San Lucas 17

Kain nchaꞌon jii thi nchencheꞌe ni thi jianꞌa

(Mt. 18:6-7, 21-22; Mr. 9:42)

1Jesús ndachro ngain chujni bakao:

—Ngataꞌa nunthe jiꞌi, kain nchaꞌon seꞌe thi nchencheꞌe ni thi jianꞌa, aro ¡icha tangi tsuꞌen thi chujni sincheyeꞌe inaa chujni ixin sincheꞌe thi jianꞌa! 2Ko icha jian chujni mee rugechrianito naa xruchrin ngain thusin ko rugetsingangi ndachaon, ke sinchetjajin naa chujni ngain thi jianꞌa. 3Mexinxin tsjeꞌe ra jian thi tencheꞌe ra.

’Ko ja̱ naa thi dithikaon thi jian juajna ncheꞌe thi jianꞌa ngajin, nichjeꞌe ko ndache ixin nchaoꞌa jincheꞌe, ko ja̱ tsinthuꞌe thi jianꞌa jincheꞌe, jaꞌa nchetjañeꞌe. 4Ko chujni mee maski yaato nthiꞌa sincheꞌe jianꞌa ngajin ngain nakua nchaꞌon, ko yaato nthiꞌa tsii sinthathjo: “Irukjanꞌa na sinthaꞌa jamee”, jaꞌa sinchetjañeꞌe.

Thi juachaxin chunda chujni dithikaon Ndo Dio

5Ko chujni bakao Jesús ndachro na̱ ngain:

—Thjengijna ni ra ixin jaꞌan ná ruchunthia ná icha.

6Kuthimejan Jesús ndachro ngain na̱:

—Ja̱ thi chunthia ra rukujiéxin inchin naa tsee mostaza, jaꞌa ra nchao rundache ra ntha yua jiꞌa: “Jaꞌa dachrjengixin yaa, ko sadixenga ngangi ndachaon”, ko ntha yua mee runcheꞌe ntha thi ruketuꞌen ra ntha.

Thi jikininxin ncheꞌe ni ncheꞌe xra

7’Ja̱ chrujan ra chunda ra naa ni ncheꞌe xra ko thixin ngataon jngi ixin bikenga o bikingaria kuleko, ¿ako ndache ra: “Xrakui dariꞌi jinthe”? 8Naꞌi, jaꞌa ra ndachroꞌa ra jamee, ko jeꞌo ndachro ra: “Nchechjian thi sine ko sikuꞌna kain thi sinaꞌo are jaꞌan rine ko ridiꞌi, kuthimejan jaꞌa nchao sinthe ko siꞌi.” 9¿Andache ra thi ncheꞌe xra mee: “Ndo Dio tsjengaꞌa ꞌna”? Aro naꞌi ixin thi ncheꞌe xra mee, jeꞌo bincheꞌe thi jaꞌa kuetuꞌen. 10Jamee jaꞌa ra kai, are tsjexin sincheꞌe ra kain thi thetuꞌan Ndo Dio, ndachro ra: “Jaꞌan ná ni ncheꞌe xra xruꞌin xree ixin jeꞌo binthaꞌa ná xra bitunna ná.”

The chujni bechunda chin lepra kuxrueꞌen na̱

11Are Jesús sakjui ngain rajna Jerusalén, jeꞌe batho nununtheꞌe Samaria ko Galilea. 12Ko are Jesús biji ngain naa rajnanchjan, ngandeꞌe rajna mee the xii bechunda chin lepra bachuꞌen xa Jesús ngatja nthiꞌá, aro xra ikjion tabinthengathjen xa, 13ko binthendachro xa seen:

—¡Jesús, Suixin ke tjaago, thiakunuana ni ra!

14Are Jesús bikon kain xii mee, jeꞌe ndachro ngain xa:

—Sathji ra ko dikjaguꞌe ra xi daana ixin ixruꞌin chin chunda ra.

Ko are satethji xa, chiꞌin xa ndabitjaan chin. 15Kuthimejan naa xa are bikon xa ixin ixruꞌin chin jichunda xa, sakjan xa ko suji jituyao xa ixin jinchesayeꞌe xa Ndo Dio. 16Ko bethuxin xa ko bisetaꞌa xa nunthe ngain ruthee Jesús, ko kuexruxiꞌin xa Jesús. Ko xii mee xi Samaria. 17Kuthimejan Jesús ndachro:

—¿Ajeꞌa the xii xi kuxrueꞌen? ¿Thinoo te xi icha? 18¿Ajeꞌo xii jiꞌi, xi juixin inaa nunthe kjan xa ixin binchesayeꞌe xa Ndo Dio?

19Kuthimejan Jesús ndachro ngain xii mee:

—Dingathjen ko sathji, jaꞌa ukuxruaꞌan ixin chunthia na.

Tsii thi thetuꞌan Ndo Dio

(Mt. 24:23-28, 36-41)

20Kain xi fariseo banchiangi xa ngain Jesús ixin kensa tsii thi thetuꞌan Ndo Dio, ko Jesús ndachro ngain xa:

—Are tsii thi thetuꞌan Ndo Dio, mee jeꞌa thi nchao sikon ni. 21Ko chroꞌa rundachro ni: “Nthiꞌi jii”, o “Nujiꞌa jii”, ixin thi thetuꞌan Ndo Dio ujii ngayaꞌa ra.

22Kuthimejan ndachro ngain thi chujni bakao:

—Tsii nchaꞌon are jaꞌa ra sinao ra ixin jaꞌan, thi Xii juixin ngajni, sariꞌi ngajin ra maski nakua nchaꞌon, aro jaꞌa ra ichroꞌa sikon ni ra. 23Ko maski chujni rundathjo ra nthiꞌi riꞌi jaꞌan o nujiꞌa riꞌi, aro jaꞌa ra dithikaonꞌa ra na̱ ko rueꞌa ra na̱. 24Ko inchin dikon ni tungiixin nguii ngajni, jamee tsuꞌen ngain nchaꞌon are jaꞌan, thi Xii juixin ngajni, siꞌi inaa. 25Aro saꞌo rugunda anto tangi tsunna ko chujni te nchaꞌon teꞌi runingakunna na̱. 26Ko jañaa inchin bancheꞌe chujni ngain nchaꞌon are bechon Noé, jañaa kai sincheꞌe na̱ are jaꞌan, thi Xii juixin ngajni, siꞌi inaa. 27Ngain nchaꞌon bechon Noé, chujni bane na̱, bagiꞌi na̱ ko bakutheꞌe na̱, ko biji nchaꞌon are Noé bixiꞌin ngain arca ko juii chrin suji ko binchexanthe kain. 28Kai jamee kuꞌen ngain nchauen Lot. Are mee kain chujni bane na̱, bagiꞌi na̱, bakeꞌna na̱, banchekji na̱, bakenga na̱ ko banchechjian na̱ nchia. 29Are Lot bachrjexin ngain rajna Sodoma, ngajni binguxin xruꞌi ko azufre ko ndabuen kainxin chujni. 30Xrajeꞌo sincheꞌe chujni are jaꞌan, thi Xii juixin ngajni, rukjan siꞌi inaa.

31’Ngain nchaꞌon mee thi chujni seꞌe ngataꞌa nchianduꞌa, ko thi jichunda ngaxiꞌin nchianduꞌa saniaꞌa siruee. Ko ja̱ chrujan chujni seꞌe ngataon jngi, rukjanꞌa nchianduꞌa. 32Xraxaon ra keꞌe kuꞌen chriꞌi Lot. 33Thi jeꞌo thjee ixin jian seꞌe ngataꞌa nunthe jiꞌi, ndaseꞌen. Ko thi ruxrajon seꞌen rukjan inaa chujni narua ko xruꞌin nchaꞌon tsjexin.

34’Jaꞌan ndathjo ra, ixin ngain thie mee, ja̱ yoo chujni tatejua ngain nakua saon, naa sasikao Ndo Dio ko naa tasithuꞌe. 35Ko are mee, ja̱ yoo nchrii tedaꞌo nchra, naa nchra sasikao nchra Ndo Dio ko inaa nchra tasithuꞌe nchra. 36Ko ja̱ yoo xii tencheꞌe xa xra ngataon jngi, naa xa sasikao xa Ndo Dio ko inaa xa tasithuꞌe xa. 37Are chujni kuiꞌin jiꞌi, banchiangi na̱ ngain Jesús ko ndachro na̱:

—¿Thinoo tsuenxin kain jiꞌi?

Ko Jesús ndachro:

—Thi jitsinga thi ndadigeꞌen, nthi̱ꞌa̱ ruxrathe kunthachrjen.

Currently Selected:

San Lucas 17: plsNT

Highlight

Copy