San Mateo 10

Jesús kuinchieꞌe theyoo chujni

(Mr. 3:13-19; Lc. 6:12-16)

1Kuthimejan Jesús baye̱e thi theyoo chujni bakao ko bajon juachaxin ngain na̱ ixin nchao sengixin na̱ espíritu jianꞌa techunda chujni ko nchao sinchexrueꞌen na̱ kexeꞌo chin ko kain thi thiin chujni.

2Jaꞌin diꞌin thi theyoo chujni kuinchieꞌe Jesús: thi saꞌo diꞌin Simón, thi kai diꞌin Pedro; Andrés, xan choo Pedro; Jacobo ko xan choo, xan diꞌin Juan, ko kayui xan teꞌi xeꞌen Zebedeo; 3Felipe; Bartolomé; Tomás; Mateo, thi bagatse tumii Roma; Jacobo, xeꞌen Alfeo; Lebeo, thi kai diꞌin Tadeo; 4Simón, thi baketukaꞌo chujni romano; ko Judas Iscariote, thi kjuaago ixin tse na̱ Jesús.

Jesús ruaꞌan ni theyoo ixin kjuaago na̱ thi jian juajnee Ndo Dio

(Mr. 6:7-13; Lc. 9:1-6)

5Jesús ruaꞌan thi theyoo chujni teꞌi ko jaꞌin kuetuꞌen na̱:

—Thjiꞌa ra ngain chujni jeꞌa judío, ko thjiꞌa ra nuntheꞌe Samaria. 6Thji ra jeꞌo ngain chujni judío ixin jeꞌe na̱ te na̱ inchin kuleko digichrue. 7Ko are saso ra, ndache ra na̱: “Ujitunchiaon nchaꞌon tsetuꞌan Ndo Dio nthiꞌi ngataꞌa nunthe.” 8Ko nchexrueꞌen ra chujni niꞌi, nchexechon ra chujni undadigeꞌen, nchexrueꞌen ra chujni techunda chin lepra, ko dantsjexin ra espíritu jianꞌa ngain chujni. Jaꞌa ra bithuꞌan ra juachaxin jiꞌi, mexinxin are sinchexrueꞌen ra chujni xruꞌin danchieꞌe ra na̱ tsjengaꞌa ra na̱ ꞌna.

9’Thjioꞌa ra oro, plata ko cobre. 10Thjioꞌa ra inaa luntho, thjioꞌa ra inaa kathe, thjioꞌa ra inaa nthakutho ko xruꞌin tama ra, ixin thi ncheꞌe xra jikininxin sayée thi sundeꞌe.

11’Are saso ra ngain naa rajna o ngain naa rajnanchjan, thjee ra nthi̱ꞌa̱ naa chujni jian ko dithuꞌa ra ngain nchianduꞌa, ko nthi̱ꞌa̱ dithuꞌa ra sachrjexinja ra rajna mee. 12Are saso ra ngain nchia mee chjeꞌe ra na̱ juajna ko nchenchaon ra na̱. 13Ja̱ chujni te ngain nchia mee, tekininxin na̱ tsunchaon na̱ chrjuin tsunuꞌe na̱ ngain anseen na̱, aro ja̱ tekininxinꞌa na̱ sayée na̱ thi chrjuin jiꞌi, xruꞌin sayée na̱. 14Ko ja̱ ngain naa nchia rinaoꞌa na̱ sayáꞌa ra na̱ ko rinaoꞌa na̱ tsiꞌin na̱ thi jaꞌa ra rundache ra na̱, jaꞌa ra dachrjexin ra ngain nchia mee o ngain rajna mee ko tuntsjenga ra ruthea ra ixin sinthji kain jinche. 15Jaꞌan nduaxin rindathjo ra, ixin ngain nchaꞌon sincheꞌe Ndo Dio jie̱, icha sujiꞌa sueꞌen jie̱ rajna Sodoma ko Gomorra ke rajna teꞌi.

Chujni runingakuꞌen na̱ ni bakao Jesús

16’¡Tsjexin ra! Jaꞌan ruruaꞌan ra inchin kuleko ngayee kundanixra. Mexinxin tsjeꞌe ra jian xraa ncheꞌe kunchee, ko tainꞌa ñao ra ko ncheꞌe ra inchin ncheꞌe kunthuanajni. 17Tsjeꞌe ra jian ngain chujni ixin rutse ra na̱ ko sinthachiaꞌan ra na̱ ngain thi ni ncheꞌe jie̱ ko tsaxin ra na̱ nthaa ngaxiꞌin niꞌngo. 18Ko ixin jaꞌan, sinthachianxin ra na̱ ngain xi thetuꞌan ko ngain xi rey, ko jañaa jaꞌa ra nchao runichja ra ngain kain xii teꞌi ko ngain chujni jeꞌa judío. 19Ko are rutse ra na̱ ko sinthachiaan ra na̱ ngain ni ncheꞌe jie̱, taꞌa ra juachjaon ixin keꞌe rundachro ra o kexreen runichja ra, ixin Ndo Dio rundathjo ra ndo thi jaꞌa ra runichja ra. 20Ixin jeꞌa jaꞌa ra thi runichja ra, Espiritue Ndudaa ra, mee thi runichja ixin jaꞌa ra.

21’Chujni sichro jie̱ ixin xan choo ixin nasuenxon na̱ xan, ko ndudaꞌa sichro ndo jie̱ ixin xeꞌen ndo nasuenxon na̱ xan, ko chjan runingakuꞌen xan ni nduꞌa xan ko sichro xan jie̱ ixin nasuenxon na̱ ni nduꞌa xan. 22Chujni nguixin nunthe runingakuꞌan ra na̱ ixin jaꞌan. Aro thi chujni ruchunthia na jaꞌan kainxin nchaꞌon, chujni jiꞌi thi rukjan inaa chujni narua. 23Are ngain naa rajna chujni tsexiꞌin na̱ rutsayaꞌa ra na̱ ixin sinthja ra na̱, sathji ra ngain inaa rajna. Jaꞌan ndua rindathjo ra, ixin xratsjaꞌa ra tsingaria ra kainxin rajnee ni Israel, are jaꞌan, thi Xii juixin ngajni, urukjan siꞌi inaa.

24’Thi jitangi nueꞌa icha ke xi nchekueꞌen, ko naa ni ncheꞌe xra thetuanꞌa icha ke xi najnii. 25Thi jitangi kunixin tsunueꞌo inchin xi nchekueꞌen, yaa unchao jii, ko thi ncheꞌe xra jeꞌo ruchunda inchin xi najnii, yaa unchao jii. Ja̱ chujni nchegiꞌin na na̱ nchiijin, mee keꞌe ruchroꞌa na̱ ixin jaꞌa ra.

Kensen jikininxin ruxraguen ni

(Lc. 12:2-9)

26’Xraguenꞌa ra chujni ixin xruꞌin thi jima jii ke rukununxinꞌa ko xruꞌin thi jima tjao chujni ke rukunueꞌa na̱. 27Thi ndathjo ra are naxin xeꞌe, jaꞌa ra ngain nchaꞌon ndache ra chujni, ko thi jima ndathjo ra, jaꞌa ra ngataꞌa nchia nichja ra suji ixin tsunuꞌe chujni. 28Xraguenꞌa ra thi naduenxion chujni ixin jeꞌe chroꞌa nasuenxion almee na̱. Icha jian xraguꞌen ra Ndo Dio ixin jeꞌo jeꞌe ndo nchao nasuenxion nthauꞌa ra ko almaa ra ngain xruꞌi dangaꞌa.

29’¿Kejaꞌin renthe yoo kunthuachjan? ¿A jeꞌa nakua tuminchjan? Aro maski jamee, xruꞌin kunthuachjan deꞌen ja̱ Ndudaa ná, ndo thjen ngajni, sajonꞌa ndo juachaxin. 30Ko jaꞌa ra, Ndo Dio nuꞌe ndo kejaꞌin xrajaa ra chunda ra. 31Mexinxin xraonꞌa ra ixin jaꞌa ra icha renthe ra ke tsjé kunthua.

Chujni ndachro ngathexin kon icha chujni ixin Jesús jian

(Lc. 12:8-9)

32’Kain chujni rundachro ngathexin kon chujni ixin jaꞌan jian na, kai jaꞌan rundachrjan ngathexin kon Ndudana, ndo thjen ngajni, ixin chujni mee kai jian. 33Aro thi chujni rundachro ngathexin kon chujni ixin chunxinꞌa na, kai jaꞌan rundachrjan ngathexin kon Ndudana, ndo thjen ngajni, ixin jaꞌan chunxinꞌa.

Chjeeya chujni ixin Jesús

(Lc. 12:51-53; 14:26-27)

34’Xraxaonꞌa ra ixin jaꞌan juiꞌi ixin chujni sakao choo na̱ ndakua ngataꞌa nunthe jiꞌi. Naꞌi, ixin chujni tseto na̱ ko tsuñauꞌe choo na̱ ixin jaꞌan. 35Ko ixin dithikaon ni ra jaꞌan, chjan runingakuꞌen xan ndudee xan, xanchrii runingakuꞌen janee xan ko nchrideinda runingakuꞌen janchee nchra. 36Ixin chujni runingakuꞌan ra, mee jeꞌo ni nchiandui ra.

37’Thi thjueꞌe ndudee ko janee icha ke jaꞌan, chujni mee jikininxinꞌa siꞌin chujnina, ko chujni thjueꞌe nchrichjeꞌe o xi tsiꞌi icha ke jaꞌan, chujni mee jikininxinꞌa siꞌin chujnina. 38Thi chujni rinaoꞌa satho tangi ixin jaꞌan ko ruena, chujni mee jikininxinꞌa rukjan chujnina. 39Thi jeꞌo thjee ixin jian seꞌe ngataꞌa nunthe jiꞌi, ndaseꞌen. Ko thi seꞌen ixin tjaago thi jaꞌan tjaago, chujni jiꞌi rukjan inaa chujni narua.

Thi dacha chujni

(Mr. 9:41)

40’Chujni sayáꞌa ra, chujni mee kai sayéꞌna na̱ jaꞌan, ko thi chujni dayeꞌna jaꞌan, chujni mee kai dayée thi ruaꞌan na jaꞌan. 41Thi dayée naa chujni dayée juajnee Ndo Dio, chujni mee Ndo Dio tsjengeꞌe ꞌna xrajeꞌo inchin xengeꞌe ꞌna naa thi dayée juajnee Ndo Dio. Ko thi sayée naa xii jian, ruxenge ꞌna xrajeꞌo inchin naa xii jian. 42Ko kexeꞌo chujni sajon maski naa xalo jinda kin ngain kexeꞌo chujni dithikaon na jaꞌan, maski rentheꞌa na̱, chujni mee Ndo Dio tsjengeꞌe na̱ ꞌna.

Currently Selected:

San Mateo 10: plsNT

Highlight

Copy