Marcos 10
10
Chrónka Jesús kixin chrókjuáke̱ehya kícho sin
(Mt. 19:1-12; Lc. 16:18)
1Chꞌin Jesús kꞌuaxrjexín Capernaum la sákjuí chꞌan Judea la ko ti chjasin siín tóhe nda̱río Jordán. Ndá nchónhña chojni kónkotsé sin ti itjen chꞌan. Ndá kjuankíxin kjuako chꞌan éxi kuéhen chꞌan. 2Ndá iso sin fariseo kóchjina, la kjuanchankí sin kixin tjinkaon sin chrókjua̱cha̱xi̱n sin chꞌan, la ndáchro sin:
―¿Siín kjuachaxin tsáke̱he̱ ijnko chojni ti ichjién ní?
3Ndá chꞌin Jesús kjuáte̱he, ndáchro:
―¿Nkehe kꞌue̱tua̱han Moisés?
4 #
Dt. 24:1-4; Mt. 5:31. *Ndá ndáchro sin:
―Moisés kjuajon kjuachaxin kixin tsꞌóna ijnko xroon tsákja ti chojnichjin ndá jína tsíto̱he kícho sin.
5Ndá chꞌin Jesús, ndáchro:
―Jahara la icha a̱sánra, titekákonhñara, mé xi̱kaha kꞌue̱to̱an Moisés tsꞌóna ti xroon a. 6#Gn. 1:27; 5:2.*Kjánchó ti xránkíxixín ti ó kjuíchꞌéna Díos kaín nkehe la kjuíchꞌéna chꞌan ijnko chojnindoa la ko ijnko chojnichjin. 7#Gn. 2:24.*Méxra̱ ti chojnindoa la tsíto̱he ti itꞌé la ko ìñé la tsákja ti ichjién 8la yóí sin tsꞌóna sin éxi nkoko̱a chojni. Méxra̱ í jehya yaá chojni. Náhí, nkoko̱a chojni. 9Méxra̱ ti nkexro kónkojiéxin Díos, la chrókꞌuíto̱ehya kícho sin.
10Ndá ti ó kjan sin nchia la ti sin kꞌuájiko chꞌan mé kjuanchankí sin kuènté tíha. 11#Mt. 5:32; 1Co. 7:10, 11.*Ndá chꞌin Jesús ndáchro:
―Ti nkojín nkexro tsjáke̱he̱ ichjién ndá tsákja íjnko ichjin la tsjasihin chꞌan ijie̱. 12La kja̱xin ti jnko chojnichjin tsjáke̱he̱ ti xìi, ndá tsákja íjnko chojnindoa la kja̱xin tjan tjasin tjan ijie̱.
Chꞌin Jesús kjuíncheñao xjan
(Mt. 19:13-15; Lc. 18:15-17)
13Ndá kjui̱ka̱o sin xje̱en sin kixin tsjakꞌetja itja chꞌin Jesús. Ndá ti sin kꞌuájiko chꞌan mé kónínkakohen sin ti sin kjui̱ka̱o ti ixjan. 14Ndá ti ó kꞌuíkon chꞌin Jesús la kónínkaon chꞌan, ndáchro chꞌan:
Ti̱to̱héra ti xjan tsoxrakoa ti itjén, la tꞌínka̱kuénhñara xjan kixin ti kjuachaxin kuènté Díos mé tóyóhe̱ ti nkexro tꞌóna éxi ti xjan i. 15#Mt. 18:3.*Chaxín ndáxrja̱n kixin ti nkexro tsꞌónahña éxi ijnko xjan la xitjahya tsꞌixehen sin ti tsꞌe̱to̱an Díos.
16Ndá kjóa chꞌan ti ixjan la kjuakꞌetja tja chꞌan la kjuíncheñao chꞌan xjan.
Ijnko ndasoá rico nixje̱he̱ ti chꞌin Jesús
(Mt. 19:16-30; Lc. 18:18-30)
17A̱ndá ti ó sákjuí chꞌin Jesús la tinká ijnko nkexro, kóchjina, kjuákꞌexín tochꞌin nkayakon chꞌin Jesús, la ndáchro:
―Jaha, Maestro jína, ¿nkexrín chrókjuíchꞌeni ndá chrókꞌuitjani ti kjuachón nkochríxín?
18Ndá chꞌin Jesús ndáchro:
―¿Nkekuènté ndáchrua kixin jína janhan? Jehó nkoko̱a nkexro mé jína; tíha la Díos. 19#Ex. 20:13; Dt. 5:17; Ex. 20:14; Dt. 5:18; Ex. 20:15; Dt. 5:19; Ex. 20:16; Dt. 5:20; Ex. 20:12; Dt. 5:16.*Jaha ó noha nkehe kꞌue̱to̱an Díos: “Chrokjuacheéhya kichua, chrókꞌoñáhña chojni, Chrókueéhya la ko chrókjóntahya kichua la ko chrókjui̱chꞌiahya la ko chróchontehé kjuasàya itꞌá la ko ìná.”
20Ndá kjuáte̱he ti nkexro a, ndáchro:
―Maestro, kaín tíha la kjuínchexiteyáni ndesi kꞌuánkíni.
21Ndá chꞌin Jesús komá ti nkexro a la kui̱konoéhe̱ chꞌan. Ndá ndáchro chꞌan:
―Na̱xa̱ tꞌitjáña jnko nkehe si̱chꞌe. Sátjia, nchekjia kaín ti nkehe chonta. A̱ndá ti chichaon si̱nchekjixián ti nkehe chonta la ncheki̱to̱nhén ti sin nóa, ndá ti nkehe tjete la tsochonta nkaya nka̱jní. A̱ndá ti ó tsjixin la chréhé ti janhan ―ichro chꞌin Jesús.
22Ndá ti ó kuíhin chꞌan xi̱kaha, la nóaxi̱n kjuákꞌe chꞌan sákjuí chꞌan kixin imá itsjé nkehe tjete chónta chꞌan.
23Ndá chꞌin Jesús komá ti sin tjejó ntiha, la ndáche chꞌan ti sin kꞌuájiko chꞌan:
―Imá ixra̱ tsꞌixehen ti tꞌe̱to̱an Díos ijnko nkexro chónta nchónhña nkehe tjete ―ichro chꞌan.
24Ndá tóxakohen ti sin kꞌuájiko chꞌan kixin xi̱kaha ichro chꞌan. Ndá ínaá ndáchro chꞌan:
―Ti sin jehó tjeyá ti nkehe tjete tsochónta la imá ixra̱ tsꞌixehen sin ti tꞌe̱to̱an Díos. 25A̱ntsí xra̱hya chrókꞌuatsínka ijnko kokamello ti tjexrja tja̱rꞌin ntachika, ke ijnko nkexro chónta itsjé nkehe tjete chrókꞌuixehen ti tꞌe̱to̱axín Díos ―ichro chꞌin Jesús.
26Ndá ti ó kuíhin sin xi̱kaha, la a̱ntsí kóxakohen sin. Ndá kjuanchankíhi kícho sin:
―Ti xi̱kaha la, ¿xá nkexro tsjacha tsaá? ―ichro sin.
27Ndá chꞌin Jesús komá ti jehe sin, la ndáchro:
―Chojni la tsjachahya sinchexiteyá tíha, kjánchó Díos la jína sichꞌe kaín nkehe, kixin Díos la kohya nkehe imá ixra̱.
28Ndá chꞌin Pedro ndáchro:
―Ìnchéni, jeheni kuíto̱heni kaín nkehe chóntani, ndá chréhe̱ni ti jaha.
29Ndá kjuáte̱he chꞌin Jesús, ndáchro:
―Chaxín ndáxrja̱n kixin ti nkexro tsíto̱he ndo̱e, o̱ kícho ndoa o̱ ichjin, o̱ itꞌé o̱ ìñé o̱ ichjién o̱ xje̱en o̱ no̱nte̱e kixin tsochréhe̱ ti janhan la ko ti itan tsjajon kjuachón, 30la ntihi chjasintajni mé tsꞌáyéhe̱ sin ciento vece ndo̱e sin, kícho sin, ìñé sin, xje̱en sin la ko no̱nte̱e sin. Kjónté tsjasóte sin ntihi chjasintajni la chrꞌéxi̱n tsochónta sin ti kjuachón nkochríxín. 31#Mt. 20:16; Lc. 13:30.*Kjánchó itsjé ti sin imá tjetoan ijie la ti ña̱o a la kanhñó tsotjetoan sin. A̱ndá itsjé ti sin kanhñó tjetoan ijie, la ti ña̱o a la tsꞌóna sin ijnko nkexro imá tjetoan.
Chrónka chꞌin Jesús kixin itsꞌen
(Mt. 20:17-19; Lc. 18:31-34)
32Ndá tjejótji sin, chrìin sin ti nti̱a sátsji̱ Jerusalén. Ndá chꞌin Jesús mé tjetaón nti̱a, la ti sin kꞌuájiko chꞌan mé tóxakohen sin chrakon sin chréhe̱ sin. Ndá kꞌuéye̱he̱ chꞌan jehó ti teyó sin, ndá kjuankíxin chenka chꞌan sin nkehe tso̱hen chꞌan. 33La ndáchro chꞌan:
―Ijie sátsji̱ni Jerusalén la ti Xje̱en Díos kꞌóna Chojni mé tsotsé sin, tsjikéhen sin ti sin ncha̱tꞌá tꞌe̱to̱an la ko ti sin tjako ley. Ndá tsꞌe̱to̱an sin kixin itsꞌen chꞌan la ko sinchekꞌayéhe̱ sin chꞌan ti sin jehya judío sinchekjasóte sin chꞌan. 34Tsjanoá sin chꞌan la ko tsi̱ki̱te sin nda̱té sin la ko tsjate sin, ndá tsꞌóñá sin chꞌan, kjánchó ti níxin ña̱o mé tsoxechón chꞌan ínaá.
Ti nkehe kjuanchia Jacobo ko Juan
(Mt. 20:20-28)
35A̱ndá chꞌin Jacobo la ko Juan, xje̱en Zebedeo mé kóchjinehe sin Jesús la ndáchro sin:
―Maestro, tjinkaoni tsjánjua ti nkehe tjanchiani ―ichro sin.
36Ndá kjuanchankí chꞌin Jesús ndáchro:
―¿Xá nkehe tjinkáonra?
37Ndá ndáchro sin:
―Ti ó tsétua̱nxián ti kjuachaxin ijié kuèntá la chrókjuánjua kjuachaxin kixin ijnkoni la chrókꞌuakꞌetja̱xi̱ni ti itjá chjina, la ti íjnkoni ti itjá ikjon.
38 #
Lc. 12:50. *Ndá chꞌin Jesús ndáchro:
―Jahara la noahñara nkehe ti tjánchànara. ¿Á chrókjuachara chrókꞌuira ti nkehe itsjá itsꞌia ní la ko á chrókjuachara chrókuikitexínra éxi tsikite janhan ní? ―ichro chꞌan.
39Ndá jehe sin ndáchro sin:
―Tsjachani.
Ndá chꞌin Jesús ndáchro:
―Chaxín itsꞌira éxi ti nkehe itsjá itsꞌia la ko tsikitera éxi tsikite janhan. 40Kjánchó janhan la xitjahya tsjánjua kjuachaxin kixin ijnkora chrókjuakꞌera tjaná chjina la íjnkora chrókjuakꞌera tjaná ikjon kixin janhan la chontahya kjuachaxin tsjánjua tíha kixin ti sin a la ó xráxín kónoxín sin ―ichro chꞌan.
41A̱ndá ti ó kuíhin ti ite sin kixin xi̱kaha tsíndáchro ti sin a, ndá kjuankíxin kónínkakohen sin ti chꞌin Jacobo la ko Juan. 42#Lc. 22:25, 26.*Ndá kꞌuéye̱he̱ chꞌin Jesús kaín sin la ndáchro chꞌan:
―Ó nohara kixin ti sin tꞌe̱to̱an chjasintajni la imá tꞌe̱tue̱hen sin kaín chojni la ko ti sin imá tjetoan mé imá nchehnke sin kixin imá tꞌe̱to̱an sin. 43#Mt. 23:11; Mr. 9:35; Lc. 22:26.*Kjánchó jahara la xi̱kahña chrókjuáko̱xinra. Ti nkojinra tjinkáonra chrókuéto̱anra la ticháxi̱n sa̱o chrókjuínki̱tsara íso sin. 44Ti nkojinra tjinkáonra a̱ntsí chrókuéto̱anra, la ticháxi̱n sa̱o chrókjui̱chꞌehéra ixra̱ ti kichuara. 45Kixin ti Xje̱en Díos kꞌóna Chojni mé kuihya kixin chrókjuichꞌehe chojni ixra̱ ti jehe chꞌan. Ikui chꞌan kixin sichꞌe chꞌan ixra̱ la ko tsꞌenyákohe̱n chꞌan nchónhña chojni kixin tsaá sin.
Chꞌin Bartimeo kuito̱he jína
(Mt. 20:29-34; Lc. 18:35-43)
46Ndá kjuíji sin chjasin Jericó. Ndá chꞌin Jesús la ko ti sin kꞌuájiko chꞌan la ko nchónhña chojni kꞌuaxrjexín sin ti chjasin a. Ndá ntiha itjen ijnko nkexro tꞌikonhña itꞌin Bartimeo, xje̱en chꞌin Timeo. Mé tjetja̱xi̱n chꞌan chrínta nti̱a, tjanchakꞌá chꞌan. 47Ndá ti ó kuíhin chꞌan kixin Jesús tsíkji̱xi̱n Nazaret ó kuichjina, la kjuankíxin kꞌóyako chꞌan ndáchro chꞌan:
―Jesús, tsíkꞌaxrjeníxian David, ti̱konoéhéni.
48La itsjé chojni kꞌue̱tue̱hen sin chꞌan kixin tsotání chꞌan. Kjánchó ícha a̱ntsí itsen kꞌuéya chꞌan ndáchro chꞌan:
―Xje̱en David, ti̱konoéhéni.
49Ndá ntahó kjuákꞌe chꞌin Jesús. La kꞌue̱to̱an chꞌan:
―Tꞌéye̱héra ti nkexro a ―ichro chꞌan.
Ndá kꞌuéye̱he̱ sin ti nkexro tꞌikonhña la ndáchro sin:
―Tócháha̱ la tꞌínkatjen kixin tjetꞌèya chꞌan.
50Ndá ikꞌue chꞌan ti ika tꞌitsáte chꞌan, la kꞌuínkatjen chꞌan, kóchjinehe chꞌan ti chꞌin Jesús. 51Ndá chꞌin Jesús kjuanchankí, ndáchro:
―¿Xá nkehe tjinkaoan chrókjui̱tꞌaha?
Ndá kjuáte̱he ti nkexro tꞌikonhña ndáchro:
―Maestro, tjinkaoni chrókꞌuíkoni.
52Ndá chꞌin Jesús ndáchro:
―Ijie la jína sátjia. Ti kuitekaoan la kuíto̱axián jína.
Ndá ti nkexro tꞌikonhña la tuénxín kꞌuíkon, la chréhe̱ chꞌan ti chꞌin Jesús.
Currently Selected:
Marcos 10: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
