San Mateo 12

Jesús Nchee nchaꞌon nchejugaꞌa ni

(Mr. 2:23-28; Lc. 6:1-5)

1Xrajeꞌo ngain nchaꞌon teꞌi ngain naa nchaꞌon nchejugaꞌa ni, Jesús ko chujni bakao batho na̱ ngain kanxion jngi thi dinga nuatrigo. Ko chujnii beꞌen na̱ jintha, mexinxin kuexiꞌin na̱ kunchrijin na̱ kanxion ninchjeꞌen trigo ko juine na̱. 2Ko are kanxion xi fariseo binthegikon xa jiꞌi, ndachro xa ngain Jesús:

—Tsjexin, chujnia chrjiꞌo tencheꞌe na̱ xra ko jikininxinꞌa sincheꞌe ni xra ngain thi nchaꞌon nchejugaꞌa ni.

3Aro Jesús ndachro ngain xa:

—¿Axra tsjeꞌa ra Xruen Ndo Dio ixin keꞌe bincheꞌe David kunixin kain xi bagakao are binthegeꞌen na̱ jintha? 4David bixiꞌin ningue Ndo Dio, ko jeꞌe ko kain ni bagakao bine na̱ niuthja banchendusen na̱ ngain Ndo Dio, thi niuthja bikininxinꞌa rujine na̱ ko jeꞌo xi daana bekininxin bane xa niuthja mee. 5Ko, ¿axra tsjeꞌa ra thi jitaxin ley bayée Moisés ixin kain xi daana ngain niꞌngo xruꞌin nchaꞌon nchejugaꞌa xa ngain thi nchaꞌon nchejugaꞌa ni, ko mee jeꞌa jianꞌa ixin jeꞌe xa? 6Ko jaꞌan rindathjo ra ixin riꞌi ngajin ra ko icha renthe na ke niꞌngo mee. 7Ja̱ jaꞌa ra rukinxin ra thi ndachro Ndo Dio ngain Xruen ndo, thi ndachro: “Jaꞌan rinaꞌo ixin jaꞌa ra thiakunueꞌe ra chujni, ko jeꞌa ixin suꞌen ra kuxiigo ixin jaꞌan.” Ja̱ jaꞌa ra rukinxin ra jiꞌi iruncheꞌa ra jie̱ ngain chujni xruꞌin teka. 8Ixin jaꞌan, thi Xii juixin ngajni, chunda juachaxin ngain thi nchaꞌon nchejugaꞌa ni.

Naa xii ndadixemadoꞌo naa raa

(Mr. 3:1-6; Lc. 6:6-11)

9Kuthimejan Jesús sakjuixin nthi̱ꞌa̱, ko sabixiꞌin ngain ningue na̱. 10Ko nthi̱ꞌa̱ ngaxiꞌin niꞌngo tajii naa xii ndadixemadoꞌo naa raa. Ko xi fariseo techuꞌen xa keꞌe nchaoꞌa runcheꞌe Jesús ixin rukjangiꞌi xa. Mexinxin banchiangi xi fariseo ngain Jesús ko ndachro xa:

—¿Anchao sinchexrueꞌen ni chujni niꞌi ngain nchaꞌon nchejugaꞌa ni?

11Jesús ndachro:

—Ja̱ chrujan ra xro chunda ra naa kuleko ko setsingaa ba ngain naa thi yasuꞌe ngain nchaꞌon nchejugaꞌa ni, ¿atsjiꞌa ra sigantsje ra ba? 12¡Ajeꞌa icha renthe naa chujni ke naa kuleko! Mexinxin, nchao sincheꞌe ni thi jian ngain thi nchaꞌon nchejugaꞌa ni.

13Kuthimejan ndachro Jesús ngain thi xii dixemadoꞌo raa:

—Thinxe raa.

Ko are jeꞌe kuinxe raa, ujian bithuꞌe ra inchin ra jngo. 14Aro xi fariseo binthegachrjexin xa nthi̱ꞌa̱ ko kuexiꞌin xa kjuao choo xa ixin kexreen nasuenxon xa Jesús.

Thi ncheꞌe xra kuinchieꞌe Ndo Dio

15Are Jesús kunuꞌe ixin ruguen na, jeꞌe sakjuixin nthi̱ꞌa̱ ko anto tsjé chujni ruee ko binchexrueꞌen kainxin chujni niꞌi, 16Aro kuetuꞌen na̱ ixin rundacheꞌa na̱ icha chujni ixin kensen jeꞌe. 17Jañaa bikuꞌen thi dikji̱n Isaías, thi bagayée juajnee Ndo Dio, ko ndachro:

18Jiꞌi xi ncheꞌe xrana, thi jaꞌan kuinchiaa,

thi anto thjuaa ko anto chaꞌna ixin jeꞌe.

Ko Espirituna seꞌe ngain jeꞌe,

ko runichja thi jian sinthaꞌa ngain chujni jii nguixin nunthe.

19Jeꞌe xruꞌin chujni tsetukaꞌo ko tsuyautheꞌa,

ko runichjaꞌa suji ngain chujni ngaa nthiꞌá.

20Jeꞌe sinchegathuꞌa tangi chujni ujidathuꞌe tangi,

ko chujni nchion thinxin sinchekinxin na̱ jian,

sinchegachaja thi jian.

21Ko chujni te nguixin nunthe ruchunthia na̱ ngain jeꞌe.

Chujni ndachro ixin Jesús chunda juachaxiin nchiijin

(Mr. 3:19-30; Lc. 11:14-23; 12:10)

22Kuthimejan bikauꞌe na̱ Jesús naa xii bagikonꞌa ko banichjaꞌa ixin bechunda xa naa espíritu jianꞌa. Ko Jesús binchexrueꞌen xa, ko jeꞌe xa unchao bikon xa ko nichja xa. 23Ko kainxin chujni kuiseꞌen na̱ ko binthendachro na̱:

—¿A jeꞌe thi bachrjeninxin chujnii David?

24Ko are xi fariseo binthekiꞌin xa jiꞌi, binthendachro xa:

—Xii jiꞌi dengi xa espíritu jianꞌa kunixin juachaxiin Beelzebú, thi thetuꞌen kain espíritu jianꞌa.

25Jesús benuꞌe keꞌe baxraxaon xi fariseo, mexinxin jeꞌe ndachro ngain xa:

—Ja̱ chujni thetuꞌan ngain naa nunthe ndachjeeya na̱, chujni nunthe mee ndatsjexin na̱, ko ja̱ chujni ngain naa rajna o chujni texiꞌin ngain naa nchia theto na̱, chujni teꞌi tuin ndatsjexin na̱. 26Kai, ja̱ nchiijin jeꞌo dengi choo, mee ruchro ixin thetukaꞌo choo ko juachaxiin ko thi thetuꞌan seꞌa tsunchrjeꞌen. 27Ko ja̱ ndachro ra ixin jaꞌan dengi espíritu jianꞌa kunixin juachaxiin Beelzebú, mee ¿kensen dajon juachaxin ngain chujnia ra ixin dengi na̱ espíritu jianꞌa? Ja̱ rundachro ra ixin Ndo Dio, mee ruchro ixin jaꞌa ra jeꞌa ndua thi texraxaon ra. 28Mexinxin ja̱ jaꞌan dengi espíritu jianꞌa kunixin juachaxiin Espiritue Ndo Dio, mee ruchro ixin thi thetuꞌan Ndo Dio ujii ngajin ra.

29’Ja̱ naa chujni rinao santsjeꞌe thi jichunda ngaxiꞌin nchianduꞌa naa xii tsanga, saꞌo rugunda tsia xa, kuthimejan nchao santsje kain thi jichunda xa ngaxiꞌin nchianduꞌa xa.

30’Thi jiꞌa ngajin, mee ningakunna, ko thi thjengijnaꞌa na ixin runichjee icha chujni ixin rurueꞌe na na̱, jeꞌe icha tunchjekee na̱.

31’Mexinxin jaꞌan rindathjo ra, ixin kain chujni nchao sitjañeꞌe na̱ kain thi jianꞌa ncheꞌe na̱ ko kain thi jianꞌa nichja na̱, aro sitjañeꞌa na̱ ja̱ runichja na̱ jianꞌa ixin Espíritu Santo. 32Ko kexeꞌo chujni runichja jianꞌa ixin thi Xii juixin ngajni, nchao sitjañeꞌe na̱, aro thi chujni runichja jianꞌa ixin Espíritu Santo, Ndo Dio sinchetjañeꞌa na̱ jai ko are sinthe na̱ ngathexin kon ndo.

Ntha thuchjuin datsuan ni ntha ixin thuchjuiin ntha

(Lc. 6:43-45)

33’Ja̱ ntha thuchjuin jian ntha, kai thuchjuiin ntha jian tho; ko thi nthaa xruꞌin xree, kai thuchjuiin ntha xruꞌin xree tho. Mexinxin ntha thuchjuin datsuan ni ntha ixin thuchjuiin ntha. 34¡Jaꞌa ra inchin xeꞌen kunchee! ¿Kexreen nchao runichja ra thi jian ja̱ jaꞌa ra jianꞌa ra? Ixin thi icha jii ngain anseen ni, mee thi nichja ruꞌa ni. 35Naa chujni jian, nichja thi jian jii ngain anseen; ko naa chujni jianꞌa nichja thi jianꞌa jii ngain anseen. 36Ko jaꞌan rindathjo ra ixin ngain thi nchaꞌon are Ndo Dio sincheꞌe jie̱, kainxin chujni tsjenga na̱ ꞌna ixin kain thi jianꞌa nichja na̱. 37Ixin thi jian nichja jaꞌa sitjañanxin, ko ixin thi jianꞌa nichja jaꞌa Ndo Dio sincheꞌe jie̱ ngajin.

Chujni jianꞌa danchia na̱ sikon na̱ naa thi xranaꞌa dikunxin na̱

(Mr. 8:12; Lc. 11:29-32)

38Kuthimejan kanxion xi fariseo ko kanxion xi tjaago ley binthendachro xa ngain Jesús:

—Suixin ke thjaago, jaꞌan ná rinaꞌo ná sikon ná sincheꞌe naa thi xranaꞌa dikunxin ni.

39Jesús ndachro ngain xa:

—Chujni chunthiaꞌa Ndo Dio ko jianꞌa na̱, danchia na̱ sikon na̱ naa thi xranaꞌa dikunxin chujni, aro ni teꞌi xruꞌin inaa ruxrague na̱, jeꞌo tsjagua na inchin thi kuꞌen Jonás, thi bagayée juajnee Ndo Dio. 40Ixin jañaa inchin Jonás beꞌe nii nchaꞌon ko nii thie ngaxiꞌin tseꞌe naa kuchee jié, jañaa kai, jaꞌan thi Xii juixin ngajni, sariꞌi ngadoꞌo nunthe nii nchaꞌon ko nii thie. 41Kain chujni binthe ngain rajna Nínive, ruxechon na̱ ngain nchaꞌon are Ndo Dio sincheꞌe jie̱ ko ni Nínive ruchro na̱ jie̱ ixin kain chujni teꞌi, ixin chujni Nínive kuinthuꞌe na̱ thi jianꞌa bancheꞌe na̱ are Jonás bindache na̱ juajnee Ndo Dio. Ko nthiꞌi ngajin ra riꞌi jaꞌan, naa thi icha renthe ke Jonás. 42Kai nchri kuetuꞌan nunthe Sabá, ruxechon nchra ngain thi nchaꞌon are Ndo Dio sincheꞌe jie̱ ko kai ruchro nchra jie̱ ngain chujni teꞌi, ixin jeꞌe nchra anto kjín juixin nchra ixin bikiꞌin nchra thi benuꞌe Salomón, ko nthiꞌi ngajin ra riꞌi jaꞌan, naa thi icha renthe ke Salomón.

Thi espíritu jianꞌa kjan

(Lc. 11:24-26)

43’Are naa espíritu jianꞌa dachrjexin ngain nthauꞌe naa chujni, espíritu mee tarideꞌe no thi jii nunthe xema ixin dikjee thinoo sinchejugaꞌa, aro dithjaꞌa. 44Aro deꞌe xraxaon ko ndachro: “Jaꞌan rukjan na ngain nchiania thi bachrjexin.” Ko are espíritu jianꞌa mee diji, dithja nthauꞌe chujni mee inchin naa nchia thi xruꞌin chujni te, thi digajon na̱ jian ko ditsujin. 45Kuthimejan espíritu jianꞌa jiꞌi diruee iyaato espíritu icha jianꞌa ko kain espíritu mee dixiꞌin nthauꞌe chujni mee, ko chujni mee icha jianꞌa kjan ke are saꞌo. Ko kai jañaa tsuꞌen chujni jianꞌa te nchaꞌon jai.

Janee ko xan choo Jesús

(Mr. 3:31-35; Lc. 8:19-21)

46Jesús xrajinichja ngain kain chujni, are biji janee ko xan choo Jesús ixin binao na̱ runichjee na̱, aro nduja tabinthe na̱ ixin tsjé chujni beꞌe nthi̱ꞌa̱. 47Naa chujni ndachro ngain Jesús:

—Janaa ko xan choo nduja te na̱ ko rinao na̱ runichjaꞌa na̱.

48Aro Jesús ndachro ngain chujni mee:

—¿Kensen janana, ko kekaa xan chian?

49Kuthimejan jeꞌe kjuaguxin raa chujni bakao ko ndachro:

—Chujni teꞌi inchin janana ko inchin xan chian, 50ixin kain chujni ncheꞌe inchin thetuꞌan Ndudana, ndo thjen ngajni, chujni mee thi xan chian, nchrichian ko janana.

Currently Selected:

San Mateo 12: plsNT

Highlight

Copy