Hechos 4

Pedro la ko Juan kꞌuejó nkayakon ti sin tꞌe̱to̱an

1A̱ndá chꞌin Pedro la ko Juan na̱xa̱ nixje̱he̱ sin ti sin tsíkónkotsé ntiha, la xrína̱hña ikui ti sin ncha̱tꞌá la ko ti nkexro tꞌe̱tue̱hen ti sin soldado kuènté ti ni̱nko la ko ti sin saduceo. 2Jehe sin la imá kónínkaon sin kixin chꞌin Pedro la ko Juan mé kjua̱ko̱he̱ sin ti chojni tsíkónkotsé ntiha kixin jína tsoxechón ti chojni tsíkꞌen kixin chꞌin Jesús la xechón. 3Ndá itsé sin ti chꞌin Pedro la ko Juan la sákjuíko sin kꞌuejóchjina sin, la ntahó kꞌuejó sin kuenté tie kixin ó ndá kóntó. 4Kjánchó itsjé ti sin kuíhin ti itan ni̱xin la kuitekaon sin. La kaín ti chojnindoa kuitekaon Ìnchéni ti ña̱o a, mé inꞌó mil chojni.

5A̱ndá ti ña̱o chrꞌéxi̱n mé kónkotsé ti sin tꞌe̱to̱an kuènté ti sin judío la ko ti sin tjako ley ti chjasin Jerusalén. 6Mé kja̱xin ntiha kjuákꞌe ti ncha̱tꞌá imá tꞌe̱to̱an Anás, la ko Caifás, Juan, Alejandro la ko kaín ti chojni kjéhya ti ncha̱tꞌá tꞌe̱to̱an. 7Ndá kꞌue̱to̱an sin kixin tsíxrakoa chꞌin Pedro la ko Juan. Ndá kaín ti sin kꞌuejó ntiha la kjuanchankí sin ndáchro sin:

―¿Nkexro kjuajon kjuachaxin o̱ ihni̱é nkexro tjejochꞌexínra tíhi?

8Ndá chꞌin Pedro imá chónta kjuachaxíen Ncha̱kuén Díos kjuáte̱he ndáchro:

―Jahara chojni tꞌe̱to̱an kuènté chjasin la ko jahara chojni táda kuènté Israel, 9jahara tjanchankíra nkexrín kuito̱he jína ijnko chojni xitjahya itji. 10Tihínra jína kaínra, jahara chojni Israel kixin tso̱nohara kixin ti nkexro itjen ntihi la kjuachaxíen ihni̱é Jesucristo, ti nkexro tsíkji̱xi̱n Nazaret, mé kuíto̱exín chꞌan jína; ti nkexro a kjuakénka̱nira ijnko ntacruz, kjánchó Díos mé kjuínchexechón chꞌan. 11#Sal. 118:22.*Jesús mé ti ixro̱ náxrjónhña tsíki̱to̱héra ti ó kjui̱chꞌénara tja̱tꞌo̱, a̱ndá ijie mé kꞌóna ti ixro̱ tjetoan. 12Kohya íjnko nkexro chónta kjuachaxin tsaáxin chojni kixin kjuajonhña Díos íjnko ihni̱é chojni ntihi chjasintajni tsinkáchónkini ndá tsaáni ―ichro chꞌin Pedro.

13Ti sin tꞌe̱to̱an mé ti ó kꞌuíkon sin kixin Pedro la ko Juan la chrákonhña sin, nixja sin kaín a̱sén sin, la ko nohe sin kixin ti sin a la jehya chojni nohe xroon la ko tjetuanhña sin. Ndá imá chrákon ti sin tꞌe̱to̱an kixin kónohe sin kixin ti sin a la kꞌuájiko Jesús. 14Kja̱xin ti nkexro tsíkito̱he jína la ntiha tjejóko sin. Méxra̱ í xrokjuahya kjuanchia sin ijie̱. 15Ndá ti sin tꞌe̱to̱an la kꞌue̱to̱an kixin tsꞌaxrje ti sin a ndója, ndá jehó sin kjuénka̱yáxin sin. 16La ndáchro sin:

―¿Xá nkehe sichꞌeheni ti sin a? Kaín chojni Jerusalén nohe kixin Díos kjuínki̱tsa ti jehe sin, la kjua̱ko̱xi̱n sin ti kjuaxroan ijié, a̱ndá jeheni la xrokjuahya tsondáchroni kixin chaxínhña tíha. 17Kjánchó í tjinkakonhñani kixin na̱xa̱ tsochronka sin tíha; méxra̱ sinchechrákoni sin kixin í tsochenkahya sin íso chojni ti ihni̱é Jesús ―ichro sin.

18Ndá kꞌuéye̱he̱ sin ti sin a ínaá ndá kꞌue̱tue̱hen sin kixin í tsonixjahya sin ninkehó ti ihni̱é Jesús la ko í tsja̱ko̱xi̱nhña sin ti kjuachaxin kuènté chꞌan. 19A̱ndá chꞌin Pedro la ko Juan kjuáte̱he ndáchro:

―Tjénka̱yáxinra jína, ¿á chrókóxríhi̱n Díos kixin chrókjuínchexiteyáni ti nkehe této̱anra o̱ ti nkehe tꞌe̱to̱an chꞌan? 20Jeheni la xrokjuahya tsíto̱heni tsochronkani ti nkehe kꞌuíkoni la ko ti nkehe kuíhini ―ichro sin.

21A̱ndá ti sin tꞌe̱to̱an la na̱xa̱ jie̱he kꞌue̱to̱an sin kixin í tsjakohya ti sin a kuènté chꞌin Jesús, ndá kjuajon sin kjuachaxin sákjuí sin kixin kꞌuitjahya sin nkexrín chrókjuasóte ti sin a, kixin kaín ti sin chjasin la chjéhe sin Díos kjuasáya kixin ti kjuaxroan kꞌuíkon sin 22kixin ti nkexro kuito̱he jína la ó cuarenta nánó xi̱kaha kjuákꞌe.

Ti sin chréhe̱ chꞌin Jesús nixje̱he̱ sin Díos

23A̱ndá chꞌin Pedro la ko Juan ti ó kꞌuaxrjexín sin ntiha la sákjuí sin ti tónkotsé ti iso sin la chrónka sin kaín ti nkehe kꞌue̱to̱an ti sin ncha̱tꞌá la ko ti sin táda. 24#Ex. 20:11; Neh. 9:6; Sal. 146:6.*Ndá ti ó kjuixin kuíhin ti sin kónkotsé, la kaín sin chjéhe sin Díos kjuasáya, ndáchro sin:

―Ìnchéni, jaha kjui̱chꞌéna nka̱jní la ko chjasintajni la ko nda̱ñao la ko kaín ti nkehe siín. 25#Sal. 2:1, 2.*La ti kjuachaxin kuènté ti Ncha̱kuán nixjaxi̱n David, ti nkexro kjuítꞌaha ixra̱, ndáchro:

¿Nkekuènté kónínkaon kaín ti chojni siín kaín nación

la ko tjenka̱yáxin sin nkehe ninkehó sínkíhya?

26Ti rey siín chjasintajni la ko kaín ti sin tꞌe̱to̱an kónkotsé sin

la nínkakohen sin Ìnchéni la ko Cristo.

27 # Lc. 23:7-11; Mt. 27:1, 2; Mr. 15:1; Lc. 23:1; Jn. 18:28, 29. *’Kixin chaxín Herodes, Poncio Pilato la ko ti chojni tsíkji̱xi̱n ókjé, la ko ti sin israelita mé kónkotsé sin la kónínkakohen sin ti Xja̱an Jesús, ti nkexro tsíkjéyá kixin sitꞌaha ixra̱. 28Ndá xi̱kaha kjuínchexiteyá sin ti nkehe kjuénka̱yáxian ósé. 29Méxra̱, Ìnchéni, ijie tsjehé nkexrín imá jie̱he tꞌe̱to̱an ti sin i, kixin í tsonixjahyani. Tjínki̱tsani kixin jína sitꞌahani ixra̱ la tsochrakonhñani tsochronkani ti itan. 30La tjáko̱xián ti kjuachaxin kuèntá la nchekito̱he jína ti chojni níhi la ko tjáko̱xián kjuaxroan kjuachaxíen ti ihni̱é Jesús, ti nkexro tsíkjéyá ―ichro sin.

31Ndá ti ó kjuixin nixje̱he̱ sin Díos, la ti tjejó sin la kꞌuínki nonte. Ndá kaín sin kꞌuáyéhe̱ sin kjuachaxíen ti ncha̱kuén Díos la chrákonhña sin chrónka sin ti itén Díos.

Nkexrín kꞌuejó ti sin kuékꞌajiko chꞌin Jesús

32 # Hch. 2:44, 45. *Kaín ti chojni kuitekaon chꞌin Jesús la nkoko̱a kjuénka̱yáxin sin. La ninkexró ndáchrohya kixin jehó kuènté ti nkehe siín. Náhí. Kaín sin kuènté sin tíha. 33A̱ndá ti sin kꞌuájiko Ìnchéni mé kaín a̱sén sin chrónka sin kixin xechón Ìnchéni Jesús la Díos a̱ntsí kjuíncheñao kaín ti jehe sin, 34la kohya ninkexró nóa ti tjejó sin ntiha kixin kaín ti sin chónta no̱nte̱e o̱ ndo̱e la kjuínchekji sin tíha la kjui̱ka̱o sin ti chichaon 35la chjéhe sin ti sin kꞌuájiko chꞌin Jesús. La ti sin a, mé kꞌóxika̱ye̱he sin ti chichaon a kaín ti sin chóntahya. 36Mé xi̱kaha kjuíchꞌe ijnko chꞌin levita itꞌin José, tsíkji̱xi̱n chꞌan Chipre nko̱siñe nda̱ñao; la ti sin tsíkjeyá chꞌin Jesús mé kjuínchekꞌin sin Bernabé, mé tíha la tꞌaxrjexín: “Ijnko nkexro nchechéhe̱ a̱sén chojni.” 37Jehe chꞌan mé kjuínchekji chꞌan ti no̱nte̱e chꞌan la kjui̱ka̱o chꞌan kaín ti chichaon, chjéhe chꞌan ti sin kꞌuájiko chꞌin Jesús.

Currently Selected:

Hechos 4: poeNTplus

Highlight

Copy