Hechos 7
7
Ti nkehe chrónka chꞌin Esteban
1Ndá ti ncha̱tꞌá tꞌe̱to̱an kjuanchankíhi ndáchro:
―¿Á chaxín kaín ti nkehe ichro sin ní?
2 #
Gn. 12:1. *Ndá Esteban ndáchro:
―Kíchóni la ko jahara itꞌé xjan, tihínra ti nkehe tsondáxrja̱n. Ti Díos kuènténi chónta kaín kjuachaxin mé kjua̱ko̱xi̱n ti kjuachaxin kuènté chꞌan ti nixje̱he̱ chꞌin Abraham, ti nkexro kꞌuaxrjeníxini, ti kjuákꞌe chꞌan Mesopotamia, ti na̱xa̱ sákjuihya chꞌan Harán. 3La tsíndáchro chꞌan: “Tito̱hé ti chjasán la ko kaín ti nkexro kjéhya, la sátjia ti nonte tso̱xrja̱nka.” 4#Gn. 11:31; Gn. 12:4.*Ndá xi̱kaha kꞌuaxrjexín chꞌan ti nonte Caldeo la sákjuí chꞌan Harán la ntiha kjuákꞌe chꞌan. La ti ó ikꞌuén ti itꞌé chꞌan, ndá Díos kjui̱ka̱o chꞌan ntihi ti tjejora ijie. 5#Gn. 12:7; 13:15; 15:18; 17:8.*La kjónté xi̱kaha la chꞌin Abraham la kuákjahya nítꞌo̱ nonte, hasta ni ti chrókjuákꞌe to̱té chꞌan. Kjánchó Díos chrónka kixin chrꞌéxi̱n ti ó itsꞌen Abraham, la ti sin tsꞌaxrjeníxin chꞌan mé tsꞌáyéhe̱ sin ti nonte. Kjónté na̱xa̱ nijnko xjan chóntahya chꞌin Abraham la xi̱kaha ichro Díos. 6#Gn. 15:13, 14.*Kja̱xin tsíndáchro Díos: “Ti sin tsꞌaxrjéníxian la tsꞌejó sin ókjé nonte sichꞌexón sin ixra̱ la kjuaxróxinhña tsꞌejó sin noó ciento nánó. 7#Ex. 3:12.*Kjánchó janhan si̱ntakjasóte ti sin kjuínchekjasóte ti xja̱an. Ndá chrꞌéxi̱n la tsꞌaxrjexín sin ntiha la tsokjan sin ntihi tsjikosáyehe sin ti janhan”, ichro Díos. 8#Gn. 17:10-14; Gn. 21:2-4; Gn. 25:26; Gn. 29:31—35:18.*Landá Díos ikjo Abraham kixin kaín ti chojnindoa tsꞌaxrjeníxin chꞌan mé itsa sin xro̱ye. Ndá xi̱kaha ti ó kokjíhi Isaac, la chꞌin Abraham chjéhe xro̱ye ti ixjan ti ó xítja ijní ña̱o. La xi̱kaha kjuíchꞌe chꞌin Isaac ti ó kóchónta chꞌan ti xje̱en chꞌan Jacob, la Jacob xi̱kaha kjuíchꞌe chꞌan ti kóchónta chꞌan ti teyó xje̱en chꞌan. Mé ti sin a ti kꞌóna itꞌé ti teyó tribu tsíkꞌaxrjeníxin Jacob.
9 #
Gn. 37:11;
Gn. 37:28;
Gn. 39:2, 21. *’Ti xje̱en chꞌin Jacob, ti sin kꞌuaxrjeníxini, la kꞌuéchji̱no̱xíhin sin ti kícho sin José, ndá kjuínchekji sin, la sákjuíko sin chꞌan Egipto, kjánchó Díos mé kꞌuéjóko ti chꞌin José. 10#Gn. 41:39-41.*La Díos kjuínki̱tsa chꞌan kjónté kaín ti nkehe náxrjónhña kóhen chꞌan la ko kjuajon chꞌan kjuaxrexinkaon jína. Ndá kꞌuíkon chꞌin Faraón, ti rey kuènté Egipto, ti ixra̱ jína kjuíchꞌe José, la kjuajon chꞌan kjuachaxin kixin tsꞌe̱to̱an chꞌin José ti chjasin Egipto la ko ti ndo̱e ti chꞌin Faraón.
11 #
Gn. 42:1, 2. *’Landá kókjinta kuenté ti chjasin Egipto la ko Canaán la ti sin kꞌuaxrjeníxini la kꞌuitjahya sin nkehe sinie sin la náxrjónhña kꞌuejó sin. 12Kjánchó ti ó kuíhin Jacob kixin sítóxin noa trigo ti chjasin Egipto la kꞌue̱tue̱hen chꞌan ti xje̱en chꞌan, ti sin kꞌuaxrjeníxini, kixin sátsji sin ntiha sátjikꞌe̱na sin noa la tíha mé ti sa̱oxín sákjuí sin. 13#Gn. 45:1; Gn. 45:16.*Ndá ti ó yaáxin sákjuí sin la chꞌin José kjuajon kjuachaxin kixin tso̱nohe sin nkexro ti jehe chꞌan. Landá xi̱kaha kóchóxin ti rey Faraón ti sin kjéhya chꞌin José. 14#Gn. 45:9, 10, 17, 18; Gn. 46:27.*Ndá kꞌue̱to̱an chꞌin José kixin tsjikakjín sin ti itꞌé chꞌan, Jacob, la ko kaín ti sin kjéhya chꞌan, mé ijnko setenta y cinco chojni. 15#Gn. 46:1-7; Gn. 49:33.*Ndá xi̱kaha sákjuí chꞌin Jacob Egipto la ntiha kjuákꞌe chꞌan, ndá chrꞌéxi̱n ikꞌuén chꞌan, la ko kja̱xin ti sin tsíkꞌaxrjeníxini la ntiha nkákꞌénxín sin. 16#Gn. 23:3-16; 33:19; 50:7-13; Jos. 24:32.*Ndá chrꞌéxi̱n kuakitsjexín sin tòye̱ ti huéso̱e Jacob la sákjuíko sin ti chjasin Siquem la ntiha kjua̱vá sin chꞌan ijnko nonte tsíkꞌe̱nehe chꞌin Abraham ti xje̱en Hamor.
17 #
Ex. 1:7, 8. *’Ndá ti ó kjuixraká ti ña̱o tsoxiteyá ti nkehe tsíndáchro Díos, tsíkjo chꞌan ti chꞌin Abraham, la ti sin Israel la imá kótsjé sin ti kꞌuejó sin Egipto. 18A̱ndá ntiha kjuákꞌe íjnko rey kꞌue̱to̱an ti chjasin Egipto la kochónhña chꞌan ti chꞌin José. 19#Ex. 1:10, 11; Ex. 1:22.*La ti rey í, mé kjuíchꞌiyehe ti sin kꞌuaxrjeníxini la kjuínchekjasóte chꞌan ti jehe sin. La kꞌue̱to̱an chꞌan kixin kaín ti xjan ndoa na̱ntá tsíkokjíhi mé tsjikꞌitjí kixin itsꞌen. 20#Ex. 2:2.*Landá ti ña̱o a mé kokjíhi ti ixjan Moisés, la imá kóxríhi̱n Díos ti ixjan. La ti ìñé ko itꞌé xjan mé iní nitjó kóchónta sin xjan ndo̱e sin. 21#Ex. 2:3-10.*Ndá ti í xrokjuahya tsja̱kꞌe̱ma̱ sin ti ixjan, la kjuikjáka sin la ijnko xje̱en ti rey kuènté Egipto mé kuákja ti xjan la sákjuíko tjan ndo̱e tjan la kjuínchekꞌánkí tjan ti ixjan éxi xje̱en tjan. 22Ndá xi̱kaha chꞌin Moisés kꞌuitja chꞌan kaín ti nkehe nohe ti sin Egipto, la imá nohe chꞌan nixja chꞌan la ko jína ixra̱ kjuíchꞌe chꞌan.
23 #
Ex. 2:11-15. *’A̱ndá ti ó kóchónta chꞌin Moisés cuarenta nánó, ndá tjinkaon chꞌan chrókuitsjehe chꞌan ti sin israelita, ti sin na̱xa̱ kjéhya chꞌan. 24La ti ó kꞌuíkon chꞌan kixin ijnko chojni Egipto kjuate ijnko ti sin na̱xa̱ kjéhya chꞌan, ndá kjuínki̱tsa chꞌan ti nkexro na̱xa̱ kjéhya chꞌan, la kꞌóñá chꞌan ti chojni Egipto. 25Kjuenka̱yáxin chꞌan kixin ti sin israelita la tso̱nohe sin kixin Díos tsíchrꞌán ti jehe chꞌan kixin sinchekaá chꞌan sin. Kjánchó ti sin a la kjuátso̱anhña sin chꞌan. 26A̱ndá ti ña̱o chrꞌéxi̱n, la chꞌin Moisés kꞌuíkon kixin yaá sin israelita tjajo̱n sin. Landá níxje̱he̱ chꞌan sin kixin chrókjuajonhña sin, la ndáche chꞌan sin: “Jahara nkoko̱a kichuara, ¿nkekuènté tjánjo̱nra?” 27A̱ndá ti nkexro chónta ijie̱ mé kónínkaon, la kótéka ti chꞌin Moisés, la ndáchro: “¿Xá nkexro kjuajon kjuachaxin kixin jaha tsꞌóna juez tsꞌétue̱héni? 28¿Á tjinkaoan tsꞌoñá ti jeheni, éxi kꞌoñá ti chꞌin Egipto ijna ní?” 29#Ex. 18:3, 4.*Ndá ti ó kuíhin Moisés tíha, la sákjuixin chꞌan ntiha la sákjui̱ chꞌan ti chjasin Madián, la ntiha kjuákꞌe chꞌan éxi ijnko chojni tsíkji̱xi̱n ókjé. La kóte̱he̱ chꞌan la kóchónta chꞌan yaá ixjan ndoa.
30 #
Ex. 3:1-10. *’Ndá cuarenta nánó chrꞌéxi̱n, la ti nte̱je̱ itjen chjina ti ijna̱ Sinaí mé kꞌuíkon chꞌin Moisés ijnko ángel tjenkákꞌá ijnko ntayoa tjeche xrohi. 31Ndá imá chrákon chꞌan la kóchjinehe chꞌan ti xrohi kixin tsotsjehe chꞌan jína, la kuíhin chꞌan itén Ìnchéni ndáchro: 32“Janhan ti Díos tinkáchónki ti sin kꞌuaxrjeníxian la ko ti Díos kuènté Abraham, Isaac la ko Jacob.” Ndá chꞌin Moisés la imá chrákon chꞌan la síxrànka̱ chꞌan la í kjuachahya chꞌan tsotsjehe chꞌan ntiha. 33La Ìnchéni ndáchro: “Takítsje ti to̱ka̱tá kixin ti nonte tinkátja la nonte tjóá. 34Chaxín ó kꞌuíkua̱n kixin ti sin kuénta̱na la imá tjejótjasóte sin ti chjasin Egipto, la kui̱ha̱n ti tꞌéya sin ndá ijie kꞌuinka kixin tsjínki̱tsa sin. Méxra̱ tóchjina kixin tjínka̱oan kixin sátsjia Egipto.”
35 #
Ex. 2:14. *’Ti sin israelita la kꞌuékjanoá ti chꞌin Moisés la ko tsíndáchro sin: “¿Nkexro kjuajon kjuachaxin kixin tsꞌóna juez tsꞌétue̱héni?” Méxra̱ ti chꞌin Moisés la Díos kjueyá kixin tsꞌe̱to̱an chꞌan la ko sinchekaá chꞌan ti sin israelita kjuachaxíen ti ángel kꞌuíkon chꞌan chríkjan ti ntayoa tjeche. 36#Ex. 7:3; Ex. 14:21; Nm. 14:33.*Chꞌin Moisés mé kuakitsjexín chꞌan Egipto ti sin tsíkꞌaxrjeníxini. La kjua̱ko̱xi̱n chꞌan itsjé kjuaxroan ijié ti chjasin Egipto, la ko ti Nda̱ñao kjátse, la ko ti kꞌuáji sin nte̱je̱ cuarenta nánó. 37#Dt. 18:15, 18.*La ndáche chꞌan ti sin israelita: “Díos mé tsjeyá ijnko chojni tsonixja ti itén chꞌan, tsꞌaxrjekjanxin ti sin kichuara éxi ichrꞌán chꞌan ti janhan. Titekákohénra ti nkexro a” ―ichro chꞌan ―. 38#Ex. 19:1—20:17; Dt. 5:1-33.*Chꞌin Moisés mé kjuákꞌeko sin ti kꞌuejó sin nte̱je̱. Ndá ijnko ángel nixje̱he̱ Moisés ti ijna̱ Sinaí, la ti sin kꞌuaxrjeníxini mé kꞌuáyéhe̱ sin ti itan tjajon kjuachón, la ti itan a mé tinhini ijie.
39’Kjánchó ti sin kꞌuaxrjeníxini la kuítekakonhña sin Moisés la kjuanoá sin chꞌan la tjinkaon sin chrókjan sin Egipto. 40#Ex. 32:1.*Ndá ijnko ña̱o ndáche sin ti chꞌin Aarón: “Tjinkaoni si̱chꞌéna ijnko díos tsinkáchónkini la tsjako ti nti̱a kixin noehñani nkehe tsíkóhen ti chꞌin Moisés, ti nkexro kjuínki̱tsa kꞌuaxrjexíni Egipto.” 41#Ex. 32:2-6.*Ndá xi̱kaha kjuínchekjano̱ña sin ijnko koxintáxjan, la kꞌóñá sin iko kjo̱ke̱he̱ sin, la kjuasin sin kia la imá kóchéhe̱ sin kꞌuíkon sin ti nkehe kꞌónaxín itja sin. 42#Am. 5:25-27.*A̱ndá Díos la kuíto̱he ti jehe sin kixin tsinkáchónki sin ti konotsé siín nka̱jní éxi tsíkjin ijnko nkexro kꞌuéchronka itén Díos ósé, ndáchro:
Jahara chojni Israel, ¿á kꞌoñánara iko ti kꞌuejora
cuarenta nánó nte̱je̱ ní?
43Náhí, jehó ti nkehe tsíkjano̱ña kjui̱chꞌénara mé kjóke̱héra iko.
La kjuíkoára ti ni̱nkué Moloc, ti díos tsíkjano̱ña
la ko kjuíkoára ti konotsé kuènté ti díos Renfán.
A̱ndá ti nkehe tsíkji̱chꞌénara mé xráxinkákonxínra éxi díos.
Méxra̱ janhan tsakítsjexínra ntiha la tsochrꞌanra sátsjira a̱ntsí ikjin ke Babilonia.
Mé xi̱kaha tsíndáchro Díos.
44 #
Ex. 25:9, 40. *’Ti sin kꞌuaxrjeníxini la na̱xa̱ kꞌuejó sin ti nte̱je̱ la kꞌuéchónta sin ijnko ni̱nko kꞌónaxín ika la ntiha itjen ti ley tsíkꞌe̱to̱an Díos. Ti ni̱nko i, la kjuíchꞌéna Moisés éxi tsíkꞌe̱to̱an Díos sichꞌéna chꞌan éxi ti tsíkꞌikon chꞌan tsíkjako Díos. 45#Jos. 3:14-17.*Ndá ti ó kꞌuáyéhe̱ ti nkexro tsíkꞌaxrjeníxini ti ni̱nko, ndá Josué kuitaón nti̱a la kjui̱ka̱o sin ti ni̱nko ti ó kjuacha sin kꞌuáyéhe̱ sin íjnko nonte kuènté ókjé chojni kixin Díos kjuínki̱tsa kuakitsjexín ti chojni ntiha. Mé ntiha kꞌuejó sin hasta ti ña̱o kꞌue̱to̱an chꞌin David. 46#2Sam. 7:1-16; 1Cr. 17:1-14.*La imá kjuíncheñao Díos ti rey David, la jehe chꞌan tjinkaon chꞌan chrókjuichꞌéna chꞌan ijnko ni̱nko kuènté Díos, ti Díos kuènté Jacob. 47#1Rs. 6:1-38; 2Cr. 3:1-17.*Kjánchó jehe chꞌan la kjuíchꞌénahña chꞌan ti ni̱nko. Ti xje̱en chꞌan, Salomón, mé kjuíchꞌéna tíha. 48Kjánchó Díos itjen nkaya nka̱jní la tjakꞌexenhña ijnko nchia tsíkꞌónaxín itja chojni. Éxi ndáchro ti xroon tsíkjin ti sin kꞌuéchronka itén Díos ósé:
49 #
Is. 66:1, 2. *Nkaya nka̱jní mé ti trono kuénta̱na,
a̱ndá ti chjasintajni la tjekjen to̱téná.
¿Xá nke nchia chrókjui̱chꞌénehéra ti janhan?
O̱, ¿xá nketí chrókjuakꞌe chróko̱kꞌána?
50¿Á jehya tjaná kjui̱tꞌánaxián kaín ti nkehe siín ní?
51 #
Is. 63:10. *A̱ndá na̱xa̱ nixja Esteban ndáchro:
―Jahara chojni icha a̱sén la tjinkákonhñara tsitekáonra. Jahara tihínra, kjánchó tjáko̱xinra éxi chojni chónhña Díos. Jahara tóyóha̱ra éxi ti sin tsíkꞌaxrjeníxinra ósé la titekákonhñara ti Ncha̱kuén Díos. 52Ti sin kꞌuaxrjeníxinra la kjuínchekjasóte sin kaín ti nkexro kꞌuéchronka itén Díos la ko kꞌóñá sin ti nkexro kꞌuéchronka kixin itsi ti nkexro chóntahya ninkehó ijie̱. A̱ndá ti ó ikui ti nkexro a, la jahara kjui̱nchekjira la kꞌo̱ñára chꞌan. 53Jahara kꞌuayéhéra ti ley kꞌue̱to̱an Díos, ti nkehe chrónka ti ángel, kjánchó kuitekákonhñara ―ichro chꞌin Esteban.
Ikꞌuén chꞌin Esteban
54A̱ndá ti ó kuíhin sin tíha, la kjónietaón ñeno sin kónínkakohen sin ti chꞌin Esteban. 55Kjánchó chꞌin Esteban a̱ntsí kꞌuáyéhe̱ chꞌan Ncha̱kuén Díos, la konta chꞌan nka̱jní la kꞌuíkon chꞌan ti kjuachaxin kuènté Díos la ko kꞌuíkon chꞌan Ìnchéni Jesús tjexín to̱té ti itja chjina kuènté Díos. 56La itsen ndáchro chꞌan:
―Tꞌíkua̱n tjexránke̱he̱ nka̱jní la ntiha itjen ti Xje̱en Díos kꞌóna Chojni, tjexin to̱té ti itja chjina kuènté Díos.
57A̱ndá jehe sin la kꞌuekjehe̱ sin ndatsjon sin la itsen kꞌuíxité sin la kꞌuíxitja sin chꞌin Esteban 58la sákjui̱ko sin chꞌan chrínta chjasin la kjuatexín sin chꞌan ixro̱. La ti sin tjanchia ijie̱ mé kuakitsje sin ti iké sin la kꞌuejó sin to̱té ijnko ndasoá itꞌin Saulo kixin tsꞌayakohen chꞌan. 59Ndá na̱xa̱ tjejótjate sin ti chꞌin Esteban, la jehe chꞌan la chrónoéhe̱ chꞌan Ìnchéni ndáchro chꞌan:
―Ìnchéni Jesús, takjá ti ncha̱kuéni.
60Ndá tuénxín kjuákꞌetꞌo̱xin chꞌan la kꞌóyako chꞌan itsen, ndáchro chꞌan:
―Ìnchéni, tahya kuentá ti nkehe ichꞌe sin.
Xi̱kaha ichro chꞌan, ndá ikꞌuén chꞌan.
Currently Selected:
Hechos 7: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
