San Lucas 18
18
Thi kuꞌen nchri gaꞌan ko xi ncheꞌe jie̱ jianꞌa
1Jesús kuekiin chujni bakao naa thi kuꞌen ko ixin rugunda runichjee na̱ Ndo Dio kain nchaꞌon ko tsunchrjenꞌa na̱. 2Jeꞌe ndachro ngain na̱:
—Ngain naa rajna beꞌe naa xi ncheꞌe jie̱, aro baxraguenꞌa xa Ndo Dio ko ndusenꞌa xa icha chujni. 3Ngain rajna mee beꞌe naa nchri gaꞌan ko bakji nchra ngain xi ncheꞌe jie̱ ixin baganchia nchra jie̱ ixin chujni baketukaꞌo nchra. 4Anto see xi ncheꞌe jie̱ jiꞌi chroꞌa xa bincheꞌe xa jie̱ ixin nchrii mee, aro beꞌe xa xraxaon xa: “Maski jaꞌan xraguanꞌa Ndo Dio ko ndusenaꞌa icha chujni, 5aro nchri gaꞌan jiꞌi juxon ndachjejin na nchra ixin sinthaꞌa nchra jie̱, mexinxin icha jian tsjengijna nchra ixin jañaa itsiꞌa nchra nanao ko isincheñaoꞌa na nchra.”
6Ko Jesús ndachro:
—Thiꞌin ra thi ndachro xi ncheꞌe jie̱ jianꞌa jiꞌi. 7¿A Ndo Dio sincheꞌa jie̱ ixin kain chujni jeꞌe ndo ukuinchieꞌe ndo ko nchetseꞌen na̱ ñao ndo nchaꞌon ko thie? ¿Ako tsunchrjeꞌen ndo ixin satheꞌe ndo? 8Jaꞌan ndathjo ra ixin jaikua sincheꞌe ndo jie̱ ixin jaꞌa ra. Aro jaꞌan, thi Xii juixin ngajni, are rukjan na siꞌi inaa, ¿a xra sithja ngain nunthe jiꞌi chujni ndua chunthia ngajin?
Thi ncheꞌe xi fariseo ko xi thjejo tumii César
9Jesús kuekin inaa thi kuꞌen ngain chujni tunuꞌe ixin anto jian na̱ ko baxraxaon na̱ ixin icha chujni xruꞌin renthe na̱. Ko jeꞌe ndachro:
10—Yoo xii kjui xa ngain niꞌngo icha renthe ixin binichjee xa Ndo Dio, naa xa xi fariseo xa ko inaa xa xi thjejo tumii César. 11Xi fariseo tajingathjen xa ko nichjee xa Ndo Dio, ko ndachro xa jaꞌin: “Suixin Ndo Diuna, jaꞌan thexruxiꞌan ixin jaꞌan jeꞌa inchin kanxion chujni thee, chujni ncheꞌe thi jianꞌa, o inchin ni dejuakaꞌo nchrii jeꞌa chriꞌi na̱. ¡Ko jaꞌan jeꞌa inchin xii jiꞌi, xi thjejo tumii César! 12Jaꞌan nthakjaaño yoo nthiꞌa ngain semana, ko jaꞌan dajon kain thi thexin dacha.” 13Aro xi thjejo tumii César kjínxin bithuꞌe xa, ko jeꞌe xa tsinꞌa kon xa ixin rutsjeꞌe xa ngajni ko jeꞌo xrangii xa thon ntha pechue xa ko ndachro xa: “¡Suixin Ndo Diuna, nthatsaꞌan ñao thiakunuana ixin jaꞌan naa chujni anto ncheꞌe thi jianꞌa!”
14Kuthimejan Jesús ndachro:
—Jaꞌan ndathjo ra ixin are xi thjejo tumi sakjan xa nchianduꞌa xa, Ndo Dio ubinchetjañeꞌe xa kain thi jianꞌa bincheꞌe xa, aro xi fariseo, naꞌi. Ixin thi chujni taꞌin ñao ixin anto jian, chujni jiꞌi sathueꞌe juasuaxin, ko chujni tainꞌa ñao ixin anto jian, chujni jiꞌi, tsusayeꞌe na̱.
Jesús binchenchaon xan nchinnchinchjan
(Mt. 19:13-15; Mr. 10:13-16)
15Chujni bakiaꞌo na̱ xan nchinnchinchjeꞌen na̱ ngain Jesús ixin banchenchaon xan, aro chujni bakao Jesús bikon na̱ jiꞌi, ko kuexiꞌin na̱ binchesatheꞌe na̱ ni bakiaꞌo xeꞌen. 16Aro Jesús baye̱e xan nchinnchinchjan ko ndachro ngain chujni bakao:
—Tanchrjanda ra xan nchinnchinchjan tsii xan ngajin, ko kayakuenꞌa ra xan, ixin thi thetuꞌan Ndo Dio jikininxin chujni kjan inchin jeꞌe xan nchinnchinchjan. 17Ndua thi ndathjo ra ixin thi chujni dayeꞌa thi thetuꞌan Ndo Dio, inchin naa chjan, chujni mee sixinꞌa na̱ nthi̱ꞌa̱ thi thetuꞌan ndo.
Naa xaxii anto tsjé tumi chunda
(Mt. 19:16-30; Mr. 10:17-31)
18Naa xi thetuꞌan ngain chujni judío banchiangi xa ngain Jesús ko ndachro xa:
—Suixin ke tjaago, ko anto jian, ¿keꞌe icha sinthaꞌa ixin sayaa thi kjan ni inaa chujni narua ko xruꞌin nchaꞌon tsjexin?
19Jesús ndachro ngain xa:
—¿Unda ndachro jaꞌa ixin jaꞌan jian na? Xruꞌin kensen jian, jeꞌo nakua thi jian, ko mee Ndo Dio. 20Jaꞌa anuꞌa kain thi kuetuꞌan Ndo Dio, thi ndachro: “Darichrikoꞌa nchrii jeꞌa chriꞌa o xii jeꞌa xixiꞌa, duenꞌa chujni, theꞌa, nichjaꞌa thi nduaꞌa ncheꞌe chujni ko dithikaon ndudaa ko janaa.”
21Jeꞌe thi xii mee ndachro:
—Kain yaa rinthaꞌa ko binthaꞌa are xra nchiin na.
22Are kuiꞌin Jesús jiꞌi, jeꞌe ndachro ngain xa:
—Jaꞌa xra nchetjaan naa thi sincheꞌe. Nchekji kain thi chunda ko tumi mee tunchjeyeꞌe chujni nua, ko jañaa nthi̱ꞌa̱ ngajni jaꞌa ruchunda thi icha renthe. Kuthimejan siꞌi ngajin ko ruena.
23Are thi xii kuiꞌin jiꞌi, anto tabechiin xa ixin anto tsjé tumi bechunda. 24Are Jesús bikon ixin anto tabechiin xa, jeꞌe ndachro:
—¡Anto tangi sixiꞌin chujni chunda tsjé tumi ngain thi thetuꞌan Ndo Dio! 25Icha tangiꞌa ixin naa kucamello sathuxiꞌin ba thuechjeꞌen naa nthachia ke chujni anto chunda tumi sixiꞌin ngain thi thetuꞌan Ndo Dio.
26Ko kain ni kuiꞌin jiꞌi banchangi na̱:
—Ko, ¿kensen nchao rukjan inaa chujni narua remee?
27Jesús ndachro ngain na̱:
—Thi anto tangi tunuꞌe chujni sincheꞌe na̱, Ndo Dio tangiꞌa sincheꞌe ndo.
28Pedro ndachro ngain Jesús:
—Jaꞌan ná kuinthua ná kain thi techunda ná ixin ruaꞌa ntha suixin.
29Kuthimejan Jesús ndachro:
—Ndua thi rindathjo ra ixin kexeꞌo chujni thinthuꞌe nchianduꞌa, ndudee, janee, xan choo, chriꞌi o xeꞌen ixin thi thetuꞌan Ndo Dio, 30chujni mee ngataꞌa nunthe nthiꞌi sayée na̱ icha tsjé, ko ngain nunthe tsii, rukjan inaa chujni narua ko xruꞌin nchaꞌon tsjexin.
Jesús ndachro inaa ixin jeꞌe ndaseꞌen
(Mt. 20:17-19; Mr. 10:32-34)
31Jesús bantsjenda thi theyoo chujni bakao ko ndachro ngain na̱:
—Jai jaꞌa ra unuꞌa ra ixin satsji ná Jerusalén. Nthi̱ꞌa̱ thi tsuenxin kain thi ndachro kain ni bagayee juajnee Ndo Dio ixin jaꞌan, thi Xii juixin ngajni. 32Ko nthi̱ꞌa̱ chujni sajon na na̱ ngain chujni jeꞌa judío ko jeꞌe na̱ tsjanua na na̱, ko chrjuinꞌa runichja na̱ ixin jaꞌan ko tsjanito na na̱ ndathee na̱. 33Ko are tsjexin sikaon na, kuthimejan nasuenxon na na̱. Aro ngain nchaꞌon ninxin jaꞌan ruxechon na.
34Ko ni theyoo bakao Jesús kuinxinꞌa na̱ thi ndachro jeꞌe, ixin xra bechundaꞌa na̱ juachaxin rukinxin na̱ thi jeꞌe jindachro.
Jesús binchexrueꞌen naa xi Jericó chroꞌa bagikon
(Mt. 20:29-34; Mr. 10:46-52)
35Are Jesús ko chujni bakao uchiaon tediji na̱ rajna Jericó, naa thi xii chroꞌa bagikon tajii ngandeꞌe nthiꞌá ixin jidanchiagaꞌa. 36Are jeꞌe xa kuiꞌin xa ixin nthi̱ꞌa̱ jidatho tsjé chujni, banchiangi xa keꞌe jituꞌen. 37Ko chujni ndache na̱ ixin Jesús, thi juixin Nazaret jidatho no nthi̱ꞌa̱. 38Jeꞌe xa seen ndachro xa:
—¡Jesús, chujnii David, thiakunuana jaꞌan!
39Ko chujni tetaon nthi̱ꞌa̱ binchesatheꞌe na̱ ixin rutenkua xa, aro jeꞌe xa icha suji kuyao xa:
—¡Suixin, chujnii David, thiakunuana jaꞌan!
40Kuthimejan Jesús tabingathjen ko kuetuꞌan ixin rukiauꞌe na̱, ko are ukunchieꞌen thi bagikonꞌa, Jesús banchiangiꞌi ko ndachro:
41—¿Keꞌe rinao sinthaꞌa ngajin?
Ko thi bagikonꞌa ndachro:
—Jaꞌan rinaꞌo sikon.
42Jesús ndachro:
—¡Jaꞌa unchao dikon! Jaꞌa ukuxruaꞌan ixin bithikaon na.
43Ko tuinxion thi bagikonꞌa mee unchao bikon, ko saruee Jesús ko binchesayeꞌe Ndo Dio, ko kain chujni bikon jiꞌi kai binchesayeꞌe na̱ ndo.
Currently Selected:
San Lucas 18: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
