San Mateo 13

Jesús tjaago ixin thi bikenga trigo ngataon jngi

(Mr. 4:1-9; Lc. 8:4-8)

1Ngain nchaꞌon mee Jesús bachrjexin nchia ko tabeꞌe ngandeꞌe nda Galilea. 2Ko anto tsjé chujni xrathe ngain jeꞌe, mexinxin kuani ngain naa ntha barko ko tabeꞌe ngain ntha ko chujni tabinthengathjen na̱ ngandeꞌe nda. 3Ko jeꞌe banchegunda tsjé thi bakuꞌen ixin bakjaguexin chujni ko ndachro:

—Naa xii kjui xa bikenga xa ngataon jngi. 4Ko are kuexiꞌin xa kjua xa trigo ngataon jngi, thuꞌa trigo binthji ngandeꞌe nthiꞌá, ko juii kunthua ko tajuine ba trigo. 5Ko ithuꞌa trigo binthji ngagaꞌa xro, thi thjinꞌa jinche jii, ko trigo mee anto daka chriꞌin ixin tsjéꞌa jinche xramataon. 6Ko are bachrje nchaꞌon ndaxeꞌnthe ko ndaxema katrigo mee, ixin ngatuenkua bithuꞌe nueꞌe ka. 7Ko ithuꞌa trigo binthji ngakjan kanchaꞌa, ko kanchaꞌa icha daka bangi ka ko kuanchrjandaꞌa ka trigo bangi ka. 8Aro ithuꞌa trigo binthji thi jii jian jinche ko jian guan. Ko kanxion ninchjan bajon naa renkia nuanchjan, ikanxion nuanchjan bajon nii kan nuanchjan ko ikanxion bajon kan ko the nuanchjan. 9Xro thiꞌin ra, thiꞌin ra jian.

Jesús bakjaago kunixin thi bancheꞌe chujni

(Mr. 4:10-12; Lc. 8:9-10)

10Kuthimejan chujni bakao Jesús kunchieꞌen na̱ ko banchiangi na̱:

—¿Unda nchekueꞌen chujni kunixin thi tuꞌen icha chujni?

11Jesús batheꞌe ngain na̱:

—Jaꞌa ra Ndo Dio chjaa ra juachaxin tsunuꞌa ra thi xruꞌin kensen nuꞌe ixin keꞌe ruchro thi thetuꞌan Ndo Dio, aro jeꞌe na̱ naꞌi. 12Ko chujni thinxin, Ndo Dio sinchekinxin ndo na̱ icha, aro chujni tsjeꞌa thinxin, Ndo Dio santsjeꞌe ndo na̱ thi nchion thinxin na̱. 13Mexinxin jaꞌan nthakuaan na̱ kunixin thi tuꞌen inaa chujni, ixin maski dikon na̱ aro xraa dikonꞌa na̱, ko maski thiꞌin na̱ aro thinxinꞌa na̱ xraa chujni thinꞌa. 14Ko ngain jeꞌe na̱ bikuenxin thi dikji̱n Isaías, thi bagayée juajnee Ndo Dio are ndachro:

Jaꞌa ra tsiꞌin ra, aro tsinxinꞌa ra;

sikon ra, aro satsuanꞌa ra.

15Ixin anseen chujni rajna teꞌi atho cha,

ko ndatsjuen na̱ atho tangi thiꞌin,

ko ndakuejee jmakon na̱,

ixin ja̱ ruginao na̱ rugikon na̱ kunixin jmakon na̱,

ko ndatsjuen na̱ rukiꞌin,

ko anseen na̱ rukinxin na̱,

ko rukjan na̱ ngajin, jaꞌan runthakjan na̱ inaa chujni narua.

16’Anto chrjuin ixin jmakon ra dikon ko ndatsjuan ra thiꞌin. 17Ndua thi rindathjo ra ixin tsjé chujni bagayée juajnee Ndo Dio, ko tsjé chujni jian ngain anseen binao na̱ rugikon na̱ kain thi jaꞌa ra tedikon ra jai, aro bikonꞌa na̱ thi tedikon ra ko kuinꞌa na̱ thi tethiꞌin ra.

Jesús ndachro keꞌe ruchro thi bikenga trigo

(Mr. 4:13-20; Lc. 8:11-15)

18’Thiꞌin ra keꞌe ruchro thi bikenga trigo ngataon jngi. 19Are chrujan chujni thiꞌin juajnee Ndo Dio ixin kexreen thetuꞌan ndo, ko jeꞌe thinxinꞌa juajna mee, thii nchiijin ko ndanchetjajin ko ndatjañeꞌe thi binga ngain anseen. Ko chujni jiꞌi inchin trigo betsinga ngandeꞌe nthiꞌá. 20Ko trigo betsinga ngagaꞌa xro, mee ruchro chujni thiꞌin juajnee Ndo Dio ko jaikua dayée juajna ngain anseen ko anto chee. 21Aro seꞌa tunchrjeꞌen ixin ngatuenkua bithuꞌe nuꞌe, jiꞌi ruchro ixin chujni jiꞌi, are anto ta na̱ juachjaon ko tangi tuꞌen na̱ ixin dithikaon na̱ juajnee Ndo Dio, tuin ndadachrjenda na̱. 22Ko thi trigo betsinga ngakjan kanchaꞌa, mee ruchro thi chujni thiꞌin juajnee Ndo Dio, aro jeꞌe na̱ icha ta na̱ juachjaon ixin thi jii ngataꞌa nunthe jiꞌi ko thi thiakuꞌen na̱ tumi ndanchetjajin na̱ ko incheꞌa na̱ thi thetuꞌan Ndo Dio. 23Aro trigo binthji ngain thi jian jinche, mee ruchro thi chujni thiꞌin juajnee Ndo Dio ko ncheꞌe thi ndachro juajna, ko mee inchin trigo binchechjian naa renkia nua ngain nakua ninchjan, ko ikanxion trigo binchechjian nii kan nua ngain nakua ninchjan ko ikanxion trigo binchechjian nii the nua ngain nakua ninchjan.

Ka trigo ko ka xrakua katrigo jii

24Kuthimejan Jesús kjuaago inaa ko ndachro:

—Thi thetuꞌan Ndo Dio, mee inchin naa xii kuenga jian trigo ngain jngiꞌi. 25Ko thie, are kain chujni ncheꞌe xra tatejua na̱, juii naa thi ningakuꞌen xi najni ko kuengagee thi ka xrakua katrigo jii ko sakjui. 26Are trigo bangi ko kuexiꞌin binchechjian ninchjan, are mee kununxin ka xrakua katrigo jii. 27Kuthimejan ni ncheꞌe xree xi kuenga katrigo ngain jngi, kjui na̱ ko ndachro na̱: “Nchana, ¿ajeꞌa juxon trigo jian kuenga ngataon jngiꞌa?, mexinxin, ¿thinoo juixin thi ka xrakua katrigo jii?” 28Thi jngiꞌi ndachro ngain na̱: “Chrujan chujni ningakunna bincheꞌe jiꞌi.” Kuthimejan ni ncheꞌe xra banchiangi na̱ ko ndachro na̱: “¿Arinao suixin, tsji ná sigantsjengi ná kain ka xrakua katrigo jii?” 29Ko thi jngiꞌi ndachro: “Naꞌi, ixin are santsjengi ra ka xrakua katrigo jii, kai santsjengi ra katrigo. 30Icha jian tanchrjanda ra ka sangikaꞌo katrigo, kuthimejan are usikaade na̱ katrigo jaꞌan rundathjan ni ncheꞌe xrana, saꞌo tsaade na̱ ka xrakua katrigo jii, ko tsia na̱ ka ko tsjaaga na̱ ka; ko juxon trigo tsenchiꞌan na̱ ngain nthanetunꞌna.”

Thi tuꞌen naa tsee diꞌin mostaza

(Mr. 4:30-32; Lc. 13:18-19)

31Jesús kjuaguxin thi tuꞌen tsee ko ndachro:

—Thi thetuꞌan Ndo Dio, mee inchin naa tsee diꞌin mostaza thenga naa xii ngataon jngiꞌi xa. 32Ko tsee jiꞌi, thi tsee icha nchinchin ke kainxin tsee dajon icha ka, aro kee tsee jiꞌi icha jié dangi ka ke kain ka jine ni. Ko dangi ka inchin naa nthaa jié ko kunthua nchechjian ba kakee ba ngagaꞌa chaan nthaa mee.

Thi tuꞌen thi nchegeꞌen nchue niuthja

(Lc. 13:20-21)

33Ko ndachro Jesús ngain na̱ inaa thi tuꞌen:

—Thi thetuꞌan Ndo Dio, mee inchin thi nchegeꞌen nchue niuthja ko naa nchrii kuaa thi nchegeꞌen nchoꞌo ko kuinthekjan ngain nii nchue niuthja ixin runchegeꞌen ncho.

Jesús bakjaguxin kunixin thi bakuꞌen

(Mr. 4:33-34)

34Jesús kjuague kain chujni kunixin thi bakekin chujni ko bakjagoꞌa ja̱ bakekinꞌa jiꞌi. 35Jañaa bikuꞌen thi dindachro Ndo Dio ngain thi bagayée juajnee ndo are dikji̱n:

Jaꞌan runichja ixin thi ukuꞌen;

jaꞌan rundachrjan thi bema icha saꞌo ke are nunthe kuexiꞌin kunchjian nunthe.

Jesús ndachro keꞌe ruchro thi ka xrakua katrigo jii

36Ko are juexin sakjui kainxin chujni, Jesús sabixiꞌin nchia ko chujni bakao ndachro na̱:

—Ndachjejin ni ra keꞌe ruchro thi xrakua katrigo jii bangi ngataon jngi.

37Kuthimejan Jesús ndachro:

—Thi thenga trigo jian, mee jaꞌan thi Xii juixin ngajni. 38Ko jngi mee nunthe jiꞌi, ko thi jian trigo, mee ruchro kain chujni dithikaon thi thetuꞌan Ndo Dio, ko thi ka xrakua katrigo jii, mee ruchro kain chujni ncheꞌe thi thetuꞌan nchiijin. 39Ko thi kuenga ka xrakua katrigo jii, mee nchiijin, thi ningakunna. Ko are ruxratse katrigo mee ruchro ixin undatsjexin nunthe, ko thi satse katrigo mee kain angeel Ndo Dio. 40Jamee inchin xratse ka xrakua katrigo jii ko che ka ngathe xruꞌi, kai jamee tsuꞌen chujnii nchiijin are undatsjexin nunthe jiꞌi. 41Ko jaꞌan, thi Xii juixin ngajni, ruruaꞌan tsjé ángel sigantsjeyexin ngain thi jaꞌan thetuꞌan kain chujni ncheꞌe jianꞌa ko nchetjajin icha chujni, 42ko ángel tsja ngathe xruꞌi chujni teꞌi, ko nthi̱ꞌa̱ rutsjanga na̱ ko sinetaon neno na̱. 43Are mee kain chujni ncheꞌe inchin rinao Ndo Dio tsungixima na̱ inchin nchaꞌon nthi̱ꞌa̱ thi thetuꞌan ndo. Ja̱ thiꞌin ra, ¡thiꞌin ra jian!

Thi anto renthe jima

44Ko Jesús kjuaago inaa ko ndachro:

—Thi thetuꞌan Ndo Dio, mee inchin naa thi anto renthe jixrabaa ngain naa jngi. Ko are naa chujni dithja thi anto renthe mee, kjan tjabaa inaa. Kuthimejan anto chee sakjan nchianduꞌa ko nchekji kain thi chunda ko theꞌna jngi jixrabaa thi anto renthe mee.

Thi xro anto renthe diꞌin perla

45’Ko kai thi thetuꞌan Ndo Dio, mee inchin naa xi tachji ko nchekji xro anto renthe diꞌin perla. 46Ko are xi tachji dithja xa inaa xro icha renthe diꞌin perla, jeꞌe xa thji xa ko nchekji xa kainxin thi chunda xa ixin thenanxin xa xro mee.

Nunchaꞌa tsexin na̱ kuchee

47’Ko kai thi thetuꞌan Ndo Dio, mee inchin naa nunchaꞌa tjangi na̱ jinda ko tse kexeꞌo kuchee. 48Ko are undakaon nunchaꞌa, ni tse ba dinthjian na̱ nunchaꞌa ngandeꞌe jinda, ko nthi̱ꞌa̱ thinchieꞌe na̱ kuchee jian ko thenga na̱ ba ngain nthaxra ko kuchee xruꞌin xree thingo na̱ ba. 49Jamee tsuꞌen are undatsjexin nunthe jiꞌi; tsii tsjé angeel Ndo Dio ixin sigantsjegee chujni jianꞌa te ngayee chujni jian. 50Ko ángel ruruaꞌan kain chujni ncheꞌe thi jianꞌa ngathe xruꞌi, ko nthi̱ꞌa̱ rutsjanga na̱ ko sinetaon neno na̱.

Thi anto renthe ko narua ko thi anto renthe ko unthaxii

51Kuthimejan Jesús banchiangi ngain chujni bakao:

—¿Athinxin ra kain jiꞌi?

Jeꞌe na̱ binthendachro na̱:

—Jaan.

52Kuthimejan Jesús ndachro:

—Kain xi tjaago ley ko dithikaon xa thi jaꞌan ndachrjan, mee inchin naa chujni dikenchjiꞌan ngaxiꞌin nchianduꞌa yoo thi anto renthe, naa thi naruaxin ko naa thi nthaxii.

Jesús ngain rajna Nazaret

(Mr. 6:1-6; Lc. 4:16-30)

53Are Jesús juexin kjuaago kunixin thi kuekin, jeꞌe sakjuixin nthi̱ꞌa̱. 54Ko are biji ngain rajna Nazaret, thi jeꞌe bangixin, nthi̱ꞌa̱ kuexiꞌin banchekueꞌen chujni juajnee Ndo Dio ngain niꞌngo, ko kain chujni nthi̱ꞌa̱ kuiseꞌen na̱ ko ndachro na̱:

—¿Kexreen kuangixin xii jiꞌi kain thi nuꞌe xa? ko, ¿kexreen nchao ncheꞌe xa thi naꞌa dikunxin ni? 55¿Ajeꞌa xii jiꞌi xi tsiꞌi José, thi dameꞌe nthaa? ko, ¿ajeꞌa janee diꞌin María, ko ajeꞌa xan choo xa diꞌin Jacobo, José, Simón ko Judas? 56Ko, ¿ajeꞌa ngajin ná te kain nchri choo? ko, ¿thinoo kuangixin xa kain thi nuꞌe xa?

57Mexinxin jeꞌe na̱ bagithikaonꞌa na̱ Jesús. Aro Jesús ndachro ngain na̱:

—Kain ni dayee juajnee Ndo Dio tusayeꞌe na̱ ngain jee rajna aro ngain rajnee na̱ ko nchianduꞌa na̱ tusayeꞌa na̱.

58Ko tsjéꞌa thi xradikunxinꞌa ni bincheꞌe Jesús ngain rajnee ixin chujni bithikaonꞌa na̱ ngain jeꞌe.

Currently Selected:

San Mateo 13: plsNT

Highlight

Copy