San Juan 21

Chꞌin Jesús xéta yato ti sin kuékꞌajiko

1A̱ndá chrꞌéxi̱n chꞌin Jesús xéta ínaá yato ti sin kuékꞌajiko chrínta ti Nda̱ñao Tiberias. Mé kꞌuíkon chꞌan 2chꞌin Simón Pedro, Tomás, ti nkexro ti̱ki̱texín sin Nóhé, Natanael, tsíki̱xi̱n Caná nonte Galilea la ko yaá xje̱en chꞌin Zebedeo la ko íyaá ti sin kuékꞌajiko chꞌan, mé nkoko̱a kꞌuejó sin. 3#Lc. 5:5.*Ndá chꞌin Simón Pedro ndáchro:

―Sátsjitséni koche.

Ndá ndáchro ti íso sin:

―Kaíni tsjikoni ti jaha ―ichro sin.

Ndá sákjuí sin kꞌui̱tꞌótjen sin ijnko ntabarco, kjánchó ninkehó koche tséhya sin kuenté tie. 4A̱ndá ó chjina tsꞌinkaséña, ndá ikjan sin la xrína̱hña kꞌuíkon sin itjen chꞌin Jesús chrínta ti nda̱ñao, kjánchó kjuátso̱anhña sin kixin jehe chꞌan tíha. 5Ndá kjuanchankí chꞌan, ndáchro chꞌan:

―Ndasoá, ¿á itse̱ra koche ní?

Ndá kjuáte̱he sin, ndáchro sin:

―Náhí, ninkehó.

6 # Lc. 5:6. *Ndá chꞌin Jesús ndáchro:

―Itéra ti nchísén chjia ti ntabarco la tso̱tse̱ra iso va.

Ndá kjuínchexiteyá sin la ikꞌue sin ti nchísén, la í kjuachahya sin kuakitsjetaón sin kixin nchónhña koche sítjinká. 7A̱ndá ti nkexro imá tjue̱he chꞌin Jesús mé ndáche ti chꞌin Pedro:

―Ti nkexro a la Ìnchéni tíha.

Ndá ti ó kuíhin chꞌin Simón Pedro kixin Ìnchéni tíha, la tjoka kꞌuinkáya chꞌan ti iké chꞌan (kixin tsíkakítsje chꞌan), ndá kjiánkí chꞌan ti ìnta̱. 8Ndá ti íso sin mé kjui̱ka̱o sin chrínta nda̱ñao ti ntabarco tinkánkákjetóxin sin ti nchísén tjinká koche kixin kꞌuejó sin ijnko ciento metro kjínxi̱n chrínta ti nda̱ñao. 9Ndá ti ó kꞌuínkaji̱nxi̱n sin ti ntabarco la kꞌuíkon sin kixin tjeche xrohi la chritaón ti xrinta la tjekjen ijnko koche la ko nio̱tja̱. 10Ndá chꞌin Jesús ndáchro:

―Xrákoara iso ti koche itse̱ra na̱ntá.

11Ndá chꞌin Simón Pedro mé kꞌui̱tꞌótjen chꞌan ti ntabarco la kuákja chꞌan ti nchísén tsíkaón koche yehye, la kuinkánkákjen chꞌan xráka̱o chꞌan, mé ti koche itsé sin la ijnko ciento cincuenta y tres va, la kjónté itsjé va la kꞌuichjehya ti nchísén. 12Ndá ndáchro chꞌin Jesús:

―Xrákira, intera.

La ninkehó ti sin kꞌuájiko chꞌan kjuanchankíhya sin kixin nkexro ti jehe chꞌan kixin ó nohe sin kixin Ìnchéni tíha. 13Ndá chꞌin Jesús kóchjina la kuákja ti nio̱tja̱ la chjéhe chꞌan ti jehe sin la ko xi̱kaha kjuajon chꞌan ti koche kja̱xin.

14Tíhi mé ti níxin xéta chꞌin Jesús ti sin kꞌuájiko chꞌan ti ó xechón chꞌan.

Jesús nixje̱he̱ ti chꞌin Pedro

15Ndá ti ó kjuixin kjónie sin, ndá chꞌin Jesús kjuanchankíhi ti chꞌin Simón Pedro, ndáchro:

―Simón, xje̱en Jonás, ¿a̱ntsí tjue̱he ti janhan ke ti íso sin ní?

Ndá kjuáte̱he chꞌin Simón Pedro ndáchro:

―Jeén, Ìnchéni, ó noha kixin tjinkaoni ti jaha.

Ndá chꞌin Jesús ndáchro:

―Tꞌayakohén ti kolélo kuénta̱na.

16Ndá yaáxin xíkjanchankí chꞌin Jesús, ndáchro:

―Simón, xje̱en Jonás, ¿á tjue̱he ti janhan ní?

Ndá kjuáte̱he chꞌin Simón Pedro ndáchro:

―Jeén, Ìnchéni, ó noha kixin tjinkaoni ti jaha.

Ndá chꞌin Jesús ndáchro:

―Tꞌayakohén ti kolélo kuénta̱na.

17Ndá ó níxin xíkjanchankí chꞌin Jesús, ndáchro:

―Simón, xje̱en Jonás, ¿á tjinkaoan ti janhan ní?

A̱ndá chꞌin Pedro kꞌuává a̱sén chꞌan kixin ó tíhi ti níxin kjuanchankí chꞌin Jesús kixin á tjinkaon chꞌan ti jehe, ndá ndáchro chꞌan:

―Ìnchéni, jaha noha kaín nkehe la ó noha kixin tjinkaoni ti jaha.

Ndá chꞌin Jesús ndáchro:

―Ti xi̱kaha la tꞌayakohén ti kolélo kuénta̱na. 18Ijnko nkehe chaxín tso̱tjo̱nka kixin ti na̱xa̱ kꞌuéndasoá, la jahuá kuékꞌinka̱ya ti iká la kꞌuékjia ti kꞌuékóxríhan. Kjánchó ti ó tso̱tada la tsjàya itjá, la íjnko nkexro sintakꞌinkáya ti iká la sátsjiko sin ti jaha ti tóxría̱nhña chrókjuia.

19Tíhi mé chrónkaxín chꞌin Jesús nkexrín itsꞌen chꞌin Pedro la ko nkexrín tsochjéxin chꞌan Díos kjuasáya. Ndá kjuixin la ndáchro chꞌan:

―Chréhé ti janhan.

Ti nkexro a̱ntsí tjue̱he chꞌin Jesús

20 # Jn. 13:25. *Ndá nkátjíá chꞌin Pedro la kꞌuíkon chꞌan kixin tjetinkáchréhe̱ ti nkexro a̱ntsí tjue̱he chꞌin Jesús, mé ti nkexro a ti kjuákꞌe chjina chꞌin Jesús ti kjónie sin, la jehe chꞌan ti kjuanchankíhi chꞌan chꞌin Jesús kixin nkexro sinchekji ti jehe chꞌan. 21A̱ndá ti kꞌuíkon chꞌin Pedro kixin tjechréhe̱ chꞌan, ndá kjuanchankíhi chꞌan ti chꞌin Jesús, ndáchro chꞌan:

―Ìnchéni, ¿ndá ti chꞌin i la nkehe tso̱hen?

22Ndá chꞌin Jesús ndáchro:

―Ti tjínka̱oan kixin tsjakꞌechón chꞌan hasta tsokjan janhan, la, ¿nkehe tjiatéxian tíha? Jaha la jehó chréhé ti janhan.

23Mé xi̱kaha ikjo ti sin kuékꞌajiko chꞌin Jesús kixin tsꞌenhña ti nkexro a, kjánchó jehya ndáchro chꞌin Jesús kixin chaxín tsꞌenhña ti nkexro. Náhí. Jehí ndáchro chꞌan kixin ti tjinkaon chꞌan na̱xa̱ chrókjuákꞌechón ti nkexro ti tsokjan chꞌan, la chrókjuiatéhya ti chꞌin Pedro, la chrókjuanchankíxinhña chꞌan.

24A̱ndá ti nkexro a mé ti nkexro chronka kixin chaxín kóhen kaín tíha la ko ikjin ti xroon i. Ndá ó noheni kixin ti nkehe tsíkjin chꞌan la chaxín ndoá.

25Chꞌin Jesús la kjua̱ko̱xi̱n chꞌan íso kjuaxroan chóntahya ti xroon i. Kixin ti chrókꞌóna nkojnko tíha, la kjá chrókjuachahya ti chjasintajni chrókꞌuinka kaín ti xroon chrókꞌóna. Mé xi̱kaha tso̱hen. Ó tjen.

Currently Selected:

San Juan 21: poeNTplus

Highlight

Copy