Hechos 3

Kuíto̱he jína ijnko nkexro xitjahya itji

1Ijnko ña̱o chꞌin Pedro la ko chꞌin Juan mé sákjui̱ sin ni̱nko, ijnko las tres kójín, ti hora chjéhe sin Díos kjuasáya. 2A̱ndá chjina ntiha mé kjuákꞌe ijnko chojni tsíkokjíexíen xrokjuahya itji. Mé kaín ña̱o tjiko sin chꞌan ti ni̱nko ti puerta itꞌin Ndója Náxrjón kixin tsjanchakꞌéhe chꞌan ti sin tsjiji ni̱nko. 3Ti kꞌuíkon chꞌan kixin kjuíji chꞌin Pedro la ko chꞌin Juan ti ni̱nko, la kjuanchakꞌá chꞌan. 4Ndá chꞌin Pedro la ko chꞌin Juan la komá sin ti nkexro a, la chꞌin Pedro ndáchro:

―Tsjehé ntihi.

5Landá ti nkexro a, tsjehe jína kixin áchꞌe tsjajon sin ichrén nkehe, 6kjánchó chꞌin Pedro ndáchro:

―Chontahya plata la ko oro tsotjahá, kjánchó ti nkehe chonta la tsotjahá. Kjuachaxin ihni̱é Jesucristo, tsíkji̱xi̱n Nazaret, la tꞌínkatjen, la itjia.

7Ndá itsé chꞌin Pedro ti itja chjina ti nkexro a, la kꞌuínkatjen chꞌan la kósóji ti ntantoá to̱té chꞌan. 8Ndá kjuixichríká chꞌan la kjuákꞌexín chꞌan to̱té chꞌan, la kjuankíxin ikjuí chꞌan; ndá kꞌuixenko sin chꞌan ni̱nko, la tetjixin chꞌan to̱té chꞌan, chrika chꞌan chjéhe chꞌan Díos kjuasáya. 9Ndá ti ó kꞌuíkon kaín chojni siín ntiha kixin ó tetji chꞌan la ko chjéhe chꞌan kjuasáya Díos, 10la imá chrákon sin kixin xi̱kaha kóhen kixin ó chóxin sin ti nkexro kjuákꞌetja̱xi̱n kjuanchakꞌá ndója ti ni̱nko itꞌin Ndója Náxrjón.

Chꞌin Pedro nixje̱he̱ ti chojni kónkotsé

11A̱ndá ti nkexro xrokjuahya kꞌuékji la títo̱ehya chréhe̱ ti chꞌin Pedro la ko Juan. La kaín ti chojni la chrákon sin la kuinká sin sákjuitsjehe sin ti nda̱sin kuènté ni̱nko itꞌin nda̱sin kuènté Salomón kixin ntiha tjejó ti sin a. 12Ndá ti kꞌuíkon chꞌin Pedro xi̱kaha la ndáchro chꞌan:

―Jahara chojni israelita, ¿nkekuènté chrakonra la ko komára ti jeheni? ¿Á tjénka̱yáxinra kixin jehóni kjuínchekito̱heni jína ti nkexro i kixin imá chóntani kjuachaxin ní? 13#Ex. 3:15.*Náhí. Ti Díos kꞌuékitekaon Abraham, Isaac la ko Jacob mé chjéhe kjuachaxin ti Xje̱en chꞌan Jesús. Kjánchó jahara tsíkjiko̱ara chꞌan ti kꞌuejó ti sin tꞌe̱to̱an. La chꞌin Pilato tjinkaon chrókꞌuatjánta ti chꞌin Jesús, kjánchó jahara kotjinkákonhñara 14#Mt. 27:15-23; Mr. 15:6-14; Lc. 23:13-23; Jn. 19:12-15.*kixin chrókꞌuatjánta sin sáchrokjui ti nkexro tjóá la ko jína, la kjuanchiara kixin tsꞌatjánta sin ijnko ti chojni tjasin itsjé ijie̱, 15la xi̱kaha kꞌo̱ñára ti nkexro tjajon kjuachón. Kjánchó Díos kjuínchexechón chꞌan ti nkexro ikꞌuén la xi̱kaha kꞌuíkoni la chronkani. 16A̱ndá ijie kjuachaxíen ihni̱é ti Jesús tinkáchónkini, mé kuito̱exín jína ti nkexro tꞌikonra la ko choxínra. Kuíto̱he chꞌan jína kixin kuitekaon chꞌan ti chꞌin Jesús.

17’Kíchóni ó nona kixin jahara la ko ti sin tꞌe̱to̱an la noahñara nkehe tjejochꞌera ti kꞌo̱ñára ti chꞌin Jesús. 18Kjánchó xi̱kaha xiteyá ti nkehe tsíkꞌe̱to̱an Díos tsínixja̱xi̱n ti sin kꞌuéchronka ti itén chꞌan kixin ti Cristo la ticháxi̱n tsjasóte. 19Méxra̱ ijie la chrókjanra chrókuinkachónkira Díos, ndá tsoxika ti iji̱ára la Ìnchéni mé tsjajon chꞌan kjuaxróxin. 20A̱ndá Díos mé tsochrꞌán chꞌan ti Ìnchéni Jesucristo ínaá éxi tsíkjenka̱yáxin chꞌan ósé kixin xi̱kaha tsjinki̱tsa chꞌan ti jahara. 21Kjánchó ijie la nkaya nka̱jní ó tsjakꞌe Ìnchéni Jesucristo hasta tsjasiyóxinjña Díos kaín nkehe éxi tsínixja̱xi̱n ti sin kꞌuéchronka itén Díos ósé. 22#Dt. 18:15, 18.*Moisés tsíchenka ti sin kꞌuaxrjeníxini: “Ìnchéni Díos mé tsochrꞌán chꞌan ijnko nkexro tsꞌaxrjéníxinra tsochronka chꞌan itén Díos éxi janhan. A̱ndá jahara la ticháxi̱n tsihínra kaín ti nkehe tsochronka ti nkexro a. 23#Dt. 18:19.*A̱ndá ti nkexro tsitekakonhña ti nkehe nixja chꞌan, la tsꞌitjáña sin la tsꞌaxrjexín sin ti chjasin Israel.”

24’Ndá kaín ti sin kꞌuéchronka itén Díos kjuankíxixín ndesi Samuel la ko kaín ti sin ikui chrꞌéxi̱n mé chrónka sin ti nkehe tso̱hen ti ña̱o i. 25#Gn. 22:18.*Jahara mé xje̱en ti sin kꞌuéchronka itén Díos kꞌuejó ósé, la ti nkehe tsíndáchro Díos tso̱hen, tsínixja̱xi̱n chꞌan ti sin kꞌuéchronka itén chꞌan, la kaín tíha tso̱hen ijie kixin chrókꞌuejora jína. Díos mé tsíkjajon kjuachaxin ni̱xin kꞌuáyéhe̱ ti sin tsíkꞌaxjeníxinra éxi tsíndáche chꞌan Abraham ósé: “Kaín chojni siín chjasintajni mé tso̱ñao sin kixin ti nkexro tsꞌaxrjéníxian.” 26Ti ó kjuínchexechón Díos ti Xje̱en chꞌan la senó ichrꞌán chꞌan ti tjejora kixin chrókjuincheñao chꞌan ti jahara kixin nkojnkora la chrókui̱to̱héra ti nkehe jínahña tjejochꞌera ―ichro chꞌin Pedro.

Currently Selected:

Hechos 3: poeNTplus

Highlight

Copy