Lucas 8

Ti chojnichjin kjuíchꞌehe ixra̱ chꞌin Jesús

1A̱ndá chrꞌéxi̱n la chꞌin Jesús kꞌuáji chꞌan itsjé chjasin ihyé la ko chjasin ntsí kjuako chꞌan la ko chrónka chꞌan ti itan jína kuènté ti kjuachaxin tꞌe̱to̱axín Díos, kꞌuájiko chꞌan ti teyó sin. 2#Mt. 27:55, 56; Mr. 15:40, 41; Lc. 23:49.*La kja̱xin chréhe̱ iso chojnichjin tsíkjinchekito̱he chꞌan jína kixin tsíkakítsje chꞌan ncha̱kuén jínahña kꞌuéchónta sin la ko tsíkja̱tse̱n chꞌan ti ichin kꞌuéchónta sin. Ijnko ti tjan a mé itꞌin María kja̱xin ti̱ki̱texín sin tjan Magdalena, ti nkexro tsíkꞌaxrjexín yato ncha̱kuén jínahña, 3kja̱xin tjan Juana, ichjién Chuza, ti nkexro kꞌuékjichꞌehe ixra̱ Herodes kuékꞌe̱to̱an; Susana la ko íso sin. Kaín sin kjuajon sin ti nkehe kꞌuéchónta sin kjuínki̱tsa sin chꞌin Jesús.

Ti nkexro kꞌue̱nka̱ nonte

(Mt. 13:1-9; Mr. 4:1-9)

4Ndá nchónhña chojni tsíkji̱xi̱n itsjé chjasin kónkotsé sin ti itjen chꞌan. Ndá chꞌin Jesús kjuíncheyóe̱xin jnko nkehe, ndáchro:

5―Ijnko nkexro sákjuikꞌe̱nka̱ no̱nte̱e. La ti ó tjetꞌe̱nka̱ chꞌan la iso ti noatje la xèjin chrínta nti̱a ndá nkátja chojni la ti koxroxe ikui la kjónie ti noa. 6Iso ti noa la kꞌuitjí chríkꞌá ixro̱ ndá kꞌuaña la tjoka xámá kixin kanhñó siín itjo. 7Ndá íso ti noatje la kꞌuitjí chríkꞌá kachꞌi̱, ndá ti kachꞌi̱ la kꞌuánkí ndá í xitjahya kꞌuánkí ti ino kixin tsíkjate ti kachꞌi̱. 8La íso ti noa la kꞌuitjí ti inche jína la kꞌuaña la kꞌuánkí nte̱to la kꞌóna jína mé nkojnko ti noatje la kꞌóna ciento ñeno noa.

Ndá ti ó kjuixin kjuako chꞌin Jesús kaín tíha ndá itsen ndáchro chꞌan:

―Ti tjinkáonra chrókuihínra la tihínra jína.

Chꞌin Jesús chrónka nkekuènté kjuíncheyóe̱xin

(Mt. 13:10-17; Mr. 4:10-12)

9Ndá ti sin kꞌuájiko chꞌan mé kjuanchankí sin nkehe tꞌaxrjexín ti nkehe kjuíncheyóe̱xin chꞌan. 10#Is. 6:9.*Ndá chꞌin Jesús ndáchro:

―Díos mé kjuajon kjuachaxin kixin tso̱nohara ti nkehe tienxínhña íso chojni kuènté ti kjuachaxin tꞌe̱to̱axín Díos, kjánchó ti sin titekakonhña la kjui̱ntayóa̱xoán kixin kjónté tjejótsjehe sin la tsꞌikonhña sin, kjónté tjejótihin sin la tsienxínhña sin.

Ti nkehe tꞌaxrjexín ti nkexro kꞌue̱nka̱ nonte

(Mt. 13:18-23; Mr. 4:13-20)

11’Tíhi tꞌaxrjexín ti nkehe kjui̱ntayóa̱xoán. Ti noatje mé ti itén Díos. 12A̱ndá ti noatje kꞌuitsínka chrínta nti̱a mé tóyóhe̱ ti sin kuíhin ti itan jína, ndá ikui ti Jínahña la kjuínchekꞌitjáña kaín ti itén Díos kuíhin sin kixin tsitekakonhña sin ti nkehe chrókuaáxin sin. 13Ti noa kꞌuitsínkakꞌá ixro̱ la yóhe̱ ti chojni kuíhin ti itén Díos la tjoka kóxríhi̱n la imá chéhe̱ kuitekaon, kjánchó ni̱nkahya chónta nuèé, ndá ti ó itsi ti kjuaxróxinhña, la tsíto̱he ti itén Díos kuíhin. 14A̱ndá ti noatje kꞌuitsínkakꞌá kachꞌi̱ la yóhe̱ ti chojni kuíhin ti itan jína, kjánchó tjinkíhya sin ti nkehe tjenka̱yáxin kixin na̱xa̱ tóxakohen sin ti ixra̱ chónta sin la ko tjinkaon sin tsochónta sin itsjé chichaon la ko ti nkehe tóxríhi̱n sin mé tꞌinkákonhe̱n la xitjahya sichꞌehe sin ixra̱ Díos. 15A̱ndá ti noa kꞌuitsínka nonte jína mé yóhe̱ ti chojni kuíhin ti itén Díos, la kaín a̱sén kuitekaon la kuíto̱ehya sin ti itan, ndá xi̱kaha jína chꞌehe sin Díos ixra̱.

Kohya nkehe ómó itjen chrókónoxínhña

(Mr. 4:21-25)

16 # Mt. 5:15; Lc. 11:33. *’Nijnko nkexro chrókjuinchekꞌákjen ijnko xrohi ndá chrókjua̱kꞌe̱ma̱ nkaxehen ichi̱ o̱ chrínkí cama. Náhí. Noi chrókjuákꞌe ti xrohi kixin ti nkexro tsꞌixehen ti nchia la tsꞌikonxín jína ti xrohi a. 17#Mt. 10:26; Lc. 12:2.*Kixin kohya nkehe chrókꞌuejómá ndá chrókónoxínhña; la ko kohya nkehe imó ninkexró noehña chrókónoxínhña chrꞌéxi̱n kixin kaín nkehe la tso̱noxíxin ti xrohi. 18#Mt. 25:29; Lc. 19:26.*Méxra̱ chrókuihínra jína kixin ti nkexro chónta mé a̱ntsí tsꞌáyéhe̱. A̱ndá ti nkexro chóntahya, la kjónté ti nkehe tjenka̱yáxin chónta, la tsꞌaxrjehe.

Ìñé la ko kícho chꞌin Jesús

(Mt. 12:46-50; Mr. 3:31-35)

19Ndá ti ìñé la ko kícho chꞌin Jesús mé kjuíji sin, la xitjahya tso̱chjina sin kixin nchónhña chojni tjejó ntiha. 20A̱ndá ijnko sin chenka sin chꞌin Jesús:

―Ìná la ko kichua tjejó sin ndója la tjinkaon sin tsonixje̱he̱ sin ti jaha.

21Kjánchó chꞌin Jesús, ndáchro:

―Ti sin tihin itén Díos la ko titekaon sin mé tíha ti na̱ná la ko kíchina.

Chꞌin Jesús kjuinchekꞌixratán ti xri̱nto̱ la ko ti ìnta̱

(Mt. 8:23-27; Mr. 4:35-41)

22Ndá ijnko ña̱o kꞌuíxehen chꞌin Jesús ijnko ntabarco la ko ti sin kꞌuájiko chꞌan. Ndá ndáchro chꞌin Jesús:

―Sátsjini tóhe ti nda̱ñao.

Ndá sákjuí sin. 23Ndá na̱xa̱ tjejótꞌatóye̱ sin, la chꞌin Jesús tsíkꞌajua. La imá tji̱a̱n chjéhe xri̱nto̱ chritaón ìnta̱, la xrankíxin sítikia ìnta̱ ti ntabarco ndá chrakon sin kixin tsꞌaniánkí sin ìnta̱. 24Ndá kjuínchekjaye̱he̱ sin chꞌan, la ndáchro sin:

―Maestro, Maestro, tjejótꞌániankíni ìnta̱.

Ndá chꞌin Jesús kꞌuàya la kꞌue̱tue̱hen ti xri̱nto̱ la ko ti ìnta̱ kixin tsꞌixitán, ndá tuénxín kꞌuíxitá. 25Ndá ndáche chꞌin Jesús ti sin kꞌuájiko:

―¿Nkekuènté chaxínhña titekáonra Díos?

Kjánchó jehe sin la chrakon sin itjo sin kícho sin:

―¿Xá nkexro tíhi? Kixin tꞌe̱tue̱hen ti xri̱nto̱ la ko ti ìnta̱ la titekaon.

Ti nkexro Gadara chónta ncha̱kuén jínahña

(Mt. 8:28-34; Mr. 5:1-20)

26Ndá kjuíji sin ti Gadara, ti tóhe nda̱ñao chokꞌèxín Galilea. 27Ndá kꞌuínkaji̱nxi̱n chꞌin Jesús ti ntabarco la kóchjina ijnko nkexro itjen ntiha, ósé chónta ncha̱kuén jínahña. La ni ika tꞌinkáyahya chꞌan, la ko jehya ndo̱e chꞌan kjuákꞌe chꞌan, jehó ti tsíxravá chojni ó kjuákꞌe chꞌan. 28Ndá ti ó kꞌuíkon ti chꞌin Jesús la kjuákꞌexín tochꞌin, la itsen ndáchro:

―¿Nkekuènté tji̱a̱té ti jeheni?, jaha Jesús, Xje̱en Díos, itjen nkaya nka̱jní. Chrónòahani kixin sinchekjasótehyani.

29Xi̱kaha ichro kixin chꞌin Jesús tsíkꞌe̱tue̱hen kixin tsꞌaxrjexín ti nkexro a. Nchónhña vece la ti ncha̱kuén jínahña kuékꞌe̱tue̱hen ti nkexro a; la itsjé vece kꞌuétsé sin chꞌan kꞌuékjinchentetoxín sin cadena itja la ko to̱té chꞌan, kixin tjinkaon sin itónkoá chrókjuákꞌe chꞌan. Kjánchó kꞌuekóchríjin chꞌan ti cadena tsíkóntetoxín chꞌan la ti ncha̱kuén jínahña tjinkaon sáchrókjuiko ti jehe chꞌan nte̱je̱. 30Ndá chꞌin Jesús kjuanchankí ndáchro:

―¿Nkexrín itꞌian?

Ndá ti nkexro ndáchro:

―Legión.

Kixin nchónhña ncha̱kuén jínahña chónta ti nkexro a. 31La xi̱kahó kaín ti ncha̱kuén jínahña chrónoéhe̱ ti chꞌin Jesús kixin chrókꞌue̱to̱anhña kixin Sáchrokjui sin ti tòye̱ ni̱nka. 32Ndá ntiha ti ijna̱ a siín nchónhña kochíno xrinie. La ti ncha̱kuén jínahña chrónoéhe̱ chꞌin Jesús kixin chrókjuajon kjuachaxin chrókꞌuixehen sin ti kochíno a. Ndá kjuajon chꞌan kjuachaxin. 33A̱ndá ti ncha̱kuén jínahña kꞌuaxrjexín ti nkexro a, la kꞌuíxehen ti kochíno. Ndá kaín ti kochíno kuinká va, sákjuí va, kꞌuanótje̱ña va nkaya tsa̱ka, kꞌuánótjenkí va ìnta̱ la ikꞌuén va.

34Ndá ti sin tꞌayakohen ti kochíno ti ó kꞌuíkon sin tíha, la chrákon sin, kuinká sin sákjuichronka sin ti chjasén sin la ko ti rancho. 35Ndá kaín chojni kꞌuaxrjexín sin chjasin sákjuitsjehe sin ti nkehe tsíkóhen. A̱ndá ti ó kjuíji sin ti itjen chꞌin Jesús, la kꞌuíkon sin kixin ntiha itjen ti nkexro tsíkꞌaxrjexín ti ncha̱kuén jínahña. Ntiha tjetja̱xi̱n chꞌan ti itjen to̱té chꞌin Jesús, chrꞌinkáya chꞌan ika la ó jína itjen chꞌan, la imá chrákon sin. 36A̱ndá kaín ti sin tsíkꞌikon nkehe kóhen mé chrónka sin nkexrín kuito̱he jína ti nkexro kꞌuéchónta ti ncha̱kuén jínahña. 37La kaín ti chojni chjasin Gadara chrónoéhe̱ sin ti chꞌin Jesús kixin sáchrókjuixin chꞌan ntiha kixin imá chrákon sin. Ndá chꞌin Jesús kꞌui̱tꞌótjen ti ntabarco la sákjuixin ntiha. 38Ndá ti nkexro tsíkꞌaxrjexín ti ncha̱kuén jínahña mé chrónoéhe̱ chꞌin Jesús kixin kja̱xin sáchrókjuiko sin, kjánchó chꞌin Jesús kꞌue̱tue̱hen kixin tsito̱he la ndáchro:

39―Ikjan ndo̱a la chro̱nka nkexrín ti kjuachaxin ijié kuènté Díos kuíto̱axián jína.

Ndá sákjuí ti nkexro a la chrónka chꞌan nkuíxín ti kjuaxroan ijié kjuíchꞌe chꞌin Jesús kuito̱exín chꞌan jína.

Ti xje̱en Jairo la ko ti tjan kuákóxi̱n iké chꞌin Jesús

(Mt. 9:18-26; Mr. 5:21-43)

40Ti ó ikjan chꞌin Jesús ti íjnko tóhe nda̱ñao la nchónhña chojni tjejó ntiha la chéhe̱ sin kixin kjuíji chꞌan, kixin kaín sin tjejóchóhen sin ti jehe chꞌan. 41Ndá ikui ijnko nkexro itꞌin Jairo ijnko ti nkexro tꞌe̱to̱an kuènté ti ni̱nko judío. Ndá kjuákꞌexín chꞌan tochꞌin chꞌan to̱té chꞌin Jesús la chrónòa chꞌan kixin sáchrokjui chꞌin Jesús ndo̱e chꞌan 42kixin nkoko̱axón xje̱en chꞌan chjin chónta teyó nánó la ó tjetꞌen tjan. Ndá sákjuí chꞌin Jesús la nchónhña chojni chréhe̱ la tinkákꞌindate sin chꞌan.

43La ntiha tjenkákjan ijnko chojnichjin níhi, ó chónta teyó nánó sítji tjan ijni̱. La kaín ti nkehe kꞌuéchónta tjan la kjuínchekji tjan kixin kjue̱nke̱he tjan ti sin tjajon xro̱a̱n la ninkexró kjuachahya kjuínchekito̱he jína ti jehe tjan. 44Ndá jehe tjan la kóchjina tjan nóton chꞌin Jesús, la kuákóxi̱n tjan ti iké chꞌan, ndá tuénxín ti ijni̱ la ó kjui̱xén.

45Ndá chꞌin Jesús kjuanchankí:

―¿Nkexro kuákóxi̱n ti janhan?

Ndá kaín sin ndáchro sin kixin ninkexró. Ndá Pedro la ko ti sin kꞌuájiko chꞌan ndáchro sin:

―Maestro, nchónhña chojni tjejó ntihi hasta tótéka kícho sin, ¿ndá nkekuènté tjánchánkia kixin nkexro kuákóxi̱n ti jaha?

46Kjánchó chꞌin Jesús ndáchro:

―Nkojín nkexro kuákóxi̱n ti janhan kixin kónona kꞌuaxrje ti kjuachaxin kuénta̱na kuito̱exín chojni jína ―ichro chꞌan.

47Ndá ti ó kuihin ti tjan kixin ó kónohe chꞌan la chrákon kon tjan kóchjina tjan la kjuákꞌexín tjan tochꞌin tjan nkayakon chꞌin Jesús. Ndá chrónka tjan nkayakon kaín chojni nkekuènté kuákóxi̱n tjan iké chꞌin Jesús la ko nkexrín kuito̱he tjan jína.

48Ndá chꞌin Jesús ndáchro:

―Xje̱eni, ó kuito̱ha jína kixin kuitekaoan ti janhan. Kjuaxróxin sátjia ndo̱a.

49Ndá na̱xa̱ tjejótjo sin la ijnko nkexro kjui̱xi̱n ndo̱e ti nkexro tꞌe̱to̱an kuènté ni̱nko, la ndáche ti nkexro a:

―Xja̱an la ó kjuixin ikꞌuén. Í chjèhya ixra̱ ti maestro.

50Ndá ti ó kuíhin chꞌin Jesús tíha la ndáchro:

―Chrakonhña. Titekaoan ti janhan la tsito̱he jína ti xja̱an.

51Ndá ti ó kjuíji sin ti nchia la kuíto̱ehya chꞌin Jesús kixin kaín chojni chrókꞌuixehen ti nchia. Jehó Pedro, Jacobo, Juan la ko ti itꞌé la ko ti ìñé ti xjachjin kꞌuíxehen sin ti itjen ti xjan. 52Ndá kaín ti sin tjejó ntiha la tsjánkàma̱ sin ti xjan, kjánchó chꞌin Jesús ndáchro:

―Tsja̱nkahyara. Ti xjan la tsíkꞌenhña xjan; jehó tjejua xjan.

53Ndá kjuanoá sin chꞌan kixin jehe sin la nohe sin kixin tsíkꞌen xjan. 54Ndá chꞌin Jesús itsé itja ti xjan, la itsen nixje̱he̱ chꞌan, ndáchro chꞌan:

―Cháchjin, Tꞌàyá.

55Ndá ikjan a̱sén xjan la tuénxín kꞌuínkatjen tjan. La kꞌue̱to̱an chꞌin Jesús kixin tsjajon sin nkehe sinie tjan. 56Ndá itꞌé la ko ìñé tjan la chrakon sin. Kjánchó chꞌin Jesús kꞌue̱tue̱hen ti sin a, kixin ninkexró chróchenkahya sin kixin xi̱kaha kóhen.

Currently Selected:

Lucas 8: poeNTplus

Highlight

Copy