San Mateo 6

Jesús tjaago ixin rugunda tsjengijna ni chujni nua

1’Ncheꞌa ra thi jian jeꞌo are tatetsjeꞌe chujni ixin ruxraxaon na̱ ixin jaꞌa ra anto jian ra. Ja̱ jamee sincheꞌe ra, Ndudaa ra, ndo thjen ngajni, xruꞌin thi jian ruchjaa ra ndo. 2Mexinxin are jaꞌa tsjengijna chujni nua, thekinꞌa ngain icha chujni, inchin chujni tjaago ixin anto jian ko nduaꞌa. Ixin jeꞌe na̱ jañaa ncheꞌe na̱ ngain niꞌngo ko ngaa nthiꞌá ixin icha chujni runichja na̱ jian ixin jeꞌe na̱. Aro jaꞌan rindathjo ra ixin thi jian nichja chujni ixin jeꞌe na̱, mee thi ubayée na̱. 3Mexinxin jaꞌa are tsjengijna chujni nua, xruꞌin ni thekiꞌin, maski ni icha jian dakjioꞌo. 4Ko icha jian jimao thjengijna na̱. Ko Ndudaa, ndo thjen ngajni, dikon ndo thi jimao ncheꞌe, ko jeꞌe ndo tsjengaꞌa ndo ꞌna.

Jesús tjaago kexreen runichjee ni Ndo Dio

(Lc. 11:2-4)

5’Ko are jaꞌa ra runichjeꞌe ra Ndo Dio, ncheꞌa ra xraa chujni tjaago ixin anto jian aro nduaꞌa, ixin nchexruxiꞌin na̱ ixin chujni sikon na̱, mexinxin tatengathjen na̱ are nichjee na̱ Ndo Dio ngaxiꞌin niꞌngo, ko thi dathujinxin choo nthiꞌá ixin chujni sikon na̱. Jaꞌan rindathjo ra ixin chujni ndachro ixin anto jian aro nduaꞌa ubacha na̱ ixin chujni ubikon na̱ thi bincheꞌe ni teꞌi. 6Aro jaꞌa are runichjeꞌe Ndo Dio, dixiꞌin nchiandui ko thejeꞌe nchia ko jimao nichjeꞌe Ndudaa jii ngajin, jaꞌo ko jeꞌe ndo. Ko Ndudaa, ndo dikon thi jaꞌa ncheꞌe, jeꞌe ndo tsjengaꞌa ndo ꞌna.

7’Are jaꞌa ra runichjeꞌe ra Ndo Dio, nichjakuaꞌa ra ixin jañaa ncheꞌe chujni chunxinꞌa ndo, ixin xraxaon na̱ ixin Ndo Dio tsiꞌin na̱ thi anto tsjé nichja na̱. 8Ko ncheꞌa ra inchin jeꞌe na̱, ixin Ndudaa ná thjen ngajni unuꞌe ndo keꞌe sanchieꞌe ra ndo are xradanchieꞌa ra ndo. 9Mexinxin jaꞌa ra nichjeꞌe ra ndo jaꞌin:

Suixin Ndudana ná thjen ngajni,

Suixin tsusayaꞌa.

10Suixin dikjiꞌi diketuꞌan nthiꞌi ngataꞌa nunthe,

ko tsuꞌen inchin Suixin rinao nthiꞌi ngataꞌa nunthe jañaa inchin tuꞌen nthi̱ꞌa̱ ngajni.

11Chjana ni ra thi rugunda na ná ixin sine ná jai.

12Nchetjañana ni ra thi jianꞌa binthaꞌa ná, jañaa inchin jaꞌan ná binthatjañaa ná thi chujni bincheꞌe jianꞌa ngajin ná.

13Tanchrjandaꞌa ni ra sitaꞌa ná thi jianꞌa; thjengijna ni ra ixin thi jianꞌa tsjanaꞌa ná cha.

Ixin Suixin thi thetuꞌan ko chunda kainxin juachaxin ko kainxin thi anto chrjuin jii kainxin nchaꞌon. Jañaa tsuꞌen.

14’Ja̱ nchetjañeꞌe ra thi chujni ncheꞌe jianꞌa ngajin ra, Ndudaa ná, ndo thjen ngajni, kai sinthatjañaꞌa ra ndo. 15Aro ja̱ nchetjañeꞌa ra chujni ncheꞌe jianꞌa ngajin ra, Ndudaa ná, ndo thjen ngajni, kai chroꞌa sinthatjañaꞌa ra thi jianꞌa ncheꞌe ra.

Jesús ndachro kexreen sinchekjaaño ni

16’Are jaꞌa ra sinchekjaaño ra, dinthechinꞌa ra inchin chujni kunxon tjaago ixin anto jian, ixin ni teꞌi ngakon na̱ tjaguxin na̱ ixin tenchekjaaño na̱. Aro jaꞌan rindathjo ra ixin Ndo Dio ubinchegacha na̱ ixin chujni ubikon na̱. 17Aro jaꞌa ra are sinchekjaaño ra, tunthi ra jinda ngakon ra ko nchejijin jaa ra jian, 18ko jañaa chujni ruxraxaonꞌa na̱ ixin jaꞌa rinchekjaaño. Jeꞌo Ndudaa thi jii jimao ngajin tsunuꞌe ndo ko jeꞌe ndo tsjenga ndo ꞌna.

Thi renthe jii ngajni

(Lc. 12:33-34)

19’Datseꞌa ra tsjé thi renthe nthiꞌi ngataꞌa nunthe ixin nthiꞌi ndathjeꞌe kuchii ko chia ndadiꞌi chjiin, ko xicheꞌe dixiꞌin xa nchia ko thema xa. 20Icha jian datse ra thi renthe nthi̱ꞌa̱ ngajni, nthi̱ꞌa̱ thi xruꞌin kuchii jii ko chia diꞌa chjiin chia, ko xruꞌin xicheꞌe jii. 21Ixin ngain thi jii thi renthe chunda ra, kai nthi̱ꞌa̱ jii juaxraxaon ra ko ansean ra.

Jmakon ni inchin naa xruꞌi nchengaseꞌen ni

(Lc. 11:34-36)

22’Jmakon inchin naa xruꞌi nchengaseꞌen nthauꞌa. Mexinxin ja̱ jmakon jian, kai nguixin nthauꞌa jian singaseꞌen. 23Aro ja̱ jmakon jianꞌa dikon, kai nguixin nthauꞌa jii ngain thi naxin xeꞌe. Ko ja̱ koꞌa xruii Ndo Dio ngajin, atho naxin xeꞌe thi riꞌi jaꞌa.

Ndo Dio ko tumi

(Lc. 16:13)

24’Xruꞌin chujni nchao ngurisincheꞌo xree yoo xi najni, ixin icha sinao naa xi najni ko runingakuꞌen inaa xa, o icha sithikaon ngain naa xa ko ngain inaa xa sithikaonꞌa. Jañaa kai chroꞌa ngurisincheꞌo ni xree Ndo Dio ko tsjee ni tsjé tumi.

Ndo Dio dakuꞌen xeꞌen ndo

(Lc. 12:22-31)

25’Mexinxin jaꞌan rindathjo ra: Taꞌa ra juachjaon ixin thi sinthe ra ko thi siꞌi ra ixin sinthechunxin ra kai taꞌa ra juachjaon ixin keꞌe luntho sintengaꞌa ra. ¿A jeꞌa icha renthe thi techon ni ke thi jine ni, ko a jeꞌa icha renthe nthauꞌe ni ke lunthue ni? 26Tsjeꞌe ra kain kunthua; jeꞌe ba xruꞌin thenga ba ko xruꞌin thjejo ba ko xruꞌin datsiin ba ngain nthanetuꞌen ba. Aro maski jamee, Ndudaa ná thjen ngajni dajon ndo thi jine ba. Ko, ¿a jeꞌa icha renthe ra ke kain kunthua? 27Ko, ¿kexeꞌe ra xro ixin icha tsa ra juachaon, nchao sangi ra irioꞌo metro?

28’¿Unda anto ta ra juachjaon ixin luntho? Tsjeꞌe ra kexreen dangi tsjo ngataon jngi, ko ncheꞌa tsjo xra ko tjaonꞌa tsjo lunthue tsjo. 29Ko rey Salomón maski tsjé bechunda ko chrjuin batsujin, aro tsujinꞌa inchin tsjo teꞌi. 30Ja̱ Ndo Dio jaꞌin nchetsaa ka jii ngataon jngi ko nduexin ndaxema ka ko che ka, ¿a runcheꞌa ndo icha ixin jaꞌa ra?, maski jaꞌa ra chunthiaꞌa ra jian ngain ndo. 31Mexinxin taꞌa ra juachjaon ko ndachroꞌa ra: “¿Keꞌe sunthe ná? o ¿keꞌe soꞌo ná? o ¿keꞌe luntho sunthengaa ná?” 32Ixin chujni chunxinꞌa Ndo Dio kain jiꞌi taxin na̱ juachjaon, aro Ndudaa ra thjen ngajni unuꞌe ndo ixin jaꞌa ra, jaan, rugundaꞌa ra kain jiꞌi. 33Mexinxin saꞌo thjee ra ko ncheꞌe ra thi thetuꞌan ndo ko rinao ndo, ko jañaa ruchjaa ra ndo thi rugundaꞌa ra. 34Mexinxin taꞌa ra juachjaon ixin kexreen sincheꞌe ra ndue, ixin nchaꞌon tsiaꞌo ujee juachjaon. Ixin kain nchaꞌon thiaꞌo juachjauen nchaon.

Currently Selected:

San Mateo 6: plsNT

Highlight

Copy