Hechos 11

Pedro nixje̱he̱ ti sin tjejó Jerusalén

1Ndá ti sin tsíkjeyá Ìnchéni la ko kaín ti sin tinkáchónki ti jehe chꞌan kꞌuejó Judea mé kuíhin sin kixin ti sin jehya judío la ó kjuankíxin tihin sin itén Díos. 2Méxra̱ ti ó kja̱nxi̱n chꞌin Pedro Jerusalén, la iso ti sin judío tinkáchónki Ìnchéni na̱xa̱ titekaon sin kixin kaín chojni chrókua xro̱ye, la ikjo sin chꞌan 3la ndáchro sin:

―¿Nkekuènté kjuitsjehé ti sin jehya judío, la ko kjóntekoá sin? ―ichro sin.

4A̱ndá chꞌin Pedro kjuankíxin chrónka chꞌan ndesi xránkíxixín kaín ti nkehe kóhen. La ndáchro chꞌan:

5―Janhan kjuakꞌé chjasin Jope la na̱xa̱ tjénixja̱ha̱ Díos la Ncha̱kuén Díos kꞌuíko̱xian ijnko ika ijié kꞌuínkaji̱nxi̱n nka̱jní. La kanoé punté ti ika la tjejóte̱ la ikui hasta ti itjén. 6Ndá tsjaha̱ jína la kꞌuíkua̱n tjinká itsjé iko; iko chónta noó to̱té, iko nte̱je̱, la ko ti iko xritjaká. 7La kui̱ha̱n itén ijnko nkexro ndáchro: “Pedro, tꞌínkatjen, tꞌoñá ti iko la inte.” 8Ndá janhan, ndáxrja̱n: “Náhí, Ìnchéni. Niehñani ti nkehe tjuáhya.” 9A̱ndá ti itan kui̱xi̱n nka̱jní la ndáchro: “Ti nkehe kjuínchetjóá Díos la ndáchrohya kixin tjuáhya.” 10Mé xi̱kaha kóhen iní vece. Ndá kaín sákjui̱ nkaya nka̱jní ínaá. 11A̱ndá tuénxín kjuíji iní chojni ti nchia itjén janhan. Tsíkji̱xi̱n sin Cesarea xritjeyá sin ti janhan. 12A̱ndá ti Ncha̱kuén Díos mé kꞌue̱to̱an kixin sáchrókjuiki̱a̱n sin la chrókóxakonahña. Kja̱xin sákjuiki̱a̱n injon sin kíchóni tjejó ntihi, la kaíni kꞌuíxeheni ndo̱e ti nkexro a. 13A̱ndá ti nkexro a mé chronka kixin ikui ijnko ángel ti ndo̱e chꞌan la ndáchro: “Tétue̱hén ijnko nkexro sátsji chjasin Jope tsjikakjín ti nkexro itꞌin Simón, mé kja̱xin itꞌin Pedro. 14Jehe chꞌan mé tsonixja chꞌan tsochronka chꞌan nkexrín tsaá jaha la ko kaín ti sin tjejó ndo̱a.” 15Ndá na̱ntá kjuankíxian níxja la tuénxín ikui ti Ncha̱kuén Díos kꞌuáyéhe̱ sin éxi kꞌuáyéhe̱ni ti xránkíxixín. 16#Hch. 1:5.*Ndá xráxinka̱oan ti nkehe níxja Ìnchéni, ndáchro: “Chaxín chꞌin Juan la ìnta̱ kui̱ki̱texín chojni, a̱ndá jahara la Ncha̱kuén Díos tsikitiaxínra.” 17A̱ndá ti kjuajon Díos kjuachaxin kꞌuáyéhe̱ sin ti ncha̱kuén chꞌan éxi kꞌuáyéhe̱ni ti ó kuitekaoni Ìnchéni Jesucristo la, ¿xá nkexro ti janhan kixin chrókꞌuinkakoha̱n ti nkehe tjinkaon Díos? ―ichro chꞌin Pedro.

18A̱ndá ti ó kuíhin sin kaín ti nkehe kóhen la tání sin la chjéhe sin Díos kjuasáye. Ndáchro sin:

―Díos kjuajon kjuachaxin kixin kja̱xin ti sin jehya judío kꞌuáyéhe̱ kjuachaxin kixin tsinkáchónki sin chꞌan la ko tsochónta sin ti kjuachón nkochríxín ―ichro sin.

Ti ni̱nko itjen Antioquía

19 # Hch. 8:1-4. *Ti ó ikꞌuén chꞌin Esteban, ndá ti sin nínkaon la kjuankíxin chréhe̱ sin ti sin tinkáchónki Ìnchéni kixin tsꞌóñá sin. Ndá xi̱kaha iso sin sákjuí sin chjasin Fenicia la ko Chipre nko̱siñe nda̱ñao la ko Antioquía. La ntiha kjua̱ko̱he̱ sin jehó ti chojni judío nkexrín itjen ti itan jína. 20Kjánchó íso sin tinkáchónki Ìnchéni tsíkji̱xi̱n chjasin Chipre la ko Cirene sákjuí sin Antioquía. La ti ó kꞌuejó sin ntiha la kjua̱ko̱he̱ sin ti sin jehya judío nkexrín itjen ti itan jína kuènté Ìnchéni Jesucristo. 21La ti kjuachaxin kuènté Ìnchéni kꞌuéjóko sin; la nchónhña ti sin kuíhin ti itan jína kuíto̱he sin ti nkehe kꞌuékinkáchónki sin la kuitekaon sin Ìnchéni Jesús.

22Ndá ti ó kuíhin ti sin tinkáchónki Ìnchéni tjejó Jerusalén ti nkehe kóhen Antioquía, la ichrꞌán sin chꞌin Bernabé sákjuí ntiha. 23Ndá ti ó kjuíji chꞌan ntiha la kꞌuíkon chꞌan kixin imá kjuínki̱tsa Díos ti jehe sin kja̱xin. La imá kóchéhe̱ chꞌan, la nixje̱he̱ chꞌan sin kixin kaín a̱sén sin tsinkáchónki sin Ìnchéni. 24Chꞌin Bernabé mé ijnko nkexro jína a̱sén la chónta ti kjuachaxin kuènté Ncha̱kuén Díos la jína kuitekaon chꞌan Ìnchéni; ndá xi̱kaha itsjé chojni kuitekaon Ìnchéni.

25A̱ndá chrꞌéxi̱n la chꞌin Bernabé sákjuí Tarso, sákjuikjeyá chꞌan ti chꞌin Saulo. 26Ndá ti ó kꞌuitja chꞌan la sákjui̱ko chꞌan Antioquía. La ntiha kꞌuéjóko sin ti sin tinkáchónki Ìnchéni kuenté ijnko nánó la kjua̱ko̱he̱ sin itsjé chojni. Ti chjasin Antioquía mé ti xránkíxixín kuikitexín ti sin kuitekaon Cristo chojni cristiano.

27Ti ña̱o a la iso ti sin chronka itén Díos la kꞌuaxrjexín sin Jerusalén la sákjuí sin Antioquía. 28#Hch. 21:10.*A̱ndá ijnko ti nkexro itꞌin Agabo kjuákꞌexín to̱té ti tónkotsé kaín ti sin tinkáchónki Jesús la kjuachaxíen Ncha̱kuén Díos chrónkaxín chꞌan kixin tso̱kjinta nkuíxín ntiha. La xi̱kaha kóhen éxi ti chrónka chꞌan ti ó kꞌue̱to̱an ti emperador Claudio. 29A̱ndá ti sin tinkáchónki Ìnchéni tjejó Antioquía la kjuénka̱yáxin sin tsjinki̱tsa sin ti sin tinkáchónki Ìnchéni tjejó Judea. La nkojnko sin kjuajon sin ti nkehe chónta sin. 30Ndá xi̱kaha kaín ti nkehe kjuenájín sin la sákjui̱ko chꞌin Bernabé la ko chꞌin Saulo chjéhe ti sin tꞌayakohen ti ni̱nko itjen Judea.

Currently Selected:

Hechos 11: poeNTplus

Highlight

Copy