San Mateo 23

Jesús nichja thi jianꞌa ncheꞌe xi fariseo ko xi tjaago ley

(Mr. 12:38-40; Lc. 11:37-54; 20:45-47)

1Kuthimejan Jesús ndachro ngain kain chujni te nthi̱ꞌa̱ ko ngain chujni bakao:

2—Kain xi tjaago ley ko kain xi fariseo tunuꞌe xa ixin jeꞌo xa chunda xa juachaxin tjaago xa ley Moisés. 3Mexinxin jaꞌa ra dithikaon ra ko ncheꞌe ra kain thi rundathjo ra xa aro ncheꞌa ra inchin jeꞌe xa, ixin jeꞌe xa jee ndachro xa ko jee ncheꞌe xa. 4Ko tsjé thi tangi thetuꞌen xa chujni sincheꞌe na̱, aro jeꞌe xa ncheꞌa xa thi thetuꞌan xa. 5Jeꞌe xa jeꞌo ncheꞌe xa kain yaa ixin chujni sikon xa. Ko thianito nthathjen xa naa rua jingaa rioꞌo xroon jitaxin nchion juajnee Ndo Dio, ko icha nchexon xa tjaago xa thi jindeꞌe lunthue xa. 6Ko anto nchexruxiꞌin xa tadinthe xa ngain ntha xintaon icha renthe ngain naa kiai, ko kai anto nchexruxiꞌin xa dinthe xa ngain ntha xintaon icha renthe ngain niꞌngo. 7Ko are ridinthe xa ngain nthiꞌá nchexruxiꞌin xa ixin chujni sajon na̱ juajna ngain xa ko rundache na̱ xa “Suixin ke tjaago”.

8’Aro jaꞌa ra dithuaxinꞌa ra ixin chujni sinthagiꞌin ra na̱ “suixin thi tjaago”, ixin jaꞌa ra choo ra ko chunda ra nakuaxinxon thi tjaguꞌa ra, ko mee Cristo. 9Ko nthiꞌi ngataꞌa nunthe xruꞌin chujni nchegiꞌin ra ndudaa ra, ixin nakuaxinxon Ndudaa ra chunda ra ko thjen ndo nthi̱ꞌa̱ ngajni. 10Ko dithuaxinꞌa ra ixin chujni rundathjo ra na̱ ixin jaꞌa ra thi tjaago ra ixin jaꞌa ra chunda ra nakua thi tjaago, ko mee Cristo. 11Thi icha sincheꞌe xra ngayaꞌa ra, mee thi icha renthe seꞌe ngajin ra. 12Ixin chujni jai tunuꞌe anto renthe, chujni mee tsurentheꞌa na̱ ko chujni jai tunuꞌe ixin rentheꞌa, chujni mee tsurenthe na̱.

13’¡Atho tangi sikuꞌan ra jaꞌa ra xro tjaago ra ley ko jaꞌa ra xro fariseo ra, xro kunxon tjaago ra ixin jian ra aro nduaꞌa! Ixin jaꞌa ra tekayakueꞌen ra chujni ixin chroꞌa sixiꞌin na̱ ngain thi thetuꞌan Ndo Dio. Ko kaxon jaꞌa ra chroꞌa dixiꞌin ra ko tajandaꞌa ra dixiꞌin chujni rinao sixiꞌin.

14’¡Atho tangi tsuꞌan ra, jaꞌa ra xro tjaago ra ley ko jaꞌa ra xro fariseo ra, xro kunxon tjaago ra ixin jian ra aro nduaꞌa! Ixin jaꞌa ra dantsjeꞌe ra nchri gaꞌan nchianduꞌa nchra, ko chijninxion ncheꞌe ra ixin anto see nichjeꞌe ra Ndo Dio; mexinxin jaꞌa ra icha suji jie̱ suaꞌan ra.

15’¡Atho tangi tsuꞌan ra jaꞌa ra xro tjaago ra ley ko jaꞌa ra xro fariseo ra, xro kunxon tjaago ra ixin jian ra aro nduaꞌa! Ixin jaꞌa ra thingaria ra ngataꞌa nunthe ko ngataon ndachaon ixin thjee ra chujni sithikaon xrajeꞌo inchin jaꞌa ra ko are udinchii ra na̱, ndanchekjan ra na̱ chujni icha jianꞌa ke jaꞌa ra ko dikininxin tsji na̱ yoo nthiꞌa ngathe xruꞌi thi xruꞌin nchaꞌon danga.

16’¡Atho tangi tsuꞌan ra jaꞌa ra!, xro tenchekueꞌen ra chujni ixin sithikaon na̱ Ndo Dio, aro jaꞌa ra dithikaonꞌa ra ndo. Ko ndachro ra: “Ja̱ ndachro ra ixin chrujan sincheꞌe ra ko nchekininxin ra niꞌngo, mee xruꞌin renthe, aro ja̱ chrujan ndachro ra sincheꞌe ra ko nchekininxin ra oro jixiꞌin niꞌngo, rugunda sincheꞌe ra thi ndachro ra.” 17¡Jaꞌa ra xro xraxaonꞌa ra thi ncheꞌe ra ko kajin ra! ¿Kexeꞌe thi icha renthe a oro o niꞌngo thi nchenchaon oro? 18Ko kai ndachro ra: “Ja̱ ndachro ra chrujan sincheꞌe ra ko nchekininxin ra altar, mee xruꞌin renthe, aro ja̱ chrujan ndachro ra sincheꞌe ra ko nchekininxin ra thi jitaꞌa altar, rugunda sincheꞌe ra thi ndachro ra.” 19¡Jaꞌa ra xro anto cha thinxin ra ko kajin ra! ¿Kexeꞌe thi icha renthe a thi jii ngataꞌa altar o altar thi nchenchaon thi jitaꞌa? 20Mexinxin are chujni ndachro ixin chrujan sincheꞌe ko nchekininxin altar, jinchekininxin altar ko kain thi jitaꞌa. 21Ko are chujni ndachro chrujan sincheꞌe ko nchekininxin niꞌngo, jinchekininxin niꞌngo ko kain thi jii ngain niꞌngo. 22Kai are chujni ndachro ixin chrujan sincheꞌe ko nchekininxin ngajni, jinchekininxin Ndo Dio ko ntha xintauen ndo.

23’¡Atho tangi tsuꞌan ra jaꞌa ra xro tjaago ra ley ko jaꞌa ra xro fariseo ra, xro kunxon tjaago ra ixin jian ra aro nduaꞌa! Ixin jaꞌa ra dajon ra ngain Ndo Dio thi thexin dantsenda ra ngain kaxranchuni, ka anís, comino. Aro ncheꞌa ra thi icha renthe thetuꞌan ley, inchin thi sincheꞌe ra jian, thi tsiakunueꞌe ra chujni ko thi ruchunthia ra ngain Ndo Dio. Jiꞌi thi rugunda sincheꞌe ra ko thinthueꞌa ra thi thexin dajon ra ngain Ndo Dio. 24¡Jaꞌa ra xro thetuꞌan ra aro xruꞌin nuꞌa ra! ¡Jaꞌa ra nchekangiꞌi ra jinda ixin singaꞌa ra kuxisenchjan, aro nchujio naa kucamello dinga ra!

25’¡Atho tangi tsuꞌan ra jaꞌa ra xro tjaago ra ley ko jaꞌa ra xro fariseo ra, xro kunxon tjaago ra ixin jian ra aro nduaꞌa! Jaꞌa ra xro ncherua ra ngamao thi dixin ra ko thi nthexin ra, aro ngain ansean ra jii thi thiakuꞌen ra thema ra ko ncheꞌe ra thi jianꞌa. 26Jaꞌa ra xro fariseo ra te ra xraa chujni kajin. Saꞌo ncherua ra ansean ra ko jamee kai tsurua ngama ra, inchin ncheꞌe ra ngain thi dixin ra ko thi nthexin ra.

27’¡Atho tangi tsuꞌan ra jaꞌa ra xro tjaago ra ley ko jaꞌa ra xro fariseo ra, xro kunxon tjaago ra ixin jian ra aro nduaꞌa! Ixin jaꞌa ra te ra inchin chinthi thi xrabaa chujni ko dikentaꞌa na̱ xro anto chrjuin te ixin dikengaxin na̱ ngama, aro ngaxinxin jikaon kunixin lurue chujni ko kain thi thjuaꞌa. 28Jamee te ra jaꞌa ra kai, ixin tjaago ra ixin jian chujni ra, aro ngaxiꞌin ansean ra jikaon ixin thi kunxon jian ra aro nduaꞌa ko kain thi jianꞌa xraxaon ra.

29’¡Atho tangi tsuꞌan ra jaꞌa ra xro tjaago ra ley ko jaꞌa ra xro fariseo ra, xro kunxon tjaago ra ixin jian ra aro nduaꞌa! Ixin jaꞌa ra nchechjian ra chinthiꞌi ni bagayee juajnee Ndo Dio ko nchetsujin ra chinthiꞌi chujni kjui jian. 30Ko ndachro ra: “Ja̱ jaꞌan ná ruginthe ná ngain nchaꞌon binthechon ni ndo dachriꞌna ná xrachrjen, jaꞌan ná rukjengijnaꞌa ná na̱ are baguen na̱ ni bagayee juajnee Ndo Dio.” 31Ko ixin jañaa tenichja ra, jaꞌo ra tendachro ra ixin ndua jaꞌa ra xan nthii ni baguenxon ni bagayee juajnee Ndo Dio. 32¡Anchee jaꞌa ra nchekjexin ra thi kuexinxin bincheꞌe ni ndo dachriꞌa ra xrachrjen!

33’¡Jaꞌa ra xraa kunchee ra, ko anto jianꞌa ra xraa jeꞌe ba!, mexinxin jaꞌa ra chroꞌa tsingeꞌe ra thi xruꞌi dangaꞌa. 34Mexinxin jaꞌan ruruaꞌan ni dayée juajnee Ndo Dio, ni anto nuꞌe ko ni jian sinthakuaꞌan ra ixin Ndo Dio. Aro jaꞌa ra nasuenxon ra na̱ ko tsenganito ra na̱ ngain ntha cruz ko ikanxion na̱ sintja ra na̱ ngaxiꞌin niꞌngo, ko rurueꞌe ra na̱ kain rajna thi jeꞌe na̱ satsinga na̱. 35Mexinxin jaꞌa ra ko ni ndo dachriꞌa ra xrachrjen setsingataꞌa ra jnii kainxin chujni jian, thi jni binthji ngain nunthe, kuexinxin ngain Abel thi kjui xii jian ngain Ndo Dio ko bikjexinxin ngain Zacarías, xeꞌen Berequías thi naguenxon ni ndo dachriꞌa ra xrachrjen ngayee niꞌngo ko altar. 36Atho ndua thi jaꞌan rundathjo ra, ixin kain jiꞌi setsingataꞌa chujni judío te jai.

Jesús tsjangaxin Jerusalén

(Lc. 13:34-35)

37Kuthimejan ndachro Jesús:

—¡Ni Jerusalén, ni Jerusalén, jaꞌa ra thi naduenxon ra ni dayée juajnee Ndo Dio ko naduenxon ra kunixin xro chujni thiaꞌo juajnee ndo ngajin ra! ¡Anto tsjé nthiꞌa jaꞌan binaꞌo rugatse ra inchin kuchia datse xeꞌen ba ngangiꞌi neneꞌe ba, aro jaꞌa ra binaoꞌa ra! 38Tsjexin ra, nchiandui ra ndasithuꞌe nchia jeꞌo nchia, 39jaꞌan rindathjo ra ke irukjanꞌa ra sikon ni ra, tsija nchaꞌon are rundachro ra: “Ndo Dio binthanchaon ndo jaꞌa, thi juii kunixin juachaxiin ndo.”

Currently Selected:

San Mateo 23: plsNT

Highlight

Copy