San Mateo 17

Bikon na̱ Jesús anto ujee

(Mr. 9:2-13; Lc. 9:28-36)

1Batho inkjaon nchaꞌon, kuthimejan Jesús bikao Pedro, Jacobo ko Juan, thi kjui xan choo Jacobo. Ko Jesús bikao na̱ ngataꞌa naa jna anto nui, 2ko nthi̱ꞌa̱ Jesús bituxinbeꞌo ngathexin kon jeꞌe na̱. Ko ngakon Jesús kungiixin xra thee nchaꞌon ko lunthue kurua luntho xraa thee nchaon. 3Ko bikon na̱ Moisés ko Elías tatetjao na̱ Jesús. 4Kuthimejan Pedro ndache Jesús:

—Nchana, ¡atho nchao ixin jaꞌan ná te ná nthiꞌi! Ja̱ rinao, jaꞌan ná sinthachjian ná nii nchiachjan: naa nchiachjan ixin suixin, naa nchiachjan ixin Moisés ko inaa nchiachjan ixin Elías.

5Pedro xrajinichjao jañaa are juii naa thjui rua jitungixima, ko thjui mee kjuamataon na̱, ko ngakjan thjui mee kuiꞌin ni naa thee thi ndachro:

—Jiꞌi Xanꞌna, xan anto thjuaa, ko anto chaꞌna ixin jeꞌe xan. Thiꞌin ra thi rundachro xan.

6Kuthimejan kanio chujni bikao Jesús, are kuiꞌin na̱ yaa, kanio na̱ binthethuxin na̱ ko bisee na̱ ngataꞌa nunthe ko anto xraon na̱. 7Kuthimejan Jesús kunchieꞌen ngain na̱, kathe na̱ ko ndachro ngain na̱:

—Dingathjen ra, ko xraonꞌa ra.

8Ko are jeꞌe na̱ batsiin kon na̱, ixruꞌin chujni bikon na̱, jeꞌo Jesús.

9Are tedanianxin na̱ jna, Jesús kuetuꞌen na̱ ko ndachro:

—Xruꞌin chujni thekiꞌin ra thi jaꞌa ra bikon ra, ruxechunja na jaꞌan, thi Xii juixin ngajni.

10Kuthimejan kanio chujni bikao Jesús banchiangi na̱ ko ndachro na̱:

—¿Unda ndachro xi tjaago ley ixin Elías rugunda tsii saꞌo?

11Jesús ndachro ngain na̱:

—Jaan ndua, Elías tsii icha saꞌo ko jeꞌe thi sinchekinxin chujni kexreen sayéꞌna na̱ jaꞌan. 12Aro jaꞌan rindathjo ra ixin Elías ujuii ko jeꞌe na̱ batsuanꞌa na̱, ko bincheꞌe na̱ ngain jeꞌe inchin jeꞌe na̱ binao na̱. Jañaa kai tangi tsunna ngaa raa na̱, jaꞌan thi Xii juixin ngajni.

13Kuthimejan kanio chujni bikao Jesús kuinxin na̱ ixin jeꞌe jinichja ixin Juan, thi banchegithe chujni.

Jesús binchexrueꞌen naa xaxii chunda chin denda

(Mr. 9:14-29; Lc. 9:37-43)

14Are biji na̱ ngain thi binthe tsjé chujni, kunchieꞌen naa thi xii ngain Jesús ko bethuxin ko ndachro:

15—Nthatsaꞌan ñao suixin, thiakunueꞌe xanꞌna ixin chunda xan chin denda ko anto tangi tuꞌen xan. Tsjé nthiꞌa detsingathe xan xruꞌi o ngangi jinda. 16Jaꞌan bikian xan ngain chujni chrjiꞌo, aro chroꞌa nchexingameꞌe na̱ xan.

17Jesús ndachro:

—¡Jaꞌa ra chujni dithikaonꞌa ko jianꞌa! ¿Xra kensa rugunda sariꞌi ngajin ra? ¿Xra kensa rugunda tsixinna ngajin ra? ¡Sikuꞌna ra xan nthiꞌi!

18Kuthimejan Jesús binchesatheꞌe espíritu jianꞌa bechunda xan, ko espíritu mee bachrjexin ngain xan ko kuxruenbeꞌo xan.

19Kuthimejan ni bakao Jesús kunchieꞌen na̱ ngain jeꞌe ko jimao banchiangiꞌi na̱ ko ndachro na̱:

—¿Unda jaꞌan ná chroꞌa beꞌngi ná espíritu jianꞌa yaa?

20Jesús ndachro ngain na̱:

—Jaꞌa ra unda chunthiaꞌa ra jian. Ko jaꞌan ndua rundathjo ra, ja̱ thi chunthia ra rukujiexin inchin naa tsee diꞌin mostaza, nchao rundache ra jna jiꞌa: “Sathjixin nthiꞌi ko dariꞌi nujiꞌa”, ko jna rugithikaon jna. Ko xruꞌin thi tangi rugeꞌe ixin runcheꞌe ra. 21Aro espíritu jianꞌa yaa nchao dengi ni jeꞌo are nichjee ni Ndo Dio ko nchekjaaño ni.

Jesús ndachro inaa ixin jeꞌe ndaseꞌen

(Mr. 9:30-32; Lc. 9:43-45)

22Naa nchaꞌon are xrabinthe na̱ ngain nunthe Galilea, Jesús ndache chujni bakao:

—Chujni sajon na na̱, jaꞌan thi Xii juixin ngajni ngain chujni jianꞌa, 23ko nasuenxon na na̱ aro ngain nchaꞌon ninxin jaꞌan ruxechon na.

Ko chujni bakao binthechiin na̱ are kuiꞌin na̱ yaa.

Jesús kjuenga ꞌna thi xenga ꞌna ngain niꞌngo

24Are Jesús kunixin chujni bakao biji na̱ ngain rajna Capernaum, xi bakjejo tumii niꞌngo kjui xa ngain Pedro ko banchiangiꞌi xa:

—¿Athjenga ꞌna ngain niꞌngo xi nthakuaꞌan ra?

25Pedro ndachro:

—Jaan.

Kuthimejan Pedro kjui ngaxiꞌin nchia ixin runichjee Jesús, aro Jesús batheꞌe saꞌo:

—Pedro, ndachjejin na jaꞌa, ¿kensen thjenga ꞌna tumi ngain xi thetuꞌan nunthe? ¿Axeꞌen xa o chujni jeꞌa rajnee xa?

26Pedro ndachro:

—Thi chujni jeꞌa rajnee xa.

Jesús ndachro:

—Mexinxin chujnii xa rugundaꞌa tsjenga na̱ ꞌna. 27Aro ixin xruꞌin chujni sinthuñao ná, thji ngain jinda ko tjangi chia tsexin ni kuchee, ko kuchee santsjengi saꞌo danthjeꞌe ruꞌa ba ko sinchii naa tumi thjengaxin ꞌna ixin jaꞌa ko jaꞌan.

Currently Selected:

San Mateo 17: plsNT

Highlight

Copy