San Marcos 16

Xechon Jesús

(Mt. 28:1-10; Lc. 24:1-12; Jn. 20:1-10)

1Ko are ubatho nchaꞌon nchejugaꞌa na̱, María Magdalena, Salomé ko María janee Jacobo, dikeꞌna na̱ naa nda xruan anto xrajni ixin rukinga na̱ nthauꞌe Jesús. 2Ko nchaꞌon domingo, thi nchaꞌon thexinxin semaana, juii na̱ ngain chinthi are uchriꞌin nchaꞌon. 3Ko thinga tendache choo nchra ngatja nthiꞌá:

—¿Aro kensen sinthjian na̱ xro jié jijexin chinthi?

4Ko are bintheji nchra, binthegikon nchra ixin thi xro anto jié udikingi xro. 5Ko are binthexiꞌin nchra thi jii chinthi, nthi̱ꞌa̱ bikon nchra naa xan xii no rajianxin thi beꞌe Jesús, ko lunthue xan rua ko jini luntho. Ko jeꞌe nchra binthexraon nchra. 6Aro xan xii ndachro xan ngain nchra:

—Xraonꞌa ra. Ununa ixin tethjee ra Jesús thi juixin rajna Nazaret, thi kuenganito na̱ ntha cruz. Aro jeꞌe uxechon ko ikoꞌa nthiꞌi. Tsjexin ra thi beꞌe. 7Anchee thji ra ngain ni bakao Jesús, ko ngain Pedro, ko ndache ra na̱: “Jesús jitauꞌan ra nthiꞌá ixin tsji ra ngain nunthe Galilea. Ko nthi̱ꞌa̱ sikon ra jeꞌe, jañaa inchin ndathjo ra.”

8Ko jeꞌe nchra tethinga nchra sakjuixin nchra ngain chinthi ixin anto texranga nchra ixin binthexraon nchra. Ko ixin anto binthexraon nchra, mexinxin ixruꞌin kensen ndache nchra thi binthekuꞌen nchra.

Jesús kununxiꞌin María Magdalena

(Jn. 20:11-18)

9Kuthimejan are uxechon Jesús ngain thi nchaꞌon thexinxin semaana, jeꞌe kununxiꞌin María Magdalena, nchri kuxrueꞌen ixin Jesús are bachrjeꞌe nchra thi yaato espíritu jianꞌa bechunda nchra. 10Ko jeꞌe María Magdalena kjui binchenuꞌe ni bakao Jesús, aro ni teꞌi tetsjanga na̱ ko techiin na̱ ixin Jesús. 11Ko are kuiꞌin na̱ ixin Jesús jichon, jeꞌe na̱ bithikaonꞌa na̱.

Jesús kununxiꞌin yoo chujni bakao

(Lc. 24:13-35)

12Kuthimejan Jesús kununxiꞌin iyoo chujni bakao, ko ni teꞌi teyaa na̱ nthiꞌá satethji na̱ ngataon jngi, aro jeꞌe na̱ xrabatsuanꞌa na̱. 13Kuthimejan kayui ni teꞌi kjui na̱ ko ndachro na̱ ngain ni icha thi kuꞌen, aro ni icha xra bithikaonꞌa na̱.

Jesús kuetuꞌan thi sincheꞌe ni apóstol

(Mt. 28:16-20; Lc. 24:36-49; Jn. 20:19-23)

14Ko Jesús juexinxin xraago ngain ni thejngo bakao, are tene na̱ ngain nthanchaon. Ko jeꞌe binchesatheꞌe na̱ ixin bithikaonꞌa na̱ ko atho cha thinxin na̱, ixin bithikaonꞌa na̱ thi ndachro chujni bikon jeꞌe ixin uxechon. 15Kuthimejan Jesús ndachro ngain na̱:

—Thji ra nguixin nunthe ko ndache ra kainxin chujni thi jian juajna. 16Ko thi chujni sithikaon ko sigithe, rukjan inaa chujni narua ko xruꞌin nchaꞌon tsjexin. Aro thi chujni sithikaonꞌa, Ndo Dio sincheꞌe na̱ jie̱. 17Ko jiꞌi sincheꞌe chujni sithikaon na na̱ jaꞌan: Santsjexin na̱ espíritu jianꞌa ngain chujni kunixin juachaxinna runichja na̱ inaa ngigua, 18raa na̱ rutsexin na̱ kunchee ko ja̱ siꞌi na̱ chrujan xruan naduenxon chujni, xruꞌin tsuꞌen na̱, ko kai tsentaꞌa raa na̱ ngataꞌa chujni niꞌi ko tsuxrueꞌen na̱.

Jesús sakuajiin ngajni

(Lc. 24:50-53)

19Ko are Nchaa ná Jesús juexin nichjee na̱, jeꞌe sakuajiin ngajni ko beꞌe no rajianxiin Ndo Dio. 20Ko chujni bakao Jesús, kjui na̱ nguixin nunthe ko kjuaago na̱ thi jian juajna. Ko Jesús bakjengijna na̱ ngain xra bancheꞌe na̱, ko baxraago ngain juajna thi naꞌa bagikunxin chujni bancheꞌe ni teꞌi.

Currently Selected:

San Marcos 16: plsNT

Highlight

Copy