Marcos 11
11
Chꞌin Jesús kꞌuíxehen Jerusalén
(Mt. 21:1-11; Lc. 19:28-40; Jn. 12:12-19)
1Ndá ti ó kjuíjichjina sin Jerusalén chjinaxón ti chjasin Betfagé la ko Betania chokꞌèxín ti ijna̱ Olivo, ndá kꞌue̱tue̱hen chꞌin Jesús yaá ti sin kꞌuájiko chꞌan, 2ndáchro chꞌan:
―Sátjira ti chjasin intsí chokꞌèxín ti ntihi. Ndá ti ó tsjasánra ntiha la tsꞌikonra tjechroé ijnko kolócho na̱xa̱ ninkexró tjakꞌekjenhña, tjasinta̱nke̱héra va la tsjiko̱ara va ntihi. 3A̱ndá ti nkojín chojni tsjanchankí nkekuènté xi̱kaha ichꞌera la ndáchrora: “Ti Maestro mé tichánxi̱hin va ti ó tsjixin la tsjikaáni va”, ichrora.
4Ndá sákjuí sin la kꞌuíkon sin ti kolócho tjechroé chjinaxón ndója nchia ndá kjuasinta̱nke̱he sin va. 5A̱ndá ti chojni tjejó ntiha la kjuanchankí sin:
―¿Nkekuènté tjasinta̱nke̱héra ti kolócho? ―ichro sin.
6Ndá kjuáte̱he sin éxi kꞌue̱to̱an chꞌin Jesús. Ndá xrájon kjuachaxin sákjuíko sin va. 7Ndá sákjuíko sin ti kolócho ti itjen chꞌin Jesús. La iké sin kjuínchekamá sin va, ndá kjuákꞌekjen chꞌin Jesús. 8Ndá itsjé chojni kuakitsje sin ti ika tꞌitsáte sin la kjuasintaón sin nonte la ko íso sin la kóchríjin sin chaon ti ntayoa la kjuasintaón sin nonte kixin tsꞌatsínka chꞌin Jesús.
9 #
Sal. 118:25, 26. *A̱ndá ti sin sítaón nti̱a la ko ti sin chréhe̱ la chéhe̱ sin, kjuankíxin itsje sin ndáchro sin:
―Tsochjéheni kjuasáya Díos. Jína ti nkexro kui̱xi̱n kjuachaxin ihni̱é Ìnchéni. 10Jína tsꞌe̱to̱an ti nkexro kꞌuaxrjeníxin itꞌéni David. Kjuasáye Díos itjen nkaya nka̱jní ―ichro sin.
11Ndá kꞌuíxehen chꞌin Jesús Jerusalén la sákjuí chꞌan ti ni̱nko la tsjehe chꞌan nkuíxín. Ndá ó kóndanonte la sákjuíko chꞌan ti teyó sin, ti chjasin Betania.
Chꞌin Jesús kónínkakohen ijnko inta tohigo
(Mt. 21:18-19)
12A̱ndá ti kóña̱o la kꞌuaxrjexín sin Betania, la chꞌin Jesús mé ikꞌuén chꞌan kjinta. 13Ndá kꞌuíkon chꞌan ikjín itjen ijnko inta higo chónta iké yoa. Ndá sákjuitsjehe chꞌan ti inta ákue tsahya ito. Ndá kꞌuíkon chꞌan kixin jehó chaon yoa chónta kixin jehya ti ña̱o tꞌóna tohigo. 14Ndá chꞌin Jesús ndáche ti inta tohigo:
―Í ninkexró siniehña ti ito tsꞌóna jaha.
Ndá ti sin kꞌuájiko chꞌan mé kuíhin tíha.
Chꞌin Jesús kjuínchetjóá ni̱nko
(Mt. 21:12-17; Lc. 19:45-48; Jn. 2:13-22)
15Ndá kjuíji sin chjasin Jerusalén la kꞌuíxehen chꞌin Jesús nkaxehen ni̱nko. Ndá kjuankíxin kꞌuínkíté chꞌan ti sin nchekjixin nkehe ntiha la ko ti sin tꞌe̱na nkehe la ko kóxitjen chꞌan ti mesa tjinkíxin sin chichaon la ko ti silla tjejókjen ti sin nchekji kontóá 16la kjuajonhña chꞌan kjuachaxin kixin tsꞌatsínkako sin nkehe ti nkaxehen ni̱nko. 17#Is. 56:7; Jer. 7:11.*La kjua̱ko̱he̱ chꞌan sin, ndáchro chꞌan:
―Ndáchro xroon itén Díos: “Ti ndo̱na#11:17 ndo̱na mi casa i mé itꞌin nchia tsochjéxin chojni Díos kjuasáya”, a̱ndá jahara tsíkji̱chꞌénara itjue̱é xíche̱e.
18Ndá ti sin ncha̱tꞌá tꞌe̱to̱an la ko ti sin maestro tjako ley kuíhin sin tíha, la kjueyá sin nkexrín chrókꞌóñá sin chꞌan, kjánchó chrakon sin kixin kóxríhi̱n chojni ti nkehe kjuako chꞌan. 19A̱ndá ó kóntó la kꞌuaxrjexín chꞌan ti chjasin a, sákjuí chꞌan.
Tsíxámá ti inta tꞌóna tohigo
(Mt. 21:20-22)
20Ndá ti ó nchítjen, kꞌuatsínka sin ti itjen ti inta tꞌóna to higo la kꞌuíkon sin kixin ó tsíxámáxin nuèé ti inta. 21Ndá chꞌin Pedro xráxinkaon chꞌan ti nkehe tsíkóhen, la ndáche chꞌan chꞌin Jesús:
―Maestro, tsjehé ti inta tꞌóna tohigo kóninkákohén ijna la ó tsíxámá.
22Ndá kjuáte̱he chꞌin Jesús ndáchro:
―Titekáonra Díos. 23#Mt. 17:20; 1Co. 13:2.*Chaxín ndáxrja̱n kixin ti nkojinra chróndáchera ti ijna̱ i: “Sátjixian ntihi, tjíkjia̱nkiá nda̱ñao”, la kaín a̱sánra chrókuitekáonra kixin tsoxiteyá ti nkehe tsondáchrora, la chaxín tsoxiteyá. 24Mé xi̱kaha ndáxrja̱n kixin kaín ti nkehe tsjanchehéra Díos ti tsítekáonra kixin chaxín tsꞌayéhéra, la xi̱kaha tso̱hen. 25#Mt. 6:14, 15.*Ti ó tsonixjehéra Díos, ndá na̱xa̱ ninkákohénra nkojín nkexro, la chrókꞌuitjáñahanra tíha kixin Itꞌára itjen nkaya nka̱jní chrókꞌóxika chꞌan ti ijie̱ chontara. 26A̱ndá ti tsꞌitjáñahñara ti iji̱é kjuitꞌahara íjnko chojni, la Itꞌára itjen nkaya nka̱jní la kja̱xin tsꞌitjáñehña chꞌan ti ijie̱ chontara.
Ti kjuachaxin chónta chꞌin Jesús
(Mt. 21:23-27; Lc. 20:1-8)
27Ndá xíkjan sin chjasin Jerusalén. Ndá xritjakꞌe chꞌan nkaxehen ti ni̱nko, la kóchjina ti sin ncha̱tꞌá tꞌe̱to̱an la ko ti sin tjako ley la ko ti sin táda tꞌe̱to̱an ni̱nko, 28la kjuanchankí sin:
―¿Nke kjuachaxin chonta kixin xi̱kaha ichꞌe? ¿Nkexro tjáha ti kjuachaxin kixin xi̱kaha kjui̱chꞌe?
29Ndá kjuáte̱he chꞌin Jesús, ndáchro:
―Kja̱xin janhan tsjánchánkíhara ijnko nkehe, tjáte̱héra, ndá tso̱tjo̱nkara nke kjuachaxin chonta janhan kixin xi̱kaha itꞌa̱ ti ixra̱ i. 30¿Nkexro kꞌue̱tue̱hen chꞌin Juan kixin tsi̱ki̱te chojni? ¿Á Díos ní o̱ chojni ó? Tjáte̱héra ―ichro chꞌan.
31Ndá kjuankíxin ikjo sin kícho sin:
―Ti tsondáchroni kixin Díos tsíkꞌe̱tue̱hen ti chꞌin Juan, la tsjanchankí chꞌan nkekuènté kuitekakuenhñani chꞌan. 32¿Á chróndáchroni kixin chojni ó tsíkꞌe̱tue̱hen chꞌan?
Kjánchó chráko̱nhe̱n sin ti chojni kixin kaín sin nohe sin kixin chꞌin Juan mé kꞌuénixja itén Díos. 33Mé xi̱kaha ndáche sin ti chꞌin Jesús:
―Noehñani nkexro.
Ndá ndáchro chꞌin Jesús:
―Kja̱xin janhan tso̱xrja̱nkahya nkexro kjuajon kjuachaxin kixin xi̱kaha itꞌa̱.
Currently Selected:
Marcos 11: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
