San Marcos 15

Jesús ngathexin kon Pilato

(Mt. 27:1-2, 11-14; Lc. 23:1-5; Jn. 18:28-38)

1Are ubingasaan kain xi daana baketuꞌan ngain icha xi daana, xi tjaago ley, kain ni thetuꞌan ngain rajna ko kain ni ncheꞌe jie̱ kjuathexin na̱ ixin kexreen sincheꞌe na̱, kuthimejan kuia na̱ Jesús ko bikao na̱ ngain Poncio Pilato. 2Ko Pilato banchiangiꞌi Jesús, ko ndachro:

—¿Ajaꞌa thi Rey ni judío?

Ko Jesús ndachro:

—Jaan, jañaa inchin jaꞌa ndachro.

3Ko kain xi daana baketuꞌan ngain icha xi daana anto tsjé bankataꞌa na̱ Jesús. 4Mexinxin Pilato kjan banchiangiꞌi Jesús inaa, ko ndachro:

—¿A ko xruꞌin rundachro jaꞌa? Thiꞌin kain thi jianꞌa tenichja na̱ ixin jaꞌa.

5Aro Jesús xruꞌin batheꞌe. Ko Pilato ibenueꞌa keꞌe ruxraxaon ixin Jesús.

Chujni banchia ixin Jesús seꞌen

(Mt. 27:15-31; Lc. 23:13-25; Jn. 18:38—19:16)

6Ko ngain kain kiai pascua Pilato bakanchrjanda naa thi teaxiꞌin ko ni rajna bakinchieꞌe kexeꞌe thi bakanchrjanda. 7Ko ngain nchaꞌon mee beꞌe ngaxiꞌin nduꞌa xiiso naa xii biꞌin Barrabás ko ikanxion chujnii, thi bintheguen chujni are baketukaꞌo na̱ ni romano. 8Ko are xrathe tsjé chujni, kuexiꞌin na̱ ndache na̱ Pilato ixin tsanchrjanda naa thi jiaxiꞌin, jañaa inchin kukuꞌen na̱ ngain kain kiai. 9Ko Pilato ndachro ngain na̱:

—¿Arinao ra tsanchrjanda thi jaꞌa ra nchegiꞌin ra Rey ni judío?

10Jañaa ndachro Pilato ixin jeꞌe benuꞌe ixin kain xi daana thetuꞌen icha xi daana kunchjueꞌe xa ngain Jesús, mexinxin juiauꞌe na̱ ngathexin kon. 11Aro kain xi daana baketuꞌan ngain icha xi daana ndache xa chujni ixin rundachro na̱ ngain Pilato ixin Barrabás thi sachrjexin nduꞌa xiiso. 12Kuthimejan Pilato ndachro ngain na̱:

—¿Keꞌe rinao ra sinthaꞌa jaꞌan ngain thi jaꞌa ra nchegiꞌin ra Rey chujni judío?

13Ko kain na̱ kuyao na̱ ko ndachro na̱:

—¡Thenganito ntha cruz!

14Kuthimejan Pilato ndachro ngain na̱:

—Aro, ¿keꞌe jianꞌa bincheꞌe?

Ko jeꞌe na̱ kjan na̱ ndachro na̱ suji inaa:

—¡Thenganito ntha cruz!

15Ko Pilato binao bithuꞌe jian ngain chujni, mexinxin bantsje Barrabás ko kuanchrjanda sakjui, ko kuetuꞌan ixin bintja na̱ Jesús. Kuthimejan Pilato bajon Jesús ixin kuenganito na̱ ntha cruz.

16Kuthimejan xi soldado sabikao xa Jesús ngain patiue nchianduꞌa Pilato ko baye̱e xa kainxin xi soldado. 17Ko kuentsaa xa Jesús naa luntho jatse suji, ko binchekjinga xa naa ntha nchaꞌa dintheka̱a̱ xa. 18Ko kjuanua xa ko ndachro xa suji:

—¡Thjengijna ni ra, jaꞌa thi thetuꞌen ni judío!

19Ko xrangii xa nthaa jaa, ko kjuanito xa ndathee xa, ko binthegethuxin xa ngain Jesús ixin runchesayeꞌe xa. 20Kuthimejan are juexin kjuanua xa, bantsjeꞌe xa luntho jatse binchetsaa xa ko binchengaa xa lunthue, ko sabikao xa ixin kuenganito xa ntha cruz.

Kuenganito xa Jesús ngain ntha cruz

(Mt. 27:32-44; Lc. 23:26-43; Jn. 19:17-27)

21Ko are tedachrjekauxin xa Jesús nthi̱ꞌa̱, betan xa naa thi xii kjanxin ngataon jngi ko binchekama xa ntha cruz, ko xii jiꞌi biꞌin Simón, ko dikixin xa rajna Cirene. Ko xii mee kjui ndudee Alejandro ko Rufo.

22Ko bikao xa Jesús ngain jna diꞌin Gólgota, ko jiꞌi ruchro Thi jii Nthaluro Jaa Chujni. 23Ko nthi̱ꞌa̱ binao xa runchegiꞌi xa Jesús vino jithekjan ndee ka diꞌin mirra, aro Jesús biꞌa vino mee. 24Kuthimejan are ukuenganito xa Jesús ngain ntha cruz, kain xi soldado tsuntaon xa ixin kensen rugithueꞌe lunthue Jesús.

25Jesús dakao benganito ntha cruz inchin a las nueve. 26Ko bakeꞌe na̱ naa thi dikji̱ntaꞌa thi jitaxin ixin unda kuenganito xa Jesús ngain ntha cruz, ko jaꞌin betaxin:

“Rey Chujni Judío.”

27Ko chrikee Jesús kai kuenganito xa ntha cruz yoo xi cheꞌe, naa xa beꞌe no rajianxiin Jesús ko inaa xa no rajngunxin. 28Ko jañaa bikuenxin thi jitaxin ngain Xruen Ndo Dio thi ndachro: “Ko guen na̱ inchin duen na̱ chujni ncheꞌe jianꞌa.”

29Ko kain ni bagatho nthi̱ꞌa̱ banchengithjen jaa na̱ ko banichja na̱ jianꞌa ixin Jesús, ko bandachro na̱:

—Jaꞌa thi ndachro ixin rukunxanthe niꞌngo icha renthe ko ngain nchaꞌon ninxin rukjan runchechjian niꞌngo inaa. 30¡Danianxin ntha cruz, ja̱ ndua jaꞌa Xeꞌen Ndo Dio!

31Ko kain xi daana baketuꞌan ngain icha xi daana ko xi tjaago ley, kjuanua xa Jesús ko ndachro xa:

—Jeꞌe nchao kjuengijna icha chujni, aro jeꞌe chroꞌa danianxin ntha cruz. 32Ja̱ ndua jeꞌe thi Cristo ko thetuꞌen ni judío, ncho dañianxin ntha cruz ko suthikaon ná jeꞌe.

Ko kayui thi xii beꞌe nganito ntha cruz kjuanua xa Jesús.

Beꞌen Jesús

(Mt. 27:45-56; Lc. 23:44-49; Jn. 19:28-30)

33Ko ngusine nchaꞌon kuexiꞌin kunaxin xeꞌe nguixin nunthe ko batho nii hora ko xra naxin xeꞌe beꞌe. 34Ko a las tres Jesús kuyao suji, ko ndachro:

—Eloi, Eloi, ¿lama sabactani? —ko jiꞌi ruchro: Diuna, Diuna, ¿unda ndakuinthuna jaꞌon?

35Ko kanxion ni te nthi̱ꞌa̱ kuiꞌin na̱ mee ko ndachro na̱:

—Thiꞌin ra, xii mee jidaye̱e xa Elías.

36Ko naa thi xii jii nthi̱ꞌa̱ kuinga biruee naa thi datse jinda inchin chjon, ko xrangi xa vinagre ko kuenkjin xa kon naa nthaa ko chjee xa Jesús ixin rugiꞌi, ko ndachro xa:

—Chuꞌen ra. Sukon ná ako tsii Elías ixin sinchegania.

37Aro Jesús kuyao suji, ko ndabeꞌen. 38Ko are mee thi manta bethua ngaxiꞌin niꞌngo icha renthe, nui kuexinxin bichjenga nguii manta. 39Ko xi thetuꞌan naa renkia xi soldado tajitsjeꞌe thi jii Jesús, ko are bikon kexreen beꞌen, jeꞌe ndachro:

—Jaan, ndua xii jiꞌi Xeꞌen Ndo Dio.

40Ko nthi̱ꞌa̱ kai beꞌe kanxion nchrii ko kjínxin tatetsjeꞌe nchra thi jituꞌen. Nthi̱ꞌa̱ ngain nchra beꞌe María Magdalena, Salomé ko María, thi janee Jacobo ko José. 41Ko nchrii teꞌi kai baruee nchra Jesús ko bayakuꞌen nchra jeꞌe are beꞌe ngain nunthe Galilea. Kai beꞌe kanxion ni nchrii ruee jeꞌe are kjui ngain rajna Jerusalén.

Xrabaa Jesús

(Mt. 27:57-61; Lc. 23:50-56; Jn. 19:38-42)

42Ko mee kjui viernes tsukjin, thi nchaꞌon bancheꞌe na̱ kain ixin bachuꞌen na̱ thi nchaꞌon banchejugaꞌa na̱. 43Mexinxin jaikua juii naa xii biꞌin José thi juixin rajna Arimatea, ko xraonꞌa kunchieꞌen ngain Pilato ko banchia Jesús. Ko José kjui naa xii bechunda jié juachaxin ngakjan ni ncheꞌe jie̱, ko kai jichuꞌen thi nchaꞌon tsetuꞌan Ndo Dio. 44Pilato anto kuiseꞌen are kunuꞌe ixin Jesús beꞌen, mexinxin ruaꞌan xi capitán ixin biganchiangi xa a ko ndua ndabeꞌen Jesús. 45Ko are xi capitán ndachro xa ixin ndua undabeꞌen Jesús, Pilato bajon juachaxin ngain José ixin nchao sarugikao Jesús. 46Kuthimejan José bincheganianxin Jesús ngain ntha cruz ko kuensia naa manta dikeꞌna, ko bikaan ngain naa chinthi dikunchjian ngadoꞌo naa jna. Kuthimejan jeꞌe kuejee chinthi kunixin naa xro jié. 47Ko María Magdalena ko María janee José bikon na̱ thinoo xrabaa Jesús.

Currently Selected:

San Marcos 15: plsNT

Highlight

Copy