San Mateo 8

Jesús binchexrueꞌen naa thi bechunda chin lepra

(Mr. 1:40-45; Lc. 5:12-16)

1Are Jesús juixin ngain jna, anto tsjé chujni ruee. 2Ko kunchieꞌen naa xii chunda chin lepra, ko xii mee bethuxin xa ngathexin kon Jesús ko ndachro xa:

—Suixin Nchana, ja̱ rinao, nchao sinchexruanna.

3Kuthimejan Jesús kuinxe raa ko kathe xii mee ko ndachro ngain xa:

—Jaan rinaꞌo, tuxruaꞌan.

Ko are Jesús ndachro jiꞌi bitjanbeꞌo chin lepra bechunda xa. 4Kuthimejan Jesús ndachro:

—Thiꞌin jian thi rundathjo; xruꞌin chujni thekiꞌin, jeꞌo thji ko tunchieꞌen ngain xi daana ixin sikon xa ixin jaꞌa ukuxruaꞌan, ko dajon ngain Ndo Dio inchin thetuꞌan ley bayée Moisés, ixin kain chujni te nthi̱ꞌa̱ tsunuꞌe na̱ ixin ukuxruaꞌan.

Jesús binchexrueꞌen xi nchexree naa xi capitán romano

(Lc. 7:1-10)

5Are Jesús juii ngain rajna Capernaum, naa xi capitán romano kunchieꞌen ko binchetseꞌen ñao Jesús 6ko ndachro xa:

—Nchana, naa xi ncheꞌe xrana niꞌi xa ko jitsingataꞌa xa saon ko chroꞌa thingi xa ko anto jithiin xa.

7Jesús ndachro:

—Jaꞌan tsji ko sinthaxruan xa.

8Ko xi capitán ndachro xa:

—Jaꞌan jikininxinꞌa na ixin suixin sixiꞌin nchiania, jeꞌo rinaꞌo thetuꞌan tsuxrueꞌen xi ncheꞌe xrana ko jeꞌe xa tsuxrueꞌen xa. 9Ixin jaꞌan kai dithikaꞌon xi chunda icha tsjé juachaxin ke jaꞌan, ko kai jaꞌan chunda juachaxin thetuan xi soldaduna, ko are jaꞌan ndathjan naa xa thji nujiꞌa, jeꞌe xa thji xa, ko are ndathjan inaa xa tsii xa, jeꞌe xa thii xa, ko are thetuan xi ncheꞌe xrana ncheꞌe jiꞌi, jeꞌe xa ncheꞌe xa.

10Are Jesús kuiꞌin jiꞌi, jeꞌe kuiseꞌen ko ndachro ngain chujni jidikao:

—Jaꞌan nduaxin rundathjo ra ixin nguixin nuntheꞌe Israel xruꞌin chujni bikon anto chunthia inchin xii jiꞌi. 11Jaꞌan rindathjo ra ixin tsjé chujni tsixin no thi chrinxin ko diataunxin nchaꞌon ko sinthe na̱ ngain Abraham, Isaac ko Jacob nthi̱ꞌa̱ ngajni thi thetuꞌan Ndo Dio. 12Aro tsjé chujni bikininxin rukji nthi̱ꞌa̱ thi thetuan Ndo Dio tsjiꞌa na̱ ixin Ndo Dio ruruaꞌan na̱ ngain thi naxin xeꞌe, nthi̱ꞌa̱ thi juxon rutsjanga na̱ ko sinetaon neno na̱.

13Kuthimejan Jesús ndachro ngain xi capitán:

—Sathji nchiandui ko tsuꞌen inchin jaꞌa bithikaon.

Ko xi ncheꞌe xree xi capitán kuxrueꞌen xa are juexin nichja Jesús.

Jesús binchexrueꞌen janchee Pedro

(Mr. 1:29-31; Lc. 4:38-39)

14Jesús kjui nchianduꞌa Pedro, ko nthi̱ꞌa̱ bikon janchee Pedro tajitsingataꞌa jan saon ixin sua. 15Are Jesús tseꞌe raa jan ndabachrjeꞌe jan sua ko bingathjen jan ko bajon jan juine na̱.

Jesús binchexrueꞌen tsjé chujni niꞌi

(Mr. 1:32-34; Lc. 4:40-41)

16Ko are undakunaxin xeꞌe, juiauꞌe na̱ Jesús tsjé chujni chunda espíritu jianꞌa, ko jeꞌo kuetuꞌan ko bengi kain espíritu jianꞌa, ko binchexrueꞌen kainxin chujni niꞌi kunchieꞌen ngain. 17Ko jaꞌin bikuenxin thi dindachro Isaías, thi bagayée juajnee Ndo Dio: “Jeꞌe kuama kain chiꞌan ná ko sabikao thi anto thiin ná.”

Thi chujni binao rugakao Jesús

(Lc. 9:57-62)

18Are Jesús bikon tsjé chujni ngandajin, jeꞌe kuetuꞌen chujni bakao ixin rugatho na̱ tuenxin nda Galilea. 19Ko kunchieꞌen naa xi tjaago ley ngain Jesús ko ndachro xa:

—Suixin thi dikjaago, jaꞌan rinaꞌo ruruaꞌa thi suixin sakji.

20Jesús ndachro:

—Kuntha chunda ba nchianduꞌe ba chringiꞌi thjao ko kunthua chunda ba kakee ba, aro jaꞌan, thi Xii juixin ngajni, chundaꞌa thinoo tsenkjon jana.

21Ko inaa chujni bakao ndachro:

—Nchana, saꞌo tajanda na tsji sikjabaa ndudana.

22Ko Jesús ndachro:

—Rueꞌna ko tanchrjanda chujni dithikaonꞌa na tsjabaa choo na̱.

Jesús kuenta chrintho ko nda jikjamangiathe

(Mr. 4:35-41; Lc. 8:22-25)

23Kuthimejan Jesús kunixin chujni bakao kuani na̱ naa ntha barko ko sakjuixin na̱ nthi̱ꞌa̱. 24Ko are utethji na̱ ngatauꞌen nda, kjua chrintho anto suji ko jinda kjamangiathe kuexiꞌin bikia nda ngain ntha barko, ko Jesús tajijua. 25Kuthimejan chujni jidikao Jesús binchexingameꞌe na̱ ko ndachro na̱:

—¡Nthatsaꞌan ra ñao, thjengijna ni ra!, ixin ntha barko ndajixinkanjingi ntha jinda.

26Jesús ndachro:

—¿Unda anto xraon ra? ¡Jaꞌa ra xro nchion chunthia ra!

Kuthejan Jesús bingathjen ko takuenta chrintho ko jinda jikjamangiathe. Ko kain xratao tabeꞌe. 27Ko kain ni bakao binthekiseꞌen na̱, ko ndachro na̱:

—¿Kensen xii jiꞌi, ixin chrintho ko jinda dithikaon thi ndachro xa?

Yoo xii bechunda espíritu jianꞌa ngain nunthe Gadara

(Mr. 5:1-20; Lc. 8:26-39)

28Are Jesús biji tuenxin nda Galilea ngain nunthe Gadara, yoo xii jidoꞌo espíritu jianꞌa binthegachrjexin ngayee thi texrabaa chujni ko binthekunchieꞌen xa ngain Jesús. Ko ixin anto chrintho binthe xa, xruꞌin chujni bagatho nuyaa. 29Ko binthekuyao xa suji:

—¿Unda juiꞌi ngajin ná, jaꞌa Jesús, Xeꞌen Ndo Dio? ¡Xra jeꞌa nchaꞌon ixin sinchegetan ni ra tangi!

30Ko nthi̱ꞌa̱ ridinthe tsjé kukuchi tenea ba. 31Ko kain espíritu jianꞌa binchetseꞌen ñao Jesús ko ndachro:

—Ja̱ santsjexin ni ra ngajin xii teꞌi, tanchrjanda ni ra sixiꞌin ná ngaxiꞌin kukuchi teꞌa.

32Jesús ndachro:

—Jaan, thji ra.

Ko kain espíritu jianꞌa bachrjexin ngain kayui xii mee sabixiꞌin ngain kain kukuchi ko kain ba kuinga ba ko kuanthjean ba thi yasuꞌe ko betsingangi ba jinda ko kjuꞌen ba nda.

33Ko chujni bakingaria kukuchi kjui na̱ ngain rajna ko bindachro na̱ kain thi kuꞌen ko kai kuekin na̱ thi kuꞌen kayui thi xii bechunda espíritu jianꞌa. 34Kuthimejan kain ni rajna binthekji na̱ thi jii Jesús ko are bikon na̱ Jesús binchetseꞌen na̱ ñao sarukjixin ngain nuntheꞌe na̱.

Currently Selected:

San Mateo 8: plsNT

Highlight

Copy