San Mateo 24

Jesús ndachro ixin niꞌngo icha renthe ruxanthe

(Mr. 13:1-2; Lc. 21:5-6)

1Jesús bachrjexin niꞌngo icha renthe ko are usajithji, chujni bakao kunchieꞌen na̱ ngain ko ndache na̱ ixin rutsjeꞌe nguixin niꞌngo. 2Ko Jesús ndachro ngain na̱:

—¿A dikon ra kain yaa? Ndua thi rundathjo ra ixin xruꞌin xro sithuꞌe ngataꞌa inaa xro ixin kain ndaruxanthe.

Thi tsuꞌen saꞌo kuthimejan ndatsjexin nunthe

(Mr. 13:3-23; Lc. 21:7-24; 17:22-24)

3Kuthimejan sabinthekji na̱ ngain jnanchjan diꞌin Ntha Olivo, ko are Jesús tabeꞌe nthi̱ꞌa̱, chujni bakao tsjetsjeꞌa na̱ kunchieꞌen na̱ ngain ko ndachro na̱:

—Ndachjejin ni ra kensa tsuꞌen thi Suixin bendachro. ¿Ko keꞌe ruxraago are Suixin rukjan siꞌi inaa ko are undatsjexin nunthe?

4Kuthimejan Jesús ndachro ngain na̱:

—Tsjeꞌe ra jian ixin xruꞌin chujni sinthayaꞌa ra. 5Ixin anto tsjé chujni tsii ko rundachro na̱: “Jaꞌan thi Cristo na”, ko sincheyeꞌe na̱ tsjé chujni. 6Jaꞌa ra tsiꞌin ra ixin jii guerra ko tsiꞌin ra runichja na̱ ixin jii guerra ngain ikanxin rajna, aro xraonꞌa ra ixin jamee rugunda tsuꞌen, aro xra jeꞌa nchaꞌon are ndatsjexin nunthe. 7Ixin naa nunthe tsetukaꞌo inaa nunthe, ko naa rajna tsetukaꞌo inaa rajna. Ko ngain tsjé nunthe seꞌe jintha, chin ko suji tsingi nunthe. 8Kain yaa tsuꞌen ko nandaa tsexinxin thi anto tangi tsuꞌen chujni.

9’Kuthimejan chujni sajon ra na̱ ngain chujni ningakuꞌan ra ko sinthja ra na̱ ko nasuenxon ra na̱, ko chujni nguixin nunthe runingakuꞌan ra na̱ ixin dithikaon ni ra jaꞌan. 10Ngain nchaꞌon teꞌa tsjé na̱ iruchunthiaꞌa na na̱ jaꞌan, ikanxion na̱ tsjangiꞌo choo na̱ ngain ni runingakuꞌen na̱ ko jeꞌo na̱ runingakuꞌen choo na̱. 11Ko are mee tsununxin tsjé chujni rundachro ixin jeꞌe nichja juajnee Ndo Dio aro nduaꞌa, ko sincheyeꞌe na̱ tsjé chujni. 12Ko anto tsjé jianꞌa seꞌe, mexinxin tsjé chujni iruthjueꞌa choo na̱. 13Aro chujni tsinthueꞌa thi chunthia na jaꞌan, chujni mee rukjan na̱ inaa chujni narua. 14Ko thi thetuꞌan Ndo Dio mee thi jian juajnee ndo ruxraago nguixin nunthe ixin tsunuꞌe na̱ thi jian juajna jiꞌi. Kuthimejan ndasitjaan nunthe jiꞌi.

15’Mexinxin are sikon ra ngain niꞌngo thi anto thjuaꞌa ko nchejianꞌa kain, jañaa inchin ndachro Daniel, thi bagayee juajnee Ndo Dio. Thi tsjeꞌe xroon jiꞌi rugunda tsinxin. 16Ko are mee xro sinthe ra ngain rajna Judea sathinga ra ngagaꞌa jna. 17Ko thi seꞌe ngataꞌa nchianduꞌa, saniaꞌa siruee thi sinao sasikao. 18Ko thi seꞌe ngataon jngi, tsjiꞌa siruee lunthue. 19Ko, ¡anto tangi tsuꞌen kain nchrii sintheyaa chjan ko kain nchrii ruchunda chjan tetai ngain nchaꞌon mee! 20Ko nchetseꞌen ra ñao Ndo Dio ixin satsingaꞌa ra ngain kunithjaue kin o ngain nchaꞌon nchejugaꞌa ni, 21ixin are mee anto tangi tsuꞌen, ko thi tangi mee bagikuꞌan ni are nakuexinxin beꞌe nunthe jiꞌi, ko isikuenꞌa. 22Ko ja̱ Ndo Dio rukanchrjanda rugatho thi tangi tsjé nchaꞌon, xruꞌin chujni ruxeꞌe, aro jeꞌe ndo kuanchrjandaꞌa ndo batho tsjé nchaꞌon ixin anto thjueꞌe ndo chujni jeꞌe ndo kuinchieꞌe ndo.

23’Are mee ja̱ chrujan chujni rundathjo ra na̱: “Nthiꞌi jii thi Cristo”, o “Nujiꞌa jii”, jaꞌa ra dithikaonꞌa ra. 24Ixin are mee tsununxin tsjé thi rundachro ixin jeꞌe thi Cristo ko tsjé thi rundachro ixin jeꞌe thi dayée juajnee Ndo Dio. Ko sincheꞌe na̱ tsjé thi chrjuin dikon ni ko tsjé thi xranaꞌa dikunxin ni, ko ja̱ nchao, kai sincheyeꞌe na̱ chujni ukuinchieꞌe Ndo Dio. 25Jaꞌan ubinthanuꞌa ra kain thi sikuꞌen jiꞌi. 26Mexinxin ja̱ rundathjo ra na̱: “Tsjexin ra, ngagaꞌa jna thi xruꞌin jii, nthi̱ꞌa̱ jii thi Cristo”, jaꞌa ra thjiꞌa ra ditsjeꞌe ra, o ja̱ rundathjo ra na̱: “Thi Cristo nthiꞌi jii ngaxiꞌin naa nchia”, jaꞌa ra dithikaonꞌa ra. 27Ixin xraa are tungixinthe no thi chrinxin nchaꞌon ko diji thi diataunxin nchaꞌon, jañaa rukjan siꞌi inaa, jaꞌan, thi Xii juixin ngajni. 28Ko thi xrathe tsjé kunthachrjen, nthi̱ꞌa̱ xraago ixin nthi̱ꞌa̱ jitsinga naa thi ndadigeꞌen.

Rukjan tsii thi xii juixin ngajni

(Mr. 13:24-37; Lc. 21:25-33; 17:26-30, 34-36)

29’Ko are tsjexin satho kain thi nchaꞌon anto tangi mee, kuthimejan nchaꞌon isinchengasanꞌa nchaon, kunithjao isinchengasanꞌa ba, kunutse singuxin ba ngajni ko kainxin thi jii ngajni ruxranga. 30Kuthimejan tsununxin nthi̱ꞌa̱ ngajni thi xranaꞌa dikunxin ra, thi sinthaꞌa jaꞌan, thi Xii juixin ngajni ko kainxin chujni te nguixin nunthe rutsjanga na̱, ko sikon na na̱ jaꞌan, thi Xii juixin ngajni, siꞌi inaa ngakjan thjui kunixin jié juachaxin. 31Ko jaꞌan ruruaꞌan angelna kunixin naa trompeta ko sanua suji ixin satse kainxin chujnina te nguixin nunthe, thi ni jaꞌan kuinchiaa.

32’Tangi ra ixin thi tuꞌen ntha higo: Are xesan chaan ntha, jaꞌa ra unuꞌa ra ixin ubikunchiaon kunithjaue chrin. 33Jañaa kai, are jaꞌa ra sikon ra kain yaa tsexiꞌin tsuꞌen, jaꞌa ra unuꞌa ra ixin jaꞌan uchiaon rukjan na siꞌi inaa. 34Atho ndua thi rindathjo ra ixin tsuenja kain jiꞌi, kuthimejan ndaseꞌen chujni sinthechon are mee. 35Maski ngajni ko nunthe ndasitjaan, aro thi jaꞌan ndachrjan, jaan, sikuꞌen.

36’Aro xruꞌin kensen nuꞌe nchaꞌon ko hora are sikuꞌen jiꞌi, ko xruꞌin ángel nuꞌe kai. Jeꞌo Ndo Dio, Ndudaa ná, thi nuꞌe.

37’Jañaa inchin kuꞌen ngain nchauen Noé, kai jamee tsuꞌen are siꞌi jaꞌan, thi Xii juixin ngajni. 38Ngain nchaꞌon are xrabitjanxinꞌa jinda kain chujni; bajine na̱, bagiꞌi na̱, bakutheꞌe na̱ ko bagajon na̱ xeꞌen na̱ bakutheꞌe xan. Ko jañaa bancheꞌe na̱ juija nchaꞌon are Noé bixiꞌin ngain ntha arca. 39Ko kuinxinꞌa na̱ keꞌe rugikuꞌen, juija jinda ko kain na̱ kjuꞌen na̱ nda. Jamee tsuꞌen kai are siꞌi jaꞌan, thi Xii juixin ngajni. 40Are mee yoo xii tencheꞌe xra ngataon jngi, naa xa sitjankjio xa ko inaa xa ndasithuꞌe xa. 41Yoo nchrii tedaꞌo nchra, naa nchra sitjankjio nchra ko inaa nchra ndasithuꞌe nchra.

42’Mexinxin jaꞌa ra chuꞌen ra kain nchaꞌon ixin nuaꞌa ra keꞌe hora tsii Nchaa ra. 43Aro thinxin ra jiꞌi, ja̱ naa xii chunda naa nchia rukunuꞌe keꞌe hora rukii xi cheꞌe are thie, xi nchianduꞌa rugejuaꞌa xa ixin rukanchrjandaꞌa xa thi cheꞌe rugixiꞌin rukee. 44Mexinxin jaꞌa ra kai chuꞌen ra, ixin jaꞌan, thi Xii juixin ngajni siꞌi inaa, are jaꞌa ra texraxaonꞌa ra.

Naa thi ncheꞌe xra jian ko naa thi ncheꞌe xra jianꞌa

(Lc. 12:41-48)

45’Naa xi ncheꞌe xra dithikaon kain thi dituꞌen ko chunxin thi jian, mexinxin xi najnii chunthia xa ngain jeꞌe ixin dithueꞌe icha ni ncheꞌe xree xa ko ruchjee na̱ sine na̱ are jikininxin. 46Ndo Dio sinchenchaon thi ncheꞌe xra ixin are rukjan xi najnii sithja xa jincheꞌe kain thi bituꞌen. 47Atho ndua thi rindathjo ra, ixin xi najnii ruchjee xa juachaxin ixin jeꞌe senda kainxin thi chunda xa. 48Aro thi ni ncheꞌe xra jianꞌa, seꞌe ruxraxaon ixin xi najnii tsiꞌa xa tuin, 49ko tsexiꞌin xa sinthja xa icha ni nchekaꞌo xa xra, ko sinekaꞌo xa ko sikaꞌo xa kain thi kuan. 50Ko are tsii xi najnii ngain nchaꞌon are jeꞌe jixraxaonꞌa ko ngain hora ke jeꞌe nueꞌa, 51xi najnii sinchegatho xa anto tangi, inchin tangi sathuꞌe kain chujni kunxon ndachro ixin jian aro nduaꞌa. Ko nthi̱ꞌa̱ rutsjanga na̱ ko sinetaon neno na̱.

Currently Selected:

San Mateo 24: plsNT

Highlight

Copy