Marcos 9

1Kja̱xin ndáchro chꞌan:

―Chaxín ndáxrja̱n kixin isora tjejora ntihi la na̱xa̱ tsꞌenhñara tsꞌikonjñara itsi ti kjuachaxin tsꞌe̱to̱an Díos.

Kꞌuíxitoxi̱n nkexrín tsjehe chꞌin Jesús

(Mt. 17:1-13; Lc. 9:28-36)

2 # 2Pe. 1:17, 18. *Ndá kꞌuatsínka injon ña̱o, la chꞌin Jesús sákjui̱ko chꞌin Pedro, Jacobo la ko chꞌin Juan ijnko ijna̱ noi, la ntiha kꞌuíkon sin kixin kꞌuíxitoxi̱n tsjehe chꞌin Jesús. 3Ti iké chꞌan la imá kótjaki̱ni la ko imá tjóá éxi chrintá tsjehe, la kohya nkojín nkehe ntihi chjasintajni chrókjuinchetjóá ti ika kixin chrókuíto̱he xi̱kaha. 4La kꞌuíkon sin ntiha itjen chꞌin Elías la ko Moisés tjejótjo sin chꞌin Jesús. 5Ndá Pedro ndáche ti chꞌin Jesús:

―Maestro, jína kixin tjejóni ntihi. Sichꞌénani iyꞌá itsꞌuan; ijnko kuèntá, ijnko kuènté Moisés la ko ijnko kuènté Elías.

6Mé xi̱kaha ichro chꞌan kixin kaín sin imá chrakon sin la í noehña sin nkehe tsixro sin. 7#Mt. 3:17; Mr. 1:11; Lc. 3:22.*Ndá ikui ijnko itji̱ kjuejóyakjan sin. La chríkjan ti itji̱ mé kuíhin sin itén ijnko nkexro, ndáchro:

―Tíhi mé xja̱na, imá tjua̱ha̱. Tihínra ti nkehe tsjako chꞌan.

8Ndá ti ó tsjehe sin nkuíxín ti tjejó sin la í kohya ninkexró. Jehó chꞌin Jesús itjen.

9Ndá ti ó kꞌuínkaji̱nxi̱n sin ti ijna̱, la kꞌue̱to̱an chꞌin Jesús kixin ninkexró tsochenkahya sin ti nkehe kꞌuíkon sin hasta tsoxechónjña ti Xje̱en Díos kꞌóna Chojni. 10Ndá ninkexró chénkahya sin ti nkehe kꞌuíkon sin la jehó sin mé tjejótjo sin kixin nkehe tꞌaxrjexín ti nkehe chrónka chꞌan kixin tsoxechón chꞌan ínaá. 11#Mal. 4:5; Mt. 11:14.*Ndá kjuanchankíhi sin chꞌin Jesús, ndáchro sin:

―¿Nkekuènté ndáchro ti sin tjako ley kixin ticháxi̱n itsi chꞌin Elías sa̱o? ―ichro sin.

12Ndá ndáchro chꞌin Jesús:

―Chaxín sa̱oxín itsi chꞌin Elías, tsjasiyóxin kaín nkehe. ¿A̱ndá nkehe ndáchro xroon itén Díos kixin nkehe tso̱hen ti Xje̱en Díos kꞌóna Chojni? Ndáchro kixin ticháxi̱n tsjasóte chꞌan la ko tsjikosáyehya chojni ti jehe chꞌan. 13Kjánchó ndáxrja̱n kixin Elías la ó ikui, la kjuínchekjasóte sin chꞌan éxi kóxríhi̱n sin, éxi nixja ti xroon itén Díos kixin xi̱kaha tso̱hen ―ichro chꞌin Jesús.

Ijnko xjan chónta ncha̱kuén jínahña kuito̱he jína

(Mt. 17:14-21; Lc. 9:37-43)

14A̱ndá ti ó ikjan sin ti kuíto̱he íso ti sin kꞌuájiko chꞌan, la kꞌuíkon sin kixin nchónhña chojni tsíka̱ntatjen ti jehe sin, la kja̱xin ntiha tjejó iso ti sin tjako ley tjejótjo sin. 15Ndá ti ó kꞌuíkon sin chꞌin Jesús la kaín sin kóchéhe̱ sin, la tinká sin sákjuinixje̱he̱ sin chꞌan. 16Ndá jehe chꞌan kjuanchankí chꞌan, ndáchro chꞌan:

―¿Nkehe ti itjóra sin?

17Ndá ijnko sin tjenkákjan ntiha la ndáchro:

―Maestro, kjui̱ka̱oni ti xje̱eni chónta ncha̱kuén jínahña la xrokjuahya nixja. 18Ti ó tꞌixehen ti ncha̱kuén jínahña a̱sén chꞌan la tjáka nonte, la ko nda̱lóxrjo tꞌaxrjexín irꞌua chꞌan la ñetaón ñeno chꞌan, la í tjachahya chꞌan. Ndá xrja̱noáhá ti sin xriko̱a kixin chrókuakitsje sin ti ncha̱kuén jínahña, kjánchó kjuachahya sin.

19Ndá kjuáte̱he chꞌin Jesús, ndáchro:

―Jahara chojni chaxínhña titekaon Díos. ¿Xá hasta nkekja̱ín ña̱o tjinkáonra tsꞌejóni? ¿Xá hasta nkekja̱ín ña̱o tsjácha tsjakꞌe tsjákohára? Xrákoara ntihi ti xjan méhe̱.

20Ndá kóchjinako sin ti xjan. Ndá ti ncha̱kuén jínahña ti ó kꞌuíkon ti chꞌin Jesús la kjuínchekꞌaniáte ti xjan, la kꞌuitsínka nonte la tsénta inche la ko sítꞌaxrjexín nda̱lóxrjo ti irꞌua. 21Ndá chꞌin Jesús kjuanchankíhi ti itꞌé ti xjan, ndáchro:

―¿Ndesi nkesá xi̱kaha tóhen ti xjan í?

Ndá ndáchro ti itꞌé ti xjan:

―Ndesi xja̱ntsí chꞌan. 22La tji̱xón la ti ncha̱kuén jínahña mé tjáka̱te xjan xrohi la ko tjákankí xjan ìnta̱ kixin tjinkaon chrókꞌóñá ti xjan. Méxra̱ ti tsjacha sichꞌe nkojín nkehe la ti̱konoéhéni, tjinki̱tsani.

23Ndá chꞌin Jesús ndáchro:

―Ti tsitekaoan la kaín nkehe la jína tso̱hen, kixin ti nkexro titekaon Díos la jína tso̱hen kaín nkehe.

24Ndá ti itꞌé ti ixjan la itsen kjuáte̱he, ndáchro:

―Jeén titekaoni. Tsjinki̱tsani kixin a̱ntsí chrókuitekaoni ti jaha ―ichro chꞌan.

25Ndá ti ó kꞌuíkon chꞌin Jesús kixin itsjé chojni kóchjina la ndáche chꞌan ti ncha̱kuén jínahña:

―Jaha ncha̱kuén jínahña nchenixjahya chojni la ko nchekiénhña chojni. Ijie tétua̱nhan tꞌaxrjéxian ti xjan i la ko í kjanhña ínaá ―ichro chꞌan.

26Ndá ti ncha̱kuén jínahña mé kꞌóyako la ko kjuínchekꞌaniáte ti xjan, ndá kꞌuaxrje. La éxi kꞌuén ti ixjan kuíto̱he la itsjé chojni ndáchro kixin ó kjuixin ikꞌuén xjan. 27Kjánchó chꞌin Jesús itsé itja ti ixjan, la kjuínchekꞌinkatjen chꞌan.

28Ndá ti ó kꞌuíxehen chꞌin Jesús jnko nchia, la ti sin kꞌuájiko chꞌan mé kjuanchankí sin ndáchro sin:

―¿Nkekuènté kixin jeheni la kjuachahyani kuakitsjeni ti ncha̱kuén jínahña?

29Ndá chꞌin Jesús ndáchro chꞌan:

―Ticháxi̱n nchónhña tsochronoéhéra Tꞌaná la ko sintehyara ndá jína tsakítsjera ti ncha̱kuén jínahña ―ichro chꞌan.

Chꞌin Jesús chrónka ínaá kixin itsꞌen

(Mt. 17:22-23; Lc. 9:43-45)

30Ndá ti ó sákjuixin sin ntiha la kꞌuatsínka sin Galilea. Kjánchó chꞌin Jesús la tjinkakonhña kixin tso̱nohe chojni kixin ntiha itjen chꞌan 31kixin tjetja̱ko̱he̱ chꞌan ti sin kꞌuájiko chꞌan, ndáchro chꞌan:

―Ti Xje̱en Díos kꞌóna Chojni mé tsotsé sin la ko tsjikaán sin ti tjejó ti sin tꞌe̱to̱an la ko tsꞌóñá sin chꞌan, kjánchó ti ña̱o níxin la tsoxechón chꞌan ínaá ―ichro chꞌan.

32Kjánchó jehe sin la kienxínhña sin ti nkehe ndáchro chꞌan la chrakon sin chrókjuanchankíhi sin chꞌan nkehe tꞌaxrjexín tíha.

¿Nkexro ti imá tjetoan?

(Mt. 18:1-5; Lc. 9:46-48)

33Ndá ti kjuíji sin Capernaum, ti ó tjejó sin nchia la chꞌin Jesús kjuanchankí chꞌan ndáchro chꞌan:

―¿Nkehe tinkakjóra kichuara ti ikuini nti̱a?

34 # Lc. 22:24. *Kjánchó jehe sin la táníkoá sin kixin ti ikui sin nti̱a la nkákjo kícho sin kixin nkexro ti a̱ntsí tjetoan. 35#Mt. 20:26, 27; 23:11; Mr. 10:43, 44; Lc. 22:26.*Ndá chꞌin Jesús kjuákꞌetja̱xi̱n la kꞌuéye̱he̱ ti teyó sin kꞌuájiko, la ndáchro:

―Ti nkojinra tjinkáonra tsꞌónara jnko nkexro tjetoan la ticháxi̱n si̱nchentsíra a̱sánra, la ko tsjínki̱tsara ti íso chojni ―ichro chꞌan.

36Ndá kꞌuéye̱he̱ chꞌan jnko xjan la kjuákꞌe chꞌan nko̱siñe ti tjejó sin, ndá kjóa chꞌan ti ixjan la ndáchro chꞌan:

37 # Mt. 10:40; Lc. 10:16; Jn. 13:20. *―Ti nkojín nkexro tjinki̱tsa ijnko ixjan éxi tíhi kixin tinkáchónki sin ti janhan la tjinki̱tsa sin ti janhan la ko ti nkexro ichrꞌán ti janhan ―ichro chꞌan.

Ti nkexro nínkakonhña la tjinki̱tsa ti jeheni

(Lc. 9:49-50; Mt. 10:42)

38Chꞌin Juan ndáchro:

―Maestro, kꞌuíkoni ijnko nkexro mé kjuachaxin ihni̱á kuakitsjexín chꞌan ncha̱kuén jínahña chónta chojni. Ndá kꞌue̱tue̱heni chꞌan kixin xi̱kahña sichꞌe chꞌan kixin xrikohyani chꞌan, ichroni.

39Ndá ndáchro chꞌin Jesús:

―Tito̱hé chꞌan kixin ninkexró tjasixín kjuaxroan kjuachaxin ni̱ná, chrókꞌuándaxínhi̱n ti janhan. 40#Mt. 12:30; Lc. 11:23.*Kixin ti nkexro nínkakuenhñani la tjinki̱tsa ti jeheni. 41#Mt. 10:42.*A̱ndá ti nkojín nkexro tsjajonxin ni̱ná kjónté jnko vaso ìnta̱ kixin tinkachónkira Cristo, la chaxín ndáxrja̱n kixin tsꞌáyéhe̱ sin ti nkehe jína.

Ti nkehe tsꞌitsínkaxín chojni

(Mt. 18:6-9; Lc. 17:1-2)

42’Ti nkojín nkexro tsjachròe ijnko ixjan tinkáchónki ti janhan kixin tsjasin sin ijie̱, la ícha jína chrókjuincheteyá sin ti nkexro a ijnko xro̱chre̱ la chrókꞌue̱nkí sin nda̱ñao. 43#Mt. 5:30.*Ti itjá tjásixián ijie̱ la ícha jína chrókóchrínjña, kixin kjónté nkoko̱a itjá chróchónta la chróchonta ti kjuachón nkochríxín, ke chróchónta yóí itjá ndá sáchrokjia ti siín xrohi, 44ti siín kosi̱nto̱ tꞌenhña la ko síche xrohi nkochríxín tsꞌankahya. 45Ti to̱tá tjásixián ijie̱ la ícha jína chrókóchrínjña kixin chróchónta ti kjuachón nkochríxín, kjónté nkoko̱a to̱tá, ke chróchónta yóí to̱tá ndá sáchrokjia ti síche xrohi, 46ti siín kosi̱nto̱ tꞌenhña la ko síche xrohi nkochríxín tsꞌankahya. 47#Mt. 5:29.*A̱ndá ti ikuan tjásixián ijie̱ la ícha jína chrókuakitsjenkiá kixin chróchónta ti kjuachón nkochríxín, kjónté nkoko̱a ikuan, ke chróchónta yóí ikuan ndá sáchrokjia ti síche xrohi, 48#Is. 66:24.*ti siín kosi̱nto̱ tꞌenhña la ko siín xrohi nkochríxín tsꞌankahya.

49’Kixin kaín chojni ticháxi̱n tsꞌatsínkaxín ti xrohi. 50#Mt. 5:13; Lc. 14:34, 35.*Ti xíjnta la jína. A̱ndá ti chrókuankehe ti xíjnta la í xitjahya chrókóxíjnta ínaá. Méxra̱ chrókꞌónara éxi ti xíjnta, la kjuaxróxin chrókꞌuejoko̱ara kichuara.

Currently Selected:

Marcos 9: poeNTplus

Highlight

Copy