inaa xa isincheꞌa xra. Jañaa kai, chroꞌa sincheꞌe ni xree Ndo Dio ko tsjee ni tsjé tumi.

14Xi fariseo anto banchexruxiꞌin xa tumi, ko jeꞌe xa tatethiꞌin xa kain jiꞌi, ko kjuanua xa Jesús. 15Kuthimejan Jesús ndachro ngain xa:

—Jaꞌa ra ngathexin kon chujni kunxon ncheꞌe ra ixin anto jian ra, aro nduaꞌa, ko Ndo Dio chunxin ansean ra. Ko thi xraxaon chujni ixin icha renthe, mee rentheꞌa ngathexin kon Ndo Dio.

Ley bayée Moisés ko thi thetuꞌan Ndo Dio

16’Ley bayée Moisés ko kain thi ndachro ni bagayee juajnee Ndo Dio, xrakuetuꞌan are Juan xra banchegithe chujni. Ko kai are Juan xrabanchegithe chujni kai kuexiꞌin xraago thi jian juajna ixin thi thetuꞌan Ndo Dio, ko tsjé chujni anto rinao na̱ tsji na̱ nthi̱ꞌa̱ thi thetuꞌan ndo.

17’Ko icha tangiꞌa sitjaan ngajni ko nunthe, ke tsuenꞌa thi jitaxin ngain ley.

Jesús tjaago ixin thi xii dachrjendeꞌe chriꞌi

(Mt. 19:1-12; Mr. 10:1-12)

18’Ja̱ naa xii sachrjendeꞌe xa chriꞌi xa ko sekaꞌo xa inaa nchrii, xii mee jianꞌa sincheꞌe xa, ixin sejuakaꞌo xa inaa nchrii jeꞌa chriꞌi xa. Ko xi sekaꞌo naa nchrii bachrjendeꞌe xixiꞌi, kai jianꞌa sincheꞌe xa ixin sejuakaꞌo xa naa nchrii jeꞌa chriꞌi xa.

Thi xii anto chunda tumi ko Lázaro

19’Beꞌe naa xii anto tsjé tumi bechunda ko bagengaa xa juxon luntho anto renthe, ko kain nchaꞌon bakiin xa kiai anto jié. 20Ko kai beꞌe naa xii nua biꞌin Lázaro bechunda tsjé thon ngain nthauꞌe ko tabageꞌe ngandangii nchianduꞌa xi anto tsjé jichunda. 21Ko xi nua jiꞌi binao xa rukujexin xa thi baginguxin ngataꞌa nthanchauꞌen thi xii anto tsjé tumi jichunda. Ko kunia bakunchieꞌen ba ko banchegani neje ba ngain thon bechunda xa. 22Naa nchaꞌon thi nua ndabeꞌen ko angeel Ndo Dio sabikao, ixin bigeꞌe ngain thi jii Abraham. Ko kai ndabeꞌen thi xii anto tsjé tumi bechunda ko kjuabaa na̱. 23Ko are xi jiꞌi utajii xa ngain xruꞌi dangaꞌa ko tangi jidathuꞌe xa, ko jeꞌe xa batsiin kon xa, ko kjín bikunxin xa Abraham ko Lázaro. 24Kuthimejan kuyao ko ndachro: “Ndudana Abraham, thiakunuana, ko ruaꞌan Lázaro sinchetjao kon raa kunixin jinda, ko tsii sinchetjao neje, ixin anto tangi jitunna ngathe xruꞌi jiꞌi.” 25Aro Abraham ndachro ngain thi anto tsjé tumi bechunda: “Jaꞌa xanꞌna, xraxaon ixin jaꞌa anto jian bariꞌi kain nchaꞌon barichon ngataꞌa nunthe, ko Lázaro anto tangi kuꞌen are jeꞌe bechon nthi̱ꞌa̱. Jai jeꞌe seꞌe jian nthiꞌi ko jaꞌa tangi tsuꞌan. 26Aro ngayaa ná jii naa tsaaga anto niꞌnga thi chroꞌa dathujin ni. Mexinxin thi chujni te nthiꞌi chroꞌa siji na̱ thi riꞌi jaꞌa, ko thi chujni te nthi̱ꞌa̱ chroꞌa tsii na̱ nthiꞌi.” 27Kuthimejan ndachro thi anto tsjé tumi bechunda: “Mexinxin suixin Abraham, nthatsaꞌan ñao ruaꞌan Lázaro ngain nchianduꞌa ndudana, 28ixin siketuꞌen thi naꞌo xan chian xa xii, ixin isincheꞌa xan thi jianꞌa ko jañaa tsiꞌa xan nthiꞌi thi riꞌi jaꞌan, thi anto tangi ridathua.” 29Aro Abraham ndachro ngain thi anto tsjé tumi bechunda: “Xan choo techunda xan xroon dikji̱n Moisés ko thi dikji̱n kain ni bagayee juajnee Ndo Dio. Ja̱ jeꞌe xan sithikaon xan thi ndachro xroon mee, jeꞌe xan sijiꞌa xan thi riꞌi jaꞌa.” 30Jeꞌe thi anto tsjé bechunda mee ndachro: “Suixin Abraham, yaa sithikaonꞌa xan, aro ja̱ ruruaꞌan naa chujni undabeꞌen ko runichjee xan, jamee nchue sithikaon xan ko isincheꞌa xan thi jianꞌa tencheꞌe xan.” 31Aro Abraham ndachro ngain thi anto tsjé tumi bechunda: “Ja̱ rinaoꞌa xan sithikaon xan thi kuetuꞌan Moisés ko thi dikji̱n ni bagayee juajnee Ndo Dio, kai sithikaonꞌa xan chujni ruxechon ngayee ni ndadigeꞌen.”

Currently Selected:

San Lucas 16: plsNT

Highlight

Copy