San Mateo 18

¿Kensen thi icha renthe?

(Mr. 9:33-37; Lc. 9:46-48)

1Xra mee jinichja Jesús are kunchieꞌen ngain jeꞌe chujni bakao ko banchiangi na̱:

—¿Kensen icha renthe ngain thi thetuꞌan Ndo Dio?

2Kuthimejan Jesús baye̱e naa xan xichjan ko kuiin xan ngayee na̱, 3ko ndachro:

—Ndua thi rundathjo ra, ja̱ tsinthueꞌa ra thi jianꞌa ncheꞌe ra ko rukjanꞌa ra inchin xan nchinnchinchjan, chroꞌa sixiꞌin ra ngain thi thetuꞌan Ndo Dio. 4Mexinxin kexeꞌo chujni tsainꞌa ñao inchin chjan jiꞌi mee thi icha renthe seꞌe nthi̱ꞌa̱ ngajni. 5Ko chujni sayée naa xan nchinchjan inchin xan jiꞌi, ixin dithikaon na jaꞌan, kai tedayeꞌna na̱ jaꞌan.

Tangi tsuꞌen chujni nchencheꞌe inaa chujni thi jianꞌa

(Mr. 9:42-48; Lc. 17:1-2)

6’Ja̱ chrujan chujni ixin thi jianꞌa ncheꞌe isithikaonꞌa inaa chujni nandaa jidithikaon na jaꞌan, icha jian thi chujni ncheꞌe jianꞌa mee tsianito na̱ ngain thusin naa xruchrin ko sankangi na̱ ngain thi icha niꞌnga ndachaon. 7Atho jianꞌa tsjiꞌi chujni nunthe jiꞌi ixin kain nchaꞌon seꞌe thi nchencheꞌe na̱ thi jianꞌa, ko rugunda seꞌe jiꞌi. ¡Aro icha tangi tsuꞌen thi chujni sinchegitaꞌa ko sincheyeꞌe inaa chujni sincheꞌe jianꞌa!

8’Mexinxin ja̱ naa raa o ruthea jidundaꞌa rinchexin thi jianꞌa, icha jian tunchrijin raa o ruthea ko tja kjín, ixin icha jian rukjan inaa chujni narua maski koꞌa naa raa o naa ruthea, ke tsji kunixin yuixin raa o yuixin ruthea ngain xruꞌi dangaꞌa. 9Ja̱ thi dikon jmakon nthaxraxaon sincheꞌe thi jianꞌa, icha jian dantsjengi jmakon ko tja kjín, ixin icha jian rukjan inaa chujni narua maski koꞌa naa jmakon, ke tsji kunixin kayuixin jmakon ngain xruꞌi dangaꞌa.

Jesús kjuaago ixin thi kuleko digitjaan

(Lc. 15:3-7)

10’Tsjeꞌe ra jian ko ningakuenꞌa ra chujni nandaa jidithikaon na jaꞌan. Ixin jaꞌan rindathjo ra ixin kain angeel na̱ te ngajni, ko kainxin nchaꞌon te ngathexin kon Ndudana, ndo thjen ngajni. 11Ixin jaꞌan, thi Xii juixin ngajni, juiꞌi ixin bikjengijna chujni udigitjaan.

12’¿Kexreen dikunxin ra? Ja̱ naa xii chunda xa naa renkia kuleko ko ndasitjaan naa ba, ¿kexreen sincheꞌe xa? ¿Atsinthueꞌa xa thi noo kan ko the na̱a̱ ba ngagaꞌa jna, ko satsji xa sikjee xa kuleko bitjaan? 13Ko ja̱ sithja xa ba, icha ruchee xa ixin kuleko bitjaan ke ixin thi noo kan ko the na̱a̱ kuleko bitjanꞌa. 14Kai Ndudana thjen ngajni rinaoꞌa ndo sitjaan naa chujni nandaa jithexiꞌin dithikaon na jaꞌan.

Kexreen sinchetjañeꞌe ni chujni dithikaon Jesús

(Lc. 17:3)

15’Ja̱ naa xan choo jianꞌa bincheꞌe xan ngajin, thji ko tjao ra jaꞌo ra ko nchegikon xan thi jianꞌa bincheꞌe xan ngajin ko ja̱ kuiꞌin xan, jaꞌa ubacha xan choo. 16Aro ja̱ sithuexinꞌa xan tsjao xan, kjan ko thjiꞌo naa o yoo chujni ixin tsiꞌin na̱ keꞌe rundache choo ra. 17Ko ja̱ tsinꞌa xan kayui chujni mee, kjan ko dindache kain ni niꞌngo, ko ja̱ kuinꞌa xan ni niꞌngo kai, tsjéꞌe ra xan xraa chujni dithikaonꞌa Ndo Dio o inchin naa chujni thjejo tumii Roma.

18’Jaꞌan ndua rindathjo ra ixin kain thi rundachro ra ixin tsuenꞌa nthiꞌi ngataꞌa nunthe, kai Ndo Dio nthi̱ꞌa̱ ngajni rundachruxin ndo ixin tsuenꞌa. Ko kain thi rundachro ra ixin tsuꞌen nthiꞌi ngataꞌa nunthe, kai Ndo Dio nthi̱ꞌa̱ ngajni rundachruxin ndo ixin tsuꞌen.

19’Kai rindathjo ra, ja̱ yoo ra tsjauthexin ra nthiꞌi ngataꞌa nunthe ixin keꞌe sanchia ra ngain Ndudana, ndo thjen ngajni, jaan ruchjaa ra ndo. 20Ixin thi te yoo o nii chujni tetjao na̱ ixin jaꞌan, jaꞌan nthi̱ꞌa̱ riꞌi ngayee na̱.

21Kuthimejan Pedro kunchieꞌen ngain Jesús ko ndachro:

—Nchana, ¿kieꞌen nthiꞌa rugunda sinthatjañaa xanchian thi jianꞌa ncheꞌe xan ngajin? ¿A yaato nthiꞌa sinthatjañaa xan?

22Jesús ndachro ngain Pedro:

—Jaꞌan rindathjoꞌa yaato nthiꞌa, Jaꞌan rindathjo nchetjañeꞌe xan noo renkia ko noo kan ko the nthiꞌa.

Thi yoo xii bintheka

23’Thi thetuꞌan Ndo Dio, mee inchin naa xi rey juinao ruxenge ꞌna kain thi beka kain xi ncheꞌe xree. 24Ko are kuexiꞌin banchia tumii, juiauꞌe na̱ naa thi ncheꞌe xra jika tsjé no̱ tumi. 25Ko thi ncheꞌe xra mee chundaꞌa keꞌe tsjengaxin ꞌna, mexinxin xi rey kuetuꞌan runchekji na̱, jeꞌe, chriꞌi, kain xeꞌen ko kain thi bechunda ixin ruxengaxin ꞌna thi jeꞌe jika ngain xi rey. 26Aro xi ncheꞌe xra mee bethuxin ngain xi rey ko ndachro: “Nthatsaꞌan ñao chunna nchion ko tsjengaꞌa ꞌna kainxin thi rikaꞌa.” 27Ko xi rey kuiakunueꞌe thi ncheꞌe xra ko binchetjañeꞌe kain tumi bekeꞌe ko kuanchrjanda sakjui. 28Ko are jeꞌe thi ncheꞌe xra bachrje ko sakjui, betan inaa thi banchekaꞌo xra ko jeꞌe mee tsjeꞌa tumi bekeꞌe. Ko tsengiꞌi thusin xi banchekaꞌo xra ko ndachro: “¡Thjengana ꞌna thi rikana!” 29Kuthimejan thi banchekaꞌo xra bethuxin ko ndachro: “Nthatsaꞌan ñao chunna ko tsjengaꞌa ꞌna kain thi rikaꞌa.” 30Aro jeꞌe chroꞌa, ko sabikao bakiaxiꞌin ngain nduꞌa xiiso ko rukajandaꞌa rukjengaja ꞌna thi jika. 31Ko are kunuꞌe kain ni banchekaꞌo xra, anto binthechiin na̱ ko kjui na̱ bindachro na̱ kain jiꞌi ngain xi rey. 32Kuthimejan xi rey ruaꞌan xa juajna ixin rukunchieꞌen ngain xa, ko xi rey ndachro: “¡Jaꞌa naa xi ncheꞌe xra anto jianꞌa! Jaꞌan binthatjañaꞌa kain thi barikana ixin binchetsena ñaꞌo. 33¿Ajeꞌa jaꞌa kai rukiakunueꞌe xi nchekoꞌo xra jiꞌi, jañaa inchin jaꞌan kuiakunuaꞌa?” 34Ko jeꞌe xi rey anto guñao ko kuetuꞌan runchegatho na̱ tangi rukjengaja ꞌna kain thi jika.

35Ko are Jesús juexin ndachro kain yaa, kjan ndachro:

—Kai jañaa sincheꞌe Ndudana, ndo thjen ngajni, ja̱ sinchetjañeꞌa ra xan choo ra kunixin ansean ra.

Currently Selected:

San Mateo 18: plsNT

Highlight

Copy