San Mateo 22
22
Jesús nichja ixin naa thi kiai kutheꞌe na̱
1Jesús kuexiꞌin nichja inaa ngain na̱ ko ndachro:
2—Thi thetuꞌan Ndo Dio nthi̱ꞌa̱ ngajni, mee inchin naa kiai binchechjian naa xi rey ixin kutheꞌe xeꞌen xan xii. 3Ko xi rey mee kuetuꞌen kain ni nchexree bindache xa kain chujni ruginthe ngain kiai ixin sine na̱, aro kain chujni mee chroꞌa na̱ juii na̱. 4Ko xi rey kjan ruaꞌan icha ni nchexree, ko ndachro ngain na̱: “Ndache ra kain chujni ubituꞌen tsii sine ixin unchao jii ndaxra. Ko ndache ra na̱ ixin jaꞌan ukuetuꞌan beꞌen kuxinthaꞌna ko kain kuxiigo binthanthao ko kainxin unchao jii. Ndache ra na̱ tsii na̱ ngain kiai thi tsutheꞌe xanꞌna.” 5Aro kain chujni ubituꞌen rukii chroꞌa na̱ juii. Ko naa na̱ sakjui ngataon jngiꞌi ko inaa ngain thi theꞌna ko nchekji. 6Ko ikanxion na̱ tse na̱ ko bintja na̱ ni nchexree xi rey ko naguenxon na̱. 7Ko xi rey mee, anto guñao xa, ko ruaꞌan kain xi soldadue ixin nabiguenxon xa kain chujni kjuaaya ko kai kjuaaga xa rajnee na̱. 8Kuthimejan ndachro xi rey ngain ni nchexree xa: “Ujii kiai, aro kain chujni kuetuan rukii rujine tekininxinꞌa na̱ rukii na̱. 9Jai thji ra ngain kain thi dathujinxin choo nthiꞌá ko ndache ra kain chujni setan ra tsii na̱ sine na̱.” 10Kain ni nchexree xi rey bachrje na̱ ngain kain nthiꞌá, ko batse na̱ kain chujni betan na̱, ni jian ko ni jianꞌa; ko jamee kaon nchia thi beꞌe kiee ni kutheꞌe.
11’Ko are xi rey bixiꞌin xa ixin bitsjeꞌe kain chujni bituꞌen rukii rujine, jeꞌe xa bikon xa naa xii digituxinꞌa inchin naa chujni thji ngain naa kiai thi thutheꞌe na̱. 12Ko xi rey ndachro ngain xii mee: “Jaꞌa, ¿kexreen bixinxin nthiꞌi ko digituxianꞌa inchin dithuxiꞌin naa thi thji ngain naa kiai thi thutheꞌe na̱?” Aro thi xii xruꞌin ndachro. 13Kuthimejan xi rey ndachro ngain ni tedayaa laato: “Thia ra raa ko ruthee xii jiꞌi ko diganka ra xa nduja ngain thi naxin xeꞌe thi rutsjanga xa ko sinetaon neno xa.” 14Ixin tsjé chujni baya̱a aro kainxinꞌa na̱ sinthe na̱ ngajin.
Thi ruxenga ꞌna ngain César
(Mr. 12:13-17; Lc. 20:20-26)
15Kuthimejan xi fariseo sabinthekji xa, ko binthekjauthexin choo xa kexreen sincheꞌe xa ixin sinchenichja xa Jesús naa thi rukjangixin xa Jesús. 16Mexinxin ruaꞌan xa kanxion chujnii xa kunixin kanxion chujnii Herodes ixin bindachro na̱ ngain Jesús:
—Suixin ke tjaago, jaꞌan ná nuna ná ixin suixin ndachro thi ndua, ko suixin ndua nchekueꞌen chujni nthiee Ndo Dio, ko ndusanꞌa thi nichja chujni ixin thi tjaago, ko thjagoꞌa jeꞌo ixin sithuaxin jian ngain chujni. 17Ndachjejin ni ra: ¿Anchao tsjenga ná ꞌna ngain César o naꞌi?
18Aro Jesús ukunuꞌe thi jianꞌa texraxaon xa ixin jeꞌe, ko jeꞌe ndachro ngain xa:
—¡Jaꞌa ra xro ncheꞌa ra thi ndachro ra! ¿Unda thjexin ra runichja naa thi nduaꞌa ixin tsjanginanxin ni ra? 19Tjaguꞌna ra naa tumi thjengaxin ra ꞌna ngain César.
Ko jeꞌe na̱ kjuague na̱ Jesús naa tumi diꞌin denario, thi baxengaxin ꞌna. 20Are bikon Jesús tumi mee banchiangi ngain na̱ ko ndachro:
—¿Kensen ngakon jinganito jiꞌi, ko kexreen chro thi jitaxin?
21Jeꞌe xa binthendachro xa:
—Ngakon César.
Kuthimejan Jesús ndachro ngain xa:
—Chjeꞌe ra César thi jikininxin, ko chjeꞌe ra Ndo Dio thi jikininxin sayée ndo.
22Are binthekiꞌin xa jiꞌi, jeꞌe xa binthekiseꞌen xa ko ndakuinthuꞌe xa Jesús ko sabinthekji xa.
Kanxion chujni banchiangi keꞌe ruchro thi ruxechon ni
(Mr. 12:18-27; Lc. 20:27-40)
23Ngain nchaꞌon mee kanxion xi saduceo bitsjeꞌe xa Jesús. Xi saduceo bagithikaon xa ixin chujni ndadeꞌen iruxechonꞌa na̱; mexinxin banchiangi xa ngain Jesús ko ndachro xa:
24—Suixin ke tjaago, ley bayée Moisés jitaxin ixin ja̱ naa xii jikaꞌo chriꞌi ko ndaseꞌen ko xruꞌin chjan tsinthuꞌe ngain chriꞌi, rugunda ixin naa xan choo xi ndabeꞌen sekaꞌo nchri gaꞌan ko ruchunda na̱ chjan ko chjan suan xraa ja̱ rukji xeꞌen thi ndabeꞌen. 25Nthiꞌi ngayeꞌna ná binthe yaato xan xii, kain xan choo xan. Xan saꞌo bekaꞌo xan chriꞌi xan aro ndabeꞌen xan, ko xruꞌin chjan kuinthuꞌe xan, mexinxin nchri gaꞌan bekaꞌo nchra xan choo xan ndabeꞌen. 26Ko xrajeꞌo kuꞌen xan yuxin, xan ninxin ko jañaa kuꞌen kain xan ko biji ngain xan yatuxin. 27Kuthimejan jeꞌe nchra kai ndabeꞌen nchra. 28Mexinxin ndachjejin ni ra, are ruxechon kain ni yaa, ¿kexeꞌe thi yaato xan xii ndabeꞌen, nduaxin xixiꞌi nchrii mee ixin kain xan binthekaꞌo xan nchrii mee?
29Jesús ndachro:
—Jaꞌa ra nuaꞌa ra thi tenichja ra ixin nuaꞌa ra thi jitaxin ngain Xruen Ndo Dio ko chunxinꞌa ra juachaxin chunda ndo. 30Ixin are ruxechon kain chujni undabeꞌen, are mee ixruꞌin chujni sekaꞌo choo ko ixruꞌin chujni sajon xeꞌen ixin tsutheꞌe xan ixin kain na̱ sinthe na̱ inchin angeel Ndo Dio nthi̱ꞌa̱ ngajni. 31Aro thi danchiangiꞌna ni ra ixin thi chujni ruxechon, ¿atsjeꞌa ra Xruen Ndo Dio thi jindathjo ra?, are ndachro: 32“Jaꞌan thi Ndo Diue Abraham, Isaac ko Jacob.” Ndo Dio, jeꞌa Diue ni ndadigeꞌen, Ndo Dio, Diue chujni techon.
33Are kain chujni te nthi̱ꞌa̱ kuiꞌin na̱ thi bakjaago Jesús, anto kuiseꞌen na̱.
Thi icha renthe kuetuꞌan Ndo Dio
(Mr. 12:28-34)
34Are xi fariseo kunuꞌe xa ixin Jesús binchetenkua xi saduceo, xi fariseo xrathe xa ngain Jesús. 35Ko naa xi fariseo, naa xi tjaago ley kjuexin xa ixin runchenichja xa Jesús chrujan thi nduaꞌa; mexinxin banchiangi xa ngain Jesús ko ndachro xa:
36—Suixin ke tjaago, ¿kexeꞌe thi icha renthe thetuꞌan ley?
37Jesús ndachro:
—“Thjueꞌe Ndo Dio ngain ansean, ngain almaa ko ngain juaxraxauan.” 38Jiꞌi thi icha renthe, ko thi saꞌo thetuꞌan Ndo Dio sincheꞌe ni. 39Ko thi yuxin thetuꞌan ndo xraa yaikua thi saꞌo, ixin ndachro: “Thjueꞌe kain chujni inchin thjueꞌe nthauꞌa.” 40Ko kayui thi thetuꞌan ndo jiꞌi thi icha renthe ngain ley bayée Moisés, ko thi ndachro kain ni bagayee juajnee Ndo Dio.
Thinoo bachrjeninxin Jesucristo
(Mr. 12:35-37; Lc. 20:41-44)
41Ko are xratate xi fariseo nthi̱ꞌa̱ Jesús banchiangi ngain xa, 42ko ndachro:
—¿Keꞌe xraxaon ra ixin Cristo? ¿Kensen bachrjeninxin jeꞌe?
Jeꞌe xa binthendachro xa:
—Bachrjeninxin David.
43Kuthimejan ndachro Jesús:
—¿Unda Espíritu Santo banchenichja David, ko banchegiꞌin Nchana? Ixin David dindachro:
44Nchana, ndachro ngain Nchana thi Mesías:
“Dariꞌi ngain rajianxin na,
sakeja chringiꞌi ruthea kain ni ningakuꞌan.”
45Mexinxin, ¿ja̱ David ndache Cristo, “Nchana”, kexreen rundachro ra ixin xeꞌen?
46Ko ixruꞌin xi bagatheꞌe, ko nchaꞌon maꞌo ixruꞌin xi baganchiangi ngain Jesús.
Currently Selected:
San Mateo 22: plsNT
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
